ولا راسمالو

صباح الأمس زارني إبن الجيران (طارق) وهو يعمل موظفاً صغيراً بإحدي المرافق الحكومية .. بعد التحية والسلام أعطاني صحيفة كان يحملها وهو يقول لي :
– ما معقول يا استاذ؟ معقوله بس يا استاذ؟
بعد أن هدأته قليلاً طلبت منه أن يشرح لي الموضوع فأخذ من يدي (الجريده) وطلب مني قراءة المانشيت الرئيس والذي كان يقول (زيادة تكلفة الحج 6 آلاف جنيه) ، بعد قراءتي للمانشيت سألته :
– يعني هسه تكلفة الحج هسه عملت كم ؟
– عملت 20 (مليون)
– تقصد حج (سياحي)
– سياحي شنو يا استاذ .. الحج الواااحد العادي ده
– إنتا عندكم زول عاوز يحج السنة دي؟
– يا أستاذ ده ذاااتو الجابني ليك
وبدأ ولدنا (طارق) يحكي لي في أسى عن رغبتهم منذ سنوات في تحجيج (والدتهم) .. كانو في كل عام يقوم هو وإخوته بجمع (القروش) فيفاجأون بانها (مقصرة) وأن التكلفة قد إرتفعت (ما المواد زادت وكده) ..
– أها السنة الفاتت الحج كان بي 14 مليون والقروش قصرت معانا وجمعنا 12 مليون بس .. أها المسئواين قالو السنة الجاية (اللى هي السنة دي) ح يقوموا يخفضو التكلفة من 14 .. (يعني قلنا ممكن يعملوها الإطناشر الجمعناها دي) قمنا فرحنا والحاجة ذاااتا فرحت وقالت خلاس المنادي نادا ها
– وبعدين؟
– بعدين المسؤولين الليلة يا أستاذ فاجأونا إنو زادو التكلفة تاااني وبقت 20 مليون
هسه يا أستاذ بالله الواحد يعمل شنوووووووو !
إنتهي حديث ولدنا (طارق) ولم تنته دهشتي وإستغرابي من هذه الزيادات غير المبرره في تكلفة أداء هذه الشعيرة الإسلامية .. ولأن العبدلله ليست لديه فكرة عن التكلفة الفعلية لأداء مناسك الحج فقد قمت بالإتصال بصديقنا (حاج الوسيلة) فهو (خبير حج) إذ يقوم بأداء هذه الشعيرة بصورة شبه سنوية (أقل حاجة يكون حج ليهو 30 حجة) .
– إذيك يا حاج !
– أهلا يا أستاذ
– يا حاج بس عاوز منك معلومة عن تكلفة الحج السنة دي تكون زي كم؟
– شوف يا استاذ تكلفة الحج ما بتفوت ليها خمسة ألف ريال كان بالغت !
– يعني بالسوداني كم؟
– زي 10 مليون كده !

هنا تضاعفت دهشتي .. هل يعقل أن تتربح الدولة من (شعيرة دينية) وتقوم بزيادة تكلفتها وتضاعفها كمان (100%)؟ إلا ان دهشتي قد زالت بعد أن فكرت في الموضوع بصورة شموليه .. فللحج وزارة .. والوزارة أكيد عندها وزير .. والوزير عندو أقسام والأقسام أكيد عندها رؤساء أقسام ورؤساء الأقسام عندهم موظفين والموظفين أكيد عندهم رواتب والرواتب أكيد عند الناس الفوق ديل كووووولهم .. والناس الفوق ديل كوووولهم عندهم عربات والعربات أكيد عاوزه صيانه وبنزين وزيوت وسواقين .. أها أيه رايكم علي اليمين الحج ده كده بالخسارة على الوزارة .. يعني 20 مليون دي ولا راسمالو !!

كسرة :
اقترح ضم وزارة الحج لوزارة الإستثمار

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)

24 تعليق

  1. برنجيييييييية

    1. مبروووووووووووووووووك

      1. الله يبارك فيك يا حبيب , عقبالك بعد ها الحال المايل !

    2. بخيتة و مبروكة عليك يا شمباتى,,,, الليلة دى جازفتها كيف؟؟ ما شغال و الا شنو ؟؟؟

      1. iههههههههههههه,,الله يبارك فيك يا حبيب ,,
        والله شغاااااال وبسلم فى مهام لكن بس طقت فى راسى ادخل !
        لقيت ليك الدار خلا وابوها ميت !
        هههههههه

  2. حتى الخمسة الف ما بصلها !
    اى والله ,
    حج البعثة السودانية دا بكلف ثلاثة الف بس ,,
    والتربح والتكسب دا ما جديد عليهم ,,,
    وفوق ذلك انو فى اوقاف فى مكة والمدينة مفروض ريعها يعود على الحجاج ديل !
    ياربى الحاصل شنو !!!!؟؟؟

    1. ياخوي ريحها كان عاد ما اتلوموا معانا !ّ خلي الريع .!

      1. افييييييي,,,
        الريح من تالاكم والريع من تالانا !
        ههههههههه

    1. عاد الزهور صاحية وانا انوم !؟

  3. ماذا نقول غير حسبى ألله و نعم الوكيل
    ببراءة : هل يصرف العاملون بالوزارة حوافز حج نظير نجاح موسم الحج
    ( النجاح يتمثل فى ان ألله قد غفر لكل الحجاج واسرهم )

    0

  4. هم ديل من جونا بلا يصدوا الناس عن سبيل الله شن شغلتم !ّ
    التذكرة في اغلي حالاتا وبالخطوط السعودية ذهاب واياب بي 1900 ريال ونحنا حجاج الداخل قعد ندفع للحملات في الحج العادي يعني ماكل نايم شارب مع الترحيل للمناسك والمشاعر 3000 ريال يشيلوك من الرياض لين مكة زي الف كيلو وتاااني يجيبوك صاد لحدي الرياض يعني مفروض الحاج السوداني يدفع 4900 ريال يعني بالسوق الاسود 8 مليون ونص , خلي سعر البنك .
    هو ذااتو يوم واااحد في السنة دايرلو وزارة ؟!! هسي وزير الحج ده ما قعد يخجل لما يشيل الراتب !

  5. الله لا كسبهم لا دنيا لا اخرة في دين الله عايزين ياخدو عمولة و يتكسبو و الرئيس البقرة ده ما يدي ولو لي مرة قرار شجاع ما قال هي لله الله يطلع ……………..
    حسبنا الله و نعم الوكيل

  6. عادي يا اخوانا السيد حسبو بعد ما شتت قصبو قال انا الدين دا باكل منو عيش هو براو البياكل كلهم بياكلو من الدين عيش ونحن الحاجنلها شنو

  7. لاحول الله الله يكون في عون الغلابه

  8. حسبنا الله ونعم الوكيل
    حتي في الحج يوجد لبعي

  9. وحات الله الخوف من انو الحكومه تركب عدد لكل موطن في نخرتو ويضمو ليها النفايات تبقي كملت تب

  10. السلام عليكم ورحمه الله وبركاته استقوفني هذا الحدث كثيرا ولكن وبعد فتره حبيت اقول انو تكلفه الحج كما قلت غير مبرر علي الاطلاق الفرق بتاع العشره مليون والعشره التاني بتاعت باقي الوزاره والموظفين والحاشيه التي تحج كل عام علي حساب الشعب السوداني يعني البعثات رغم انو البعثات يصرف لها مبلغ من وزاره الماليه وعليه الرجاء ثم الرجاء الذهاب بالمر الي وزاير الماليه للتاكد من الامر وزير الاشاد والسفاره السعوديه والوكالات المتخصصه في اجرات الحج ومخطبة كل من له صله بهذا الامر حتي لو لو لو لو لو لو لو لو لو تعمل كشف لجمع تبرعات للناس الزين يردون الحج خاصتا الام

  11. سبحححححان الله ومخير الله ف جنس زي ديل الله لا كسبن ياخ ديل ف الجهاد ياكلو وف الحج ياكلو وف الزكاة ياكلو ومال اليتيم ياكلو ….الناس ديل شعارن زيادة الاسعار تؤدي الي زيادة الكروش

  12. لكن اذا كان الناس ما دايرا تفهم يركبولا فهامان نان ….. عليكم الله كلو واحد يسال نفسو في سرو الحكومة دي مما جات ليوم الليلة في شئ نقص غير (البني ادم )….. السودان كدولة نقصت خلي باقي الاضينات ….. راجين شنو …..كن داير الحج بحججوك وكن داير الجنه بدخلوك…. الا العرس يقتلوك ويعرسو مرتك…
    كسرة :يا استاذ جبرا بالطريفة دي انتا قاعد تساعد الحكومة بالاقتراحات البناءة وكمان تكتلنا احنا بالمغصة … ااخخخخخخخخخخخخ ناولني التتامول 100 يا ولد ….

  13. يا احبة رسلو لي ايميلاتكم علي الجوال …. وعن حبيبتي بحكي ليكم ….ضل ضفايرا ملتقانا

    1. شاااايفك اتعودت يا حبيب !! آآآهـ ؟؟

  14. السلام عليكم يالفاتح خليهم يزيدوا زي مادايرين مساكين الموارد نشفت وهم ماعندهم كروش الرقيص وطبعا بعد انفصال الجنوب حالتهم تحنن رافة بكروشهم ممكن نضحي بالحج نؤثر علي انفسنا شويه كمان

  15. عزيزي البروف الفاتح
    حكومتنا المصونة دأبت على التكسب من أي خدمة يحتاجها الناس، ومعاناة الناس لا تتوقف عند ذلك، أنظر حولك لتعرف مدى تكسب الحكومة من مواطنيها بدءاً من الوثائق الثبوتية مروراً بالتعليم والعلاج والمعيشة وإقامة الشعائر الدينية من حج وعمرة وإنتهاءاً بالمرض وسحب الحكومة يدها تماماً من توفير العلاج للمواطن.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: