الإجتمال وارد

الاحتمال (بالإنجليزية: Probability) يمكن أن نصفه بأنه أحد الخيارات المتاحة أمام تجربة غير محسومة النتيجة، مثال : تقدم مائة شخص لوظيفة بينهم قريب المدير ما هو إحتمال أن يكون بين الفائزين إذا كان عدد المطلوبين للوظيفة عشرة؟ ( طبعن الإحتمال ما مفروض قرابة المدير دي تغير فيهو من ناحية رياضية وكده)
في الرياضيات تدل كلمة الاحتمال عن القيمة العددية التي تدل على مدى تكرارية هذا (الخيار) عند تطبيق التجربة لمرات عديدة وبهذا يكون (الخيار) الأكثر حدوثا وتكرارا درجة احتمال حدوثه أكبر من (الخيار) ذو التكرار الأقل : مثال لذلك (إذا طلبت من عدة أشخاص أن يختار كل منهم رقم من 1-5 وقمت بتكرار هذه التجربة عندها سوف يكون الرقم الأكثر إختياراً هو صاحب أكبر إحتمال لو أنك طلبت من شخص إختيار رقم من 1-5
دي مقدمة سغيرونية عن (الإحتمالات) وموضوع الإحتمالات على الرغم من أنه رياضي وإحصائي إلا أنه مفهوم حتى عند العامة الذين لم ينالوا حظاً من التعليم ويتعاملون به في حياتهم اليومية .
بما أن الرياضيات واحدة من إهتماماتي فقد توقفت عند خبر في إحدي صحف الأمس يقول أن لجنة تحقيق قد برأت أحدى الوزارات مما أثير حول تعيين الوزارة لثلاث متقدمات إستناداً على صلة القرابة التي تجمعهن بأحد العاملين بالوزارة وقد جاء في التقرير الذي سلمته اللجنة للمسئولين صحة الإجراءآت التي أتبعت في التعيين .
ثم يمضي تقرير اللجنة فيقول أن المتقدمة الأولى تم إختيارها من بين 126 متنافساً (خليكم من ترتيبا كان كم) والمتقدمة الثانية تم إختيارها من بين 55 متنافساً أما المتقدمة الثالثة فقد فازت بالوظيفة من بين 113 متنافساً .
أي انه في ثلاث معاينات مختلفة كان مجموع المتنافسين فيها 294 (لم يوضح التقرير العدد المطلوب) فازت ثلاث متقدمات يمتن بالقرابة لأحد العاملين بالوزارة !
طبقاً لقوانين الإحتمالات فحدوث ذلك بالطبع (شوية صعب) لكنه بالطبع ممكن الحدوث إذا ما قارناه بقصة (عباس) وهي طرفة متداولة تقول أن عباس شاب قوى البنية كان يعمل سائقاً لأمجاد وعندما (عصرتو) الظروف فكر بالإغتراب .. باع الأمجاد .. إستخرج جواز سفر جديد ..
بدأ في ملاحقة سماسرة (الفيز) حتي قام بشراء واحدة .. إنتهي بعد (مساسقة) من عمل تأشيرتي الخروج والدخول .. وقام بقطع (التذكرة) وتحديد موعد الرحلة ..
في عصر ذلك اليوم قام (عباس) بتجهيز شنطته وأغراضه وقام بوداع الحاج والحاجة وإخوته متوجهاً إلى المطار .
ما أن حلقت الطائرة في الجو حتي جاء صوت الكابتن على المايكرفون :
– سيداتي وسادتي .. عند إقلاع الطائرة ونسبه للإحتكاك وحرارة الجو فقد تأكل اللستك الأمامي للطائرة ويجب علينا تبديله والعودة لمطار الخرطوم للتزود بلستك أسبير !
رغم محاولات طاقم الطائرة حث الركاب على التطوع لربط أحدهم في مقدمة الطائرة وتغيير اللستك إلا أنهم (عملوا نايمين) إلأ (عباس) الذي وافق على القيام بالمهمة .. فتم ربطه وإنزاله حيث قام بفك اللستك الذي هوى ساقطاً إلى الأرض وإستبداله باللستك الإسبير وسط تصفيق الطاقم والركاب والطائرة تسدير عائدة إلى الخرطوم .
بعد الوصول لمطار الخرطوم تم تأجيل الرحلة لليوم التالي حتي يتم فحص وصيانة الطائرة فقام عباس بإستئجار تاكسي متوجهاً إلى منزلهم وما أن دخل إلى شارع منزلهم حتي رأي تجمهراً وعويلاً أمام المنزل .. إتجه صوب والدته التي كانت تبكي :
– يمة الحاصل شنو؟
– الحاج مات عباس !
– الكتلو شنو؟
– بس شايل إبريقو ماشئ يتوضأ يصلي المغرب بس جاهو ليك لستك واقع من السماء !!
كسرة :
أي إحتمال في (الزمن ده وارد) !
كسرة ثابتة (قديمة):
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

27 تعليق

    1. قلت كدي اللّخُش … أشوف قصة الاحتمالات دي شنو…لقيت ما في أيِّ إحتمال لي زول يخش وقت الفطور دة

  1. الاستاذ جبرة والسمار الكرام
    الطيارة طبعا سودانير , يا الله الشريف جاب الاطارات من وين وبي كم
    الما عارف يسأل ال عارف

    1. شريف السودان ما شريف نيجيريا

  2. سلامات
    احتمال ان هذه الحكومه تتغير 0% قولوا لى ليييييييييييييه ح اوريكم

    1. الله قادر على الظالم المفترى ………… قولوا آآآآآآميــــــــــــــــــــــــــــــــن

  3. لانو
    .
    .
    .

    .
    الاحتمال ده غير وارد

    1. بالذات كمان بعد الحشرة الاحتماليه وبما انو جات سيرة
      الحشرات , القراد الا يتكتل وهو لاصق ,,

      1. ههههههههههههههههههههه
        الله يجازي محنك الجاز ما بكتله
        ولا اقول ليك نلم الاساتك حتى حق عباس ونولعه ويبقى لينا احتمال واحد من اتنين يا متنا نحن ولا مات القراد

  4. بما انو المقدمين مية ومنهم 99 عارفين نفسهم انهم ما
    قريبين المدير وكل واحد فيهم بقول هسي يكون معانا
    واحد قريب المدير ويطيرنا اذن نسبة قريب المدير =
    99 % ,,
    والله ختيت يدي في قلبي كنت قايلك داير تحكي نكتة عباس
    الكُج الاشتغل بكان همزة تومو , بس الحمد لله طلع عباس
    بتاع الطيارة ,,,
    هي ذااتا لجان التحقيق دي تدين كيفن لو اعلان الوظيفه
    بيتفصل حسب مقاس الزول الدايرين يعينوهو , والله
    ما قعد يفضل الا يكتبوا اسم الزول في الاعلان ,,
    بختك يا خضر تبرنج وتخمس لي روحك براااااااكا ,,بتفطر
    قبل الساعه اطناشر ؟ راهات والله !

    1. ياجنوبي والله معادلتك دي رهيييبه عديل كده
      لكن نعمل فيها شوية تعديلات بما ان كل المتقدمين بقولوا انو لو في قريب المدير حتكون نسبة تعينه 100% وهم 0%

      1. بالمناشبه( نسبة خطا) تعيين شخص غير قريب المدير معدومه

    2. ههههههههههه,,
      وانا كنت قايلو عباس الماشى الكويت !
      احححححححح

    3. لا والله يا جنوبي , بس انتو لما تكونوا بتفطرو شمسنا بتكون غابت

  5. قلت لي اللستك وقع في راس ابو عباس، والله دي قضية الشعب الفضل هو الواقع فوق رؤوسنا شوية! والله دي حكاية عجيبة هو مشكلة التعيين بقي بس علي البنيات ديل دي مسألة في غاية البساطة! حقو تشوفوا البيعينوا في مناصب رفيعة وليس لديهم خبرة ولا كفاءة والواحد علي كيفو الداير يسوي والداير يخلي والمخصصات بلا حدود!!!!

    1. وبالمناسبة حتى البنيات بس السمحات والشينات يمتنعون غايتوا حسبنا الله ونعم الوكيل علي الحكومة والله يورينا يومهم

  6. ما احتمال يا بروف يكون اللستك دا من طيارة اسرائلية ونحن ما عارفين

    1. احتمال كبيـــــــــــــــــــــــــــــــــــــــــــــــــــــــــــــــــــــــــــــــــــــــــــــر …!!!!!!!!!!!!!!!!!!

  7. اختيار أحد غيرقريب المدير اختيار أحد غيرقريب المدير
    اختيار قريب المدير < أو = اختيار أحد غيرقريب المدير ( احتمال غير وارد )

  8. احتمال وارد الحاج ابو عباس يكون مات بالسكتة القلبية قبل وقوع الليستك … عشان عباس سافر و خلى الحاج فى حيص بيص المعايش وعرس البنات ….. كان ركشت عباس بتساعد برضو ….. موضوع قابل لكل الاحتمالات …. يديك العافية أستاذنا الفاضل … لقد أضحكتنى كثيرا

  9. محجوب ود المكى | رد

    تلاقى اللجنة دى زاااتا..كونا ورشح أعضاءها قريب النات ديل زااااااتو….وبعدين من باب العدالة فى توزيع فرص التوظيف..ما ممكن يعينوا أختين..زمان كنا بنقول فى تقسيمة الدافورى”الأخوان ما بنسامو

  10. اها نحن وقعت فينا طامه

  11. يااااااااارب اللستك دا كان وقع فوق راس فلانة ولا الضارة ديك ما كان اخير !!؟
    اححححححح

  12. تعليقك بانتظار الموافقة بالنشر (لمتين)

  13. انا وصاحبتي كنا ماشين معاينة بس هي كانت واثقة أنو شايلنها شايلنها حتى قالت ما بجاوب ولا سؤال وفعلاً شالوها ونحنا ياحليلنا الاجتهدنا بس الله في وما بيظلم احد وليهم يوم

  14. قصة عباس دي قوية يا استاذ ،، قويه شديد

  15. رغم التاخير لكن برضو انا برشح حمار كلتوم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: