الكمدة بالرمدة

في غياب توافر (الطب الحديث) انتشر (طب الشوارع).. في الماضي كانوا عبارة عن (نفر نفرين) من مواطني (الدول المجاورة) يجلسون في أماكن معلومة للجميع داخل الأسواق يفرشون بعض (العروق) والأعشاب و(الحجبات).. أما الآن وفي عدم وجود أي رقابة على صحة المواطنين ابتداءً من (الرغيف المكشوف) الذي يباع في الأسواق على قارعة الطريق، مروراً (باللحوم) المكشوفة التي تلتصق بها مستعمرات (الذباب)، انتهاءً بالمواد الغذائية (منتهية الصلاحية) المفروشة على عينك يا تاجر، فقد تطورت الحكاية فبات هؤلاء (الأطباء الشعبيون) يعرضون بضاعتهم في (الهواء الطلق) وينادون عليها (بمكبرات الصوت)
في أحد الأسواق المكتظة بمركز الخرطوم قابلتني عربة مغطاة بالأوراق الإعلانية ذات الطباعة الراقية.. يحيط بها عدد من (المواطنين).. طلبت من (الشخص) الذي يقف إلى جانبها عارضاً بضاعته أن يعطيني واحدة من تلك الأوراق وهالني أن رأيت مطبوعا عليها أكثر من (خمسة وستين) مرضاً (مختلفاً) يتم الشفاء منها بإذن الله (كما يقول) الإعلان بواسطة (خلطة أعشاب واحدة)!!.
وليسمح لي القارئ الكريم أن أستعرض له (بعضاً) – لاحظ بعضا- من هذه الأمراض التي يتم شفاؤها على يد هذا (الدجال) الكبير:
تساقط الشعر، الصداع، الأرق، البواسير، الدوالي، الدوخة، آلام الأذن، القراع والثعلبة، أمراض النساء والولادة، الأسنان وآلام اللوز والحنجرة، أمراض الغدد واضطراباتها، حب الشباب، الثآليل و(الدمامل)، البهاق والبرص، سرعة التئام الكسر، الكدمات والرضوض، الروماتيزم، السكر، ارتفاع ضغط الدم، إذابة الكوليسترول في الدم، التهابات الكلى، تفتيت الحصوة وطردها، الاستسقاء، الحمى الشوكية، التهاب المرارة وحصوتها، الطحال، أمراض الصدر والبرد، أمراض القلب والدورة الدموية، المغص المعوي، الإسهال، الغازات والتقلصات، الحموضة، القولون، أمراض العيون، الأميبيا، البلهارسيا، الأكزيما، العقم وعدم الإنجاب، البروستاتا، الربو، القرحة، السرطان، الإيدز.
إذاً (عزيزي القارئ) بشرى لمرضى التبول غير الإرادي والتبول الإرادي ومرضى فيروس الكبد الوبائي وفيروس الكبد غير الوبائي ومرضى الضغط العالي والضغط الواطي واللي بين العالي والواطي ومرضى عدم الإنجاب ومرضى كتْرة الإنجاب ومرضى الإسهال ومرضى الإمساك ومرضى السمنة ومرضى النحافة ومرضى الأرق ومرضى النوم ومرضى الصَرَع ومرضى القَرع ومرضى القذف السريع ومرضى القصف (العشوائي) ومرضى الضعف الجنسي ومرضى ضعف النظر ومرضى انفصال الشبكية ومرضى إلتئام القرنية.. فقد أتاهم (الفرج)!!.
هذا الإعلان المطبوع الذي يقوم بتوزيعه هذا الشخص و(مثله يطبع كإعلان على بعض الصحف مصحوباً بأرقام الهواتف وتحديد مكان العلاج) يقول ببساطة أن وداعاً للأمراض جميعاً، وما عليك إلا أن تقوم بغلي هذه الخلطة السحرية في الماء وتشرب النقيع كم مرة (كده) يومياً حتى تتعالج من كل هذه الأمراض مجتمعة (شفتو الطب عندنا إتطور كيف يا جدعان؟).
مش مهم (جرعة محددة)، ومش مهم (عمرك كم)، ولا (وزنك)، ولا (تاريخك المرضي والعائلي)، ولا معرفة إن كان لديك أي (أعراض حساسية)، بل مش مهم أن تقوم بعمل أي (تحاليل أو فحوصات) قد تكلفك الشئ الفلاني!
والسؤال هنا: هل وصلت درجة الضحك على الناس والاستخفاف بعقولهم إلى هذا الحد؟ هل أصبح الدجل يمارس هكذا (عيني عينك) ويتم النصب نهاراً جهاراً على المواطنين البسطاء الذين يعانون من هذه الأمراض والذين يتعلقون بأي (قشة) تنقذهم من آلامهم؟.. كيف يمكن لهذه (الخلطة السحرية) أن تكون علاجاً لكل هذه الأمراض المختلفة الأسباب ومختلفة الأعراض، بل مختلفة الأعضاء التي تصيبها؟
إذاً فلنغلق كل كليات الطب ونسرح الأطباء (يشوفو ليهم شغلة تانية) وكذلك (الصيدليات) و(شركات الأدوية)، ولنترك المجال لهذه (الخلطة السحرية) الخارقه فيشفى من في البر ومن في البحر، ويستريح العالم من الأمراض والآلام ولنستغني عن المستشفيات و(المستوصفات) ليتم تحويلها إلى بنوك وشركات وأماكن ترفيه.. سألته وهو مشغول بشرح (بضاعته للزبائن):
– بتعرف (أبوقراط)؟
– أيوه نعرف و(الخلطة ده ) بيعالجو الكمدة بالرمدة!!

كسرة

هذا المقال نشر قبل سنوات .. نعيده بمناسبة إنو المسؤولين إعترفو قبل أيام بانو القصة جايطة وعاوزة تنظيم .. شفتو الإستجابة السريعة دي ؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟

Advertisements

35 تعليق

  1. بنقويــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــه

      1. لك التحية اخي فلادمير وانا شردت من بلدي وصدقني الرصاص يلعلع في الراس بس برضه اخير من الهوان الحاصل عندنا

    1. يا الضل انتا جاي من ابو كرشولا ولا شنو……..قالو هناك متوفر

      1. لك التحية كتلوني واليوم كان ما تمه ما فيش حد بيقتلك استهدى بالله وولع الساتك لك تحيتي

      2. مبروك يا الغلبان مرقت في ليبيا …..الله يقطع الكيزان القطعونا في الغربة …. بس ما تنسني ترسل لينا عود القذافي داك لانو العندنا هنا دا خلاص (عفن) الفاءمشددة شديد

      1. سلامات للغاليين مره تانيه

      2. وعليكم السلاااام ورحمة الله يا حبيب ,,,

  2. ع فكره البنقاويه الفوق دي دخانها كاتل لسه في السماء ..ع الاقل هي اصدق من مشروع الزيف العظيم..من الطب البديل و تجار الدين ..

  3. ههههههه ,, الله يجازيك يا ابقراط يا الخربت للزول
    قماشو !
    هو نحنا ذااتنا بقينا شعب هايف ويصدق أي حاجه قبل
    كم سنة مشيت اجازة لقيت الناس حريم ورجال لابسين
    غوايش نحاس وفي رجال لابسنو حجل عديييل !!

    1. الحجل بالرجل يا جنوبى سووووووقنى معاك ,,
      والله يجازيك يا جعفر كان خربت لى قماشى !
      ههههههههههههههههههههههههههه

      1. بالله يا شمباتي سؤال البروف للمحتال ده عن ابقراط
        مش ياها عمايل جعفر في قماش الزول داك ؟
        هو رفع العراقي ده الا بي غرف الفول ! عينة
        السؤالات دي ما برضها بترفعو !!
        هههههههه غايتو انت بتعلمني حاجات !

      2. هييييييييييييي,, ما تبهتنى !
        من يومك معلم ومقرم ,
        كُر

    2. اها يا جنوبي الما عرفانك هناي ولا هناي
      مع شمباتي اتكاتبنا واتسامعنا وما فضل الا المشاوفة
      والرباطاب مالم يربطوك من (الوتين)

      1. هههههههه,هو دا عندو وتين شان يربطوا منو !!؟
        والله كان لى الشرف والفخار ان استمعت الى اهتزازات صوتك يا حبيب ,,
        وباذن الله نتقابل فى اليومين ديل ,,,

      2. ههههههههههه …
        أبلاي بي رقبتو تربطوا من وتينو ماااالو ..
        هي الحكومه دي خلت فينا وتين ؟ ومال قلوبنا دي
        الكتلا شنو بلا ربط الوتين …
        اشوووووووووووفك بكره في الموعد ,,,
        اها وكان طلعت هناي يا هناي انت بتبقي هناي ؟

  4. طبعا عجبتني ( امراض النساء والولادة ) دي ما سبقم فيها زول

    1. تتذكر ناس ( إرق مهبه ) !!
      مااالك ما دقيت علي شمباتي لي هسي ؟ سفرنا قرررب
      ياخوي دايرين نتشاوف .

      1. الا ادق ليهو زار …. ات مالك ماك مرقم ….. مال لقيت ليهو رقم
        بالنسبة لعرق المهبه كان في واحد تحت الشجرة ديييييك لامن نرجع من المدرسه يقول لينا يلا يا اولادي اندي ارف مهبه مجرب اها يا شيخنا ودي بستعملوها كيف يقول ليكا تمشي تجكك جم بيت ناس البت ولامن تجي ماشه الدكان او دايره تكشح موية العده انت طوالي تقوم تسف ليك سفه من الارق دا والباقي تمسحو في وشك وايديكا _كانك تتيمم_ وتجري عليها تسلم عليها في ايدا …. اخونا جعفر الله يطراهو بالخير قام طبق النظرية اخد ليهو علقه من اخو البت صارت له لقبا الي يومنا هذا
        جعفر ابا ….
        وعباسية موردة الشال شبطي منو …. ترم تررررررم ترررم
        وبرضو حمد كمد ورمد ورمد ولا نقدر عليه وحدنا

      2. هههههههههههه,تشوف الموت يا جنوبى !
        وسفرك بكرة قالوا , ياناس مالكم ومالو ,,,

        كتلوك ولسه حى ,,,
        خد 0555040149
        من المسلط من العين الشافتو ماااا صلت يغطينى الله الليلة ساير !!

      3. أجي !! جابت ليها رباطاب كمان !!
        يرقموكا ويلقموكا وفي بيت الظار يدلوكا
        وبالرفاعي شراب الدم يرقصوكا,,,
        ياسين ما تديهو !

      4. يدوك من كل شجرة عصا !
        والباقى بالدرب ,,,

  5. اسي يابروف لو جاء زول باع سم في سوق الله واكبر ده في زول بيسلو حكومه قسمت البلد والدولار ٧ الف جنيه وهم لمن جو قالو ما جينا الدولار كان حصل ٢٨ جنيه جاونا ناس خليل جوه الخرطوم واسي في ابو كرشولا انضربنا بالطيران بااليل والنهار وكمان جوه الخرطوم انضربنا تقول لي زول بيبع دوا يابروف المشكله بقت فينا ؟؟؟؟؟؟؟؟؟

    1. انت يا ابراهيم ما تبقي حقاني , هسي في ذمتك دي
      هم قالوا 28 جنيه بالقديم ؟ لسه ياخوي باقيلم 21
      جنيه !! بعد داك يبقي من حقنا نلومن ,,وااااي

      1. اخي جنوبي والله انا بقيت ما فاهم شئ في الحساب مع العلم انني مدرس رياضيات اصبحت حسبت برما يا راجل قديم وجديد

  6. يا ريس الجماعة ديل دافعين قروش للمحلية و قيس على ذالك

  7. يا بروف سلام : اخشى انو الجماعة ديل لو قرو كلامك دا، يمشو يقولو : الفاتح جبرا دا ذاتو داير ليهو علاج … عشبي، شعبي …

  8. غلطان البروف لمن سألو عن أبوقراط مش أبقراط !!!!! ديل عندهم اجابة لكل سؤال

    1. مججججججججججججججججج

  9. حاج أحمد السلاوى | رد

    د. شنباتى خلاس بقيتو بضاعة فاسدة ما ليكم عزا ..أمشوا شوفوا ليكم شغلة تانية ..

    1. ياسين شمباتى | رد

      هههههههههههههههههههههههههههههههههه,,,
      هى اصلا الشغلة ما شغلتنا بس النسبة جبرتنا !
      وسمعنى سلام (عيانة شيلونى فى سريرو ختونى),,,

  10. كتمت آآآآآآآآآآآآآآآآآناس

    1. الغلبان شِن اخبارك ؟ باهي ؟
      بندوروا نخرطوا معاك بالليبي بتوعا ؟ ولآ توووك ؟
      والله عندهم كلام يمحنك في روحك دي اسهل منو الفرنساوي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: