حبر مافي

من أشكال أكل أموال المواطنين بالباطل والتي إنتهجتها كثير من المؤسسات الخدمية الحكومية أن يقوم المواطن بدفع رسوم ما فيفاجأ بأن المكتوب في الإيصال يقل عما قام بدفعة .. وبالطبع لو أن المواطن عاوز يعمل فيها (تفتيحة) فإن معاملته لن تمر !
سبق أن نبهت أخواننا في قيادات الشرطة عبر مقال عن مثل هذا التجاوز بأحد مكاتب السجل المدني بمدينة سنار .. وطلبو منا بعض المعلومات وقاموا بإستجواب الشخص الذي قام بالتبليغ .. وبعد أشهر من الواقعة علمت من نفس المواطن إنو (الشغلانية مدورة لسه) فقمت على الفور بكتابة مقال أنبه فيه إلى ذلك واطلب فيه من أخواننا في الشرطة الرد لكن للاسف (صهينوا) !
لم يمض على ذلك وقت (قليل) حتي أخبرني مواطن بانه قد تعرض (للشئ ذاتو) في مكتب إستخراج البطاقة الشخصية بمدينة بحري إذ وجد أن المبلغ المسجل بالإيصال يقل عما دفعه حقيقة .. فكتبت منبها الإخوة في الشرطة بان هنالك مبلغا من المال لا يظهر في (الإيصال) .. وبرضو لم يرد علينا إخواننا في قيادة الشرطة حتى هذه اللحظة … والعبد لله لن يندهش لو ان (الشغلانه) لسه مدورة فالتعامل مع (حال سنار) السابق يغنينا عن (سؤال بحري) اللاحق !
وكما أن هنالك فساد مالي فهنالك فساد (إداري) وهو الإهمال وعدم القيام بالمسئولية كما يجب والذي يتضح في هذه القصة والتي تكون قد واجهت الكثيرين مثلي ..
في بداية شهر يناير الماضي قمت بترخيص عربتي بمجمع الترخيص بالمنطقة الصناعية بحري .. وبعد دفع الرسوم (المتلتلة) والملف (الإجباري) أبو عشرة الف والذي لا يساوي ثمنه (ألف جنيه) (البدون إيصال) والما معروف قروشو بتمشي وين ؟ إنتهيت من كل مراحل الترخيص وتم تسليمي (اللوحة) :
– ممكن تدوني شهادة الملكية الممغنطة ؟
– والله يا استاذ (حبر مافي) ممكن تجيها بعد كم يوم !
بعد كم يوم إستقطعت من وقتي و(بنزيني) وقطعت المسافة من منزلي (أم درمان) إلى مجمع الترخيص المزدحم (بحري) وبعد مدافرة ونحنا ناس (عيانين وكده) وصلت إلى الشرطي :
– يا إبني أنا … (وحكيت ليهو الحكاية)
– والله يا حاج (الحبر لسه ما وصل) تعال لينا بعد كم يوم
عندما تكررت المسألة حوالى أربع مرات أقسمت بألا اذهب مرة أخرى إذ ليس من المنظق ولا العدل ان أهدر وقتي ومالي وصحتي من أجل خطأ يرتكبه غيري .

عن طريق الصدفة وفي تلك الأيام (يناير) إكتشفت أن (رخصة قيادتي) تحتاج إلى تجديد فحملتها وذهبت إلى (البينية) بالملازمين حيث وجدت ضابطاً برتية (رائد)
– عاوز أجدد رخصتي لو ممكن الإجراءآت شنو؟
– والله يا استاذ (حبر مافي) !!
بالطبع لم أذهب مرة أخري .. إنتظرت متوقعاً أن يصدر الإخوة في الشرطة تنويها للمواطنين عبر وسائل الإعلام تخطرهم بوصول (الحبر) عشان يجو يستلموا شهادات عرباتهم أو يجددوا رخصهم لكن ذلك لم يحدث إذ يبدو أن (الشرطة) عايزه المواطن كل يوم يومين يمشي هو يسال !
أخي مدير عام الشرطة :
لو قلتا ليك إنو (العبدلله) كل يوم والتاني ح يقوم يبطل شغلو ويقطع (المسافات دي) عشان يمشي يسأل ناس الترخيص (جبتو الحبر) .. أو ناس رخص القيادة (الحبر جاكم) ويقولو ليهو (لسه ) يكون بيكضب عليك .. أنا الآن اقود عربتي دون (شهادة بحث ممغنطة) وبرخصة قيادة (غير مجددة) وأجد نفسي غير مخالفاً للقانون ولو تصرفي ده (غلت) قولو ليا فالعبد لله ليس مسئولاً عن أخطاء من بيده مقاليد (الحبر) !!
كسرة :
نرجو من الأخ مدير عام الشرطة التعليق على هذا المقال .. وهل (الحبر جا) وللا (لسه) وبالمرة الرد على حكاية (سنار) و(بحري) دي والحصل فيهم شنو عشان نطمئن وكده؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟

22 تعليق

    1. معاااااااااااااااااااااكم

  1. هههههههههههههههههههههههه,,,
    متخيل مديرالشرطة دا ينتظر لحدى ما مقالاتك تصل خمسة او ستة ويرد عليها مجمعة !
    لانو حصل موقف هنا من قبل الوزارة بعد سنة كاااااملة ردوا لينا بخطاب واحد !
    وسووووووحى آييييا بالجنبة موووووحى ,,

    1. سوحي بالجمبات ايييا حريقة في شمبات ترلاالا
      رجعاتنا لزمان الكدرو يا خ

      1. زمان الدلوكة المشدودة,, مش ؟؟؟؟؟

  2. الأستاذ المسكين الفاتح جبرا
    جبر الله كسر معنوياتكم … وقريب من موضوعاتك دي وبما انك صحفي اقترح عليك ان تتولى رئاسة تحرير جريدة يومية إخبارية ولكن ليست سياسية ولا رياضية ولا حوادثية … جريدة تتولى إخبار القارئ عن التجاوزات الموجودة في حياة المواطن السوداني في كل المرافق ومناحي الحياة … أبدأ ب12 صفحة وبعد داك حسب المواضيع زيد عدد الصفحات .. والكتاب حيكونوا بدون مرتبات ( مجاني ساااكت ) ما أهل مغس … والتوزيع برضو مجاني … والحبر مجاني .. بس شوف ليك حل للورق ده ( دي إمبراطورية لا يمكن شقها ) وأسأل عنها …

  3. كسره مليونيه (اخبار المحبره شنو)
    مقاديف مافى عوم ساكت مع العايمين ؟؟؟؟؟؟؟؟؟؟؟

  4. والله أنا مرة مشيت أجدد جواز السفر .. ودخلتا ليهم الجواز منتظر ساعتين وبعده مشيت للضابط قال لي أسمك خشه السيستم بالغلط وقعد يعقد لي الشغلة وأنا زول مسافر تاني يوم .. عاوز أفر من البلد المرض دي بأي طريقة .. قلتا لي طيب المطلوب شنو يعني هسي في الحالة دي .. قال لي الشغلة دي بتمها ليك هسي دي بس جيب خمسين جنيه !! نخيل ضابط كل نجمه في كتفه تنطح التانية عاوز ياكلني والكذب باين في عيونه .. لكن العبد لله غلبان و ما عنده خيار تاني غير يدفعها .. أعمل شنو بس

  5. هو في أخلاق علشان يكون في حبر؟
    عفواً كنت عايز أعلق بصورة أفضل وأوسع لكن ….
    لكن [مافي حبر] – يرحمنا الله!! !

  6. حبر مافي يعني في زيادة من رخص القيادة المنتهية وزيادة
    من شهادات الملكية المنتهية وزيادة في ايرادات مخالفات
    المرور !!
    الايصالات دي قعد يلقوا ليها حبر وين !؟

    1. هي لا !!
      انت مالك مستحرج كده !!!
      ياخ ما تدفعو الفسالة ليكم شنو ؟

  7. برنجية… وانا رخصتي منتهية… وحبر ماااافي

  8. سلام عليكم
    عندي قصة بمناسبة ناس الشرطة ديل, عندنا واحد صاحبنا اخد والدته للسفارة الامريكية في الخرطوم لعمل تاشيرة زيارة لامريكا و للمفاجاة ناس السفارة اكتشفوا خطأ في اسم والدته المكتوب باللغة الانجليزية يختلف عن المكتوب باللغة العربية فقام صاحبنا بالتوجه للجوازات و فعلا تم تعديل الاسم ولكن طالبوه بدفع مبلغ 70 جنية رسوم تعديل اها صاحبنا رجع للسفارة مرة اخري و لكن ليكتشفو خطأ أخر وهو تاريخ الميلاد المكتوب الانجليزي يختلف عن المكتوب العربي و مرة اخري يذهب للجوازات لتعديل الخطأ و مرة ثانية يدفع رسوم تعديل يعني بالعربي كدة تعديل الجواز ده كلفو اكتر من سعر جواز جديد و الغريبة انو ناس الشرطة يغلطو و المواطن المغلوب علي امره يدفع الثمن بالزيادة.

    طـــــه

  9. لو جابو الحبر المخالفات بتقل بالتالي التوريدة الخارج الأيصا ل بتقل هم بليدين عشان اجيبوليك الحبر يا أستاذ

  10. هو ناس الشرطة كان بشوفو شغلم كان ناس الجبهة الثورية داهمو ام روابه وماتلاها وروعوا المساكين ونهبوهم وبهدلوا حالهم…..الله يكون في عون الشعب الفضل

    1. وحات الله شايفين شغلم
      شرطة وكمان عسكرية ! اتواضعو واشتغلو ليكم حلاقين !! اتقطعو هم ؟؟

  11. مالك ابوالحسن | رد

    أنا صاحب مكتب استخدام وبالامس كان هناك اربعة شباب جاءتهم عقود عمل بالخارج وبداوا في إجراءاتهم وعندما جاؤوا لإجراءات استخراج الإعفاء او الاستثناء من الخدمة الوطنية دفعوا مبلغ ٩٦جتيها بدون اي اصلا هذا الإجراء تم في مكاتب الخدمة الوطنية بشارع ٦١ ثم تكرر نفس السيناريو عندما أرادوا استخراج تأشيرة الخروج من المغتربين دفعوا مبلغ ٧٥ جنيه بدون اي إيصال للحصول على التأشيرة

    1. ما قالو ليك حبر مافي، الايصالات دي يكتبوها بشنو يعني؟

  12. بالنسبة للحبر يا أستاذ وصل من فبراير أنا استلمت رخصة قيادة بتاريخ 4/2 ، أما عن الرسوم غير المنطقية التى يدفعها المواطن المسكين فهناك مبلغ 80 جنيه أى نعم ثمانون جنيه ، تدفع فى مركز ترخيص بحرى فى الفترة المسائية، تسمى رسوم خدمة مسائية، ولو ما دفعتها ضابط الترخيص أصلاً ما بيستلم ورقك، تقولى شنو وتقولى منو ؟ أزيدك من الشعر بيت، إمتحان الرخصة بعربية ملاكى ‘ بمجرد ما مشيت على العربية لأداء الإمتحان يظهر ليك مواطن عادى جداً ويقول ليك عشرين جنيه رسوم ( الآن أصبحت ثلاثين)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: