إلا نحنا (من الأرشيف)

• في كل بلاد العالم تستخدم كلمات مثل .. لو سمحت .. شكراً .. متأسف .. إلا نحنا (ليه ما تعرف)؟
• في كل بلاد العالم (اللاعب المستورد) بجيب أقوان إلا نحنا (بجيب ضغط)
• في كل بلاد العالم توجد على الطرق الرئيسة خطوط عبور مشاة .. إلا نحنا (تقطع الشارع وإنتا وحظك بقى)
• في كل بلاد العالم يوجد ناطق رسمي واحد للحكومة إلا نحنا (أى مسئول يمكنه النطق )
• في كل بلاد العالم يوجهك شرطي المرور إلى أن هذا الطريق إتجاه واحد إلا نحنا (يخليك لمن تدخل) !
• في كل بلاد العالم تستخدم الركشات لنقل الأغراض إلا نحنا (عندنا تستخدم لنقل البشر والخمور كمان) !
• في كل بلاد العالم لا تتعطل دواوين الحكومة عند مجئ ساعة الإفطار إلا نحنا (الفطور وبعدين الشاي فالصلاة ثم .. تعال بكرة)
• في كل بلاد العالم إذا قبض عليك تقود سيارتك دون رخصة قيادة تم إياقفك إلا نحنا .. تدفع الغرامة وتمشى (ما الغرامة أهم من السلامة وكده)
• في كل بلاد العالم يتم إستخراج الأوراف الثبوتية للمواطنين مجاناً أو برسوم رمزية إلا نحنا تطلعا بالشئ الفلانى وتجددها بالشئ الفلتكاني وكمان المبلغ الفي الإيصال أقل من الدفعتو
• في كل بلاد العالم رقم الإسعاف معروف إلا نحنا (تفتش ليهو فتيش ولمن تلقاهو يكون المريض موضوعو إنتهى)
• في كل بلاد العالم يتم تخصيص حصص للموسيقي في المدارس إلا نحنا (ومع ده عندنا عشرين مليون فنان)
• في كل بلاد العالم توجد لافتات توريك إلى اين تفضي بك الشوارع التى تسير فييها إلا نحنا (لو عاوز تمشي حته فعليك الإستعانة بصديق) !
• في كل بلاد العالم هنالك سلال لوضع النفايات على الشوارع إلا نحنا (ويقولوا ليك هيئة ترقية السلوك الحضري) !
• في كل بلاد العالم لا يمكنك صرف دواء من غير روشته (من الدكتور) إلا نحنا لأنو مقابلة الدكتور (حكاية) !

• في كل بلاد العالم عندما يستوقفك الشرطي فإنه يبتسم لك ألا نحنا فإنك تبتسم له (من الخوف طبعن) !

• في كل بلاد العالم توجد بالمدن أماكن لقضاء الحاجة (مجانا) إلا نحنا فإنك لا تستطيع أن تقضيها (كان ما معاك حاجة)

• في كل بلاد العالم يعتزل السياسيون في سن مبكرة إلا نحنا (كم وتمانين) ولسه عاوز فرصة ما شاء الله عليهو !

• في كل بلاد العالم يتم فتح ملفات الفساد والتحقيق فيها إلا نحن (نفتح ليها حفرة) وندفنها

• في كل بلاد العالم لا يسمح للوافد (بدون أوراق) العمل إلا نحنا .. شغالات .. سواقين ركشات .. عمال كافتيريات والمسؤولين عاملين نايمين !

• في كل بلاد العالم يستخدم أفراد شركات الأمن لحراسة الشركات والمؤسسات إلا نحنا إذ تجدهم شغالين في الإستقبال (مع إنو ده ما شغلهم ولا مؤهلين ليهو)

• في كل بلاد العالم تعمل السفارات على حل مشاكل مواطنيها إلا نحنا فسفاراتنا تعمل على (شربكتها) !

• في كل بلاد العالم يستغرق إنشاء جامعة عشرة سنوات إلا نحنا (ممكن نعمل عشرة جامعات في سنة واااحدة)

• في كل بلاد العالم لا يمارس عملية التطبيب إلا من حصل على إجازة علمية وتم تسجيله من الجهات المسؤوله إلا نحنا (ناس الأعشاب والشنو ما بعرف فاتحين ليهم عيادات عديل كده) وكمان بيعلنوا في الصحف والقنوات !

• في كل بلاد العالم يعتبر أغتصاب القاصرين جريمة توقع عليها أقسى العقوبات إلا نحنا .. شهر شهرين سجن وكم سوط كده !

• في كل بلاد العالم لن تجد في الصحف إعلانات لمرضي يطلبون من ذوى القلوب الرحيمة التبرع لعلاجهم إلا نحنا (العندنا ديوان زكاة) !

• في كل بلاد العالم توجد بين الأحياء مساحات يمارس فيها الأطفال والشباب الرياضة والالعاب إلا نحنا (عملوها كووولها عمارات) عشان كده مش ح نتحصل على مداليات ولو من صفيح !

• في كل بلاد العالم توجد بالأسواق أماكن لإيقاف العربات إلا نحنا (لأنو المحلية قاعدة تأجرها لبتاعين الطبالي وكده)

كسرة :

• في كل بلاد العالم يمكنك معرفة مخصصات المسؤولين بسهولة إلا نحنا ما تعرفها إلا لمن المسؤول (يتسرق) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟

17 تعليق

    1. Salamt with you – يعنى مشترك , و كية للمابينا

  1. د. عبيد و ود بوتين سلامات
    شريكم بالثلث

    1. المندهش – حبابك الف …

  2. أجي !!!
    نحن برضو مع دول العالم ؟!!!!

  3. فى كل دول العالم المواطن و معظم الاجانب يدخلون و يخرجون بدون تأشيرات, الا نحنا المواطن ما يسافر الا بعد الحصول على تأشيرة الخروج ,, و ما ادراك ما تأشيرة الخروج خصوصا للمغترب !!!

  4. بلد تحير إبليس زاتو

  5. في كل بلاد العالم المسئول يعمل في مؤسسة حكومية واحدة الا نحنا المسئول رئيس إدارة كم مؤسسة غير شركاته الخاصة

  6. ياعمك نحن ماعاوزين حصة موسيقى لو عملوا الحصص التعليم كفاية وبعدين يقول ليك تقشف والحكومة اكبر مستورد للعربات والكماليات ياخى دى عايره وادوها صوط .

  7. الغريبو الليلة ابان دقنون مسجلين غياب يا ربي مشوا يحتفلوا مع الجماعة في أبكر شولا رقيص جديد ولا شنو … احمد حسن جمعه سمعنا صوتو

    1. وميرغنى بتشوفو باذ

    2. واحد يقول ( الغريبو ) والتاني يقول بتشوفو ( باذ ) !
      تحرير ابكرشوله ده ما حاااااار يا المرجفين في المدينة !
      ههههههههههههههههههه .
      المندهش لميت فيهو وأكد الجيه ..واليلة يا كتلناك يا
      دفناك حي !

      1. ههههههههه,,ترجف بلا برد يا غبيان !
        والنصيحة كتلنا بى ظرافتو واسرنا بى سحرو ,,
        اححححححح,,
        كانت ليلة ويا لها ,, من ليلة ,,
        شكرا (جنوبى-كتلونى ولسه حى-المندهش-عباس ركس),,,
        وادام الله الود والرجفة والمحبة ,,كع

  8. وميرغنى بتشوفو عدييييل باذن الله !
    والمندهش ما برد !

  9. يابروف كدة بترفع في ضقطك ساااااااي والخوف تكون بتبلع بلنديل ابو٩٠ جنيه الموضوع بتاع المقارنه انسي دحين اسيي وركز لينا في الخط الابا يجيب مويه ده

  10. دا شنو يا بروف الظاهر بعد الكسرة ثابتة (جديدة) : اتهكرت ولا شنو؟؟؟؟؟؟

  11. فى كل بلاد العالم يعتبر كل من سكن البلاد مواطن وله كامل الحقوق التى تكفلها له قوانين تلك البلد ..اما عندنا هنا حتى لو سكنت القبر الحكومة ما تريحك ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: