كسرات بديلة

اليوم يمضي حوالى (شهر) منذ توجيه السيد رئيس الجمهورية بحسم ملف هيثرو لذا فقد قلنا (بسم الله) ووضعنا (واواً) أولياً أمام الكسرة الثابتة الجديدة و(واوا) آخر يحمل الرقم (17) أما م الكسرة الثابتة (القديمة) وعلى قول أخونا وصديقنا (سعدالدين) .. النشوف آخرتا !
ليست قضية (هيثرو) بالطبع وحدها التي تحتاج إلى تقديم الضالعين فيها إلى القضاء .. فقد تمت إستباحة (المال العام) في السنوات الأخيرة بصورة متكررة حتي صار ذلك شيئاً عادياً طال أكثر المؤسسات قداسة دينية كالأوقاف والحج والعمرة وهذا لعمري شئ يبعث على الحزن والأسى مما آل إليه حال البلاد والعباد .
مما يدهش حقاً أن التعامل مع كل هذه الحالات من النهب (المصلح) الموثق (من المراجع العام) يتم التعامل معه من قبل قيادات البلاد وولاة أمر المسلمين ببرود يحسدون عليه على الرغم من أن المبالغ التي يتم نهبها والتعدي عليها (ما هينه) في بلد يتضور أفراده جوعاً وليس بعيداً قولة ذلك المسئول الذي (نهبت) أكثر من نصف ميزانية ولايته حيث قال أنهم سوف يتبعون في معالجة الأمر أسلوب (التقويم) وليس (التجريم) !!
والحال هكذا لابد لنا من التذكير المستمر بهذه القضايا (العالقة) – العالقة دي حلوة؟- حتى لا يطويها النسيان (وهذا هو المقصود) وإذا كانت حكاية (الكسرة الثابتة) تعد آليه من آليات التذكير ونسبة لكثرة هذا القضايا وحتي لا يصبح المقال (كلو كسرات) فالعبدلله يقترح أليات أخري يطرحها على (الشعب السوداني الفضل) لمعرفة رأيه ..
الآلية (الاولى) :
لابد أنكم قد لاحظتم إنتشار (البكاسي) التي تحمل الخضار تجوب به الأحياء وتعلن عن بضاعتها (بالمايكرفون) هؤلاء (الباعة الجائلون) يمكنهم أن يؤدوا عملا وطنيا عظيما بتذكير (الناس) و (السلطة) بالقضايا العالقة (مساعدين كسرة وكده) مثلاً :
– أيوه علينا جاي .. العجور .. الأقطان .. بطاطس خط هيثرو .. جرجير المدينة الرياضية
– جابوهو بالطياره وباعوهو بالخسارة .. الفجل .. الأدوية الفاسدة .. البامية .. الأوقاف .. الليمون .. الحج والعمرة
– ثم صوت (بكسي) السمك من الشارع المجاور :
– البلطي النضيف .. التقاوى الفاسدة .. يلا الكبروس سودانير القرقور الموارد البشرية العجل الأقطان
ثم يختلط الصوتان :
– ايوه بالطيارة جاي .. القرقور الأقطان العجور الكبروس الأوقاف الليمون سودانير البلطي النضيف !!
– بالخسارة الطيارة أيوه .. العجل الفجل القرقور هيثرو الخدره الحج والعمرة الطماطم سودانيييير .. علينا جااااي
أما الآلية الثانية والتي أعتقد إنها ما بطالة وهي إضافة هذه القضايا العالقة للأغاني التي يكتبها سائقو الحافلات والأمجاد على زجاج مركباتهم الخلفي لتصبح من شاكلة :
– ما قلنا ليك …….. الكوايتة بحبوووونا
– يا ريتني كنتا ……….عارف !
– لمتين لمتين؟ ……….الحج والعمرة
– وقوف متكرر ……….الأوقاف
– يا ناس يا حنان …… وين الأقطان؟
اما الآليه الأخيرة فهي تغيير لافتات اسماء المحلات التجارية حتى تكون تذكيراً دائما للمسئولين :
– مخبز هيثرو
– مطعم التقاوى
– ترزي الأقطان
– محلات الموارد البشرية
– بقالة صندوق دعم الطلاب
– صالون سودانير (للحلاقة طبعن هي حلاقة نصاح)
عموما لن نفتأ نبحث عن وسائل وآليات لإيقاظ ضمائر ولاة الأمر للحفاظ على أموال (بيت مال المسلمين) وردع ومعاقبة ناهبيه وهذا اقل ما يمكن فعله من أجل (دولة الإسلام) ذات (التوجه الحضاري)… وللا ما كده ؟

كسرة :
لو الكسرة الثابتة الجديدة جات عليها (واو) تاااني وبقت (واوين) دي تكون كارثة راسا عدييييييييل !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

30 تعليق

    1. غايتو يا طارق حقت الليلة دي ماااا برنجيه ده الشئ
      داك عديييييل .. انت كورنيش ابروف افتتحو ولا شنو !

      1. لا إفتتحت كورنيش النخله
        هاك الجاز دا

  1. برنجييييية

    1. اقعد كتر فى الياء لحدت ما تسف تمباك

  2. وعلى قول أخونا وصديقنا (سعدالدين) .. النشوف آخرتا !
    يا عمك (النشوف آخرتا دى ملكيه فكريه حصريه للحاج السلاوى و من أسى و بقيت تنسى

    1. ياخ انتو حاج السلاوي وين ؟

      1. كان مهنضب !!!

  3. تفاح ،عنب،برقوق،كمثري وافوكادو وعلينا جاي عماره الرياض الوقعت

    1. زكرتنا ايام زماااااااااااااااان وسوق الخضر والفاكهة آلعبيد بعدين ما تقول كده محش بيفهمك يعني ايه اللي قلته مش فاهم غير عمارة الرياض ياخ هههههههه

      1. آآآآى و اللاهى آآالغلبان يا اخوى,, نحنا اخرنا الموز و البرتكان دة بس !!!

  4. ياربي انحنا الاخطاء العاملناها دي شنو اشان ربنا يعا قبنا بي مجموعة المحرمين والدجالين والحرامية ديل ، لازم يكون عندنا مصفوفة بتاعت اخطاء كبيرة عملا الشعب السوداني

    1. آآآآآآآآآآآآآه يا مدني رجعتنا ثاني لعلي بابا والاربعين ………

  5. بتاعين الخضار والسمك اليكوركو كواريكم سااااكت ..
    ما اب فقره ده ؟ يمين كان اعادو تسمية شارع 15 وسموهو
    اورنيك 15 يمشي يفتتحو ويرقص سااااااااكت ..

    1. كفاية عليه ساحة حدادي مدادي وكمان خضراء هع

  6. الشمار الشمار ,, سفوك يا سنار
    االجداد والبط ،،، سرقوك با الخط
    الجزر البمبى ،،، ما بتشذ يا اللمبى
    الطماطم و الجرجير ليك يوم يا الم…..ير

    1. بالمناسبه في حاجة زمان بقولوها : آآآآي دا الشغل دا الشغل آآآآآي
      هاك الشغل النضيف دا علي الحلال قالو تاني لغفو ليهم 721 مليون منحة ما معروفة جات وين وبرضو ما معرفة مشت وين …المهم انو في منحة دخلت السودان ولغفت مباشرة …. تقول لي هيثرو …. ياخي دي قبال تخش مرقت ….هاك اللغف دا …. ابليس ذاتو قعد هناك وبتفرج ..مندهش طبعا ..آآآآآآلمندهش

  7. يا بروف جبرا انت ما سمعت البروف الطيب زين العابدين بقول الرئيس بتكلم ساكت !!
    كم وكم وكم تصريح وكم وكم قرار لفخامة الرئيس طلع كلام الليل يمحوه النهار

  8. يا دفعة نسيت الية اشباه الفنانين الكتار الجداد ديل ممكن مع اغنيهم الما عندها معني دي يدخلو الحاجات دي كلها يعني ممكن :
    راجل المرا دا حلو حلا زي الخط الراح برا
    واضربني بمسدسك زي ما ضربت سنار
    وهلم جرا

  9. السلام عليكم
    طبعا في حاجات مامكن يقاضوا مرتكبيها واقصد بذلك عمارة الرباط الكان المقاول فيه اخو اللمبي لأنوا دخل التراب ولاقى ربنا وعقبال كل الظلمة

    1. هههه مين قال اللي بموت ما بيتحاسب

    2. دخل التراب براهو الباقين وين …. يا عيني
      بتو وزوجها كانو المهندسين بتاع المشروع ….اها ديل يخلوهم

  10. سلامات يا استاذنا والله اخرتها شكلنا بتجينا جلطة وبنموت ونرتاح

  11. السلام عليكم احبتى
    الغريب فى الأمر مش توجيهات الريس …… الغريب انو الريس يوجه القضاء لعمله فى اتخاذ الأجراءات يعنى الناظر يوجه المعلمين للدراسة و و و وعلى شاكلته …

  12. نسيت يا أستذنا الفاضل أهم حاجة مشروع الجزيرة العملاق …… وقف وصاح المنادى وقال: مشروع الجزيرة للبيع مين يذود … واحد… اتنين .. تلاتة …. اتباع …. قروشه مشت وين ….. ؟؟؟؟ فى بطن التمساح …. وين التمساح … ؟؟؟؟ دخل البحر …. الراجل الــ ..يقبضو….!!!
    كتيـــــــــــــــر من دا و الحسرة تقطع القلب ….. الله على الظالم و المفترى

    1. لا تحزن شليل ما فات شليل ما راح كتمت

      1. ايوة يا الغلبان شليل فوق التقانت قام خدار وبلاد … شليل عند المسورو حرق باقلو حصاد …. شليل قايم نصاص اليل يتمتم ليلو وردية
        الشارع الشارع

  13. وحات الله بكسي واحد يطلع يقول الكلام كان يلقا نفسو في كوبر ياعمك

  14. بما ان الملفات كتيره والواوات بتاعت الكسرات باين عليها ما شا
    زايده, انا باقترح انو أخونا الفاتح جبرا يستفيد من تجربة محرك البحث
    قوقل ويعمل تحت كل واو رقم مثلا 1,2و3و4 وهكذا عشان لمن ندوس
    الواو نلقي الملفات بسهوله وبي كده الكسرات بتكون منظمه وبعدين
    بعض الملفات بتكون مستوره علي وزن خلي الطابق مستور و
    برضو ما في داعي تخلو الواوات كلها طاهره عشان ما توجعوا قلوبنا
    أكتر…ودي فرصه لاطهار ابداعات الشباب وناس قوقل ما اشطر
    مننا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: