من غير ملامح

العبدلله له ولع شديد بالحكم والأمثال عموماً والسودانية بصفة خاصة ويكاد يحفظ معظمها وقد كتب عنها عدة مقالات كذلك المقال الذي يتحدث عن الأمثال (الضارة و الهدامة) كذلك المثل الذي يقول (كان عشقت أعشق قمر وكان سرقتا أسرق جمل) والذي نفذ البعض الشق الأخير منه بحذافيره حتي اصبحت السرقات في هذا العهد الرشيد (من جمل وإنتا طالع) !
أو ذلك المثل المدمر الذي يدعو إلى توسيع دائرة الإتلا ف لمجرد العجز عن الإصلاح وهو ذلك المثل الذي يقول (كان غلبك سدها وسع قدها) والذي لو قدر له أن يترجم لأي من اللغات العالمية لإحتارت كل شعوب العالم فينا فما من شعب عاقل بالغ رشيد يمكنه أن يفكر هذا التفكير المجنون
ومن الأمثلة التي لا تقل هدماً عن المثالين السابقيين ذلك المثل الذي يقول (الفي أيدو القلم ما بيكتب روحو شقي) والعبدلله يعتبر هذا المثل بلاء محض و أساس للفساد كالمحاباة والتزوير والمحسوبية و(اللغف) و (اللهط) كما إن العبد لله يتهم هذا المثل إتهاماً صربحاً بأنه وراء كل التدهور والمعاناة التي نعيشها لأنو معظم المسئولين فيما يبدو ما صدقو والأقلام كلها شغاله تكتب … سعيد .. سعيد .. سعيد !
الأمثال الضارة والهدامة كثيرة ولكن هنالك بعض الأمثال ذات المعاني الكبيرة والمغازي التي تنم عن بعد نظر وأفق واسع وخبرة وخيال ومن تلك الأمثال ذلك الذي يقول (أسمع كلام الببكيك ما تسمع كلام البيضحكك) هذا المثل إن حاولنا تفكيكه لوجدنا أن هنالك شخص يواجه معضلة وشخص أو جماعة بيقولو ليهو كلام بيبكي (أي حديث قاس وصعب على عكس قناعاته) وآخرين بيقولو ليهو (كلام يضحكه) أي أقرب إلى قناعاته ويتماشى مع طريقه تفكيره لحل القضية او المعضله والتي ح يوديهو (ومن معه) في ستين الف داهية !
طيب الجماعة البقولو الكلام الببكي ديل منو ؟ وليه بيقولو كلام بيبكي؟
دائماً ما يكون ناس الكلام (البيبكي) والذي هو عكس ما يراهو صاحب المعضلة غالباً ما يكونو من الحادبين على مصلحة ذلك الشخص ويريدون منفعته وعدم وقوع ضرر عليه أو على من هم تحت رعايته وهم في ذلك غير آبهين لما سوف يجره عليهم هذا القول (البيبكي) من صاحب المعضلة لو رآهم كمن ينوون من قولهم القاسي ذلك له الشر مضحين بكل مصالحهم معه (إن وجدت) في سبيل إنتشاله من (الهو فيهو) !
طيب الجماعة البقولو الكلام البيضحك ديل منو ؟ وليه بيقولو كلام بيضحك؟
دائماً ما يكون ناس الكلام (البيضحك) والذي هو يتوافق مع ما يراهو صاحب المعضلة غالباً ما يكونوا أصحاب مصلحة ومنفعة من بقاء ذلك الشخص في معضلته أو مجاراته في إختيار ذلك الحل الذي يفكر فيه والذي يفاقم منها (ما منتفعين وكده) فمصلحة ذلك الشخص أو من (يرعاهم) لا تهمهم بقدر ما يهمهم بقائهم (في أماكنهم منه) لذلك يلقون على مسامعه (الكلام البيضحك) والذي يتماشى وتفكيره في حل المعضلة التي تواجهه وهم يزينون له الأمور ويحرقون له .
طيب نحنا جبنا المثل ده ليه؟
لأنو والبلاد تمر بهذه المنعطفات الخطيرة فقد ظللنا نسدي النصح و(الكلام الببكي) للقائمين على الأمر أن تنحوا (وبطلو الكنكشة) وأدوا الناس (فرصة معاكم) وذلك بتكوين حكومة قومية إنتقالية ثم إنتخابات نزيهة وذلك حتي لا تقع البلاد في مستنقع الفوضى والدمار .. ولكن لا حياة لمن تنادي فولاة الأمر ما بيعجبهم (الكلام الببكي ده) بيعجبهم (الكلام البيضحك ) من شاكلة (خليكم قاعدين الزارعكم غير الله يجي يقلعكم) .. مما يجعلنا نعيش في داخل هذا النفق المظلم ننتظر مستقبلاً (من غير ملامح) !

كسرة :
تنبيه : لا يوجد ضوء في آخر النفق !! (طبعن بيكون في زول سرقو وكده) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟

27 تعليق

  1. برنجججججججججججججججججججججية

  2. من الاقوال التي اعجبتني واري انها تجسد حالنا
    بامكان الاف من الخراف يقودها أسد أن تهزم الاف من الأسود يقودها خروف

  3. البروف والسمار .
    صباح الخير .
    دار أبوك إن خربت شيل ليك فيها شلية .
    ناسنا شغالين بالمثل دة وبعضهم ب(دار أبوك كان حسيت إنها دايرا تخرب خم ليك منها خمة )

  4. نسيت حبل المهلة يربط ويفضل – والمثل دة بالذات انتو مطبقو علينا بالكسرات الثابتة

  5. كان عشقت أعشق قمر …ده برضو الجماعة مطبقنو …مش سرقة الجمل بس………والذي بعد سرقته ممكن تعرس القمر…….شوف كل واحد منهم معرس شنو (من التانية وإنت طالع).؟؟؟

  6. المشكلة البزح ناس الضحك شنو؟ امثال ناس على محمود ماهو لازم يضحكمهم عشان مصالحوا الشخصية ، وعبدالرحيم دا بقى ليهم عادل امام عديل كده ، بعدين انتا قديم من سرقة الجمل اسى بقى كان سرقتا اسرق من عمارتين وانتا طالع .. عشان الجمل اسى بقى مابجيب قمر والقمر بدون جمل شن طعموا ..

  7. وقالوا “الضايق عضة الدبيب بيخاف من جرة الحبل”
    “عايرة وأدوها سوط” أو “فاسدة وأدوها كوز”
    وآخراً وليس أخيراً “المال السايب بيعلم السرقة”

    1. والخيل تجقلب ,,, زى الشررة فى القندول !!!!!!! موش؟؟؟

  8. أم صلمبايتي ولا كدكاي زول
    والبجينا من ايراد عبور البترول بي انابيبنا اخير
    لينا من نمد يدنا للناس وشئ دين وشئ كتيف يدين .
    شوكاية بسلوا بي بكان قدو
    واحسن الناس تقعد مع ناس المشكلة وتصل لي
    حل بدل نضيع زمنا مع الجنوب ويا عوض افتح يا عوض اقفل
    درب دخل في ألمي
    الحكومة حار بيها الدليل عديييل وخلاص ده حدها وما
    قادرة تستمر اكتر من كده لكن ما قادرة تقول

    1. أم سلمبويتي ياجنوبي

      1. شكرا يا بت مدني
        قال : لِصيق طين في كرعين ولاااا ببقي نعلين
        الناس دي نعلات الدين الكانوا لابسنها خلاااااص ..
        عليكي النبي شفتي امثال ناس دارفور دي معبره كيف ؟
        كتلوني ولسه حي : ماااالك ما ترانا في بطن بيتك !

      2. عائق انا للتراث القادم من غرب السودان بصورة ما طبيعية ,,,,
        وجرادة فى سروال ولا بأدى , لكن قعادو ما هلو !!

  9. وكمان مثل المعارضة الدايم,,,,,, يا فيها يا نفسيها

  10. قام من نومو لقي كومو
    ودي حاصله واحد ما معروف من وين وفجعتان ملياردير والشبهات تدور من حوله

  11. مثل جميل جداً وهو “بِِِيعفن ويشما”

    1. ههههههه,,المثل دا بالذات مقرف خالص ,,,
      ههههههههههههههههههههههههههههههه

    2. ههههههههه والله يا بت مدني المثل ده ما فهمتو الا هسي …
      صحي ليه بنشمها ؟
      ممكن ينطبق علي بشه في قرار قفل الانبوب …

  12. كسيير تلج وكدا (الكلام البضحك ) ولازم عشان تقعد وتحافظ علي وضعك من الاعلي منك ……..ززز مشكلة والله

  13. الاستاذ الفاتح جبرا
    ارجو منك عمل زيارة ميدانية لميناء الخرطوم البري كما يسمونه من الساعة 5 ونص الي 7 صباحاً لترى رأي العين معاناة المسافرين لكل ولايات السودان في الدخول للميناء ( فقط عدد 2شباك تزاكر وبوابة شرقية واحدة) و الاخطر كيفية تعرف المسافر على البص الذي سيسافر على متنه ( لا توجد اي لافتة على البص توضح المدينة التي سيتجه اليها) وكذلك تعرضت ممتلكات كثيرمن المسافرين للضياع والسرقة بسبب ان ضالة واحدة فقط هي التي تعمل وبقية الصالات لا تعمل. وتجد ان تّكرة السفر بها تسعيرة والمطلوب سعر اخر. ومن ثم ارجو ان تضع روشتة حلول

  14. امسك دي يا جنوبي (هو من اول عينينو ولا بالحيل والدنيا يقت ليهو بليل) بمعني نظرو من اصلو ضعيف والدنيا اظلمت ليهو اها تاني بشوف…. (الا يكون دفاعو بالنظر)…..
    وهاك من بيت الكلاوي يا شمباتي ( جقَلُو ولا مشي عُرجا) اي الارض الطينية الوعرة لا يستطيع الاعرج المشي عليها وبمعني اخر يا حكومة الكجر انتي عرجا وارضنا طينينة وعره وبالتالي شوفو ليكم غراب جزوهو ارضنا ما بتقدرو تمشو عليها …..
    وتاني واحد للسابلة ( دابي لو في خشمو جرادايه ولا بعضي) بمعني الثعبان الذي في فمه فريسة لا يستطيع ان يلدغ
    ديل زي ناس الهندي عز الدين ومزمل ابو القاسم وباقي المطبلاتية لعنهم الله ولعنهم اللاعنون
    اها قصرت معاكم

  15. واحدة اخيرة ولكن لاهل الاختصاص
    ( ضيعتيني كيف شُخُبْ اللبن الصادف الرملة وخِتا الماعون)
    اها افرك عينيك كويس يا ميرغني المامون

    1. اوووووووو,,, دى سمحة خلاس يا مكتول,
      كتلتنى وما قدرت الحالة العلى !
      وى وى وى

    2. ههههههههه
      الترجمه : اقوي من شمار في مرقة , لأنو هناك بنشرب المرقة وهنا ما بناكل الرملة ,,,
      قت ليك يا كتلوني .., بعد كفيلك مات دنيا ما بقي غير ؟

  16. الاستاذ الفاتح جبرا السلام عليكم
    ممكن تضيف لي كسراتك كسرة جديدة لو سمحت: (اخبار اراضي المهندسيين الزراعيين شنووووو ، و قروشهم مشت وين و عند منووووووووووووووو).
    السودان بلد زراعي (بقولو) طيب طلاب الزراعة ديل عملتو ليهم شنو في موضوع اراضيهم)
    وهم شباب طموح و بحلم انو يعمل مشروع يبداء بيهو حياتو و ينفع بنفسه و اهله و بلده…..لكن….بس…..و الله من العبرة ما قادر اكتب تاني حرف…..تم الباقي انت……..

  17. وهو يا أستاذ الفاتح جبرا الميناء البري دا المواطن ينكوي بنار التذاكر اللا ليها حسيب ولا ليها رقيب ويدفع تذكرة دخول السينما دي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ الله يكون في عون المواطن المغلوب علي أمره والذي فاق حد المرونة كل ما يحملوا عليه يمتد إلي مالا نهاية.

  18. ودا مثل عشان الشعب السوداني لكنه يصب في مصب الجماعة: ( صاحب السمنة لوقال حرقوها حرقوها……….. ) المصالح والهيئات والمشاريع القومية بما فيها الأراضي الميري وغير الميري( وهي أراضي من يشهد صاحبها تسخينها وحرقها وغليها ولاحول له ولاقوة حكم القوي علي الضعيف أمثال خط هيثرو — هيئة مياه المدن الهيئة القومية للكهرباء , هيئة الطيران المدني ( وهاك دي النا
    س باعت الطيران المدني وأنت بتحاجج ليك في حبال بلابقر بخط هيثرو؟؟؟؟؟)

  19. الجماعة مطبقين شقى المثل كان عشت اعشق قمر وكان
    سرقت اسرق بلد مش جمل وكمان بكل خيراتها ماتخلى سارحة ةلا مارحة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: