زي ده سمعتو بيهو؟

لم اتوقع أن يقوم مسؤول في هذه الدولة المسلمة بفعل يندي له جبين (الشيطان) خجلاً .. لم يتوقف رنين هاتفي بالأمس بعد أن تم نشر مقالي الأخير بعنوان (رسوم دخول السوق) وكان جميع المتحدثين هم ممن يعملون بالسوق المركزي والمحلي :
– يا استاذ القصة لو بقت على رسوم دخول السوق ما هينة؟
– أها تاني في شنو كمان ؟
– تتصور يا استاذ أي زول في السوق ممنوع يجيب معاهو كرسي وللا بنبر وللا تربيزة؟
– ده كلام شنو؟ إنتو متأكدين؟
– كيف ما متأكدين ؟ ما أصلو أدوها شركة .. والشركة دي تقوم تجيب الكراسي والبنابر والترابيز وتأجرهم للناس باليوم .. ستات الشاي .. بتاعين الطبالي !
ألم اقل لكم يا سادتي أن جبين الشيطان سوف يندي خجلاً ؟ زي ده بالله سمعتوا بيهو ؟ أي دين؟ واي قانون ؟ وأي إنسانية؟ تبيح مثل هذا السلوك المقزز الذي تقوم به هذه الشركة (البروس) تحت حماية السلطات وهي تجبر هذه الشرائح الضعيفة (الغلبانة) على إستقطاع جنيهات من دخلها الهذيل عن طريق إحتكار أدوات عملها (عدة شغلا) وتأجيرها لهم في ظل هذه الظروف المعيشية الضاغطة والحياة التي تزداد صعوبة يوما بعد يوم؟

لقد بح صوتنا ونحن ننادي برفع الأذي هن أولئك الفتيان الذين قامت (السلطات) بمنح إحدي الشركات حق إستخدام (الدرداقات) التي يستخدمونها في نقل الاغراض داخل الأسواق وتأجيرها لهم بواقع عشرة جنيهات يومياً لما لذلك من (مضايقة في الرزق) دون وجه حق والآن نفاجأ بان القصة حصلت (الكراسي والترابيز والبنابر) .. أيه الظلم ده؟ والله إني لأمررها (وأمشيها) لو أن هذا يحدث في ظل أي نظام آخر .. لكن أن يحدث في ظل نظام يرفع راية لا إله إلا الله محمداً رسول الله ولا يفتا مسؤولوه يرفعون العصا نحو السماء قائلين أن هي لله فهذا ما (يفقع المرارة) وده ذاااتو الجاب لينا القلب والضغط و السكري !

العبدلله وهو يتأمل هذا السلوك الشيطاني لابد أن يتوقف عند كنه هذه (الشركات) و(الاشخاص) الذين توكل إليهم مثل هذه (الجبايات الظالمة) .. من هم؟ وعلى أي أساس تم منحهم هذا الحق (ده لو فيها حق) دون سواهم؟ وكيف تسمح لهم نفوسهم أن يقتاتوا وعيالهم من هذه الأموال المستقطعة من قوت صغار هؤلاء الضعاف؟
أما آن لهيئات علماء الدين التي لا تحصي ولا تعد أن يتحدث منسوبوها عن مثل هذا الظلم البين الواضح ورأي الإسلام فيه .. أما حان الوقت أن يقولوا (كلمة حق) وأن يقفوا مع أمثال هؤلاء المستضعفين والسلطات تجبرهم على تأجير (عدة الشغل) لهم بدلاً عن إصدار البيانات (في الفارغة والمقدودة) !
أما نواب البرلمان الذين صفقوا عند قرار زيادة أسعار السكر والمحروقات فالعبدلله لا يعتقد أن مثل هذه القضية تهمهم كثيرا إذ هم منهمكون في المطالبة بزيادة المخصصات ومن لديه سعة من الوقت فهو يستخدمها في طرح القضايا الإستراتيجية الملحة من شاكلة (منع حفل شيرين) و(ختان الإناث) و(خطرالكوندوم) و(تغطية راس الوزيرة) !!

والامر هكذا عزيزي القارئ لن نفاجا بشركة تقوم بتأجير (السواطير والسكاكين) للجزارين .. وثانية تقوم بتاجير (الحفاظات والكبابي ) لبتاعين العصير وثالثة لتأجير (الملوة والربع ونص الربع والكيلة) للتشاشة ورابعة لتأجير (الكفتيرات والشرغرغات والكبابي والملاعق) لستات الشاي وأخرى لتأجير (الفوط والمقصات والأمشاط والمرايات) للحلاقين وأخيرة لتأجير (الولاعات) لباعة السجائر !
سالني أحدهم في إحدي الندوات التي عقدت مؤخراً : ما مدي تجاوب المسؤولين مع مقااتك؟ فرددت عليه بأنه لا يتعدي الواحد في المية في أحسن الاحوال .. ولو جينا للجد فالواحد ذاااتو كتير .. إذ أن كل القضايا التي يتم طرحها في هذه الزاوية يكون مصيرها (الصهينة) من قبل المسؤولين وفي أحسن الأحوال الرد على طريقة (سياسة بسمارك) ..

كسرة :
أها يا سعادة والي الخرطوم ….. (صهينة وللا سياسة بسمارك) ؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟

Advertisements

33 تعليق

    1. عبيد وشمباتي ! ماااالكم مابنها ؟ محصبه ولآ عندها
      دقن !؟ أجي ,,

      1. هههههههههههههههه,,مانا مابنها لكن مع الغبار العندكم دا الازمة بتودرنا !
        كح كح كح

      2. شمباتى ,, كر يا النبى يا الرسول …

    2. برنجييييييييييييييييييه انا عارفكم ماعندكم قروش دخول السوق

  1. وعليكم السلااااام ورحمة الله ,,
    معاك !!!

  2. حسبى الله عليهم ,,,
    ووالى الخرطوم السابق كان بسمتيارى بشكل خرافى !
    ودا عبوس وقمطرير وقامطها علينا !
    افييييييي,,,,
    والظلم بوصل مداهو الحد ,,,
    وهيئة علماء المسلمين سيعلقون من السنتهم واماكن اخرى ان وجدت !!

  3. طيب ما يرجعوا لينا الاندايات واهو برضو فايدة ليهم
    نفيسه كم بنبر وكم بستله وتام زين جردلين وكم بنبر
    عوضيه زير كبير وكم جركانه وكبابي .!
    هسي بالله مرتو تقول راجلي بنبراتي ! بري وحات الله
    اخير منه العجلاتي !
    لاكين كتر خيرم الخالننا عايشين معاهم لحدي هسي !

    1. والله ياجنوبي ف ناس عايشه كويييييييييييييس ونحنا كويس انو عايشين
      وهم لو دايرين يرجعونا للزمن داك حقو يرجعو بالمرايات عشان ما يدخلونا ف زمن ود المهدي ده والشيخ والمجاعه والسيول وووو
      الله يرهمك ياعبود وديتنا محل السوق مقدود لييييييه تستقيل ده نهنا بنستهملو اكتر من كده

  4. حسبى الله ونعم الوكيل
    فساد الحاصل فى السودان دا ما سمعنا بيه ابدا اين المسؤلين من هذاه التصرفات
    الناس تعبانة شديد يا سيادة الوالى يا ريد تتنكر وتنزل شوارع الخرطوم وتشوف بام عينك الناس تعانى قدر شنو

    1. naba ,, و يتنكر ليه؟؟ هو لو نزل سااااى كدة و الناس كلها شايفاو, قايل فى زول بيعبروا و الا بيهتم بيهو ؟؟.. ما قالوا ليك دى ديموقراطية و كل زول يعمل العايزو !! و لو سأل ليو زول عن البيحصل دة حيقولوا ليو وانتا منو زاااتك و عايز شنو ؟؟ كان الله فى عوننا !!!

    2. يتنكر ليه هو مقطوع من شجرة البلد اصبح ما فيها ش يا امه ارحميني

  5. اااااااااااااااااااااااه ااااااااااااااااااااااااااه وا وجعي الشديد

  6. انا تاني توبة اقرا مقالاتك , اصلنا ناقصين عمر وكده بقصر اكتر , ولا اقول ليك العايشين ليها شنو

  7. نكتة أصبحت واقع … تحكي أن أبليس يحدث ابناؤه بأنني (إبليس) قد علمت الأمريكان العمل بالربا ،،، وجئت لأوربا وعلمت الأوربيون شرب الخمر ،، ودخلت أفريقيا من مصر فعلمت المصريون الإستهبال ملكن عندما جئت للسودان جلست أتعلم !!!!! هاهاهاها يعلمو إبليس في السودان

    1. ديل ورو ابليس الطفي النور منو ؟ وسوس ليهم ولمن بنو العمارات كتبو فيها هزا من فضل ربي

  8. والله بقينا نفكر عما سنقوله بعدين لما ربنا يسألنا عملتو شنو شان ترفعو الظلم عن عبادي المستضعفين.
    والادهى والاصعب ماذا سيقول الس…اسة إذا سئلوا؟
    حيرووووووووووونا
    ارجو ان تعيرنا بعض كسراتك لأن البلد كلها مكسرة!

  9. البروف الحبيب سلام من الله عليك
    كلوووو منك بالرجوع لمقالاتك السابقة حنلقى انو دي أفكارك التي لم يسبقك عليها أحد ،،،
    وأخيراً جيتنا ب لن نفاجأ بشركة تقوم بتأجير (السواطير والسكاكين) للجزارين .. وثانية تقوم بتاجير (الحفاظات والكبابي ) لبتاعين العصير وثالثة …………… وبالمناسبة دي كلها قرشين حلوين،،
    غايتو كان طبقوا وااااحدة من ديل نكون قطعنا الشك باليقين
    ود الخلا وبت وراق مشو وين ؟

    1. شكرا على السوال يالمندهش
      اليوم كله بقى يكمل ونحن ساكين المواصلات وبليل النت يقطع
      لكن بينى وبينك كده هو بقى ي كلام يتقال

  10. استغفر الله من جنس هؤلاء
    (النفس امارة بالسوق ) هو حال كل احد يعمل مع ناس حكومة النخاس
    بس لو دققنا النظر ف اولادهم ظاهر فيهم تربية الرباء وقروش الناس ليهم يوم
    وياريت والي المواصلات ده ويدوهو قروش يجيب بيها تلاجات موز ويقنعنا انو دي باصات سياحيه يتعامل مع الموضوع بطريقة (روندا شييييك وليست رواندا جوه )

  11. اي دولة في العالم بتعتمد على ثلاث امور رئيسية : عسكر و منهج و المنهج نوعين : منهج ثيوقراطي و منهج تنويري و شعب وغالبا ما يكون التحالف بين العسكر و احد المنهجين الثيوقراطي او التنويري ضد الشعب.
    اها في حالة تحالف العسكر مع المثقفين و المستنيرين بينتج مجتمع حداثي و واعي زي ما كان حاصل في تونس و مصر و في حالة تحالف الثيوقراط و وطاويط الخرافة مع العسكر بينتج مجتمع رجعي متخلف زي ما حاصل في السعودية و ايران وبقية سلال القمامة.
    ببساطة فأن الوضع الطبيعي بكون لمن يتحالف الشعب مع مثقفينو ضد الثيوقراط و العسكر زي ما حاصل في السويد..دولة اتحالفت مع المثقفين ضد العسكر لدرجة انها الغت الجيش برمة تكاليفو و منصرفاتو الباهظة.
    اما نحن في السودان والحمد لله فقد تحالفت كل الاقطاب ضد المو واطن :
    العسكر و الكيزان بتحريض من الثيوقراط (نافع)، لذلك اصبحت قضية المو واطن هي قضية ذاتيه فردانية (يعني بي جاااااااااااااازك ) قضية وجود لكن مع عدم وجود المواطن وسفره الي دول المهجر ف بالتالي وجود الحبش والجنسيات الاخري هو بالاحري …..وجلب المواطن كل كده من الغربه وتشغيلها ف السوق ازن :.لابد من التحالف كل الاقطاب عليه وتنفيط كل قرش منه
    احيييييييييييييييييييييييييي ياابو نظاره انتا يا( وا) (لي)
    الا صحيح ياعمده الموقف الجديد حولوهو جنب المستشفي !!!! صح ياولدي صح …واسمو شروني كمان
    ياعمده هو كان اسمو الحريه يعني من الحراره والحر …….ايوه ياولدي والجديد اسمو شروني من الشر آقصد مشٌر

  12. الاخ جبرا والاخوه
    قبل ايام راودني حلم بان الشارع السوداني لن يسكت هذه المره فقد بلغ السيل الذبى (حلوه اللغه العربيه الفصحه دى )
    بعد الجماعه ما حولوا الموقف وغيروا طريق المواصلات وزادة التكلفه اربعه اضعاف عشان تصل مكان عملك او جامعتك
    تركب وتنزل تنزل وتركب وتتمها كدارى في نفس يوم القرار نزلوا الاحتياطي المركزي وفي اليوم التاني ذهبت الجامعه فوجدته فجاءه
    اسبوع ثقافى والصيوانات والكراسي والفنان يغني ولطلاب مع الطالبات اخر سكسكه ورقيص داخل الحرم الجامعي
    عرفته الحكومه دى بقت تلهي الشباب كيف يعني بالواضح كده الحكومه دى قاااااااعده فى قلبكم وفى مصرانكم واسكتوا ساكت

    1. ياتو شباب ديل البتتكلمي عنهم؟!! الناس الشايفها في الجامعة دي اكتر من 90% منها ما عارف هو خشا الجامعة, ولا أقول ليك بقرا لي اساسا!!
      أما بالنسبة لي “الشارع السوداني لن يسكت هذه المره فقد بلغ السيل الذبى”؟!! معليش بس دا يعتمد على مدى وطنية الناس.
      اذا دايرة تتاكدي من كلامي دا أسالي اي زول عمره 20 ولي تحت, الجيل الجديد دا ما عندو شي للسودان, بلد ما قدم لينا شي غير خلى ابهاتنا شغالين من الصباح لي بليل عشان يطلعوا المصاريف, بلد زي دا يتحرق يطير فارق معانا شنو؟!! النصيحة لله, اعملوا رايحين و بطلوا تمغسوا روحكم قبلي ما يلم فيكم ضغط ولا سكري ولا سكتة قلبية. كلها كم سنة و ابقى منو مارق, بعدين نشووف ناس الحكومة ديل نهايتهم حتكون كيف 3:)

  13. Ustaz Jabra Salam
    This unlawful practices were committed along time during ElMutafi Era as Wali and no body talk or wrote about it and it seems that it brings a lot of money to the Wali and his officals and for that reason none of them dare to stop it and only the poor crushed people suffer from that wrong doing that is why the people who are supposed to represent those poor people don’t feel it since they receive incremets everytime to close their eyes and mouths and turn their heads away from the directions of the poor peeople wa el shakyah liabeeden gawiah wa kolo shi lilah

  14. ما الحالة من بعض
    الا المساخيت الدقون … ختوها بين اهلك قرض
    بالدين وبالطين بالنسب … بالميكرفونات بالخطب
    بالبنطلونات بالرتب
    فرق تسد
    تاخد قناديلك تفوت … وانكتلو في حزمة قصب
    ويوم التصد تلقى البيوت في ازيارها باني العنكبوت
    والحزمة شاهد في التراب
    حرسك يظمبر منها
    وفرسك يكد … لا اسيادها تسال عنها … ولا زول يرد
    ارخيلي اضانك يا بلد
    مرة اسمعيني من البعيد وانطارشيني وللابد
    يا حسرة الاتغشى فيك … كبر وراك جاهد جهاد لامن هلك
    يا حسرة الصدق صلاتك وموعظاتك في الفساد … بان الشرك
    ايوات ليك ايوة ايوة يا بحر التساب ما اعدلك
    شكراً جزيلاً يا بحر … رغم الكساد
    بحت لنا العفن المكرن في الزمن من عهد عاد

  15. الأخ الفاتح سلامات
    أرجو ان تتطرق في مقالاتك القادمه عن غسل الأموال ،موضوع مرتبط بانهيار الاقتصاد السوداني ومعاناه المواطن،هنالك إشاعات كثيره في الشارع السوداني عن بعض ذوي القلوب الضعيفة والذين دمروا اقتصادنا،أرجو إفساح مساحه لهذا الموضوع ومع الشكر والاحترام لرواد المدونه

  16. مد أيدك شيل سلاحك
    غطت الاحزان ربوعنا
    وشتت الطغيان جموعنا
    ما في غير تحمل سلاحك
    تحمي ساحك
    وتشفي بي ضراعك جراحك
    مصطفى سيد أحمد
    يا بروف قول لي وين موقف بصات كاودا خلاص وصلنا الحد ولتقوم القيامة

    1. لذا اعترضت على الحبيب حميد عندما كتب (ارضا سلاح) ,,,,
      احححححح

      1. الاخ العزيز شمباتي
        عندما كتب حميد ارضا سلاح ربما لانه احس بمحطته الاخيره فوضع سلاحه املا في ان يحمله غيره ويستمر النضال

      2. تفسير جميل من امراة قوية ,,,
        فلنحمله وننادى ان حى على الفلاح ,,, حى على السلاح ,,,

  17. معليش ياستاذ الفاتح عاوز ارجع ليك وراء شوية قبل فترة كتبتا عب عدادات الهواء البصنعوا فيها فى الصين حيركبوها وين؟ انا عرفتا حيركبوها وين هم قالوا تحصيل فاتورة المياه عن طريق عددات الكهرباء والاولوية لفاتورة المياه فالفكرة جاءت من هنا انوا فاتورة الهواء تحصل عن طريق فاتورة الكهرباء والاولوية للهواء قبل المياه والكهرباء مالهواء دا حاجة ربانيا لو ماحصلوا قبل المياه والكهرباء مابقدروا تانى عشان كده قالوا نمسك الجماعة ديل من المياه والكهرباء البتوجعهم . يعنى بالعربة مادفعتا حق الهواء مافى ليك موية ولا كهرباء…..

  18. دي الحومة تسوي العاجبه .. والحكومة تريد الشعب عبيد .. والماعاجبوا يشوف ليهو بلد تاني

  19. اخوتي واحبتي بعد غيبة طويلة ارجع لكم بس من انترنتيت كافيه للاسف الاسيف منذ شهر ونيف اتخارجت من اعز مكان ووالله يا اهلي بالقمردينه الرصاص بلعلع فوق روسينا واتصوروا برضه احسن من اعز مكان وهذا زمانك يا مهازل فامرحي الغلبان شحات ليبيا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: