من غير ترخيص

العبدلله من أشد المقتنعين بإنو القصة في بلدنا دي هايصة (مما جميعو) وإنها بلد بدون (سيستم) إلا سيستم الوليدات القاعدين يلبسوهو ده .. عادي تدخل مطعم فتجد أن كمية الذباب تفوق كمية الزبائن .. تدخل عيادة خاصة فتجد ان كراسي الإنتظار تعاني من ضمور الأرجل .. نعم لا توجد جهات رقابية لمراقبة الأداء لأي شريحة من شرائح المجتمع التي تعمل في سوق الله أكبر وتقدم خدماتها للمواطنين .
قبل أشهر إتضح أن هنالك 6 أطباء بمنطقة الشهداء (بس) فاتحين عيادات (ذي الترتيب) وشغالين في أمان الله مريض داخل ومريض طالع بينما هم في الأصل لا علاقه لهم بكليات الطب .. الفني اسنان فني أسنان .. والمحضر معمل ما محضر معمل وهلم جراً ..
العبدلله لم يندهش لذلك الخبر فالقصة جايطة والمسؤولين عن الرقابة عاوزين (فلوس وبس) والدليل على كده إنو العيادات (المزورة دي) قاعدة تدفع ضرائب وزكاة ونفايات وشنو ما عارف ويوم واحد مافيش حد من الجماعة ديل طالب صاحب العيادة بالترخيص الطبي بتاعو !
هذا المثال السابق يدل على (الهيصة) الأنحنا فيها وتقصير الأجهزة الرقابية في أداء مهامها ولكن لو عاوزين تشوفوا الهيصة وصلت وين فعليكم بقراءة هذا الخبر الذي تناقلته الصخف بالأمس والذى يقول (كشفت وزارة التعليم العالي عن وجود مؤسسات تقوم بمنح أفراد شهادات علمية رغم أنها غير مرخصة وغير مدون إسمها في دليل القبول وهي تقوم بمنح الطلاب درجات علمية بدرجة الدبلوم والبكالوريوس والدراسات العليا دون ترخيص من وزارة التعليم العالي لممارسة هذا العمل) !!
إنتهي الخبر الكارثة والذي يدل أيما دلالة على ما وصلنا إليه في هذا العهد الميمون من تسيب في الاداء الرقابي .. أي زول يأجر ليهو (حتة) ويفتح ليهو مؤسسة تعليمية عليا .. معهد .. كلية .. جامعة .. والطلاب يسجلوا .. واولياء الأمور يدفعو .. والشهادات تطلع والقصة كووووووولها بدون ترخيص من الجهات المختصة وهي (الوزارة) !!
الم اقل لكم بأن القصة هايصة .. وهل هنالك (هيصان) اكثر من أن تقوم جهة بإنشاء مؤسسة تعليمية وتعلن عنها في وسائل الإعلام فيتقدم إليها الراغبون من الطلاب الذين يتم قبولهم وتدريسهم وتخريجهم دون أن تعلم الوزارة المسؤولة من الأمر شيئاً .. هل يمكن أن يحدث هذا في أكثر البلاد تخلفاً وعشوائية ؟
أي ضرر وضياع مال وزمن يحيق بالطلاب وأولياء أمورهم جراء هذا النوع من (الإحتيال)؟ وعلى من تقع المسؤوليه في هذا الأمر ؟ أليس الوزارة مسؤولة بتوجيه السلطات (بقفل) أي مؤسسة تعليمية لا تحمل ترخيصاً ؟ أم أن هنالك جهات أخري تقع على عاتقها هذه المسؤولية ؟
في ظل ما عرف بثورة التعليم العالي والتي أتاحت لكل من هب ودب أن ينشئ ويمتلك مؤسسة تعليمية (عليا) كثرت أعداد الجامعات والمعاهد العليا بصورة مشفقة هذه الشفقة تعود إلى (نوعية التعليم) الذي يتلقاه الطلاب في ظل عدم وجود أساسيات العملية التعليمية من مبان مجهزة وأساتذة مؤهلون ومكتبات ومعامل إلخ كما تعود (وهذا هو الأهم) إلى مصير هؤلاء الطلاب في دولة لا توفر ميزانياتها إلأ عدداً هذيلاً من الفرص الوظيفية التي (نسمع عنها ولا نراها) !
ومع كثرة هذه المؤسسات التعليمية التي اتاحتها (ثورة التعليم) إختلط الحابل بالنابل لذلك فمن الطبيعي أن تقوم وسط هذه الهيصة هذه المؤسسات التعليمية (البروس) التي لا تحمل تصديقاً ففي زمن مضى كان المواطن يحفظ عن ظهر قلب أسماء كل الجامعات والمعاهد أما الآن فلا أتعجب إن كانت هنالك جامعة تسمي (جامعة شمال شرق السافنا) !

كسرة :
هو التعليم (أبو ترخيص) عامل شنو؟ خليك من أبو من غير (ترخيص) !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟

Advertisements

20 تعليق

  1. وكت ده كووولو حاصل ! الاهبل ده بيرقص في شنو !؟
    ويقولوا اسرائيل ! هسي اسرائيل بتقدر لي جنس ده ؟

    1. هي وااااااي برنجيه ..

      1. جنوبى .
        مبروكة عليك .
        لكن شكلك مامصدق .
        وين شمباتى .
        هو التعليم براهو

      2. المثل بقول العرس للعريس والفرح للمطاميس او المتاعيس
        اختر مكانك واحترق

      3. شمباتى قااااعد يا حنين وكايس ليو ترخيص !
        كع …
        جنوبى…
        مبروكة عليك (مع لوية خشم) ,,,

      4. شكرا لكل من بارك ونبارك ليكم السمح ..
        حنين … والله ما صدقت لأنو لي تلاتة سنين ما برنجت .. اتلحتني فيها بت وراق لامن خلتا لي زي جمل الطريفي ..
        هي الزولة دي وينا ؟

    2. مبروك يا جنوبي والله تستاهل البرنجيه وعقبال تبقي زينا وتخليها

    3. لك تقديري جنوبي
      بت وراق مابين شروني والاستاد لافه من غير ترخيص

      1. حمد الله بالسلامة بت وراق والله فقدناك……لكن الحمد الله البقت ماجستير وبالتوفيق يا رب بس انشاء الله ما يكون صيدلة

      2. امممممممم,,
        ترخيص قانونى ولا مرورى !!؟
        بالله عليك رنة فى الرقم دا يا ملكة 0912363016

      3. شمباتي كان رنت عليك سلم لي عليها .. وكان لقيتا
        ما بتحب الجوالات الجديدة اديها رقمي اسلم عليها, سمح ؟

  2. بيرقص فى قفل البلف ..

  3. والله يا الفاتح اخوي انت قاعد تبالغ يعني الدكتوراة الكتيرة زي الملاريا دي الشايلنها الجماعة ديل جاية من وين هو الواحد فيهم لو قلت ليهو اكتب جواب لي ابوك يغلط فيهو عشرة مرات عشان كدة لازم يكون عندهم زي المؤسسات (البروس) دي لكن اهم شئ التـأصيل

  4. الجماعة عارفين عشان كدة بقروا اولادهم برا

  5. أنا المحيرني العاجبهم في الطب ده شنو علشان ينتحلو شخصية طبيب وكل يوم مورمننا بخبر زي ده
    نحن القريناهو لقيناهو غير الهم ما بيجيب شي
    المشكلة في اتحاد الأطباء لو الوزارة نايمة انتو النايمين ليها شنو البلد فضت من الكوادر واتملت بالمكدرات
    اين انتم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

  6. اليوم نرحب بشدة شديدة وفرحة اكيدة بالاخ (جنوبي) في عالم العزابة وحلة العزابة ومن هسع حلة الجمعة عليك

    1. ههههههههههههههههههههههههههههه
      لاكين بعد مقال الليلة ده فكرت ارجعم يقروا هنا ! لو ده التعليم العالي ! مال التحتو يبقي كيف ؟ انا خايف ادفع كدي ولمن يجوا يمتحنو شهادة يقولوا لي المدارس دي ما مرخصة !!
      هو خميس كجو كندة ده قاعد سااااااااااااااااااااكت !!!!!؟
      كيف تجي انت والله حللنا تجقجق ساااكت , اتصل نصل ..

      1. والله ذكرتني ايام زمان كان في واحد رجل شرطة في الحلة جبان جدا وصادف ان طلب منه القبض علي واحد من عتاولة المجرمين غايتو ما عارف قدر كيف يقبض المجرم دا في اطراف المدينة وكلبشه وجاي سايقو زي الغنماية ولامن دخل المدينة وحس بالامان وزفه الشفع والنسوان تلاحقهم بدأ يضرب في المجرم ويهمهم ويغمغم بكلمات العساكر الما معروفة بس داير سبب عشان يضرب ___ المجرم اتلفت عليهو ___ وقال ما كان تجرب تدقني في الخلا داك شان (الحلة تجقجق والجع…ة….تلقلق) انتهي طبعا دي بمناسبة حلتكم البتجقجق ساي …. اتصل نصل انت شغال دليفري ولا شنو
        عفيت منك .
        اما خميس والعوقة التاني بتاع السخافة داك مصطفي تيراب لو تذكرو انا علقت علي واحدة من سخافاتو عند افتتاح ليالي امدرمان المسرحية والله ابو ريالة اخير منو …….. ديل جايبنهم تمومة جرتق ساي ….. لو ما الدنيا بت كلب زول لا يستطيع ان يقرأ سطر كامل دون ان يخطأ يجي يبقي ايه وزير ثقافة …. والله ياهو اتسخفنا

  7. عارفين يا شباب ويا معتقين (عجدائز) انا ضعيت غربت 20 سنة في الخليج بسبب التراخيص والحاجات الفوق دي عامل فيها حقاني لما حقي راح رجعت ابحث عن رزق عيالي تحت الرصاص تصوروا في ليبيا فيه زلت اكثر من كده اخوكم الغلبان والله شوية اكون في كاودا

  8. ياجماعه شفقتونى يعني امتحاني بتاع الماجستير دا ممكن يكون مضروب
    واااااااااااااااااااااااااااىىىى بعد التعب والشلهته دى سجمى ويقس عليكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: