الله يرحم حسن سينما

(حسن سينما) عليه رحمة الله كان من شخصيات بيت المال المشهورة وهو من أوائل من وضعو على محالهم يافطة (ترزي نسائي) وقد كان رحمه الله شخصية لطيفة ومحبوبه صادقته حيناً من الدهر في ثمانينات القرن الماضي وعرفت فيه معني (اللطافة) والذوق والتهذيب وكان من فرط تهذيبه له عبارة واحدة يرددها إذا إختلف مع شخص مهما كانت حدة الإختلاف إذ كان يقول له : (ياخ إنتا زول عديم إحساس) !!
تذكرت (حسن سينما) وأنا أقرا خبراً عن كشف المراجع العام لإعتداءآت علي المال العام بولاية سنار بلغت 318 مليون جنيه و314 جنيها، من جملة ميزانية الولاية والتي لاتقل عن 600 مليون جنيه !!
يعني القصة فاتت ذلك المثل الذي يقول (ادى العيش الى خبازو ولو ياكل نصو) والذي أصبح يحتاج إلى تعديل طفيف حتى يواكب (المشروع الحضاري) ليصبح بعد التعديل (ادى العيش الى خبازو ولو ياكل تلات ترباعو) !
طيب والـ 282 دي خالينها ليه؟ نظام (شفقة وحنية) على المواطنين وللا الفهم شنو؟!
طيب تعالو نشوف ماذا قال رئيس اللجنة الاقتصادية بالمجلس التشريعي بالولاية المنكوبة الأستاذ (يوسف محمد عثمان) :
قال سيادته واصفاً حجم هذه المخالفات بـ (القليلة) مقارنة بالميزانية الكلية للولاية ! يا حضرات القضاة والمستشارين ويا هيئة علماء السودان ويا اعضاء المجمع الفقهي .. ويا لجان الحسبة بالمجلس الوطني والمجلس الطبي والمجلس البلدي ومجلس الأمن ويا من تطالبون (الوزيرة) بغطاء الرأس … السيد رئيس اللجنة الإقتصادية بالمجلس التشريعي لولاية سنار بيقول 318 مليار جنيه حاجة بسيطة .. 318 مليار جنيه حاجة (بسيطة) في بلد تتوقف فيه ماكينات غسيل الكلي بسبب (كم مليون) فيخرج المرضي محتجين ليلقوا بأجسادهم الواهنة على ظلط شارع المستشفي .. الله يرحم حسن سينما !
ولم يكتف رئيس اللجنة الإقتصادية بالمجلس التشريعي لولاية سنار بتبسيط المسألة بالرغم من جسامتها وكارثيتها بل صرح بان الامر مقدور عليه .. تفتكروا مقدور عليهو ليه؟ يجيب سعادته : (لانها في النهاية اخطاء بشر) ؟ وهنا فليسمح لي السيد (يوسف محمد عثمان) أن اخالفه الراي إذ ان هذا النوع من (الهبر الجماعي) لا يمكن أن يقوم به بشر .. قول أبالسة … قول شياطين (كده ممكن) لأن هذه المسألة تستعصي على أكثر البشر (تدرباً وإحترافاً على اللصوصية) … يا اخي لو أن هذه الميزانية وضعت في العراء (يعني في السهلة) ليأخذ منها السابله (واللصوص) لتبقى منها أكثر من ذلك ! الله يرحم حسن سينما
نعم ليس هنالك من شخص في الدنيا أو جماعة تستطيع القيام بإختلاس اوتبديد أكثر من نصف ميزانية ولاية (او مقاطعة) وهذا رقم إن تم تسجيله في موسوعة جينيس لما تم كسره حتى يرث الله الأرض وما عليها !
أما تصريح سيادته بأن الأمر مقدور عليه فقد قمت بتركيب الفهامة علني أستطيع فهم مسالة (الأقتدار) دي لكن الفهامة لم تسعفني بل خاطبتني قائلة : عليك الله هو لو في إقتدار كان (صار) ما (صار) ؟
إلى هنا عزيزي القارئ المسألة بس محتاجه ليها شوية (إسعافات أولية) لكن لو (ركبتا راسك) وعايز تواصل المقال وتعرف خاتمة تصريح السيد رئيس اللجنة الإقتصادية بالمجلس التشريعي لولاية سنار فواحد من إتنين يا تبلع حبوبك وللا بعدين القصة ح تجيب ليها (عناية مكثفة ) وإحتمال (أحمد شرفي)
على طريقة (عارف وصيوان عرس البت) والتي تجعل من (مال المسلمين) وممتلكاتهم شأناً (خاصا) الزول يعمل فيهو (العاوزو) قال لا فض فوه (نحن مع التقويم وليس التجريم) … يعني سادة يا أفاضل بالعربي كده (لا بلاغات لا محاكم ولا يحزنون) .. تجريم أيه يا سعادتك هي الناس دي عملت (جريمة) وللا حاجة (وحشة) لا سمح الله .. هم شويتين مليارات من الميزانية .. الجماعة ديل بس شالو (النص وزيادة) وخلو (للمواطنين كوووولهم) الباقي (دي فيها حاجة؟) !!
العبدلله بيفتكر التقويم (برضو حلو) عشان كده بيقترح على (حكومة سنار) يقوموا كده يجمعوا الناس(اللهطت) القروش دي ويصلوا (المغرب) جماعة وبعد الصلاة يقولو ليهم .. يا جماعة كمان ما تبالغو .. 318 مليار حته واحدة؟ خلوها حلوة .. مية مليار .. ميتين هي الدنيا طارت ما الميزانيات الجايات أكتر من الرايحات !! الله يرحم حسن سينما !!

كسرة :
تقويم ايه الإنتا جاي تقول عليه؟ هو زول (القرآن) الذي يهدي إلى الرشد ماقومو في حاجة تانية في الدنيا ممكن تقومو … قومتو نفسنا معاكم !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

37 تعليق

  1. ود الضو القبض الجو | رد

    الرئيس عمر البشير قابل ابليس قال ليهو :
    يا اخو انا داير اعمل في الشعب حاجه تطلع زيتهم
    ابليس : مالو الشعب
    بشه: رفعت الأسعار والمواصلات والبنزين برضو عاملين رايحين يااخ
    ابليس : طيب جيب اضانك وخد الفكره دي وش وش وش
    بشه: يا ابليس م نافعة عاوذ حاجه قوية
    ابليس: طيب جيب اضانك دي وش وش وش
    بشه: ابليس انت بقيت كحيان ولا شنو؟
    يا ابليس اقول ليك ناوي اعمل فيهم شنو؟؟ جيب اضانك وش وش وش
    ابليس: لا لا حرام عليك يا بشه ياااخ …انت م بتخاف الله

    1. أستوقفنى تعليقك لانه ذكرنى بمقولة (زى المثل كدى) ايطالية بتقول ” النساء يعرفن أكثر من الشيطان قليلا” … بس بعد تعليقك أحرف المثل بالسودانى و أقول ” البشير يفسد أكثر من الشيطان نفسه” …. الله يديك العافية ” ود الضو القبض الجو”

      1. البشير براهوووووووووو

  2. الله يرحم نميري يا الفاتح ياخوي
    ويرحم باقي الشعب السوداني الفضل وما تنسي حسن سينما

    1. لا نحن لايام الحكم الشمولي ولك ابعاج كان صاح كان غلط كان بمشي كلامه يعني كان حاكم هسع كيف

  3. ياتري لو خير دكتور محمد عبدالحي (العوده الي سنار) سوف يعود مره اخري
    الليلة يستقبلنى أهلى :
    أرواح جدودى تخرج من
    فضَّة أحلام النّهر ، ومن
    ليل الأسماءْ
    تتقمص أجساد الأطفالْ.
    تنفخ فى رئةِ المدّاحِ
    وتضرب بالساعد
    عبر ذراع الطبّالْ.
    تغيرت سنار يا استاذنا محمد عبدالحي من بعدك و بعض حكامها لصوصا”

    1. عاد لاكين مابالغت عديل كدا يا ضُلنا وأقوليك شنو عاد،،،
      الواحد يختارك من دون الناس علشان أتواصل معاك لأنك هبشت سنار وديوان العودة لسنار وكنت مفتكرك مصادم لقيتك صدام حسين!!
      ومعليش يا صديقي أنا بسحب كلامي وإختياري الماكان بخياري ومشكور علي ردك لأني كنت حا أكون بزازي لي هسه بي هناك في إنتظارك…
      أنا كنت مفتكرك يا مندهش برااك لقيت قبيلة،،،
      هاكم النضال ده……

      1. تسلم سنار و اهل سنار و لا يمكن ان تذكر الا و عشاقها محمد عبدالحي في المقدمة و لصوصها نكره

      2. الشرك هبر يا هناي !؟ المره الجايه شرّك بالجراد اصلو
        القدالي بحب الجراد … زمان يا ودالخلا كنا بنشرك في
        الخلا غرب استاد المريخ محل العمارات الهسي ديل
        والقدالي كان بيعمل لينا حركتو ديك يرقد ليك جمب
        الشرك ويفرفر ونحنا نجي طايرين .. وفرررر يطير

      3. يا اخوي النضال عند اهلنا السلاح
        وانا هنا بتشارك افكار مع ناس من جوالي ما اكتر
        اما حكايه اخترتك يااااخ حسستني انو ح تديني بتك
        و يا عمنا مافي داعي تفك البنقويه في راسي و الدنيا لسه ضهر

  4. انا بديت اقتنع تماما انو البحصل في السودان دا نقتة دي ما حقيقة ، لانو في الواقع دا مابحصل واعتقد ان هنالك دراما تراجيدية باسم المنافقين في الارض يقوم بتمثيلها هؤلاء اعضاء المجالس التشريعية ورفع تلك الاعمال الدرامية لجهة ماء في هليود وبهذه الطريقة يكون الجماعة ديل قدموا اعظم عرض درامي على هذه البسيطة فلم خيال علمي اجتماعي ديني ( اللهط الديني والجهادي ) الذي لايستطيع الخواجات عمل تلك الاعمال الدرامية البارعة

    1. يعملوها كيف يا بت مدني هناك في قانون وشوف بالله بشري لكن هنا بيحكمونا انصاف الاله ومش عندنا حق نقول بغيم وكتمت

  5. لعنهم الله احياءا وامواتا ,,,

    1. يلعنن اكتر من انو يبقي للوالي حقهم وشو زي تربيزة
      اللحام !!

  6. البروف العزبز
    التقويم دا حيكون في ياتو إصلاحية ؟؟؟؟، اللهم قوم نَفَسّهم ، وإنّنا لنعلم يا رب أنّ لك يوماً تنتقم فيه من الظالم للمظلوم، ونتيقّن أنّ لك وقتاً تأخذ فيه من الغاصب للمغصوب، لأنّك ﻻ يسبقك معاند، ولا يخرج عن قبضتك أحد، ، ولكن ضعفنا ﻻ يبلغ بنا الصبر على أناتك وانتظار حلمك، فقدرتك يا ربنا فوق كلّ قدرة، وسلطانك غالب على كل سلطان، ومعاد كلّ أحد إليك وإن أمهلته، ورجوع كلّ ظالم إليك وإن أنظرته قد قلّ صبرنا وضاقت حيلتنا ، وانغلقت عليّنا المذاهب إلاّ إليك، وانسدّت عليّنا الجهات إلاّ جهتك، والتبست عليّنا أمورنا في دفع مكروهه عنّا، واشتبهت عليّنا الآراء في إزالة ظلمهم ، فرجعنا إليك يا مولانا صاغرين راغمين مستكينين عالماً أنّه ﻻ فرج إلاّ عندك، ولا خلاص لنا إلاّ بك، اللهم وعدك في نصرتنا ، وإجابة دعائنا ، فإنّك قلت وقولك الحق الذي ﻻ يردّ ولا يبدل: ( وَمَنْ عَاقَبَ بِمِثْلِ مَا عُوقِبَ بِهِ ثُمَّ بُغِيَ عَلَيْهِ لَيَنصُرَنَّهُ اللهُ ) وقلت جلّ جلالك وتقدّست أسماؤك: ( ادْعُونِي أَسْتَجِبْ لَكُمْ )، ونحن فاعلون ما أمرتنا به لا منّاً عليك، وكيف نمن به وأنت عليه دللتنا ، فاستجب لنا كما وعدتنا يا من ﻻ يخلف الميعاد.

  7. عااااااادي يا بروف
    دي ولاية سنار فماذا عن باقي الولايات؟
    وما خُفي من الفساد كان أدهى وأمرّ [إغتصاب – سرقات شيوخ – وإلخ وآآآآآآآخ]

  8. 318 مليون وعرفنا , كمان شنو الطفاسه الليهم في
    ال 314 جنيه !!؟
    خلاص الفات مات لاكين من السنة الجايه يبقوا ميزانية
    سنار 282 مليون .. وكان فدل سوي تواقي ..

    1. اصادف انو الوالي جارنا
      ولما بقي والي..بيتهم القديم كسرو
      و البيت الجديد لليوم ما انتهي..طين فوق طين و ين
      و اشتري كل الجناين ع بحر ابيض
      و البحر ذاتو كان في طريقه كان عملوا حقو
      اظرف حاجه صلاه العيد
      اجباري اكون هو الامام و الناس تقول جانا العيد و الخروف والوالي..لا حولا

  9. يــــــــــــــــــــا أستاذنا الفاضل نحن نستاهل أكثر من كدى ….. لان المثل المصرى بيقول: ….. ” يا فرعون أيش فرعنك يرد يقول … ما لقيتش حد يصدنى ” ….. بالله عليك أكتب خلى الناس تعرف أكثر و أكثر …. “الله يديك العافية … طوووول ما الدجاجة حافية”

  10. قولتا توجهيات منو الله يرحم حسين سنما

  11. التطهير واجب وطني وفي سنار ناس فرحات

  12. الله يرحم حسن سينما !!

  13. يابروف طمنا علي صحتك دي أهما حاجه

  14. سلامات يا استاذنا والله انا ما لاقية كلام اقولوا غير حسبى الله عليكم
    يا الكيزان وحقنا يأخدوا لينا ربنا منكم

  15. واحد من البلد ديييك | رد

    و الله العظيم أنا مش مصدق الكلام ده !!!

  16. اخونا الفاضل اهم حاجة طمنا على صحتك وخلى الكلام البفقع المرارة وارفع الضغط وازيد الكلسترول وممكن اشل عديل لكن اقول ليك كان سكتنا ولااتكلمنا نحن انتهينا خلاص امرنا لله ولاحول ولاقوة الابالله العلى العظيم

  17. الله يرحم حسن سينما

  18. ياجماعه ما تزعلوا دى كلها بس 47,462,686.57 دولار بى
    سعر السوق البنفسج.

  19. ياجماعة عاوزة أي رقم لشباب شارع الحوادث ضروري

    1. بت مدنى ..سلام….
      ممكن تدخلى صفحتهم فى الفيسبوك او صفحة (صدقات) وبتلقى ارقام تواصل او تراسليهم عبر الرسائل الخاصة ….

  20. التقويم يعني الزجر ،، كل واحد سارق ليه كم مليون يجيبوه ويزجروه، يا فلان تاني ما تعمل كده وخلي حاجة لاخوانك يسرقوها، اعتقد ده احسن اسلوب عقاب، مع تمنياتي لحكومة المشروع الحضاري بالتقدم والازدهار والله يخليك لينا يا بشه تكتم انفاسنا كمان وكمان

  21. سلامات يا اهل
    انتو نسيتو انو العقاب بتاعهم كيف (تحفظ ليك جزء من القران) وعلي بال ما تحفظ الـ30 جزء يكون سرق حق (اليتيم والفقير والمسكين وست الشاي وست الكسرة وست الفول ولبن الاطفال وايرادات النفايات ………………………). اخخل خخخخخخخخخخ
    فترت … يا الغلبان عليك الله ولعها انا قربت ارجع ليها
    والله والله وتالله غير الشارع مافي حل

  22. Ustaz Jabra Salam before the reelection of Wali Sennar he addressed the people telling them that I took what I need (from the money!) and I gave my village (my relatives ) what they need! If you elect me I will be the one who develops the Walaiah , if you elected a new Wali he will start to eat and give his village! It seems Ustaz Jabra after being reelected he is not satisfied yet! Wa kolo shai lilah!

  23. تنوي محلية الخرطوم سن قانون يمنع بائعات الشاي من مزاولة عملهن في الشوارع السيادية

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: