وينا ذااااتا؟

في أحصائيات المواليد العالمية يقولون لك أن البلد الفلاتي نسبة المواليد فيه كذا ألف في الدقيقة والبلد الفلتكاني كذا ألف في الثانية وهكذا .. كم يا تري لو عملنا إحصائية دقيقة (وما مضروبة) لمعرفة حالات التعدي على المال العام عندنا؟
وإذا قمنا بسؤال نفسنا الأمارة بالسؤ ؟ أين تذهب هذا الأموال ؟ هل لجيوب المواطنين أم لحسابات المسئولين (صغروا أم كبرو)؟ فسوف تكون الإجابة بلا شك هي إنو المواطن (الغلبان ده) ما عندو أي شغلة بالموضوع لأنو الموضوع (حكومي 100%) !
ضحكت حتى إنكفأت على ظهري وأنا أقرأ توعد السيد وزير العدل السودانى محمد بشارة دوسة شاغلي المناصب الدستورية بالمركز والولايات بتحريك إجراءات جنائية وفتح بلاغات فى مواجهتهم حال امتناع أي دستوري عن تقديم اقرار الذمة الخاص به ودون تقديم أعذار مقبولة لمخالفته للقانون !
لم يكن ضحكي (قلة أدب) لا سمح الله ولكن ألا يري (مولانا) أن مطالبة شخص بتقديم (حيازته) من نقد ومنقولات وثوابت بعد جلوسه على كرسي المسئوليه (كم وعشرين سنه) لا تخدم غرضاً وكان الأحري أن تتم قبل أن يتسنم الشخص المسئولية (عشان نعرفو دخل كيف ومرق كيف)؟
واشد ما لفت إنتباهي بعد إنتهاء نوبه الضحك هو أن مولانا قد شدد في تصريخاته على تفعيل مبدأ (من أين لك هذا) ؟ وهو مبدأ إسلامي يحاسب المسئول يوم أن كانت (المسئولية) تحتم على رجل الدولة عدم الإنشغال (بالبزنس) .. ومش رجل الدولة وبس .. أولادو ذاااتم (أنظر حادثة الأبل بين سيدنا عمر وإبنه عبدالله) !
نعم بينما ينهي الإسلام عن إشتغال المسئولين بالتجارة والأعمال (على الأقل) أثناء توليهم لمناصبهم وكذلك كل دساتير الدنيا نجد أن معظم وزرائنا (بتاعين بيزنس) وما داسين الشغلانية .. كلما الواحد يعملو معاهو مقابلة في الأجهزة الإعلامية يقول أيوه عندي شركات ومشاريع وأنا زول سوق (ختري) !
ومش كده وبس .. تلاقي وزير الصناعة عندنا عندو مصانع .. ووزير الزراعة عندو (مشاريع زراعية) ووزير الصحة عندو مستشفيات وكليات طبية ! .. يعني تحت مسئوليتو ذااااتا .. (لله درك يا عمر فقد أعدت ما زاد عن ثمن شراء إبل غبنك عبدالله إلى خزينة المسلمين) !
طيب يا (مولانا) لو قلتا لى واحد من الوزراء (المستثمرين ديل) من أين لك هذا وقال ليك (من بزنسي المدور ده) ما شايفنو؟ أها نمشي (نجيب حسابات شركاتو عشرين سنة لى وراء وللا الدبارة شنو؟) !
وإذا علمنا ويعلم مولانا كذلك أن مسألة إقرارات الذمة (دى) هي عبارة عن معرفة مقتنيات المسئول لحظة جلوسه على كرسي المسئولية (وتقديمه لإقرار ذمته لحظتها) ثم تقديمه كشفاً بمقتناياته لحظة تركه للكرسي (للمقارنه وكده) يبقي السؤال : ماذا عن الذين شغلو مناصب لسنوات وتركوها أو تركتهم ولم يقدمو أقرارا للذمة (لا في الدخول ولا الخروج) أها ديل (إستثناء وكده) ولا شنو؟ والناس الضربت (نص) ميزانية (سنار) ديل يقدموا إقرارتهم (ذمتهم) قبل الضرب وللا بعد الضرب؟
ويختتم السيد وزير العدل تصريحه عن عزمهم إنشاء موقع الكتروني لاستقبال شكاوي المواطنين حول مظان الثراء الحرام للأشخاص لكنه شدد على ضرورة أن يدفع الشاكي ببينة مبدئية ومعلومات أساسية للتحقق من صحة المعلومات.
القارئ العزيز :
عطفاً على حديث السيد الوزير الأخير هذا فالعبدلله ينبهك حتي لا تقع تحت طائلة القانون إنك أن كانت لديك (مظان) ثراء حرام حول أحد المسئولين يجب أن يكون في حوذتك وفي جهة أمينه صورة من :
(عقد) شراء فيلا المسئول .. و(عقد شراء) شقة (لندن) وشقة (القاهرة) وشقة (كوالامبور) وعمارة (الطائف) ومزرعة (بتري) ولا تنسئ كشوفات حسابه بالعملات المحلية والأجنبية في بنك التجارة الإسلامي العالمي !
يا مولانا كدي مسألة إقرارات الذمة دي بقت تحصيل حاصل لأنها مفروض تكون قبل ما الزول يمسك المسئولية … خلونا في خط هيثرو ده !!
كسرة :
أمسك رجل الشرطة بأحد السكاري وطالبه بإثبات الشخصية فضحك (السكران) وقال مخاطباً رجل الشرطة : هي الشخصية ذااااتا وينا !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

32 تعليق

  1. ق
    م
    ر
    د
    ي
    ن
    ة

    1. اضغط نجمه وشيل النفس لكن برضو علبه ما بتمها

  2. اليوم مافى برنجية

    1. كلامك صحي آآآآآآآآآعتباني برنجية شنو مع المغايص دي وديك ومن ناس ديل وااآآآآآآآسفاي

  3. يا دفعة – من اين لك هذا راحت مع ناس عمر – بعدين هذا دي ما دايرا ليها سؤال؟

    1. يرحم ناس عمر لكن يا ربي اهلوا سموهو على عمر والا شنو راسي عاوز ينفجر يا ربي بقكر وبيقيف عند عمر وبتذكره انه هناك عمر يا ربي عارف الفرق بين عمر وعمر وعمر الاخيرة بضم العين

  4. هههههههه . اقرارات الذمه ما دايرنها !
    بس يجيب كل مسئول ويقول ليهو خت يدك في
    المصحف وقول وحات الله تاني ما اسرق ,,,والمتعافي يقعد
    فوقو عديييييل ويحلف ,,
    كسره : كأنك تريد .. هي الذمه ذااااتا وينا ..

    1. يقعد فوقوووووووووووووو كيف دا متعافي ياااااااااااااخي اها كبير اخوانو كيف

    2. انت فاكر ديل بيخافو من المصحف والا اللي جوه المصحف يا عمك ديل سيد المصحف ما خايفين منه ويا كلو ناقة صالح ديل الا قلع ومحاسبه غير كده ما فيش ليهم اي طريقه ثانية بعدين حتى لو هربوا راح يجيبوهم ليك بدون ما تطلبهم لا جنائية دولية لا انتربول وصدقني لانه ريحتهم فائحه ما ليهم الا تحت التراب وهناك نان قايل بخلوهم ليهم من العذاب ضعفين والبني ادم غره بالدنيا طول الامل صدقني بم بعد الكتمه دي قربت وراح تطلع كيف مش عارف بس راح تطلع من الابرول من الشماسه من خلق الله الدمه فار عاوزه شراره بس وقربت وبالمناسبه انا زمان مشيت ليبيا ولم اكن اتخيل ان كابوكي بروح فيها والله من الكان بعمله في الخلق رغم انها خلق شبعانه ما بالك اخي بالجياع ولا تقل لي جوع كلبك يتبعك لاني راح اقول ليك ربما جاع الكلب فاكل صاحبه وهانت وعلى اجنحت الفجر ترفرف اخي

  5. الخوف من المتعافي يشيل المصحف ويلف على المسئولين والوزراء ويقول ليهم المديدة حرقتني .. المديدة حرقتني عشان واحد يشيل عنو .ز لا نو حا يحلف على شنو ويخلي شنو .. عمركم شفتو ديل … بيتعدل

  6. يا اخوانا انتو مافاهمين الحاصل .كلام الوزير ده كلام ساكت ..المهم الناس ديل ماحايعملو اي حاجة لسببين :
    الاول : هو انو الفاسدين ديل اخوان مسلمين وبمثلوا المشروع الحضاري والاسلام واذا تمت ادانتهم ومحاكمتهم (ودي حاتجر ناس كتيرة ) فده بهدد دولة الاسلام في السودان وبدي فرصة لاعداء الاسلام ذي الشيوعييين والعملاء والغرب .
    التاني : الفاسدين ديل قيادات واخوان مسلمين واي مال اخذوه هو في النهاية رصيد للحركة الاسلامية اذا حدث اي شيء لاسمح الله في المستقبل .يعني سيبو النظرة السطحية وعاينو لي قدام . فهمتو وللا لا؟

  7. قالو للحرامي أحلف قال جاك الفرج ،،،،،،،، وبس

    1. والله يحلفوا زي السماسرة في الكامره الخفيه هع كع كرع

  8. بروف وحات الله انا بحبك في الله وماعاوز ليك المضره لكن بقيت تخش جوه عش الدبابير عديل كده وده بلحقك امهات طه ونحن نروح في خبر كان ولا اقول ليك فى خبر خط هيثرو زاتو دحين روق المنقه شان ما تحمض وقصه الفساد دى معروفه من سنين ولا حياه لمن تنادى بس الله يعينك

    1. دبابير ايه يا اخوي يا ود عوض ديل اصحوا يرجفوا شفت ليك حرااااااااااااامي ما بخاف

  9. مجرد سؤال هل الناس الحرامية ديل قاعدين يقرأو الكلام ده؟

  10. الأخ العزيز الفاتح و المدوناتيه الكرام . . .
    تحية و سلام . . .
    الجماعه هنا بقو الواحد لمان يكون بتكلم معاك في التلفون
    واللا مباشرة و إنتهى من كلامو و عايز ينتهي من المحادثه خلاس يقول ليك
    أها ” أخبار خط هيثرو شنوووو؟ “

    1. يا ريت تتعمم عندنا هنا كمان هناك بتاعتك ما عرفتها وهنا بتاعتي لذكاءك تحياتي وتقبل المرور علي سنكل

  11. بالذمه دي حكومة دي كتمت كتمت كتمت

  12. للامنجية الذين يراجعون قمردينتنا بانتظام اقول لهم حياكم الله يا مساهرين وحارسين امن الوطن الالكتروني لكن الرئيس نائم والدليل واونا الفوق في القمردينه كدي صحوه وتعالوا تاني راجعوا القمردينه

    1. والله صاح بس هم ما بيحرسو الوطن بيحرسوا الريس والمسؤلين عشان مافي حدا يشوفهم وهم بيسرقو………. بس حقوا عمنا جبرا يكون صاحي عشان ما يديهم فرقة

    2. الريس النوام ده مااا بخش الجنه لاكين ديل يمكن
      ناس عين باتت تحرس في سبيل اللاة برضهم ما
      بخشوا ..

      1. ههههههه والشعار العام ليهم هو عين ت ترمش ويد تخمش لكن ليهم يوم وثورة الجياع قربت

  13. هووووووووووووووووي آآآآآآآآآآآآآآآآآناس سلاااااااااااااااااااااااااااااااام جاكم
    علي ما اذكر قبل فترة هذا المستوزر قال انو اخر يوم يوم الخميس- للكشف- وهو شخصيا يبدأ الشلاغنة واهو كل خميس ونحنا منتظرين …..
    بالله فكونا … هذه ليست حكومة …. هولاء اجهل من مشي علي اثنين في هذا الزمن الغابر زمن غريب والله … والاغرب من كل ذلك هو سكوت هذا الشعب علي ما يجري كانهم (محوطين) والله حيرونا ….. قدر ما خلصنا الليل تلاقي ليلة باكر أطول وكل ما نقول كملنا الشيل نلاقي شيلة باكر اتقل
    وفجأة…………نلقي الشارع ……

    1. وين يا شبح ..
      ليت حا المحوطين تبقي لام ..
      انت في الرياض ؟ كان في الرياض هز لي راسك
      وكان ما في الرياض قول لا لا ..

      1. هز يا وز !!

      2. اها هزيتو …. شايفني…..هههههههههههههههههههههاي
        شنو قبل يومين عامل لي لافي في السوق العربي ؟؟؟؟؟؟؟؟
        والله في الرياض يا عم
        كلو نفر قرقر سعوديا مافي كويس الحين …ايش سوي….كتير ظلم

      3. هههههههه شمباتي يا حبيب , عليك
        النبي الزول اللايوق الما داير يموت ده
        كان عندك رقمه لزو ليا .. لزاهو البلاء
        قويه ده بتاع سجارات اوعك تديهو
        رقمي . انا تبتا ..ههه

      4. ههههههههه,,والله ما عندى ,
        لكن هو كان زولا فيهو نفع وكايس رضانا اليرسلو فى 0555040149
        باقى انا جاى عليكم نهاية الاسبوع باذن الله ,,
        جهزوا الذى منو !! هيييق

    2. اولا ابدا بي ع الحاج(حاجها) ماكل شارع و وشريفها بالع خط طيران ومامونها قاتل نصفها طبيا ونافعها ضاريها بي الاحباش اولاد عمو ديل ومتعافيها …………..احي منو ده لكن نقول شنو ااااااااااااااااااااااااااه والااها ف اضاني

  14. تصويب
    قدر ما نقول خلصنا الليل

  15. ضاقت فلما استحكمت حلقاتها ضاقت أكثر ربنا يضيق عليكم قبوركم كما ضيقتوها علينا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: