الرحمة حلوة

الكافل هو العائل ، كفله يكفله وكفله إياه وفي التنزيل العزيز : ( وكفلها زكريا) كما أن الكفل يا أحبتي هو العجز ، يقولون (وإنها لعجزاء الكفل) وقد برع شعراء الحقيبة عندنا في توصيف (الكفل) هذا أيما براعة فها هو شاعرنا الكبير ابراهيم العبادي يذكره في قصيدته (يا موفورة النفل) قائلاً :
ياموفورة النفل
بالهيبة الكست الحفل
أتمايح غصنك رفل
ميل سنده الكفل
والكافل يأتي أيضاً بمعني (الكفيل) والجمع أكفال ، ولا يشتق منه فعل ولا صفة .
ونظام الكفيل هو نظام مستمر منذ عقود بدول الخليج العربي يخضع له حوالى 20 مليون انسان، نسبة كبيرة منهم من دول عربية حيث يصبح العامل أو الموظف بموجب هذا النظام تحت امرة كفيله ، لا يملك قراره في الحركة والتنقل دون موافقته، وربما يتحول الى شبه سجين اذا اختلف مع هذا الكفيل لأي سبب من الاسباب وهنالك قصص واقعية تحكي حول هذا الأمر .
سبب كتابة هذا المقال رسائل عدة تلقيتها عبر بريدي الأليكتروني ومهاتفات كثيرة تشكو سؤ المعاملة التي يجدها الرعايا السودانيين بالشقيقة (السعودية) بعد أن تم إصدار قرار بترحيل كل مقيم لا يعمل تحت مظلة كفيله .
إذا نظرنا إلى الموضوع من (أساسو) فالعبدلله يري أن المتسبب فيه هي السلطات (السعودية) التي تمنح كل من لديه (سجل تجاري) أو رخصة تجارية ما شاء من (فيزات) تعلم تماما انه يقوم ببيعها في (سوق الله أكبر) عبر السماسرة الذين ينتشرون في كافة العواصم العربية والأجنبية ، وقد حكي لي من لا اشك في صدق حديثه أن أحد الأفراد (السعوديين) في كفالته أكثر من ا ألف شخص !
كان على السلطات (السعودية) أن تلزم يطلبون هذه (الفيز) من مواطنيها تخديم من يستقدمونهم في مؤسساتهم؟ وفرض عقوبات على من يستخدم هذه الفيز كتجارة ؟
أقول قولي هذا لأنني اعتقد ان هؤلاء الذين تقوم السلطات (السعودية) بترحيلهم (دون أعطائهم فرصة حتى لحمل أغراضهم) قد دخلوا إلى البلاد بصورة شرعية وأن عدم شرعية عملهم مع جهة غير التي إستقدمتهم هو شئ داخلي تساءل عنه تلك الجهات التي قبضت ثمن الإستقدام بآلاف الريالات (وفكت) المستقدم – بفتح الدال – عكس الهواء !
نحن هنا لسنا بصدد تقديم النصح للإخوة المسئولين بالمملكة فالطبع لكل دولة الحق في إصدار وتنفيذ أي قرارات من أجل ضبط أمن بلادها وإستقرارها لكننا فقط نرجو ونلتمس من إخواننا أن يقوموا بتنفيذ هذا القرار بصورة مرنه تعطي الشخص الوقت الكافي لتصفية حساباته مع من كان يعمل عنده فكثير من الاشخاص لديهم حقوقا لدي مخدميهم تركوها كما تركوا حتي أثاث منازلهم وسياراتهم ومعظم مقتنياتهم وهذا لعمري ظلم ما بعده ظلم !
العبد لله يري أن نظام (الكفيل) يجب ان يلغى وان يستبدل بنظام اكثر عدالة يقوم بحفظ حقوق العامل الاجنبي ايا كانت جنسيته ، ويحقق له الاستقرار النفسي والعملي ويزيح عنه هاجس (الترحيل) وما أدراك ما الترحيل ! ..
أن نبينا عليه أفضل الصلاة والسلام يدعونا إلى الترفق واللين وأن يحب المرء لأخيه ما يحب لنفسه بل يمضي رسولنا الكريم إلى أكثر من ذلك إذ يقول ان الدين المعاملة … وبرضو يا أخوانا (في الدين) الرحمة حلوة .. وللا مش كده ؟

كسرة:
بينما كا يسير في السوق .. ساله الشرطي عن (هويته) ولأن صاحبنا لم تكن لديه (إقامة) فقد تم وضعه بالسجن ثم ترحيلة للبلاد .. بينما كان يسير بشارع الجمهورية لمح في نهاية إحدي البرندات (العقال) الما بغباهو فجري نحوه مسرعاً وأمسك بتلابيبه قائلا:
– هويتك .. هويتك الهوا التشقك !

كسرة ثابتة (قديمة) :
– أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
– أخبار تنفيذ توجيهات السيد الرئيس بخصوص ملف خط هيثرو شنو(و)؟

38 تعليق

  1. يا سلاااااااااام ميل سنده الكفل !
    هو يعني كفيل دي معناها سمح كده ؟
    اول مره احب كفيلي ..ومن يوم الليله دي حاديهو
    كل احترامي ..

    1. هيييييييييييييي,,
      اوعا تديهو شئ !!!
      هههههههههههههههههههههه

    2. لو كفيلك طلع هناي امانة ما الضحك شرطك
      ايوووووويوووييييييييييييييييووووييييييييييييييييييييي
      بالله مش في غنية بتقول يا ناعس الاكفال……….
      المرسوم في جوازي وين كفيلي….

  2. أول برنجية!!!!! بتجيب دوخة

    1. اول واحدة صحي لكن ما دخنا يا سيد البيت لانو الراس قوي شوية والعليهوا ما هين

  3. التحية للكل
    وكمان اضيف ان المكفولين يورثوا للورثة حسب الانصبة الشرعية
    اذ يعتبروا مصدر دخل ثابت في التجديد والتاشيرات وخلافة
    يعني الشغلانة استرقاق عديييل كدة

    1. والله زميلنا في المدينة قسموهو في الورثة وطلع من نصيب البت كمان …..
      طبعا دي خيرا من ان تتركهم عالة يتكففون الناس

  4. يا بروف وكت جيتنا في بيتنا تعال النمحّنك ..
    طبعا في كفلاء محترمين , بس نادر جدا ..
    طبعا مكتب العمل قسم المؤسسات زي اشارة المرور كل
    لون حسب نسبة السعودة فيها وناس النطاق الاحمر ديل
    ياهم الما محققين السعوده والمؤسسة العندها ( العاده )
    يتم ايقاف تجديد اقامات الاجانب العاملين فيها وبرضو
    تأشيرات الخروج والعوده وعدم تجديد الاقامه يترتب عليه
    انذار اولادك بالفصل من المدرسه لأن اقامة الوالد
    منتهيه ويتم ايقاف حسابك في البنك لعدم تجديد الاقامه
    وبرضو تجديد رخصة القياده واستمارة السيارة ماااا
    اقامتك منتهيه وكده ! اما السعودي صاحب المؤسسة
    يسافر ويرجع وكت ما داير ويجدد رخصته واستمارة
    عربيته وحسابه في البك ماااااشي , طيب يعني صاحب
    العمل ده جاب سعوديين عشان يعينهم ونحنا الكلاب ديل
    ابينا وقلنا ليه اوعك تشغلم ؟
    نمسك ليك نوع تاني من الكفل ( اقصد كفيل
    ولآ هو اسمو شنو ؟ ) ده يكون عنده مؤسسة وهميه فيها
    نفرات ( جمع نفر ) كتير مره وفاكيهم في السوق يترزقون
    زي ما بقولوا ,يعني زي محلياتنا البتأجر للناس
    الدرداقات ويترزقوا في الملجة , النوع ده تجي
    تجدد يقول ليك ترا عندي مخالفات في المرور روح سددها
    او يقول ليك ترا اشتراك الغرفه منتهي وما
    عندي فلوس الحين وترا يمكن ابطي عليك وتاخد مخالفه اذا
    بغيت اخلصك روح سدد الغرفة التجارية الله لا يهينك ,
    وبعد ده كلو يشيل منك اتعابه ( حلوه اتعابه دي مش ؟ )
    ويبصمك علي انك ماخد رواتبك لمدة سنة مقدما ومرات
    يبصموا الناس علي بياض ! ويجي هناي يقول لينا ربنا
    مضيقا علينا في السودان عشان عمايلنا كعبه !!
    هادا بلد مره مره خراب لكين هكومه هق انا خراب زياده
    كده انا مافي روه بلد هق انا .
    مره ركبت مع بتاع لموزين وصادف قبلي ركبن معاه سعوديات
    نزلن وابن يدفعن ليهو , وصديق استلمني , انت سودان ؟
    انا كلام ايوه , سودان الله في جيب نبي ؟ انا كلام
    سودان مافي يجي نبي , هو كلام: باكستان برضو الله
    مافي جيب نبي ( ويواصل ) هادا بلد اشان زيادة خراب
    الله في جيب زياده نبي وفي سوي بيت هقو قريب
    من هنا شان شوف برررررضو سوؤدي مافي فكّر

    1. ههههههه,,رحم الله صديقى وحبيبى العامل البنغلاديشى / عبدالرحيم ,,
      فلقد اوتى من الحكمة نصيبا غير منقوص ,,,
      ولقد افادنى بما يشبه قول راعى الليموزين هذا (مرة كويس نبى هو جيبو هنا عشان هنا مافى كويس ومافى يسمع كلما نبى اجنبى) !!
      خسئوا وخابوا اينما ثقفوا ,,,

      1. وحات الله عبد الرحيم البتغالي ده كلامو
        صحي , لو ما كان منهم !!!
        ياخي ديل الواحد فيهم يسألك عن شئ
        تبدأ تشرح ليهو وتلاقيهو مقهي فيك
        ويسويلك , لااا , بالله عليك ؟ وبعد تخلص
        تبْ . يقول ليك إييي ادري ادري ,, وهو
        تلاقي سجم خشمو ما عارف ..
        وكما قال اشرف خان : فكّر كل شئ معلوم
        مافي شئ معلوم , لكين زُلم كتير معلوم .
        وقال ظفر الدين : الله مافي يعطي كل شئ
        الله في شيل فلوس , اعطيك مخ , في شيل
        مخ , اعطيك فلوس .. تفرات بس صبر
        وسوي دعاء .
        وقال محمد جان : كل دنيا رمظان واحد شهر
        كفي , هنا رمظان لو زيادة من شهر مره
        كويس شان هادا نفر رمظان يجي مررره
        اكتلاف ..

      2. ليش كلو نفر قرقر زيادة سوؤيا مافي كويس ….. انت ما ابغي هنا روه بلد هق انتا
        كلو زلم زلم ايش سوي انا مافي معلوم
        الله يجازيكم والله زي ما قال دكتور الفرزدق لو ما ريالاتكم دي طلق فت يوم ماني قاعد في بلدكو دي

  5. هويتنا عربية وديننا الاسلام ولا دا كلام جرايد يا بروف
    وكمان الاشقاء العرب يا عالم شفتو ليكم شقيق بطرد شقيقو !!!

  6. المصية انو السوداني في كل بلد عربي يعامل معاملة الرقيق (مع انو أفضل إنسان عربي هو السوداني بنتكلم عربي واضح بطلاقة ووضوح بنحترم الاخرين ايما إحترام ( وبعد كلوا راضين بالهم والهم موراضي بينا) الله يحلنا من هذه المصيبة المرمطت سمعتنا ويكثر خير بلدنا عشان نخلي الهجرة دي ( انا بكتب في هذا المقال وانا خارج السودان حليل رجالة السودانين هيع) افو علينا اخوان نسيبة

  7. الرياض 25 جمادى الأولى 1434 هـ الموافق 6 ابريل 2013م واس
    وجه خادم الحرمين الشريفين الملك عبدالله بن عبدالعزيز آل سعود – حفظه الله – كلاً من وزارة الداخلية ووزارة العمل بإعطاء فرصة للعاملين المخالفين لنظام العمل والإقامة في المملكة لتصحيح أوضاعهم في مدة أقصاها ثلاثة أشهر من تاريخه ، ومن لم يقم بذلك فيطبق بحقه النظام.
    // انتهى //
    18:49 ت م .

  8. سلام يا بروف كدي انت أسي قبلت على ديل
    دي بس الغلبه راجله ادبت حماها

    1. راجلنا منو يا دا !!؟
      عييييييييييييييييييييييييب

    2. ود الفريق .. ما نحن برضو مواطنين سودانيين ودايرين
      زول يوري الناس مشاكلنا ..
      هسي لو قمنا رجعنا , باقي ليك الحيكومه دي عيش حاف
      ساااكت كده نقرّضو بتقدر تكفينا ؟

  9. من اجحف واظلم الانظمة نظام الكفيل دا ,,
    حيث لا دين او شرع او احترام ,
    ولا خلق او فهم يقرانه !
    عنقلة سااااااااااى ,,
    وفى الاصل المقصود ارباح ودعم المواطنين ! فالرحلوهم ديل دافعييين ومشترين فيزهم , اها لما يرحلوهم يجوا ناس جداد ويدفعوا تانى ! بعد سنة يرحلوهم ! ويجوا ناس جداد يدفعوا تاااانى ! ودخلت نملة وشالت حبة ومرقت …..

    1. الحبيب شمباتي .. تعرف الحملات وقفت ليه ؟ مؤسسات
      نقل الطالبات والمعلمات اتضح انو اكتر من تمانين في
      الميه من سائقينهم ما علي الكفاله , وديل طبعا مع
      بداية الحمله خافوا ووقفوا عن العمل وبالتالي معظم
      المعلمات ما مشن شغلهن وكذلك الطالبات ,
      ميناء جده البواخر وقفت يومين ما لقت عمال تنزل
      البضاعه , الميناء البري في الرياض التريلات شاحنه
      وما لاقيه عمال تنزيل وتحميل . مؤسسات كتيرة اتضح
      انو عمالها ما علي الكفاله ووقوفها بيأثر علي اقتصاد
      البلد ..
      انا اظن انو كل همهم البي سببو وقفو الحملات هو ما
      ذكرناه اولا بناتهم والمعلمات وكل الشغله هي هدنه
      لحدي اجازة المدارس بعد شهرين وشوية.
      تعرف يا بروف واحده من مؤسسات نقل الطالبات دي
      صاحبها كل رأس ماله انو سعودي وعمل سجل تجاري
      بعد كده يجي الاجنبي يشتري العربيه من جيبه ويمشي
      طوعا واختيارا ( برضو شفت طوعا واختيارا دي )
      يسجل العربيه باسم المؤسسة دي مقابل ضمانات ضعيفه
      جدا قانونيا تثبت انو العربيه حقت الاجنبي ويبدأ يشتغل
      علي انو سواق عند المؤسسة والمؤسسة تاخد 20 في
      الميه من دخل العربيه .
      الاجازة الفاتت حصلت لي مشكله في القير ( وهو
      التعشيقه للناطقين بغيرها ) مشيت ورشه في المهندسين
      ام درمان مع الونسه عرفت انو صاحب الورشه كان
      يملك اكبر ورش صيانة القير الاتوماتيك في المنطقه
      الشرقيه وبعد موت الكفيل الكان بيتقاضي عموله مبلغ
      محدد شهريا , جاء ولد الكفيل قلع منو الورشه وقال
      ليهو هادا حلال الوالد وعمل ليهو خروج نهائي
      والورشه تقدر باكثر من مليون ريال سعودي .
      يا بروف يمين نحكي ليك زيادة مش تقول يا ولد ناولي
      حبوب الضغط تقول يا ولد ناولني المسدس ده واديني
      طلقه ,,, قال ايه اللي جابرك ع المر ….

      1. صدقت يا حبيب ,, والحال من بعضو هنا ,
        بل حتى بعض المستشفيات الخاصة الكبيرة تعطل العمل بها ! مثل مشفى سليمان فقيه بجدة ,
        وقس على ذلك عمال البلدية , حيث تكدست النفايات بمدينة تبوك لدرجة القرف ,,,
        و….ناولنى مسدسك ,, واملانى انا رصاص ,,,
        تاح تاح ترااااح

  10. اها جابت ليها دول بره كمان خلاص الفساد كمل ولا شنو

    اخبار النائم العام شنوصحي ولا لسه

  11. واحد من الاسيويين ديل بعد ما باع ورهن كل ما يملك اشتري فيزا وشغال في امان الله جنايني وكان في الشارع بيقص في الالشجار – جات الكشة والعسكري السعودي قال لية وين هويتك – اخونا طلع الهوية من جيبو واداها ليهو قام للعسكري السعودي طواالي قص الهوية وقال ليه اركب ع الترحيل الاسيوي كان ما زال ممسكا بالمقص بتاع الشجر طوالي قام قص رقبة العسكري السعودي.
    بمناسبة السعودية دي – اخونا السلاوي وين

    1. ههههههههههههه,,عفيت منو اب زرد

    2. الجمعة القبل الفاتت في سوق البطحاء جا واحد سعودي للعمال قال ليهم داير لي 50 عامل عندي فيلا لازم تتشطب في خلال اسبوع … اي واحد عايز يشتغل يركب البص وبعدين نشوف بشتغل شنو اصلي انا مستعجل وموضوع الاقامة ما تخافو انا موجود …..اها جماعتك ركبو البص وعدل للجوازات

  12. ونحنا كرمنا نيرانو بتولع قج ……ﺍﻟﺒﺸﻴﺮ ﻳﻬﺪﻱ ﺍﺭﺍﺿﻲ ﺯﺭﺍﻋﻴﺔ ﺷﺎﺳﻌﺔ ﻟﻤﺼﺮ
    .
    .
    ﻋﺮﺽ ﺳﻮﺩﺍﻧﻲ ﺟﻨﻦ ﺍﻟﻌﺎﻟﻢ..
    ﺇﻻ ﻗﻮﻟﻲ ﻳﺎ ﺭﺟﺐ ﺍﻻﺭﺽ ﻓﻲ ﺍﻟﺴﻮﺩﺍﻥ ﺑﻴﺪﻭﻫﺎ
    … ﻟﻠﻤﺼﺮﻳﻴﻦ ﻣﺠﺎﻥ؟؟؟
    ﺻﺢ ﻳﺎ ﻋﻤﺪﻩ ﺻﺢ!!
    ﺁﻩ ﻳﺎ ﻭﻻﺩ ﺍﻟﻨﻴﻞ!..

    1. وهنا برضو يا قويه , ليت لام النيل تبقي كاف ,,
      حقت ابوك ؟ توزع فيها وقاعد , ان شاء الله سرطان في الحلق
      التحت كمان قادر يا كريم ,,

    2. هههههههههههههههههههههههههههههههههههههههههههههههههههههههههه
      هههههههههههههههههههههههههههههههههههههههههههههههههههههههههههههههههههههههه
      احىىىىىىىىىىىىىىىىىىى الله يجازي محنك لكن ماقوييييييييييييييييه لمن غلط

    3. ممكن ناخد الاذن منك لعرضها فى الاسافبر الفيس بوكيه

      1. احنا الفيسبوك دا ما بنادونا فيهو ليييه !!؟
        اهئء اهئ اهئ

  13. تمكين اسلامى الجوار بارض السودان
    ودقى يامزيكه

  14. مسؤولين من الخير وين جهاز (تعذيب المغتربين) اقصد تنظيم المغتربين؟؟؟؟؟؟؟؟؟؟؟؟؟؟؟؟؟ ووين سفارتنا بالسعودية ؟؟؟؟؟؟؟؟؟؟؟

  15. شمباتي : انت المندهش ده ادوهو التابعية ولآ شنو ؟
    لا كباية ليمون ولاااا هزة كانون !! غايتو بخيل بخالتن ,,,

    1. ههههههههههههههههههههههههه,,,امكن نيرانو مولعة قج !
      انا ما بفسر وانت ما هناى ! آيييي

  16. إتبعك النشال آ جنوبي
    والمندهش تطير شقاااااااوتو
    محل إقبل ما عارف
    هنا طردونا وبلدنا من زمااااان طردتنا و أبتنا ونكرتنا

    1. هههههههه
      لالا كان كدي عذرتك ,, انا كنت قايل سكوتك انبساطه هو تاري اندهاشه !

  17. يا اخوانا
    البروف العزيز تعرض لوعكة صحية
    الناس القريبين نرجوهم يطمنونا عليه ،،

  18. تتكلموا عن كغالة برة كدى نحن فى بلدنا لاقين اللى يكفلنا ولا يجيب خبرنا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: