أوكامبو ذااااتو

في الدول الراقية والمتقدمة يتم منح الأوراق الثبوتية (بطاقة شخصية،جنسية،رخصة قيادة،جواز سفر) برسوم رمزية شبه مجانية وذلك لأن تلك الدول تعلم تماماً أن وجود هذه الأورا ق الثبوتية يساعدها على رصد ومعرفة بيانات مواطنيها ومن ثم تسخير هذه المعلومات في مجال إستتباب الأمن وتقديم الخدمات للمواطن .
لدينا الأمر مختلف تماما .. عاوز تطلع (جواز) أربعمية وخمسين ألف .. عاوز تعمل بطاقة كم وكمين ألف .. عاوز تطلع (رخصة قيادة) مليون وشوية .. والعجب لو واحده فيهم إنتهت وعاوز تقوم بتجديدها .. تلاقي رسوم التجديد (أقل شوية) من رسوم الإستخراج !
لماذا يدفع المواطن كل هذه الألوف لقاء (بطاقة) صغيرة لا تكلف طباعتها وموادها (الخام) أكثر من مية جنيه؟ الإجابة بالطبع ما عايزة ليها درس عصر .. فهذه الأوراق الثبوتية مهمة في تعاملات المواطنين والمواطن مجبر على إستخراجها لذلك لابد من فرض رسوم باهظة عليها عملا بمبدأ أن الحكومة يجب أن (تحلب) المواطن وتطلع (زيتو) وزيت الخلفوهو !
العبدلله شخصياً (رخصتو مفوتة) وجواز سفرو (كذلك) وبطاقتو (نفس الشئ) ليس تهاوناً منه بالقانون لا سمح الله فهو أكثر الناس إلتزاماً بالقانون ولكن لأنو عشان الواحد يقوم بتجديد الحاجات دي (إلا يدخل ليهو صندوق) !
من الواضح أن مسالة إستخراج وتجديد الأوراق الثبوتية أضحت مصدر رزق (للحكومة) إذ لا تتناسب الرسوم المفروضه والخدمة المقدمة لكن خلينا نقول إنو المواطن ممكن يستغني عنها .. مواطن ما عندو بطاقة شخصية يعني شنو؟ (هي ذاااتا الشخصية وينا) ، مواطن ماعندو جنسية (يعمل بيها شنو ما بقينا الجالية السودانية في الخرطوم) ، مواطن ما عندو جواز (القروش البسافرو بيها هي وينا) ، مواطن ما عندو رخصة قيادة .. (يعني شنو لو قبضوك بيدفعوك الغرامة وتمشي تسوق عربيتك) !
إذا كان من الممكن للمواطن ان يستغني عن إستخراج الأوراق الثبوتية الفوق دي كووولها إلا ان هنالك (وزقة ثبوتية) لا يمكنه الإستغناء عنها إذ أنها تدل على حقه في التعليم والعمل والميرات وخلافه وهذه الورقه هي (شهادة الميلاد) والتي أبت حكومتنا (الغاقلة الرشيدة) إلا أن تجعل لها رسوما تجاوزت الأربعين الف !
أليس من العيب والخطأ و(اللا وطنية) أن يطالب المواطن بدفع أكثر من 40 ألف جنيه من أجل تسجيل (مولوده) ألا يعتبر هذا غلواً وشططاً كان على (الحكومة) أن تربأ به إكراماً لهذا المولود الجديد
ودفعا له لمواصلة مشوار حياته (المن غير ملامح فييما يبدو)!
لا أظن على الإطلاق ان هنالك دولة واحدة في العالم تفرض مثل هذه الرسوم الباهظة على شهادات ميلاد مواليدها (ده لو كان في رسوم من أساسو) لكن نعمل شنو لو (الحكومة) بقت زى (النشال) عينا بس في(جيب) المواطن !!
تقول الطرفة أن أدروب (رقيق) الحال قد وضعت له زوجته مولوداً ذكراً باحدي المستشفيات الحكومية (شبكوهو ليك) جيب شاش (يمشي يفتش ويستلف ويجيب) .. جيب حقن .. (يمشي يفتش ويستلف ويجيب) .. جيب دربات (يمشي يفتش ويستلف ويجيب) .. يوم الخروج لم يصدق أدروب انه إنتهي من هذا الفلم (المتعب) فذهب إلى مكتب السجل المدني الملحق بالمستشفي لإستخراج شهادة الميلاد حيث فوجئ بالموظف يطلب منه 40 ألف قيمة الشهادة ، (طنطن ادروب) .. وخرج من المكتب راسو ضارب .. عند إنتصاف النهار وبعد جهد جهيد تمكن أدروب من جمع المبلغ وتوجه لمكتب السجلات :
– أهو ده القروش؟
– (وهو يملا في الشهادة) : إسمك منو؟
– أدروب طاهر على
– أها المولود ده عاوز تسميهو منو ؟
– (بحرقةوإنفعال) : نسميهو أوكامبو ذاااتو
كسرة :
(الجباية) في شهادات الميلاد شئ يدعو إلى الخجل والكسوف .. ده لو فضل فيها كسوف !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟

Advertisements

29 تعليق

  1. برنجية

    من اوكامبو ذااتووو

  2. الأستاذ الفاتح جبرا .. موضوع قريب من كلامك ده هيج علي المرارة ،، قانون الخدمة الالزامية تم وضعه في العام 1984 لحظر مواليد 1964 من السفر الا بعد اداء الخدمة اللاالزامية على اعتبار عمرهم 18 سنة واكثر لكن اكثر دي بقت مطاطة ,, الداير اصل ليه انوحتى العام الحالي 2013 مطلوب مواليد 1967 للخدمة … بتعرف مواليد 1967 عمرهم كم الآن 46 سنة ..
    مع العلم أي مواطن داخل النطاق عليه دفع مبلغ يتراوح بين 85 ج و450ج للسفر ، حسب السفرية والمهنة وجواز السفر .. يعني مواطن يحمل جواز عادي (أخضر تحول الى أسود ) ماشي مصر يتعالج 85 ج + رسوم البطاقة 10 ج + رسوم فحص الجواز 3ج + تصوير المستندات (ودي مهمة ) التصوير يتم بواسطة إدارة الخدمة ذاتااا الصورة ام 50 قرش في السوق عندهم ب 1 ج … وماأدراك ما صور الجواز والتأشيرة والتذكرة ذاتو ..
    مواطن يحمل جواز عادي وماشي أوربا أو أمريكا يدفع 450 ج + كل ما سبق أعلاه .. والعجب صاحب الجواز التجاري أضعاف مضاعفة (ده شطر كبير ) ما صاحب مهنة تجارية أو إدارية …
    بالله عليك بعد صدور القانو بأكتر من أربعين سنة يسقط منه 3 سنوات فقط دي يقولو فيها شنو ؟؟؟ تقول اي حكومة نشالة – النشال ده بيشيل من جيبك وانت ما حاسي بيه (حرفنه) لكن البشيل من يدك وعينك عينك وما تقدر تقول ليه حاجة ده يسموه شنو ؟؟؟ أنت فسر

    1. انا من مواليد 1962 بدفع سنويا الرسوم مع كل اجازة اجى عشرين سنة لحد السنة القبل الفاتت …. الفيها دخل ولدى الكبير الزون وما زلت بدفع وبدفع وبدفع وبدفع وبدفع وبدفع وبدفع وبدفع وبدفع وبدفع وبدفع وبدف …………

      1. يجب ان تدفع حتى تصير مثل دفع الله الاهبل !
        كااااااااااااااك

    2. بسمهوا رباطي وللاجيال الجديدة الما سمعت بتالرباطي اضيف ليهم انه الرباطي سموهوا كدة عشان كان بيرابط في الطريق للناس
      عشان ينهبهم , يعني ذي حملات المرور كدة
      والجبايت في اطراف الولايات والمدن
      الفرق الوحيد زمان البوليس كان بيطارد الرباطة اسي بيحرسم ولا هو زاتااااااااو

  3. هههههههههههههههههههه
    و الله ادروب ليه حق

  4. نجي نخرم لجهاز شئون المغتربين ، معروف عن الشعب للبناني والحبشي والباكستاني والهندي من اكثر الشعوب جاليات في بلاد المهجر المختلفة ، لايوجد مايسمى بجهاز خاص بالمغتربين ، وتعين شخص بدرجة وزير،وهيلمانة من الموظفين شي ضرائب زكاة خدمات جوازات خدمة وطنية ، ماعارف ناس المحليات ماوجدوا مدخل للهبر دا ، وبعد دا كلوا امصوا دم قلبك ومافي اي خدمة تقدم ليك ، ولو حصلت ليك اي مشكلة في الخارج ربنا يعينك ديل لو ماكان ورطوك في حاجة ، والله مشكلة السودان صارت كبيرة جدا وماعندها حل / والله العظيم معاناتنا دي اسوا من مايتعرض له الشعب السورى ،

    1. بقينا دفع رباعي حي تدفع ميت تدفع مسافر تدفع راجع تدفع

  5. ما لازم امنا الحيكومة تورى العين الحمرا للمواليد من البداية عشان بعدين ما يتعبوها زيك يا بروف!!!!!

    1. هههههههههه,,
      صدقت يا حبيب ,,
      احححححححح

    2. ههههههههههههههه ومعاها ضربه من الدايه كمان

  6. من شب علي شئ شاب عليه ,, عشان كده لازم يعلموا
    المولود انو الدنيا دي ما سايبه وأي حاجه بالمقابل !!
    والله يا جماعه مره زمااان قبل حكومة الانجاس دي عشان
    ما نظلما , امي سألتني وقالت : انت يا ولدي البلد
    دي حقت منو ؟ قلت ليها ما حقتنا يمه , قالت والحكومه
    قلت ليها الحكومه دي شان تخدمنا , قالت سمح مالا في
    أي شي تدفعنا قروش ؟ قت ليها ما شان تخدمنا , قالت
    سمح القروش دي قعد تمشي وين ؟ قت ليها ما قعد تصرفوا
    علينا في العلاج والمدارس ( والزمن داك كان العلاج مجان
    والمدارس بيصرفوا لينا كتب وكراسات واقلام )قالت :
    هسي نحن قعد نمرض قدر ده ؟!
    قبل كم يوم كان عندها مقابلة مع الدكتور
    شالت صور الموجات الصوتية ومشت الدكتور طلب منها
    تعمل موجات ملونه , قالت ليهو :هييي انت قايلني
    قعد اسويهن في الضو حجوج ولا عبد المنعم ؟ داير تعالج
    بي ديل عالج ما داير تعالج رجع لي قروش الكشف
    اوكامبو ده بس بلا زنقلنا الكديس في حتة ضيقه وخلاهو
    يخربش فينا ما لقينا منو شئ ,الله يعيقو زي ما عاقنا

    1. والله الطفل السوداني مسكين من اول ما يخش العالم الدايه تلبعو والحكومه تدفعو يكبر شويه ست الروضه تقرصو وتدفعو ..شويه كمان المدرسه تضربو وتدفعو …يصل الجامعه 999تخرطشو والجامعه تدفعو

      يتزوج حماتو تدفعو ومرتو تلبعو اخخخخخخخخخخخخخخ من دي بلد

  7. سلام عليكم
    ازيدكم شوية مغسة عندي اخواني تيمان تقريبا عمرهم الان 32 سنة المهم قامو عملو الخدمة الالزامية اثناء دراستهم للجامعة عشان لما يخلصو الجامعة يكونو انتهو من موضوع الخدمة و فعلا عملو الخدمة و خلصوها طبعا لازم تعمل شهادة اداء خدمة و عملوها و دفعو رسوم استخراج الشهادة ما عارف كم الف جنية بعد كدة مفروض يكون الموضوع انتهي لانهم عملو الخدمة و استلمو بطاقة تفيد بانهم خلصو الخدمة لكن الحكومة ما ممكن تفكك بسهولة كدة قامو عملو فترة صلاحية للبطاقة التي تفيد بانك اديت الخدمة و هذة الفترة هي خمسة سنوات يعني بعد خمسة سنين لازم تجدد البطاقة و تدفع حوالي سبعين الف جنية تاني. يعني اديت الخدمة الالزامية تدفع ما اديت الخدمة الالزامية تدفع يعني في الحاليتن دافع دافع.

    1. وفى الحالتين انا ضاااااايع !
      انا طبعا بطاقتى انتهت ولما مشيت اجددها قالوا لى جيب خلو الطرف الاصل !
      وااااااااااء,,
      طرفى خالى وحالى بالى ,, وما لاقيهو ,,
      واااااااااء,,
      دفعونى سبعين الف وطلعت كرت سفر طلعت بيهو !
      وااااااء وااااااااااء , بالوردقاااااااار بودااابااااااا ,, كاااا بوداااااابااااااااا

      1. و ازيدك من الشعر بيت..مشيت في رمضان الفات دا عشان اجدد بطاقه الخدمه ..الموظف بشيل منك الرسوم و الباقي 3 جنيه بقول ليك فكه مافي و بخوتها قدامك في جيبو ..و لو قولت عاوز حقك ..بقول ليك استني بيه جاي عشان تحلف في المصحف انك اديت الخدمه ..البحلفك منو في المصحف؟؟ المرتشي دا ذاتو في نهار رمضان خاتيهو في التربيزه و بياكل حرام في وش المصحف!! حلفت و شلت منو ال3 جنيه .. في واحد وراء في الصف ما حلف .. لما طلعنا قال الحمدلله ..ما قالو لي احلف..لانو في واحد جانا في الحله (الطائف) كان ببيع في البطاقات دي و بالهظار قولت ليهو : جيب لي معاك و احده؟؟ تاني يوم وصلتني و الا دفعت حقها بالاقساط ..
        كفابه و الا اقول ليك موظف الارشيف لما جات صلاه الظهر قفل عليهو المكتب و فرش التربيزه و نام و نحنا منتظرين في الحر .. و لما ضربنا الباب عشان اخارجنا ..قال لينا : انتو ما بتعرفو الصلاه كمان!!
        و الاجراءات في شارع العمارات عاملينها ذي سيرك كدا ..بين تلات مباني ..اليوم كلو تخش من هنا و تمرق بهناك ..و كل مره تقابل الناس المعاك في الممرات و تسالوا بعض ( اها يا زول لسه؟؟) الله لا كسبهم يااااااخ..
        بعد دا كلو عندي طالبه من ال المهدي بتقول لي يا استاذ عندنا واحد في الخدمه بجيب البطاقات دي لاولاد اهلي في البيت..و نحنا نشتغلها 15 شهر و ناس ماتت فيها و شبعت موت ..

      2. طبعا انا حلفت بالتقطعنى ما امشى افتح بلاغ فقدان وآثرت دفع ال70 الف جنيه نظير كرت السفر ,,
        لك الله يا وطنى الجريح ,,,,

  8. عندي عريس جاني في كسلا مسافر شهر العسل اسمرا طبعا ده عرس قايم بزاتو، شقة ب١٥٠ج لليوم الواحد، تعال شوف تسريح السفر لاسمرا:
    * ناس الامن اسمك منو ؟ قبيلتك شنو؟ سبب الزيارة؟ بما انو السؤال الاخير معروف!
    ناس الجوازات : جيب ٦٣ الف رسوم اورنيك، امش الخدمة الوطنية ، طبعا زولي عندو خلو طرف بس قالو دا ما شغال بس البطاقة الممغنطة، يا اخوانا ده ما يعني قضيت الخدمة الوطنية، لا لا جيب ٨٠ الف، طيب ادونا اورنيك ١٥ حسب كلام أستاذنا جبرا، قالو يا أخينا نحن قروشنا كلها مجنبه

  9. انا غايتو يا بروف كان حلبونى لا باكر ما بلقونى عندى نقطة !
    وااااااااااء

    1. شمباتى ياخوي
      نحن دايرين نقطه سطر جديد للحكومه دي

      1. سطر جديد ّ!!؟؟
        لاااااااااااااااااااااااااااا ,,
        استيكتك وينها ياختى؟؟

      2. مسح الكتابه هيييّن ! نان الشخيط العملوهو
        بي قلم الكوبيه ده تمسحو كيفن ؟
        أححححححححح

      3. شخيت وين اي دا !!؟

    2. شخيط صديقنا منقو !!
      من هسه وبقيت تنسي ؟

  10. في اليابان تدرس مادة من أولى ابتدائي إلى سادسة ابتدائي اسمها “طريق إلى الأخلاق” يتعلم فيها التّلاميذ الأخلاق والتعامل مع الناس !!لا يوجد رسوب من أولى ابتدائي إلى ثالث متوسط، لأن الهدف هو التربية وغرس المفاهيم وبناء الشخصية، وليس فقط التعليم والتلقين !!
    والفرق بين السودان واليابان ؟؟؟؟؟
    حلاق البشير كل مره يجيب لي سيرت اوكامبو لييييييييييه؟
    عشان شعر راسو يقيف

    1. والله صحي يا قويه نحنا قعد يحبطونا من صغرنا !!
      جيت الكم ؟ امشي يا بليد , وكفيت ودق سوط يمرقوا
      العلم من نفس الزول !!

  11. الاخ العزيز
    انا مقيم بالمملكة العربية السعودية (اجنبي) قبل اسبوع جاني مولود والعاقبة عندكم وطبعن رحت عشان اطلع شهاده الميلاد ومعي التبليغ من المستشفي وطبعن هنا في السعودية بتاخد موعد بالنت قبل ما تروح الاحوال المدنية الحكاية منظمة عشان الزحمة والناس ما تقيف في الشمش مازي الدول التانية ورحت وقدمت الاوراق واستلمت الشهاده طبعن دفعت فلوس كثيرة ( صفر ريال) مع اني اجنبي
    غريبة مفترض انا اجنبي ادفع قروش , والولادة كانت بالتامين في المستشفي اخر اهتمام ، مستشفي نظيفة والله انا زمان في السودان بقرف اكل في المستفي لكن هنا من غير مواخذة ممكن تاكل في حمام المستشفي . يعني والحمد لله دفعت حق الحلاوة بس .
    ربنا يحفظ السودان من كل شر
    هي لله هي لله ولا نامت اعين الجبناء

  12. استاذ عندنا هنا لينا اكثر من سنة مافى شهادة ميلاد طلعت اى زول شايل بيانات المولود فى ورقة و منتظر الشهادات تصل .
    السبب شنو ؟
    الشهادات بيتم طباعتها فى مطبعة العملة قالو و الرئيس قال شهادات الميلاد تطلع مجان و بتاع المطبعة قال بقروش و الى الان ما تم الاتفاق و منو الحيمشى كلامو ما عارفين او قول عارفيين .
    الان اذا محتاج شديد لى شهادة الميلاد بتاعة مولودك صدق او لا تصدق (((( تدفع 2000 ج فقط الفين جنيه لا غير )))

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: