النفايات وغرف العناية

شيئان مهمان ما فتئ الأعزاء القراء يسالون عنهما .. غرف العناية المركزة و مسألة (النفايات) نبدأ أولاً حسب التسلسل الزمني بغرف العناية المكثفة للأطفال والي تبناها شباب شارع الحوادث.
لأن التبرع والمساهمات الخارجية من أخواننا وأبنائنا المغتربين تمثل الركيزة الأساسية في الموضوع فكان يجب حل إشكالية فتح حساب بالعملة الحرة في احد البنوك وقد ظل العبد لله في مشاوير مكوكية بين رئاسات البنوك المختلفة وقام بمقابلة عدد مقدر من مديريها ولكن كل الطرق كانت مغلقة وغير مقنعة . لذلك العبد لله يري أن يقوم الإخوة المغتربين كل في البلد المغترب فيه بتكوين لجنة صغيرة مهمتها جمع المساهمات وشراء غرفة واحدة مكتملة الأجهزة وشحنها لنا لنقوم بتخليصها من (براثن) الجمارك !
يعني ناس السعودية غرفة وناس الكويت غرفة وناس الامارات غرفة وناس البحربن غرفة وناس قطر غرفة وناس عمان غرفة ديل (سته غرف) .. المسالة في إعتقادي ما صعبة وممكن الأندية والجاليات تقوم بالمهمة دي خير قيام (وللا شنو) ؟
بالنسبة للمساهمات الداخلية فإنتو طبعن عارفين الحالة البطالة وربع البصل الحصل 33 الف والحاجات التانية عشان كده بلغت في مجملها حوالي 20 ألف (مليون بالقديم) وده تم عن طريق تخصيص شريحتين لتحويل الرصيد تم تسليمهما والإشراف عليهما بواسطة (شباب شارع الحوادث) .. المبلغ مع شباب الحوادث ولم يتم التصرف فيهو وأعتقد حقو نخليهم يسددوا منو للصيدليات ويخلو منو لو جاتهم حالات محتاجة صرف .
طيب نجي لموضوع النفايات .. كما تعلمون أعزائي ان الجلسة الثانية لم ندخلها نسبة لإعتقالنا بواسطة جهاز الأمن (من حرم المحكمة) .. المفترض طبعا في خالة عدم مثول المتهم أمام المحكمة دون إذن بذلك ان يتم أستصدار امر قبض من القاضي المختص أو على الأقل أمر تكليف بالحضور .. ولأنو عاوزين يكتلو المساله فإن ذلك لم يحدث مما دعاني للذهاب للمحكمة (مرتين) لتحديد جلسة أخري غير أن المسالة كانت غير متاحة
لعدم تواجد القاضي . ولأن العبدلله صحتو الايام دي (مش ولابد) فقد فكر بالإستعانة بأي من المحامين الذين كانو قد أبدوا إستعدادهم لتقديم العون القانوني عشان يمشوا المحكمة ويسكوا الموضوع ويحددو جلسة .. إلا أنه للأسف الشديد لم يفعلوا .. على الرغم من أن معظمهم أبدي إستعدادهم لتقديم دعوي في مواجهة هيئة نظافة الخرطوم لمخالفتها القانون بتحصيلها خارج أورنيك 15 (لو مشي المحكمة ما قدرو عليهو ح يرفعو دعوى إذاي) !!
المهم إنو العبدلله عاوز شوية كده حيلو يشيلو ويمشي المحكمة عشان يحدد جلسة ولو في محامي بيقرأ في كلامي ده وممكن (يساعد) يكون كويس وينالو ثواب من الله وممكن يرسل ليا لمده بالتفاصيل على الإيميل بتاعي faith.jabra@gmail.com
هذا ما لزم توضيحة ودعواتكم لنا بالشفاء …

كسرة ثابتة (قديمة):
أخبار ملف خط هيثرو العند النائب العام شنو(وووو وووو وووو وووو)؟

كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟

36 تعليق

  1. كفارة ليك يا دعفة والنفايات ملحوقة ان شاء الله

  2. با استاذ اخد ليك اجازه وخليك من النفايات والهنايات – العمر مش بعزقة ولا شنو؟ الليلة الحوش مالو فاضي كدة وينك يا جنوبي

    1. انت في جنوبي وين ولآ في البروف الداير المحامين يمشوا
      المحكمة ده ! يقول ليك ضرب امه بالهناي اب راسين البيكسرو
      بيهو راس السكر في عضم الشيطان ! طيب حيضرب المحامين
      بي شنو ؟ و وين ؟
      غايتو يا بروف بس احمد ربك العندك مريدين قدر مريدين البرعي
      البيصحوا من الصباح ويفتحوا مواقعك يطمنوا عليك ..

  3. حبيبنا البروف العزيز ،،
    لا يسعني إلا ان ادعو لك واقول اللهم خذ بيده اللهم احرسه بعينيك التى لا تنام .
    و اكفه بركنك الذى لا يرام و احفظه بعزك الذى لا يُضام .و اكلأه فى الليل و فى النهار .
    و ارحمه بقدرتك عليه ّ.أنت ثقته و رجائه يا كاشف الهم . يا مُفرج الكرب يا مُجيب دعوة المضطرين
    اللهم البسه ثوب الصحة والعافية عاجلا غير اجلا ياأرحم الراحمين..
    اللهم اشفه اللهم اشفه اللهم اشفه..
    اللهم امين
    ويا شمباتي إنت أدعو على الجماعة ، سمعت قالو دعوتك مستجابة

    1. اللهم آمييين وانت الشافي المعافي ..
      المندهش ! فعلا شمباتي ما علي قدر كده في( للـ ) لاكين في
      ( علي ) امانه ما شاطر خلاص ..

      1. ههههههههههههههاااى,,جنوبى يا حاقد !
        فى الاولى انا مية مية لكن فى التانية نس نس ! ونسك بالهناى !

        المندهش يا حبيب ..
        اسال الله ان يطمس ابصارهم وان يجعل كيدهم فى نحرهم ودبرهم خيرا من وجوههم , وان يشغلهم فى انفسهم ويخلصنا من شرهم بانتقام عزيز مقتدر ,, انه ولى ذلك والقادر عليه …

      2. دعوة المظلوم ليس بينها وبين الله حجاب غلبان

    2. اللهم اميين ,, ربنا يشافيك و يعافيك و يواليك بالصحة و العافية دايما يارب ,, اجر و عافية و كفارة يا بروف ,, فى ميزان حسناتك ان شاء الله

  4. الله يكون فى العون يا بروف

  5. سلامتك يابروف وألف ألف ألف لابأس عليك وسلامتك ومدني كلها كرامتك ودعواتنا ليك بالشفاء إنشاءالله يارب

  6. الله يتم ليك الشفاء العاجل ببركته القادر لترجع لى كل محبينك …. اللهم أنت الشافى النعافى أشفى كل مريض

  7. بخصوص غرفة العناية انا من ناس السعودية وبرشح
    اخونا د. شمباتي . وحسب معرفتي انو عندو تواصل مع شباب
    الحوادث وبعض المنظمات البتقدم خدمات زي دي .. وبرضو هو
    طبيب وبرضو بيعرف معظمنا هنا والاهم من ده كلو انو بيحمل
    التكفت والتفاف وجضومو عراااض ..

    1. هههههههههههههههههههه,قل هو الله احد !
      بلاقيك يا جبان….

      1. هههههه والله شوق يا شمباتي ..
        ونلاقيك ونقول ان شاء الله نتفرّق
        وكان قبلنا منك غادي .. لشوفتك بنتحرّق

      2. الحبيب جنوبى..
        طيب مااا تجى ؟؟ اححححححح

    2. هههههههههههه ,, الله يجازى محنك يا جنوبى ,, و الله ضحكتنى و انا لى زماااان ما ضحكتا…

    3. انا اثنيك يا جنوبي اب جضوم ولا اب حلقوم

  8. الف لا باس عليك يا حبيب ,,
    والجاتك جاتك من الارض ما جاتك من تالا السما !

    1. الاخ شمباتى لك التحيه …. اذا تطورت فكره دعم شباب الحوادث فارجو قبول مساهمتى معكم انا فى جده
      اخوك عباس التجانى 0503605875

  9. سلامتك يا بروف وربنا يجعله اجر وعافية ….. زكاة الجسم….
    يا اخوانا الفوق افرحوا ساي احنا بقينا (ساري الليل) عشان كدا برطعو ساي لغاية ما نرجع …. تاني تشموها قدحه
    وطني يا فردة جناحي التاني وقت الناس تطير لعالما
    يا حنوبي الجنة تحت اقدام المهات …. انت (عارف) قدر ما يمشي ليها زيارة في (كوبر) بتوصيهو ( عليك الله ما تسأل عبدو ده لو سألتو انا ما عافية منك) …اهو واحد متعوس وواحد خايب رجا …… ارجو الجاييكم
    انا وقتفت الـ ال ام وبطلت

  10. الف لا باس عليك بروف لكن موضوع النفيات ده انسا لانو مافي زول تاني بجيك

  11. الفاتح سلامتك وانشالله كفاره..

    يا جماعه انتو الحاصل شنو في الدنيا،مدير مزور وفساد شديد ومطرب مقبوض في جريمه اخلاقيه وحاجات تطمم وتطرش وحسه بقرا في احدي الصحف قريت الخبر التالي
    03-28-2013 02:56 PM

    تمكنت شرطة ولاية شمال كردفان من إلقاء القبض على إمام مسجد أثناء محاولته السرقة حيث كان المتهم يستقل موتور ووجد بحوزته ” مسدس وساطور وماسورة ” .

    ويذكر في تفاصيل هذه الحادثة عندما إشتبهت الشرطة في المتهم أثناء الطوف الليلي وبعد ذلك تمت مطاردته وتمكنت من القبض عله وكشف هويته حيث أنه يعمل إمام مسجد في نفس المنطقة التي تنفذ فيها السرقات وبعد إلقاء القبض عليه وتحريز المعروضات التي كانت بحوزته تم التحري معه وأفاد بأنه يقوم بتنفيذ تلك السرقات منذ عامين وبعد تفتيش منزله وجدت الشرطة عددا كبيرا من المعروضات من بينها أجهزة كهربائية وأدوات منزلية ومصوغات ذهبية تقدر بمبلغ 55 ألف جنيه حيث أن جميع المعروضات تم التبليغ عنها بسرقتها وقد تعرف أصحاب المسروقات عليها وبعد إكتمال التحريات تم فتح بلاغ بقسم شرطة الشرقي بالأبيض تحت المادة 174 حيث مازالت الشرطة تباشر تحرياتها حتى يتم تقديم المتهم للمحاكمة .

    1. مسدس وساطور وماسورة وموتر امام هيبز دا

    2. تصدق يا عبيد نحنا عندنا امام كان بيصلي بينا
      سنين ودنين وصلينا وراه ما صلينا وفي الآخر
      اكتشفنا انو ( جنس تالت ) طبعا بعد كِبر بقي يقابض..
      وسبحان الله نحنا نقول الزول ده كان بيطول الركوع
      ماااالو !! والعاده الناس بتطوّل السجود ..
      بس الحمد لله الزمن داك ما كان ظهر السستم لسه ..
      بالله لو زول قدم لكلية الشرطه او الكلية الحربيه او
      داير يشتغل في أي مصلحه يسألو عنه سؤال منكر
      ونكير لحدي جد جدو كان حزبه شنو ! وامامة المسجد
      لكل من هب ودب !

  12. خلي بالك كان قبل ما يبقي امام
    قطع شك كان بسرق الجزم

    ويعني لو ما كان قبضوا كان ح يبقي وزير الشئون الدينية والأوقاف
    وبعدين يعمل عقد مبايعه وان تو وان ويظبط ليك باقي الأوقاف اللي في مكه والمدينه

    إذا كان رب البيت بالدف ضارب فشيمه أهل البيت كلهم الرقص

    وا أبا حفصاه

    1. لا هو ما لحق يترقى بس كل الحكاية

  13. امام ما ععندوووووش ملف

    1. هههههههههههههههههه تتجازا يا دا ورينا العندو ملف منو

  14. الف لا بأس عليك يا بروف … وانت غالي عندنا مثلك مثل النيل وجامعة الخرطوم وأغاني الحقيبة … بعدين نشوف موضوع النفايات دي … شباب الحوادث وجه مشرق لإنسان بلادي … والمتبرعون من الداخل والخارج وجه مشرق آخر … فللجميع التحية والانحناء

  15. مرات اقول اديهوكلمة تزعلو (بشو) كتمت كتمت كتمت

  16. سلامات يابروف وكفارة ليك…… ونحن من على البعد نشد من عزمكم فى المساعدة لغرف العناية

  17. كفر الله سيئاتك وتسلم ياعمو

  18. سلامتك يا أستاذ وألف لا بأس عليك ونسأل الله أن يشفيك شفاءاً عاجل غير آجل شفاءاً لا يغادر سقما ، بخصوص بلاغ النفايات أكيد تانى ما فى حد ح يعلنك أو يستدعيك ، ومحاولتك وسعيك لتحريك الإجراءات وتحديد جلسة عمرها ما حصلت فى تاريخ البلاغات والمحاكمات ، أى ان يسعى المتهم لتحريك الإجراءات ، دايما المتهم حريص على وقف الإجراءات وتعطيل الجلسات وح تكون سابق لو إنك حركت الإجراءات . شفاك الله وعافاك وكفاك شر الأشرار ، وحسبك حسبى الله ونعم الوكيل.

  19. يا عم جبرة اظن ايميلك مكتوب غلط في المقال فوق، راجع أول كلمة قاصد بيها فيث وللا فاتح
    Faith or Fatih?

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: