المنحة التي تبخرت

الفساد المالى أشكال وأنواع .. منه الإختلاس وهو أن تهبر من الخزنة أو الحساب البنكي وتحول المبالغ لصالحك .. ومنه التزوير كان تقوم بوضع أسماء وهمية للعاملين في قائمة المرتبات وتقوم بالإستلام إنابة عنهم .. أو (البرشته) كأن يوكل لك الصرف على أحد الأعياد أو المناسبات فتصرف (النص) وتضرب (النص) التاني .. ,ولو سألوك القروش دي مشت وين (ده يعني لو سألوك) تقول ليهم (التلج براااهو جبناهو بي عشرة مليون) ومن أنواع الفساد المالي (الكومشنات) وهذه معروفه للجميع ! وهنالك الكثير من أنواع (السف) الذي لا تسع المساحة لذكره غير أن (القصة الجاية دي) توضح لنا نوع من الفساد الذي يعجز (الشيطان ذات نفسو) القيام به ...
– قال لي صديقي هل أتاك حديث (المنحة التي تبخرت) ؟
– قلت له كلا يا أخا العرب !
– قال لي طيب أقول ليك : قامت إحدي الدول العربية الشقيقة بتقديم منحة إلى وزارة التعاون الدولي (قبل تفكيكها) .. الوزارة إستلمت المنحة .. والقروش إتبخرت وما معروف مشت وين؟
– ثكلتك أمك .. قل حديثاً يدخل العقل .. إتبخرت كيف يعني ؟
– إتبخرت عديل كده وإختفت
– أتريد أن تقول أن هذه المنحة لم تظهر في الأوراق الرسمية؟
– وللا الما رسمية ذاااتا يا استاذ
– ومن أين أتيت بهذا الحديث الخطير يا هذا ؟
– يا أستاذي إنتا قايلني (ناجرو من راسي)؟ هذا ما جاء في تقرير المراجع العام لسنة 2012 م !
– وماذا يقول هذا التقرير ؟
– يقول التقرير يا أستاذ إنو في «721» مليون جنيه مجهولة الجهة دخلت حسابات حكومة السودان عبر وزارة التعاون الدولي السابقة قبل تفكيكها، ولم تتبين اوجه صرفها في الاضابير الرسمية !
– هل أنت متأكد من أن المراجع العام (ذات نفسو) قال في تقريره أنها (مجهولة المصدر) !
– بلى .. قد قال
– طيب إذا لم يعلم النائب العام من أين أتت هذه المنحة أيصعب عليه أن يعلم إلى أين ذهبت أموالها؟
– والله الظاهر قدر ما (حفت) ما قدر يعرف
– ولماذا لم تظهر في الأضابير أليس بهذه الوزارة (دورة مستندية؟) .. إلا يوجد بها مسؤول يتحري معه ؟
– والله ده الحصل
– ثم أليس هنالك لجنة بالبرلمان تسمىا (لجنة الحسبة) وهي مسؤولة عن مراقبة الاداء المالي ويقدم لها تقرير المراجع العام لإجازته والتوجيه باتخاذ الإجراءات اللازمة في مثل هذه الحالة؟
– والله الظاهر اللجنة عملت نايمة !
– هل تعني أنهم لم يقوموا بعمل التحريات اللازمة لإستعادة ÷ذه الأموال المنهوبة في هذه البلد المنكوبة ؟ لماذا لم يتوصلو للفاعل هل هذه المهمة صعبة وتحتاج إلى المحقق (كونان) !
– هي يا أستاذ ما صعبة .. لكن نعمل شنو مع فقه (السترة)
– إيتستر القوم في مال عام والبلاد تئن من شدة الفقر والمرض والجوع ؟ هل يعقل أن يقوم شخص بتحويل (منحة) لمصلحتة الشخصية بينما والنائب العام (يعلم) .. ووزارة العدل (تعلم).. ولجنة الحسبة بالبرلمان (تعلم) ؟ أليس هذا غريب مريب
– والله يا استاذ من ناحية غريب فهو غريب ومن ناحية مريب فهو مريب شديد !
.. رايك شنو يا استاذ في الزول الضرب المنحة دي؟
– والله إني أرى أن نقوم بقليده وسام السرقة الذكية .. وأن تقوم (جينيس) بإدراجه ضمن من قاموا بتحطيم الأرقام القياسية ..!
– هل يمكن يا أستاذ لبلد أن يستباح (مالها العام) بهذه الصورة (العجيبة) وأن يتم التعامل مع (اللصوص) بهذه الشكل (المريب) .. يعني عرفنا الزول (يسرق) لكن يقوم يسرق ليهو منحة مقدمة لي (بلد كاااملة) ؟
– والله يا بني دي ما أدونا ليها ! ولا أظنها قد حدثت لأمة من الأمم .. إلا في عهد أمثال هؤلاء المسؤولين (الرمم) الذين لا يتورعون عن أكل الحرام ولا يفتأوون يتحدثون عن الإسلام .
– وإنتا يا أستاذ في الحالة دي دورك شنو؟
– دوري هو أن أتقدم بهذا المقال للأخ الدكتور/ الفاتح عزالدين رئيس لجنة الحسبة بالبرلمان ليوضح لنا بالتفصيل ما حدث بهذا الشان ! ولو كمان (القضية) ماتت وشبعت موت يبقى اخير لينا السكوت !!

– كسرة :
(مسؤول) يضرب (منحة بلد) .. لا حولة ولا قوة إلا بالله .. الفااااتحة

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟

Advertisements

35 تعليق

  1. والله ربنا يكون في عون الجميع

  2. آمييين

  3. – والله يا بني دي ما أدونا ليها ! ولا أظنها قد حدثت لأمة من الأمم .. إلا في عهد أمثال هؤلاء المسؤولين (الرمم) الذين لا يتورعون عن أكل الحرام ولا يفتأوون يتحدثون عن الإسلام .

    تووووووجاااااار الدييييييين

  4. الاستاذ جبرة والسمار الكرام
    اطرف تعليق سمعتو عن الفساد ذكر علي لسان احد التجار الكبار – فبل ما يجو الجماعة ديل – اذ قال الجماعة ديل لمن جو دخلونا الجامع وخشو هم السوق ودي مبلوعة لكن هسي خلي بالك الجماعة ديل اكتشفوا انو مافي يوم قيامة لكن ما دايرين يورونا

  5. هو اكل من بيت ابو زول ما منحة مقدمة لي البلد و هو استلمها نيابة عننا و نحسن الظن احتمال كان عايز يشغلا و يرجع راس المال لكن لقى الوزارة قفلت و مستني احدي ما تفتج تاني.
    كسرة:
    ما كفاية كتابة في الفساد يا جبرا بقيت زي البتكتب في الكورة

  6. هاها … الراجل كان محافظ امدرمان … ما قدم لأمدرمان الا الديون .. وياليتها كان ديون مكتوبة أو موسسية ,, تسأل منو وعن شنو ،،
    شوف يا أستاذ جبرا يا تكتب لينا كلام منطقي يا بنعلن عليك حرب ( لاتقروا للفاتح جبرا )…

  7. اى لا حولييييييييييييييييييي !!
    وزارة التعاون دى ما ياها الت اشراقة !!؟
    ولجنة الحسبة ما ياها المشغولة بغطا الراس والكنادم والزمازم !؟
    وهز يا وز ,,,

    1. وحات الله لا شغلتي بي اشراقة ولا بي لجنة ( الحصبه )ألتم
      دي !!ولا هاماني القروش دي مشت وين ؟ الا خوفي القروش
      الما معروفه دي يمكن تطلع ماااا منحه !
      يا حليلنا يا حليلنا , امانه مااا وكِرنا . ياربي
      قيامتك راجيبا شنو ,,

      1. و الله فعلا يا جنوبى,, الخوف تطلع مش منحة, و تكون قرض و ما معروف من متى,, و بكرة يجوا يطالبونا بسدادها, و طبعا من سيقوم بالسداد هم (فتات) الشعب اللى يمكن يكون فضل منو شئ حتى وقتها !!!

      2. جنوبى قصدو شيتا كُتُر يا فلاديمير !
        الله يستر !!!

      3. فيلاديمير ,, القرض ده ما دين ومتعودييييين عليهو , والدين بيرجي جنا الجنا إلا الخوف من شيتاً ما يرجا الجنا ذاااتو .
        ياربي تسترنا نحنا إتغشينا فيهم بي اسمك …….

      4. قصدك نسددها نحنا اجنوبي برضه

  8. جبرا والسمار .
    سلامات ومشتاقين.
    كدى ياجماعه أنا الشغلة دى ماوقعت لى لى أسى .
    المنحة دى مقدمة من دولة ولا من شركة ولا من زول بى عينو وبعدين مقدمة لدولة السودان ولا لى ولاية بى عينا ولى مشروع معين والاستلما ودخلا عليهو دة بيمثل الحكومة ولا الشعب ولا بيمثل رقبتو براهو نيابة عن أصحاب المحنة (المنحة).
    الله فى …

  9. دا كان الجماعة ديل تابوا ودايرين يحاسبوا الحرامية!!! المن النوع دا كان طبقوا فيهو حد السرقة يقطعوا ليهو يدو من وين

    نسأل الله العافية انا بقول لي اخواني ما تقروا جرايد لانها ما فيها حاجة غير تحملك هموم حرب قتل طلاق اغتصاب سرقة مال عام لكن بالطريقة دي الفاتح جبرا كان ما جاب لينا الاخبار بطريقة الحكاوي وخلانا نمشي بفكرنا انو الكلام دا حجا ساكت ما جد حنخليهو ذاتو لانو الفي الجرايد مكفينا

  10. يا استاذ جبرا المبلغ دا بالمليون الجديد ولا القديم

  11. حاج أحمد السلاوى | رد

    قوية شدييييييييييييييييييييييييييييييد .ز
    بس الله يستر .

    1. والله صحي قوية المرقتك دي !
      حتي المنحه بقوها لينا محنه ,,

  12. هي بقت على المنحة ؟؟؟؟؟
    ديل يضربوا ١٠٠٠ منحه ويضربوا ورآهم ناقه صالح ولا فارقه معاهم

  13. والله صدقت

  14. أهــا أخا العرب دا ما حرد الليمون بعد كده وخلى البلد بالفيها

    1. الليمونة الجوة قلبى مشتولة ,
      يا ناس ,,

  15. البلد ذاتا اتلحست — وهل المنحة الملحوسة هذه اول المنح الملتحسة — والمواطن الهلكان يغنى —
    يالرحت واتلحست وين — وين ياالجارى انت========= مع الاهتذار للاغنية

  16. ياسين شمباتى | رد

    التحليل الفلسفى لعبور الدجاجة :-
    اذا تم طرح سؤال فلسفى عن سبب (عبور الدجاجة للطريق) ,, فلننظر الى كيفية الاجابة لبعض الشخصيات المشهورة :-
    *افلاطون : بالنسبة لها الحقيقة موجودة فى الجانب الآخر , وربما كانت ذاهبة للعالم الفاضل ..
    *ارسطو : انها طبيعة الدجاج , وبما انها دجاجة والطريق قد كان مفتوحا فان العبور نتيجة منطقية !!
    *ماركس : هذه حتمية تاريخية تحددت منذ الازل , ويتساوى فى ذلك جميع الدجاج !
    *فرويد : ان الاهتمام بعبور الدجاجة للطريق يدل على وجود اضطراب فى المشاعر الدفينة (جابها صح)..
    *اينشتاين : هل الدجاجة هى التى عبرت الطريق ام ان الطريق هو الذى تحرك تحت اقدام الدجاجة ؟ فهذا الامر يعتمد على نسبية الاشياء ! فاضى طبعا عمكم دا..
    *نيوتن : يجب ان نقيس المسافة بين اول الطريق وآخره ومقدار سرعة الدجاجة لنعرف درجة اتجاه الرياح ! فاضى برضو ..
    *الترابى : هئ هئ ,,نعلم ان الله سبحانه وتعالى قد خلق الزويجن الذكر والاثنى وجعل بينهما مودة ورحمة ,, وجرغ ورجغ ورجغ ورجغ ورجغ ورجغ ورجغ ورجغ ,, هئ هئ هئ ,, وجرغ ورجغ ورجغ ورجغ ورجغ ورجغ ورجغ ,, هئ هئ ,, وجرغ ورجغ ورجغ ورجغ ,, هئ هئ هئ ,, ايتها الدجاجة الشعبية , ارجعى الى حضنى راضية مرضية …عفن الراجل دا..
    *نافع : الدجاجة حقتنا وشارع الزلط ذاتو حقنا ,, والكوبرى البودى ليهو وبجيب منو ذاتو حقنا ! والما عاجبو يلحس كوعو ّ! والزارعنا غير الله اليجى يقلعنا ! وولدى بركبو برادو حقارة بس ! وامريكا هى السبب ورا العبور الحقير دا ! انعل ابوكم لابو اهلكم ذاتو ! الراجل دا الزعلو منو يا ناس !؟
    *اللمبى : طبعا طبعا طبعا (منديل) الدجاجة دى عبرت الطريق بصورة مفاجئة فى وقت متأخر , الساعة تمانية الا خمسة , وقت صلاة العشا بالضبط وماكانت مركبة عاكس ! آيييي , ,شفت كيف (منديل) اها ما لقطناها بالنظر ,,, لكن جارى رفع درجة الخطورة (منديل)…
    *الصادق المهدى : نحن ندين ونستنكر ونشجب عبور الدجاجة للطريق دون ميثاق عبور او خارطة طريق او اتباع طرثقة التراضى ! ونلخص الميثاق فى النقاط الثلاث التالية ,,,, وحيث ان النقطة دى ممكن تتفسر فى النقاط الاربع التالية ! وهذه النقطة تتبلور فى شقين (الشق اليبلعك) , وهذا الشق يتمحور حول ثلاثة قضايا ,, والقضية الثالثة لابد لها من ايدلوجيات ثنائية ,, 4 مليار !! نحن نوافق على التراضى !! مساعد رئيس ,, الله اكبر ولله الحمد ..
    *فلانة : الدجاجة دى شاذة افقيا ! وهى فى الاصل حشرة ! ابشر ,, هييع ,, انا حصلت كذبت عليكم ؟؟ صدقونى الدجاجة دى جاية من كافورى وعلى بالطلاق تانى ما تعبر الطريق دا !! ابشر بالخير , وسمعنى سلام (النار ولعت وما بطفيها) …
    *السيد الحسب النسب الميرغنى : الدجاجة دى شردت من مرزعة ابوى ! رجعوها لى ! وليس لدى ما اقوله الآن ! وا حلاتى دى يا ناس !! اعسل واحد انت واروقهم كمان ..
    *ياسين شمباتى : الفوق ديل كوووولهم عبارة عن دجاج داجن مهجن !! والدجاجة الحمراء هى الواعية ,, والحمار حمارى من العين بضارى يااااا ناس حمارى …

    1. انا سألت الجدادة وقالت : وحات الله من بكاني ده ما إتحركت ! وطنطنت تحت تحت : هي وينا الديوك البيقطعولا الطريق !!؟
      قالت الترابي ده كان حاضن جمبي هني ده , ومن سواسيوا فقسن وقطعن الطريق وخلّنو بقي يسوي متل ورجغتو دي , إلا شايفاهو جاب بيض جدادة تانيه وحضنو .
      وقالت : هو اللمبي ده حتي مواعيد نوم الجداد ما بعرفو !ّ؟ مخيّر الله !
      وقالت الصادق قطع من البيض إلا ما قادر يخلي المكاكاه .
      ومن جبت ليها سيرة فلانة , قالت كاااااااااك وجرت جري الجداد المكلوج داك وتجري وتاااااااني تجيني راجعه متلاعبه ليس إلا ,
      اما الحسيب النسيب قالت ما بتنضم فوقوا , يمكن يطلع من آل البيت بالصحي ! وقالت هو ما عندو الفهم القدر ده وكل همو يشوفني في صندوق كنتاكي .
      ووكت جبت سيرتك قالت لي قفصوا قرّررررررب وكل مكاكي مصيرو البيض . وقالت ليك تغلبا بالكوكو كوكو وتغلب بالكاك كااك .

      1. ههههههههههههههههههههههههههههههههههههااااى,,
        ياخ انت ما واعى !
        اسمح بالنقل والنشر يا حبيب ,,
        عفيت منك

      2. ههههههههه وحات الله اللتنين مااااا واعيين

      3. المندهش..ٍسلام…
        خبارى ما بوعى !!؟
        لكن زولك دا بكون ضارب تركين ودكاى !
        وااااااااااااى

  17. غايتو يا شمباتي برنجيتك دي فيها شي من (خداري ) البي حالي ما هو داري جافاني
    والله شبعنا فساد شوفنا لينا حاجه تانية

    1. ههههههه,,ابهتونى كمان !
      وى

      1. هوي ها كمان دايرة ليها بهيتة ولا اشراقة صباح …. ما وااااااضحة !
        وي

  18. غايتو انتو عليكم جنس حالة اشيشش !!!
    والله كلامك دا كلو يا بروف ولا هاميني ولا حاجة ولا كمان برضو عاوزين القروش دي مشت وين ؟
    انا الهميني ومطير النوم من عيني الناس دي جابت القروش حقت الصومال دي من وين ؟ وعشان شنو اتبرعو ليهم ؟ الموضوع فيهو ( إنّ )
    نتبرع بمليون يورو ! !!!!!! .. وكمان – علي ود كرتي – طالب الدول الاوربية بالاستثمار في السواحل الصومالية !!! .. يا علي يا اخوي كدي حكاية الاستثمار دي عرفناها لكن المليون يورو دي من وين يا سعادة الوزير ؟!!! .. يا حليلنا نحن القلصنا سفارات أمازونيا في كثير من دول العالم الي قنصليات والسبب ميزانية الوزارة التعبانة زي ما قلت يا علي ود كرتي يا اخوي …… غايتو تاني أصلو ما ح اسألك ،،، !
    لكن تصدقو عندي احساااس غريب إنو يكونو باعو الصومال دي لي دولة نووية ….. وقبضو التمن ..ومليون يورو لذر الرماد في العيون …… وحليلنا نحن الما ذرو عيونا … إنتو رأيكم شنو ؟

    1. عشان شنو !ّ؟ يعني ما عارف ؟
      مش طلعوا كلو حاجه فاهمنها غلط !ّ يمكن دي ذاااااتا قروها ( ولو كانت بهم خساسة ) ,,

  19. غايتو بصراحة رسوم المدارس البقروا فيها أولاد الجماعة ديل غااالية وفي واحدة من المدارس فرضت
    رسوماً على الدراسة بالمدرسة وصلت إلى (150) مليون جنيه للطالب الواحد وأخرى وضعت زيادة على
    الرسوم وصلت (48%) من السنة السابقة
    يعني الجماعة ديل أولادهم يقروا كيف ؟ اهو غايتو يباصروها من منحة لي سرقة عشان أولادهم يقروا
    وما يكونو شذاذ آفاق

  20. السلام عليكم
    ما خفي اعظم………………… كل يوم بتأكد من انو البلد اسوأ ما فيها اذمة الاخلاق.
    صدقني يا استاذ في قصص من حرفنةحرفنة زمن الانقاذ
    و لكن لا اود زكرها هنا
    بس رجاء يا جماعه التعاليق من الافضل ما يكون فيها كلام مثل “يا ربي قيامتك راجي بيها شنو”
    لأن الموقع يهدف لاحقاق الحق كمان لازم نحافظ علي كلامنا مع الحق.

    1. تحياتي نجوي بس القيامة اخير عشان نشوفهم هناك انا ادعو الله ليل نهار بعد ما اموت نتلاقى كلنا في القيامة هناك وكل زول يشوف حقه وكمان عشمى كبير في ان يشملني الله برحمته بس يا ربي برضه بشملهم ؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: