المواصلات

من الواضح أن الدولة لا تعمل على معالجة الأزمات التي يواجهها المواطن بطريقة نهائية وتضع لها حلولا جذرية بل القصة ماشة بطريقة (حل) اليوم باليوم وهي حلول لا تتجاوز منطقة أرنبة الأنف ، والأمثلة على ذلك كثيرة ولعل الأزمة المتفاقمة للمواصلات تعد مثالاً واضحاً لكيفية تعامل الدولة مع الأزمات .
في كل بلاد الدنيا هنالك وسائل مواصلات تتبع للدولة .. لم اشاهد دولة واحدة لا توفر فيها الدولة وسائل مواصلات مريحة لمواطنيها .. شئ باصات .. شئ ترام .. شئ مترو أنفاق شئ مترو مش عارف أيه !
عندنا الدولة رافعة أيدا من قصة المواصلات (هى خاتاها في شنو) ؟ وإذا ما قررت أن تساهم في حل الأزمة إذا بها تأتي ببصات (200 باص) ليس من مصنع في بلد المنشأ بل من (المنطقة الصناعية دبي) حيث تمت عمليات البوهية والسمكرة ونضافة الفلاتر وتغيير الزيوت ليتوقف أكثر من نصف هذه الباصات الخردة قبل اقل من عام من تشغيلها ، تصور عزيزي القارئ 200 باص لحل أزمة مواصلات عاصمة لا يقل عدد افرادها عن 15 مليون نسمة وكمان (سكندهاند)!!
هل توفير المواصلات شئ مهم للمواطن؟ نعم .. هل يمثل أولوية ؟ مفروض .. هل يؤثر على الإنتاج؟ نعم .. هل يهدر الوقت ؟ نعم .. طيب السؤال المنطقي ليه الحكومة ما تعمل على حل المشكلة دي وتفكر ليها في طرق دائرية وللا (مترو أنفاق) وللا حاجة تريح البشر ديل؟
الإجابة واضحة .. الحكومة يا جماعة مفلسة وما عندها قروش عشان تعمل ليكم بيها حاجة تريحكم من العذاب اليومي ده .. الإيرادات كووووولها عند الوزارات والمؤسسات (شغالة تجنيب ساااكت) تشتغل في الإيرادات وتتصرف فيها على كيفا وما قاعدة تصب في الخزينة العامة؟ بتصب في (حتات تانية) أها الحكومة تجيب ليكم قروش من وين؟!
غايتو العبدلله شايف إنو في الوضع الشايفنو ده .. أزمة المواصلات ما ح يكون عندها حل إلا حل واحد وهو فتح التصديق للعربات الملاكي لنقل المواطنين (نظام نقل طارئ) وهو حل يسعد جميع الاطراف وأولهم (الحكومة) لأنو قصة (الزحمة في المواقف دى) ما مضمونة وكده!
وثانيهما المواطن صاحب العربة الذي سوف تنفتح له طاقة رزق مع كيلو اللحمة البقي بي 60 ألف ده … وأهو برضو (زيادة دخل)
وثالثهما أصحاب العمل الذين تتأثر أعمالهم بغياب وتأخر العمال والموظفين عن مواعيد العمل .
العبدلله متأكد من أن هذا حل سريع ومضمون للأزمة بعد وضع الشروط اللازمة لضبط المسالة لكن أيضاً العبدلله متأكد (زي جوع بطنو) بإنو القصة ح تجيب ليها جبايات ما أنزل الله بها من سلطان وإنو (التصديق) ح يكون بالشئ الفلاني و(التجديد) ح يكون بالشئ الفلتكاني .. والملف بي (عشرة ألف) والإستيكر (بالشنو ما عارف) !!
ومع إنو عاوزين (نحل أزمة) نلاقي (الجماعة) جاتم من السماء !!
كسرة:
وبعد ما حلينا (المواصلات) يا أحباب بالنقل الطارئ .. عاوزين برضو (نقبل) على التعليم (الطارئ) والعلاج (الطارئ) والسكن (الطارئ) !
كسرة ثابتة (قديمة):
أخبار ملف خط هيثرو العند النائب العام شنو(وووو وووو وووو وووو)+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

16 تعليق

  1. برنجيييييييييييييييييييييييييييييييييييه

  2. التحيه للبروف والسمار
    فعلا من اكتر المشاكل التي تواجه المواطن امغلوب ع امره هي المواصلات ومواصلات ولاية الخرطوم بالتحديد والطرق الموديه الي اماكن العمل والزمن اللازم للوصول …ومسالة الزمن دي مشكله تانيه لانو يومي الخميس والالاحد من كل اسبوع بنوااجهه مشكله ف عدم المواصلات وووووو انتو الحلول الجزريه دي شنو افغيدونا افيدونا

  3. السلام عليكم ورحمة الله وبركاته
    الصين حلت أزمة المواصلات و الزحام بركوب العجلات … ولكن هل كــــــــــــــــــــــــــل السودانيين حا يركبو الموجة…..؟؟؟؟

    1. وبررررررررضو حيجي واحد الطيب خوجلي بدقن ويشيل
      الطيب خوجلي ابو من غير دقن من السوق ويحتكر هو
      الرقع وجرس العجله وسرج العجله والانبوبه ويقوم
      يجينا والي تااااني ويعمل لينا عجلات الوالي وجرس
      الوالي ويقوم بينا سداري ,,

      1. و ستكون هناك رسوم للعجلات الدبل و العجلات العادية,, و (الكدر 26) رسومو اكتر من (الكدر 24) ,, و لو بقيت حريف و كشبتا زى اخوانا الجنوبين زمان,, ابقى شيل شيلتك من باب المدفوعات اللى حينفتح عليك.. عشان كدة انا مع البروف فى فكرة النقل الطارئ و لكن (بالدس) يعنى توقف عربيتك تانى شارع و تجى الموقف كدارى و تقعد تعزل فى الركاب حسب سعة عربيتك و تسوقهم هناك و تطلع بيهم.. اها الرأى شنو فى دى؟؟ هل يعتبر هذا تهريبا ام تحايل على القانون,, و الفتوى فيو شنو؟؟؟

      2. باقى ليك الشباب ديل بعرفو الطيب حوجلى

      3. ههههه لاكين يا فلاديمير ما فضل ليك الا تقول علي الراكب
        تقديم 3 صور كاملة ومن زوايا مختلفه ..
        عواليق انت ياخ داير تستغل حاجة الركاب ,,
        حسب سعة عربيتك ولآ حسب سعة نظرك ؟ آآآي
        طارق اب احمد يمين الما بعرف الزول ده يبقي ما من
        العاصمة المثلثة زاتو مش ام درمان !!
        بعدين البروف قايل الدولة غالباها توفير المواصلات ؟
        الدولة قااااصدة عشان دي ختة من ضمن المشروع الجديد
        (استغل دقائق الانتظار في الاستغفار)

  4. الدراجات بس

    1. الجو في الصين ما حار زي السودان
      والطرق هناك لا يوجد بها حفر كما أنها منظمة
      هنا لو ماشي في الشارع ساكت اجيك بتاع هايس ولا نظامي طاير مستعجل عنده حصانة يخمك يوديك الآخرة

  5. البروف الحبيب
    ذكرت معلومة جديدة بالنسبة لي أن ( عندنا الدولة رافعة أيدا من قصة المواصلات ) وأنا الغبيان كنت مفتكر إنها رافعة
    إيدها من البلد كوووولها !!! تصور !!!
    آخر أفكار نميري وحلوله العبقرية للمشاكل ، كانت أن يترك الشعب أكل الرغيف ويأكل الكسرة ( ودي برضو من حلول وزير ماليتنا الحالي )
    والحل التاني من نميري ، أن يترك الناس العربات ويركبو الحمير ،، أها منتظرين من وزير المواصلات التصريح للناس بالبدء في العمل ،،،غايتو حمارتي أنا جااااااهزة

    1. زمن نميري اقلو كان عندنا خيار نشتري كسره , هسي
      نشتري زاااتا حرمونا منها وقال نعوس عدييييل ,,
      النبي ما بلقي لي عندك حبة طايوق !
      هيييييييي في المواصلات مااا تتكلم ! نحمد الله قالوا
      دار يسوا لينا البص النهري يا يمه , نركب من ابروف
      ونتدلي في المنشيه وأحييييييييي انا من الرفاهيه !
      هو نحنا في البر ما عوامين كمان نخش معاهم المويه ؟

  6. يا بروف النقل الطارئ هو في ذات نفسو فيهو مفاسد كثيرة بدلا عنه أقترح شركة مساهمة لحل ازمة المواصلات ومحظور دخول الوالي أو أي من الدستوريين أو التابعين وتابعي التابعين فيها علشان ما تلحق خط هيثرو

  7. طيب الرجال لو ركبو النقل الطارىء .. الجنس الآخر يعمل شنو مع التحرش ؟؟؟؟

  8. يا خوانا ما برنجييييييييييييييييييييييييييييييييييييييية بينسون بس
    يا طارق (باسطة بيّن شنو المابعرفا) ، لمن تقول لي (الطيب خوجلي) وشارع العدني وباركليز بنك ووودنفاش و…..
    مع اني ما من رواد الزمن الجميل تصدق

  9. انت يابروف الوووات الكتيره ده كان بقت تسد عين الشمس عديل كده برضك مافي والخط مشي في غضب الله والله يعوض الشعب السوداني الفضل بعدين الخط في نظري طز فيه دحين الناس الادوها نص البلد بكل خيراتها دى تحسب ضد او من انجازات الثوره المجيد كلو راح وانتهي وقعدنا نحن ووواتنا والله المستعان

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: