الشكية لى الله

تعد أنظمة الدفع المقدم من أحدث الأنظمة ذات التقنية التي إستفادت من التطور الهائل في تكنولوجيا الحاسوب والإتصالات ولكن هذه الأنظمة يجب أن يصاحبها كفاءة في الإداء فيقتضي على الجهات التي تستخدمها أن تكون عالمة تماما بأن (القروش المدفوعة مقدماً دي) تعني إستمرارية الخدمة وعدم إنقطاعها ..
لا أدري إلى أي أنواع البيع تندرج مسألة الدفع المقدم في فقه البيوع لكن العبدلله يعتقد جازماً أن إنقطاع خدمة مدفوعة مقدماً يعد مخالفة يفترض معاقبة مرتكبها إن كانت شركة أو هيئة أو خلافه .
فهذه الشركات والهيئات تستثمر هذه المبالغ المدفوعة مقدماً ثم هي بعد ذلك لا تلتزم بوصول لخدمة للزبون .. وكلو كوم والخدمات المرتبطة بزمن معين كوم تاني … يعني شركات الإتصال تقول ليك الإشتراك في خدمة الإنترنت ليوم بجنيه واحد مثلاً .. تقوم إنتا يا مصدق ترسل الجنيه وتجي تدخل الإنترنت تلاقي الشبكة ضعيفة والخدمة تخش وتمرق … تخش وتمرق .. اليوم كلو على الحالة دي لحدت ما (جنيهك يكمل) لأنو اليوم إنتهي !
تشتكي لى منو؟ مفيش غيرو … الواحد الأحد الفرد الصمد الذي لم يلد ولم يولد .. هسه باقي ليكم في البلد دي فيها زول يشتكوا ليهو؟
رغم أن شركات الإتصال (تلغف) معظم دخول الشعب السوداني إلا أن معظمها ضعيف الأداء وتشترك في في ميزة أن خدمة الإنترنت بها متذبذبة وغير ثابتة وضعيفة في معظم الأحوال . وبحكم أنها تعد مورداً (سميناً) للصحف بإعلاناتها التي لا تنتهي (صفحة ونص صفحة) نجد أن جميع الصحف تتعامل بحذر مع أي مقال ينتقد أداء هذه الشركات مما جعلها (تسرح وتمرح) لدرجة أن أحدي هذه الشركات لا يمكن الوصول إلى خدمة عملائها إلا بعد عشرات المحاولات ! (يعني تقنع ليك من كم ساعة كده) !
الؤال الذي يفرض نفسه هو : من يحاسب مثل هذه الشركات حال إخفاقها في تقديم الخدمة المتفق عليها مع الزبون؟ للأسف الأسيف يكتنف هذه المسالة غموض شديد من الناحية القانونية فالمواطن المغلوب علي امره كخادم الفكي المجبورة على الصلاة تماما فهو مجبور على الإذعان لكل ما تفعله هذه الشركات حتى لو كان عديم القانونية ولعل أوضح مثال على ذلك هو ربط فاتورة المياه مع فاتورة الكهرباء مع أن هذه هيئة وتلك شركة ولا يوجد أي رابط بينهما؟ ولو أن هذا قد حدث في (جمهورية الموز) لأقام الدنيا ولم يقعدها ولصدر خكم قضائي ببطلان هذه (الشغلانية) ولكن لدينا كل شئ جائز وممكن ولا يمكن الإعتراض عليه ويمكن أن تذهب لشراء الكهرباء غداً وبعد أن تعطي البائع رقم العداد ويدخله إلى الكمبيوتر يسألك :
– إنتا مش الحاج عباس محمد علي
– أيوه
– وعربيتك 17567 خ ت
– أيوة
– عربيتك دي يا حاج ليها سنتين ما مرخصة؟
– (في إستغراب) وشنو يعني؟
– لو ما رخصتها ما بنديك كهرباء .. عشان ربطو الكهرباء بالترخيص !!

كسرة :
الشكية لى الله !

كسرةة ثابتة (قديمة) :
– أخبار ملف خط هيثرو العند النائب العام شنو(وووو وووو وووو وووو)+(و)

– كسرة ثابتة (جديدة) :
– أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

26 تعليق

  1. هو متين قريتوها والله الليله شركتا ليها لمن واصلتا بالكرسي فاضي لي اخر محطه

  2. الاول … معمول بحب

  3. الغرض انك تشترك في باقة الجنيه تسل روحك تقوم تخش علي ابو ستاشر تطلع عينك فتحول علي الاربعينات وهكذا ……

  4. MY FRIEND EVERYTHING IN SUDAN IS POSSIBLE & NORMAL,<<

  5. انت الحاج عباس
    نعم
    ممنوع التنفس لان الاكسجين العندنا مربوط بالترخيص المربوط بالكهربا المربوطة بالموية
    الخاج عباس دخل الانعاش ومات ومافي طريقة للدفن في قبر لانو القبر مربوط بالترخيض
    انت يا استاذ خليك من انقطاع الانترنت نشكي لي منو انقطاع الموية المدفوعة القيمة
    وحكاية الترخيص دي حاجة تانية وعرض جنن العالم لان مجموع الايصالات كوم والقروش المدفوعة ااااعييييييك كيمان اخري
    والله وتالله وقسما بالله حقنا نلقاه في الدنيا قبل الاخرة يوم لاينفع مال ولابنون الامن اتي الله بقلب سليم

  6. البروف الحبيب
    حمدا لله على السلامة وما تشوف شر أبدا

  7. اللهم إنا نشكو إليك ضعف قوتنا
    وقله حيلتنا وهواننا على المسئولين
    اللهم يا ناصر المستضعفين انصرنا
    اللهم يا مفرج الكروب فك كروبنا

  8. ههههههههههه مافي اي طرقه

  9. و لو إنت بعت العربية تجيب معاك المبايعة و لو ما دفعت الزكاة و الضريبة ما بنديك كهرباء .. عشان ربطو الكهرباء بالزكاة و الضريبة!! و لو اتنازلت منها لي ولدك تجيب الخدمة الوطنية و لو ما جبتها ما بنديك كهرباء .. عشان ربطو الكهرباء بالزكاة و لو عند الميكانيكي تجيب رخصة الميكانيكي و لو ما جبتها ما بنديك كهرباء .. عشان ربطو الكهرباء بالرخص التجارية و لو عربيتك مرخصة تجيب معاك أيصال العتب و و لو ما جبتها ما بنديك كهرباء و تجيب معاك إيصال النفايات و لو ما جبتها ما بنديك كهرباء يعني الكهرباء مربوطه في التكة لو داير تعملها في وقتك الخاص لا زم تتاكد بأن الكهرباء ما زالت مربوطة !! دي حكومة عكليته طالعة تاكل نازلة تاكل لما يوم ما تلقى حاجة تأكلها و تسيك سيك سيك معلقة فيك!!!

  10. (الدفع المُقدم) لأي خدمة أعتقد أن ذلك يكون بمُوجب ما يُسمى بالشروط أوالعقود والإلتزامات (كاتفاقية) بمُوجبها أنت تُقدم ليّ الخدمة اللي أنا دفعت ليك مُقدماً حقها ،،، وعليه طالما أنت لمْ تُوفي بذلك يكون عليك الشرط الجزائي – هل يا تُرى الشيئ دا عندنا في (مملكة السودان)؟؟ ؟ نسمع في أمريكا ودُول أروبا أنّ أحدهم قاضى شركة كذا أو خُطوط كذا لأنها لمْ تُوفي بإلتزامها نحوه كراكب أو خلافه!! !
    [لست قانوني فأفتونا يا أهل القانون]

  11. كما قال الدوش (مسئول كبير فى الحلة غير الله انعدم) !!
    وسوووحى آآيييااااا بالجنبة موووووووحى ,,,

    1. البلد نهبو آآيييا والعنب حصدو آآييياااااا
      وجبجب جبجب جبجاااااااب ,,كدي زح ليا اللترتر
      بالجنبه دي كمان , جبجب جبجب جبجاااااااب
      ما قلت بتجيييينا يا حليل مجيكا !!!

      1. هههههههههههههههههههه,,,
        جيييييتكم ,,
        انتبه وانت مترتر !!

  12. ياخ انت كدا اديت ناس الحركة والولاية فكرة جاهزة حسى بكرة حيطبقوها والسبب انتا

  13. سلام يا ناس
    الف حمد الله علي سلامتك يا بروف وانشاء اجر وعافية .. زكاة الجسم..
    بعدين يا الناس الفوق قلنا ليكم احنا بطلنا …ز بقينا ناس خداااااااااااااري سااااااااااااااااااااكت
    ويا شمباتي لو قلتا ليك ( لازم تقيفو صفوف صفوف وتهيجوا الهلع بالكفوف ….سامعني ولا اقول كمان
    ومرقت عند طرف البلد اهههههههه وسكرتا جد……

  14. تصويب
    وودرت جد ….. او كما قال الكابلي

    1. الكابلي خلو !! الدوش شن قال ؟

      1. قبال اليوم يحل جاهو جارو المدرس ود خدوم …. قال ليهو لا زولا هتف ….. ولا كف مشت بتلاقي كف
        ضاقت نعالي من الزعل من تحتا اتململ تراب
        وضراعي زي داير يجن والجوف يطقطق بالكلام

  15. مرات كمان لامن الله ما يستجيب ليك ويحول ليك دعاك
    رصيد في مكان آآآخر , امانه ما بتتجهجه !!رغم انو
    افضل ليكا ,,,,

  16. Ustaz Jabra Salam I thought you are going to say the prepaid electric and water bill will not prevent the company which is a governmental from disconnecting the electric current to the poor customers and no body said this is a violation and so many examples to get the alloted piece of land and pay everything to the government and you will be touchered and curse the day you thought to apply for this land because of the problems and obstacles you have to face to build a house for your family. Wa elshakeiah liabeeden gawiah.

  17. بروف الشغاله عقود توقع وفي القانون العقد شريعه المتعاقدين يعني مثلا انو عقدى مع شركه الكهريا لا يوجد به بند يخول لها ادخل اى تعديل الا بموفقه الطرفين ولكن بما ان المجلس التشريعي اقر باداخل الماء مع الكهربا يعتبر اخلالا بالعقد لانو المجاس ليس لديه صلاحيه فى تعديل اى عقد الا اذا كان مخالف للشريعه الاسلامه

    مفروض يصدر قرار من وزير العدل يوقف هذا القرار ده

  18. حمد الله على السلامة يا بروف .. وشركات الاتصال دي ما تنسى ما باقي ليها الا نسمع بعد شوية … وزارةالشئون الدينية تحت رعاية الشركة الفلانية للاتصالات … ديل مريحين الحكومة من بلا وي متلتلة … وطبعا كلو بحقو !!! وكدا ممكن نفهم ليه مافي جهة بتقدر تقول لحاجتهم اتغتي … !!!

  19. واحد من البلد ديييك | رد

    شايف البروف عمل رايح من موضوع النفايات و دخل على ناس الاتصالات !!!!

  20. التحية والتقدير
    استاذنا الفاضل …. الشكية لى الله فعلا هو الذى لا يغفل و لا ينام … بس المهم الكّتاب أمثالكم لا يغفلو عن تعرية هؤلاء لاننا جميعا نعلم علم اليقين هذة الشركات تتبع منّ ومن الذى يديرها …. شبا ب نعرفهم عز المعرفة لا يملكون غير شهادة تخرج …. اليوم يلعبون بالعملات أشكال و ألوان … من أين ….؟؟؟؟ مساهم فى شركة اتصال و من الممكن ان يكون هو صاحب شركة الاتصال ” من الباطن طبعا” و خذ على هذا …. الشكية لى الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: