دفع الله تااااااني

ما أن تطل قضية تخص (النساء) حتي ينبري لها العضو البرلمان المثير للجدل (هكذا أسموه) .. دفع الله حسب الرسول .. في ظاهرة تبدو فريده عصرها إذ أن الاعضاء البرلمانيون لا يعرف لهم تخصص فالعضو البرلماني هو المتحدث عن جميع القضايا التي تمس مواطنيه الذين قاموا بإنتخابه .
سجل العضو البرلماني (المثير للجدل) يقول انه لم يثر يوماً أي قضية تتعلق بالفساد المالي أو الفساد الإداري أو الإحالة الجبرية للصالح العام أو الغلاء الطاحن أو أي من أنواع الخلل الأخري التي تستوجب المحاسبة والمسائلة .. كل هذه الاشياء لا تجعل (دم) العضو المثير للجدل يثور ويفور ويغلي وفمه يرغي ويزبد وأعصابة تنهار وتفلت .. لكن ما أن يكون الحديث عن (النسوان) حتي (تجيهو الحالة) ويخرج عن الطور صائحاً ومحذراً وذات مرة حاول أن إستخدام العضلات لولا أن أعضاء البرلمان (حجزوهو) !
العبدلله من خلال متابعته للصحف والأخبار قام برصد هذه الظاهرة الغريبة منذ وقت طويل وكتب فيها عدة مقالات كان آخرها بعنوان (يا دفع الله ما حيرتنا) وها هو (دفع الله) يحيرنا اليوم وهو يتابع (هوايته) في السكوت عن (كل المظالم) ويتابع مسيرته القاصدة في الكلام عن (النسوان)!
يقول الخبر: طالب النائب البرلماني (دفع الله حسب الرسول أثناء التداول حول بيان الثقافة والسياحة بالبرلمان وزير السياحة بتنظيف ما أسماه (وسخ) ملفات وزراء السياحة السابقين وقال أنه كان يسميها في السابق وزارة (الصياعة) وأكد أن دليل السياحة في عهد وزراء السياحة السابقين كان يشمل كل ولايات السودان يشار في كل ولاية منها إلى فتاة جميلة وتابع (ده معناتو شنو وداير الناس يجو لشنو؟) !
إنتهي حديث النائب البرلماني (تخصص نساء) والذي يفسر وضع صورة لفتاة جميلة على دليل سياحى أنه دعوة للسياح من مشارق الأرض ومغاربها أن تعالوا فلدينا هذه البضاعة التي سوف تروق لكم .. وهذه والله العظيم فرية يجب أن يعتذر عنها هذا العضو (المتخصص) لجميع أفراد الشعب (الفضل) إذ لم يعرف مجتمعنا السوداني حتي في أحلك (أيامو) وأنضبها أن يستبيح (السياح) فتياتنا ويعد في حكم النادر جداً أن تجد فتاة سودانية تسير في الشارع العام أو تجلس مع سائح في مكان عام (في العاصمة) خليك من الأقاليم !
وحاشا لله أن يكون أحد وزراء سياحتنا السابقين قد قام بوضع مثل تلك الصور لهذا الغرض الدنيئ الذي جال بخيال العضو (المريض) ولو كنت وزيراً سابقاً بالسياحة لما توانيت في فتح بلاغ (قذف) ضده
(عشان يعرف الله واحد) !
أن يقصر العضو البرلماني (دفع الله) مداخلاته ومساءلاته البرلمانية في (تخصص) واحد لا يخرج عنه فهذا شانه وشأن الذين قاموا بإنتخابه ليمثلهم ولكن أن يصف وزراء السياحة السابقين بأن ما قاموا به (وسخ) يحتاج إلى (تنظيف) وأنهم يقومون بوضغ صور الفتيات من أجل غايات دنيئة (كما جاء في سياق السؤال) فهذا أمر يتوجب فيه أن يقوم هذا العضو (المحترم) بالإعتذار عنه امام الملأ وهو أمر لا يمت إلى (الدين) بصلة إذ أن الله تعالي يقول في محكم تنزيله :
(وَمَنْ يَكْسِبْ خَطِيئَةً أَوْ إِثْمًا ثُمَّ يَرْمِ بِهِ بَرِيئًا فَقَدِ احْتَمَلَ بُهْتَانًا وَإِثْمًا مُبِينًا (112) (سورة النساء).

كسرة :
كدي يا شيخ دفع الله خلينا من (النسوان) وشوف لينا نص ميزانية سنار مشى وين؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

18 تعليق

    1. فطرت يا جنوبي والله لسَّه

      1. ههههههه .. هجمك مُش ؟ اصلو طارق ده كده , هجام
        خلاص !! مع انو فرقكم جزء من الثانية ,,
        ارزاااااااق

    2. نفسك طويل زي اسمك كده يااب احمد
      مبروووووكه عليك

  1. ما تفور دمك يا بروف صحيح كل إناء بما فيه ينضح
    بس دا ريحتو ترمى الصقر

  2. وشوف لينا أسامه عبدالله مشى وين برضو

  3. كلام خفيف ذى دا ما بياثر فيه…. عايز ليه كلام من عيار عنتر حرد الليمون…… ولا البرنجيه بقت ما بتكييف؟

  4. خيبه الله ,,,
    هو فعلا عضو عايز بتر !!
    اتفووووووووو

  5. هو النصيحه لله قعد ينبري لأي قضية فيها نسوان إلا يوم
    زولهم المسكوهو مع حريم في نهار رمضان داك ما سمعنا ليهو
    حِس نعل ما كان عيان !؟
    هو ذااااتو وزير سياحه انصار سنة ده كيفن يعني ؟
    غايتو الا كان مع الكعبه السووها دي دايرين يسوا
    غار حراء سوداني وجبل احد سوداني وتبقي سياحه
    اسلاميه !! مِحنْ ,,
    وزير سياحه انصار سنة والشئون الدينية والاوقاف
    تنهشها الكلاب !!

  6. التحية للكل
    الزول دة مشكلتو بس مع النسوان
    حاجة غريبة يا الله يكووون …

  7. البروف العزيز
    الأحباء الكرام
    والله يا بروف إستوقفتني كلمة – في أحلك (أيامو) وأنضبها – ،، بالله عليكم في أحلك من كدا ولا أنضب من دفع الله دفع رباعي دا ؟
    وجاييكم واحد تاني اسمو ابو قرون بتاع الحسبة وتزكية المجتمع – بتاع إشراقة الحاسرة الرأس وآخر تصريحاته ( نحن قبضنا بالتنسيق مع الشرطة على خمسة اغتصبوا فتاة تدرس في جامعة النيلين واعترفوا بذلك ، والبنت قالت استدرجها فنان يغني في قناة النيل الأزرق وهومن الفنانين الجدد وهذا يظهر الآثار السلبية لهذه القناة ولذلك سيقوم بإغلاق هذه القناة تقول لي دفع الله برضو ؟؟؟
    ووووووب علينا وكُر علينا من جنس دا !!!

  8. يا اهل الخير الظاهر دى مفروض تدرس بعدين الترشيح للبرلمان لازم يكون مرفق بشهاده صحه نفسيه الناس العندهم عقد ديل يحلو عقدهم اولا بعدين البلد ليها الاصحاء من الرجال و النساء

  9. يا اخوانا والله العظيم قلنا ليكم الشغلانة فكت منهم وما ان يتزنقو الا ويدخلو بحمد ويطلعو بخوجلي والحكاية انطلت علينا ….يلا نوحد الشمل وفت مرقة للشارع وما بنرجع الا والكاس في ايدنا …. قاعدين علي الهبشة ….
    في ايدنا فاس وقلم رصاص شتلة وكمنجة ومسطرين ….. نبنيك اكيد

  10. …………………عشان…………….ويصبح الوضع ……………..

    والسلام عليكم ورحمه الله تعالي

  11. يادفع الله الباسطه بقت غاليه ولا شنو …….ده برلماني نسونجي ساي يعني خلاص البلد نظفت من الوسخ الفيها من اختلاس وسرقه ونهب

    المره الجايه نكلم ابو ؟؟؟؟ بتاع الكويت يطلب انصار سنه عشان دفع الله ده يرتاح
    حق تشيل حق الناس تخلي

  12. حاج أحمد السلاوى | رد

    الفاتح وبقية صفوة الأخيار …صبحكم الله بالخير

  13. اليوم طالعتنا الصحف بتصريح اخر مثير اكثر للجدل بخصوص الخفاض وقال الماعرف شنو ريحتو عفنة…. التقول شماهو….أهـــا يا بروف حتخلى السمك الكبار وتقعد تضيع وقتك دا مع الصيييير الصغار؟؟؟؟؟

  14. الم يسمع هذا الجهلول بالقروض الربوية والفساد المالي الذي ضرب كل موسسات الدولة ام إنة ظل يتغافل عن هفوات وجرائم الكيزان لكونة احد شيوخ السلطان اسال الله ان يريح البلاد والعباد منه ومن امثاله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: