نقول شنو؟

ينفع أبدأ المقال بعبارة (والله الواحد ما عارف يقول شنو؟) .. لأنو والله العظيم الواحد فعلاً ما عارف يقول شنو؟ الموضوع وما فيهو الفساد البقى عيني عينك عديييل كده .. الفساد المغتغت خليناهو .. والفساد القالو ودوهو النائب العام منتظرنو .. طيب الفساد الجديد لنج والواضح وسكوت الحكومة عنو ده يقولو عليهو شنو؟ خلاس الناس بقت تفسد بالمفتشر .. خلاس الناس بقت عينا قوية للدرجة دي؟
شنو لمن الحكومة تخصص ليها مساحة من ساحة مسجد الناس قاعدة تصلي فيها في الأعياد وتستخدمها في المناسبات عشان يبني فيها زول مدرسة خاصة الطالب بي كم مليون في السنة؟ هسه أنا الفاتح جبرا ده ولا أي مواطن ممكن يدونا الواطة دي؟ طبعن لا .. ده شغل التكتكة واللف والدوران .. المصلين رفعوا مذكرة للجهات المسئولة ؟ لكن يبدو إنو الجهات المسئولة شايفة إنو الموضوع ده موضوع عاااادي وما فيهو حاجة .. وما فيهو أي شبهة فساد .. زول قال عاوز يشتري ساحة مسجد .. قالوا ليهو جداً ياخ .. قامو (مسحوها) وعملو ليها الكروكي وأدوها ليهو .. قام عمل (الخرط) وقعد يبني !!
.. طبعا الكلام ده حصل قبل حوالي شهرين في مربع 69 بالمعمورة .. وطبعن حصل قبل كده في مواقع وأماكن كتيرة .. ميادين كرة (إنقلبت) بين عشية وضحاها قطع سكنية .. المدينة الرياضية إتوزعت (سكن) ومحلات تجارية و(جمعيات وهمية) وبقت (كمونية).. لم تسلم (ساحة) أو (مساحة) من هذه الهجمة (المغولية) ولكن أن تصل المسالة حد (بيع ساحات المساجد) فدي بتخلي الزول فعلاً ما عارف يقول شنو؟
بقي أن نعلم أن المدرسة المراد تشييدها هي فرع من مدارس كامبردج والتي يقال أنها ملك للوزير أمين حسن عمر إلا أنه نفي ذلك وقال أنه فقط رئيس لمجلس الإدارة وأن المدارس (بتاعت خالو) !
بمناسبة التغول على ميادين الكرة والساحات داخل الأحياء العبد لله يري أنها واحدة من أسباب تدهور الكرة السودانية .. فقد كانت هذه الميادين والساحات (السهلات) يمارس فيها صغار ولشباب الحي (الدافوري) وكرة (الشراب) وما أدراك ما كرة الشراب تلك الكرة التي لو تمكنت من السيطرة والتحكم بها لصار لك (الكفر) حاجة أسهل ما يكون ولكانت دقتك في التصويب و(الباصات) بالسنتي .. لذلك شئ عادي الآن أن تكون باصات اللاعب لخصمة في المباراة أكثر من باصاته لزميله وتصويباته نحو (الكشافة) أكثر من تصويباته نحو المرمي .. وده الخلانا لينا مية سنة لا شلنا لينا كأس وللا حتى (علبة صلصة) .
كسرة :
بالله بعد ما إنتهيتو لينا من(الميادين) ما تقبلو لينا على (المساجد) عشان المساجد دي هي لله وكده
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟

25 تعليق

    1. كأس سيجارة البرنجي الزمان داك ما كاس اليومين ديل

      1. الجماعة ما فكوا شوط الدين خلاس

  1. يمكن شان ربنا خاليهم لحدي هسع قايلنوا راضي !
    غايتو كان مدارس كامبردج القرآنية ما فوكا حاجه .
    هو ذاتو ما خلاص حقنا كوولو كملوهوا بعد ده الا
    يقلعوا حق الله !
    انتو شنو قصة الخيلان الحاصلة دي ؟!

    1. ههههههه,,بخلخل ضروسك انت !

    2. قال حقت خالو قال …..والله عجبتني حقت خالو دي …. كده تاني قولا يا …… هههههااااي
      الخال خالي وانا ود اختو …. هو من …… وانا من …..
      طبعن جنوبي عارف بس هو زولا غتيت
      والجني خال يا ناس الخير
      الله يخلع ويقلع حقت خيلانم كلهم بركة الصلاة وقال يا الله
      اميييييييييييييييييين

  2. الماعندو خل يشوف لية خال – عشان لمن يزروهو ويقولو ليهو من اين لك هذا – يقول دا حق خالي – وبعد شوية ح يكون في عطاء لاستيراد خيلان من الصين –

  3. والله حقوا أي زول يجيبوا ليه ولد الأيام دي يسمسهو أوكامبو …زى عمك الهدندوى ………..حرب نفسية وكده

  4. سمحة المقدرة .. اذا ما في محاسبة فافعل ما شئت ..

  5. سمحة المقدرة .. لو ما في محاسبة فافعل ما شئت ..

  6. أنصح الأستاذ الفاتح جبرة بتناول حبوب الضغط والسكري والصداع وجميع الأمراض المزمنة والغير مزمنة قبل قراءة قصة الفساد الآتي:
    http://meshkat.net/content/28703
    جمعتني الصدفة ذات يوم – والصدفة من القدر –بطبيبة من دولة خليجية، تحمل مؤهلات عالية وتعمل مستشارة لجهة خيرية ضخمة تنفذ عدداً هائلا من المشروعات الخيرية في دول إسلامية مختلفة، حكت تلك الطبيبة لي ولمن كان معي من الحضور قصة تستحق التأمل، أرويها وأحذف بعض التفاصيل والأسماء والأماكن لما في ذكرها من حساسية، خاصة وأن القصة لم تجد طريقها للإعلام، تقول الطبيبة:
    كنت مشرفة قبل أسابيع قليلة على مشروع ينفذ في السودان هو واحد من عدة مشروعات أشرفت عليها في هذا البلد، بل كنت السبب في توجيهها إليه وناضلت من أجل ذلك، لما للسودان وأهله الطيبين من مكانة في نفسي، كان ذلك المشروع عبارة عن أجهزة طبية موجهة لإحدى المستشفيات الحكومية المعروفة بالاتفاق مع الجهات الرسمية، وعلى وجه الدقة كانا جهازين متطورين على مستوى عالٍ، واحد لقسم الرجال والآخر للنساء، وكل منهما مجهز بملحقاته الكاملة، حيث بلغت التكلفة عدة ملايين من الدولارات. وجئت إلى السودان ومعي وفد من الجهة المتبرعة لأتأكد من تسلّم المستشفى للجهازين. طفنا بأرجاء المستشفى ومعنا الموظف السوداني المسؤول الذي باشر التنفيذ، حتى وصلنا إلى حيث وضع الجهاز الذي احتل مساحة كبيرة بملحقاته الضخمة وتأكدنا منه ، ثم طلبت رؤية الجهاز الآخر فأخبروني أنه في المخزن وأن الموظف الذي معه المفاتيح هو الآن في مدينة أخرى خارج الخرطوم، قلت لهم لابد من رؤية الجهاز لأنني سأكتب تقريراً يفيد بإشرافي على ما تم ولا يمكنني أن أكتب ذلك إلا إذا اطمأننت على رؤيته بنفسي، حاولوا إثنائي عن الأمر بحجة أنهم لا يمكنهم استدعاء الموظف فطلبت منهم إرسال من يسافر إليه ويأتي بالمفتاح، ومازلت بهم حتى وعدوني أن أرى الجهاز بعد ساعات قليلة فوافقت، ولما جاء الموعد أخبروني بأنهم أحضروا المفتاح وتوجهنا إلى المخزن وأعضاء الوفد الذي معي يلومونني على تأخيرهم بسبب تعنتي وتمسكي بتفصيلات صغيرة، وبالفعل رأينا الجهاز وطفنا بملحقاته وتهيأ بعض من معي للانصراف ولكنني توقفت فجأة عند إحدى القطع لألمح على الغبار الذي يغطيها علامة حديثة مرسومة بأصبع اليد..!! نعم .. أنا أعرف جيداً هذه العلامة وأذكر جيداً أنني قمت برسمها بنفسي صباح اليوم على غبار الجهاز الأول..!! ساعتها كنت أستمع إلى حديث أحدهم ومررت إصبعي بصورة تلقائية لأرسم تلك العلامة.. رفعت رأسي وقلت لمن معي: توقفوا.. أهذا هو الجهاز الثاني؟ قالوا: نعم. قلت في حسم: أنا الآن أريد أن أرى الجهاز الأول.. نظروا إلي باستغراب واتهموني بعدم الجدية وإضاعة الوقت، فأخبرتهم الخبر.. وواجهت الموظف المسؤول وهددته باللجوء إلى الشرطة حتى اعترف في نهاية الأمر وياله من اعتراف..!!
    اعترف بأنه باع الجهاز الآخر لحسابه الخاص..! باع الجهاز الذي جاء ليخفف آلام المرضى ويمسح دموعهم..! الجهاز الذي صُرفت فيه من أموال المتبرعين دولارات تصطف في مبلغها ستة أصفار بِيع بثمنٍ بخسٍ لأحد مواطني دولة مجاورة يريد أن يؤسس مركزاً طبياً خاصاً في بلده..!
    تقول الطبيبة: ذهلت للمفاجأة.. خاصة وأنني كنت أتوقع أن أجد خيانة الأمانة في كل مكان إلا في السودان..! هكذا تقول.. ثم إنها توجهت إلى الموظف المسؤول وهددته في حزم بأنها سترفع أمره إلى أعلى مستوى إن لم يعد الجهاز نفسه، حاول أن يسترضيها ويعدها بإرجاع الثمن لكنها كانت حازمة صارمة، وكان هو على ثقة بأنها يمكن أن تنكّل به لما لها من صلات بحكم موقعها، وبعد أن عاش فترة عصيبة استطاع أن يعيد الجهاز بالفعل، لأنه لم يكن غادر البلاد بعد.
    سألت الدكتورة عن العقوبة التي نالها ذلك الخائن، فقالت: إنه عمل معنا فترة من الزمان وأعلم أن له زوجة وعدداً من الأطفال فلم أرد أن أتسبب في ضياعهم وتشريدهم، وكان هدفي أن يعود الجهاز ليخدم الضعفاء والمرضى وقد تحقق لي ما أردت، فلم أبلّغ عنه واكتفيت بإعفائه من عمله معنا.
    قلت لها إنني أقدر عاطفتها وأشكر فعلها، ولكني أخالفها الرأي فهذا المجرم كان ينبغي أن يلقى جزاءه دون رحمة، الرحمة لها موضعها ولها من يستحقونها وليس هذا أحدهم، بل إن في عقاب مثل هؤلاء رحمة بالمجتمع، إنهم كالعضو الفاسد لابد من استئصاله قبل أن يسري الفساد إلى باقي الجسد.
    ترى كم من التبرعات وجهت إلينا ولم تصل إلى وجهتها..؟ وكم من الأموال انتقصت قبل أن تصل إلى مستحقيها؟ وكم من الأجهزة والمعدات سطا عليها قطاع الطرق العصريون؟
    ترى كيف ينعم إنسان وهو يختطف اللقمة من أفواه الجائعين؟ كيف يهنأ إنسان وهو ينزع حبة الدواء من يد المريض المسكين؟ كيف يقر له قرار وهو يسرق البسمة من شفاه الأطفال المحتاجين؟
    ترى كيف طاب لذلك المجرم أن يخون أهله وعشيرته؟ كيف استساغ أن يلطّخ سمعة بلده التي طالما عُرف أهلها بالأمانة والنزاهة، حتى صار بعض الإخوة في دول أخرى يأمنون السوداني على أموالهم وأعراضهم أكثر مما يأمنون أهل بلدهم.
    ترى كيف تجرأ ذلك المجرم على حرمات الله؟ كيف يظن أنه ينجو يوم القيامة من عذاب الله يوم يتعلق الرجل بالرجل فيقول: بيني وبينك الله، فيقول: والله ما أعرفك! فيقول: أنت أخذت طينة من حائطي، وآخر يقول: أنت أخذت خيطا من ثوبي..!!
    ويأتي ذلك المجرم لا ليخاصمه الضعفاء والمرضى ولكن ليكون خصمه رب العزة جل جلاله.. فأين المفر؟.. نعوذ بالله من غضبه وأليم عقابه..
    أخيراً.. التحية لتلك الطبيبة ولأمثالها ممن يقدمون الخير ويبذلون الجهد.. والله عنده حسن الثواب.

  7. لا حول ولا قوة الا بالله ….. الناس مستنية شنو بعد دى …. أفتكر بعد كدى حا يدخلو البيوت وشيلو الحيشان و الجد يتكلم ………!!!!!!!!!!!

  8. يا الفاتح يا اخوى الراجل خطرى اختاه

  9. Ustaz Jabra Salam
    For almost 3 to 5 years ago, the same senario had been done in Mrabaa 5 , Emtidad Shambat . There were 2 squares where the young students of Wad elSaieh Higher Secondary School play football and the people do their Eid prayers on that area because they were connected together. Suddenly a tall building of 5 floors swollowed half of that area which happened to be to the North of Dr. Abdelrahim Hamdi the Minister at that time. 2 years later a private school of 2 floors occupied the rest of that area and they said the owner is Dr. Ghazi Salah ElDin’s sister. No body can say anything about playing football or praying Eids prayers because it seems that the people around are not considered as Moslims.
    Wa kolo shi lilah as usual!
    They forgot that history will not erase their mistakes and Allah will punish every one of them in the hereafter.

    1. سبحان الله تقرا بالعربي وتكتب بالانجليزي
      تبتبا تبتبا تبتب باكر تعرف تقرا وتكتب وياما تخطط

      1. دا واحد من ناس الما نافع

  10. يابا انت المدارس هيل منو ََ؟ هيل الحكومة ,, نوم,,
    يابا انت الجوامع هيل منو ؟؟ هيل الله ,, نووووم ,,
    وما بقدر اكمل بعد دا !
    احححححححححححح اي بلد ,,

    1. نان وكت الجوامع هيل الله , مااالن
      دع يقولوا جامع فلان وجامع فلانة ؟!
      وآآآآ بنوم انا دار انوم في حضن ابوي
      شان االبحر ,,
      كسرة
      لاكين طول اجازتو ابانا لامن كملا
      وفات حرام والله نحنا البينا ارحام

      1. هههههههههه,,حامضة منك يا حبيب ,,
        ظروف والله ,,
        نوم يا قشر ,, نووووووم

    2. صح يابا فى الجامع:جا تمساح إنبطح……أي الحسن…ياباالتماسيح مسلمين……لا ,مجرمين:لابسين دقون,شايلين سِبح,ما تضربوهن بالسلاح وتكًتلوهن تاح تراح
      والله يا جنوبي وصاحبك الشمباتي داك …….جهجهتونا جهجيه الضو
      ليه كل ما الخريف يمرق وخير البلد يمرق جم
      نلقاهو يشرب في جرن خيلك نفير كعوكا فيك اتلم
      والبقة علي قرع كاسك تهش اسرابا بالكم
      من الليله انا عندي
      كسرة ثابتة ( لا ريال لا برشلونة )
      قال حقت خالو (و)

  11. يمهل ولا يهمل… يمهل ولا يهمل… الله أكبر الله أكبر الله أكبر… علي كل من طغي وتجبر الله أكبــــــــــر

  12. مادام امنا الحكومة بتوزع الفسحات لي الله ساي وبدون محسوبية انا بقترح أنو فسحة مسجد النور تكون مقر لمنظمة ذات المسير موقع استراتيجي وكدا ولا احسن نخليها ليهم اصلا قروش الحرام ممحوقة

  13. حسبنا الله ونعم الوكيل . والله اكبر على الظالمين والطغاة المتجبرين الله اكبر الله اكبر على كل من ظلم وتجبريمهل ولا يهمل

  14. بسم الله الرحمن الرحيم,
    اللهم ياموضع كل شكوى ياشاهد كل نجوى وياعالم كل خفية، ويا كاشف كل بلية ويامنجي موسى ومحمد وإبراهيم الخليل صلوات الله عليهم أدعوك يا إلهي دعاء من اشتدت فاقته وضعفت قوته وقلت حيلته دعاء الغريق الملهوف المكروب المشغوف الذى لا يجد لكشف مانزل به إلا أنت ولا إله إلا أنت فارحمنا يا أرحم الراحمين واكشف عنا مانزل بنا عدونا وعدوك الشيطان الرجيم ومن هؤلاء القوم الظالمين الباغين يارب العالمين إنك على كل شئ قدير واغوثاه يالله اللهم يابارئ لاشريك لك يادائم لا نفاد لك ياحي يامحي الموتى يا قائما على كل نفس بما كسبت إلهي إنك أنت العزيز الجبار.

  15. فى مقولة بتقول .. الما عارف يقول …..عدس ..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: