كرت ضغط وكده

من مزايانا دون شعوب الله أننا لا نحسن الترتيب لما هو آت رغم علمنا بأنه لا محالة آت فالطالب عندنا لا يرتب حالو (بالتحصيل والمذاكرة) وهو يعلم علم اليقين بأن الإمتحان آت لا ريب فيه فيقضي معظم العام الدراسي في (الكافتيريا) وأركان النقاش والشنو ما عارف حتي إذا ما إقترب الإمتحان إمتلأت محلات تصوير المستندات وكل يحاول أن يستذكر في(يوم) ما تم تدريسه في (سنة) !!
وتعد عملية الإستعدادات للخريف مثالا يضرب لعدم الترتيب والتجهيز لما هو لا محالة آت فتجد المحليات في إنشغال دائم بالتحصيل والكشات والمرور على ستات الشاي والمطاعم والكافتيريات حتي حتى إذا ما جاء الخريف (فجأتن) ظهر التجهيز وبان وعرفت أنك في (السودان) حيث تمتلئ الميادين بالمياه والأسواق بالبرك والأحياء بالمستنقعات !
هكذا هو حالنا .. لا نحسن التجهيز والترتيب لما نعلم انه لا محالة آت .. ومقالنا هذا خير شاهد ودليل فقد علم المسؤولون بالحكومة أن خيار إنفصال الجنوب هو الخيار الراجح إلا أنهم لم يجهزوا أنفسهم لذلك فتضرر الكثيرون من عدم التجهيز هذا ودونكم على سبيل المثال طلاب جامعة أعالي النيل وكلية الطب على وجه التحديد فقد كان هؤلاء الطلاب يتلقون العلم في أمن وأمان ثم جاء الإنفصال (المرجح) وبدلا من أن تكون الحكومة قد وفرت لهم جامعة بديلة مجهزة لإستيعابهم تم إنشاء جامعة على عجل تفتقر إلى أبسط المقومات الضرورية سميت (جامعة بحري) .. ولم ينتقل الطلاب مباشرة لهذه الجامعة بل قضوا عاما دراسيا كاملا (ضائعاً) بحجة أن الإنشاءآت لم تكتمل والغريب في الأمر ان الطلاب لا زالوا يقطنون في نفس المبنى القديم ولا تشييد ولا يحزنون .
وليت الأمر قد توقف عند هذه السنة التي ضاعت من أعمار هؤلاء الطلاب ولكن (كلو محصل بعضو) إذ أن هنالك عجز في هيئة التدريس ولا توجد زيارات للمستشفيات والجو العام غير مهيأ للدراسة .. المكتبه مولعه نار المكيفات اتركبت ليها سنة ولسه ما اتوصلت ليها كهرباء (ليه ما تعرف؟) .. المشرحة تعاني من عدم وجود جثث جديدة (مع إنو المشرحة الحتة الوحيده التكييفا شغال كويس) … هنالك أزمة (موية شراب) بسبب تعطل وعدم كفاية (مبردات المياه) طاولات الدراسة (لاحقة الصح) ولا تصلح للتعامل الادمي وتعتبر السبب الرئيس في تمزيق ملابس الطلاب !
لقد صبر الطلاب على هذا الوضع المزري منذ تأسيس الجامعه (تقريبا سنه ونص ) ولكن عندما علموا أنه لا توجد حتي بارقة أمل في التصحيح فقد قرروا أن يعتصموا لتوصيل رسالتهم لإدارة الجامعة (الداقه طناش) وكما قال لي أحدهم (القصة أصلو يا أستاذ ما فارقه معانا لو قفلوا لينا الجامعة يعني شنو ما قفلت قبل كده) !
وإختار الطلاب أن يكون إعتصامهم بصورة حضارية فقد تم إختيار لجنة من طلاب سنه تالته (انترميديت ) لحمل وتسليم عريضة بها جميع المطالب للسيد مسجل الكليه الموقر والذي وعدهم بتنفيذها .. ولكن بعض مضي أسابيع (والحال في حالو) إتضح إنو (إدارة الكليه) لم تشرع في تنفيذ أي مطلب من المطالب وهنا صاح الطلاب (إذن هو الاعتصام ليس سواه) وأعتصموا ليهم (يوم واااحد) خاطبهم فيه السيد مدير الكليه شخصيا قائلاً لهم (أدونا مهله ١٠ ايام ننفذ ليكم فيها مطالبكم او ع اقل تقدير نبدا في التنفيذ) فقال الطلاب سمعاً وطاعة والنشوف آخرتا .
نشوف حصل شنو؟ اثناء المهله (الفوق دي) ونظرا لكثرة أعداد طلاب السنة الأولى (ما مفتوحة قبول خاص بالملايين وكده) والذين لا تستوعبهم قاعات الكلية بالخرطوم تلاته فقد تم تخصيص قاعات لهم جوار المشرحه بمستشفى امدرمان .. ولسبب أو أخر قامت مواسير المشرحه فتحت في مواسير الكولرات) والطلاب شربو ليك داك يا الفورملين (ماده تستخدم لتحنيط وحفظ الجثث) .. وبدأوا يعانون من ضيق في التنفس وتم تسجيل 33 حالة تسمم تم إسعافها بواسطة العناية الإلهية بعد أن رفضت بعض المستشفيات إستقبالها .
طيب .. نجي نشوف تعليق إدارة الكلية على قصة تسمم الطلاب دي شنو؟ لقد صرحت إدارة الكلية المبجلة بأنو القصة دي حركة من الطلاب ساااكت وانو هم الختوا الفورمالين في المويه ككرت ضغط وكده عشان ينفذوا ليهم مطالبهم !!

كسرة :
بحري مين ؟ تعالوا المقال الجاي نشوف الحاصل في صيدلة الخرطوم !! .. هو التعليم إنتهى من شوية !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟

21 تعليق

  1. بصدق اي قصه علي طريقه الفاتح جبرا لكن دحن ما كترتا المحلبيه ولا اديتا كوز (يعني كلمه كوز دي من زمان مستعمله للكذب سبحان الله يا دوب فكرتا ليها يقول ليك اديتا كوز دلاله عل كذبه كبيره

    1. يعنى الكيزان هنا فاتوا مسيلمة زاااااتو !!! عافانا الله ……….

  2. ياأستاذ معقول الكلام دا

  3. لا حول ولا قوة الا بالله ………
    الاولاد ديل مالم ايمانم بقي ضعيف كده !!!
    نقول نحنا صدقنا ادارة الجامعة ! طيب ليه توصل اولادنا
    مرحلة الانتحار ؟
    الناس دي يا كافي البلاء لا بتعرف تجد ولاااا بتعرف
    تكذّب !!
    غايتو انا ما عارف البلد دي بدون البشير بتبقي كيف !!!
    آآآآآآخر الاخبار نافع بقي من المرجفون في المدينة
    ويستاهلوا العساكر البدافعوا عنهم !!

    1. اصلو لا !!؟
      وارجف بشنو !!؟

  4. جامعه بحري قال هو دا اسم عليك الله ماكان يسموها جامعه بدل فاقد

  5. يا اخوانا السلام عليكم
    انتو لسيتو ولا شنو __ هو الشعب الفضل دا مالو بقي نساي كدا _ في احدي خطبو ايا م الضلالات الاولي _ البشكير بتاعنا ما قال لازم اي زول واي زولة لازم يقرا ما مهم المكان ( في قاعة في شقة في الرمضان في اوضة في راكوبة وانشاء الله حتي تحت شجرة المهم الناس تقرا …. الله اكبر الله اكبر الله اكبر …. وهللنا وكبرنا اها تاني شنو ليكم اتكتمو بس ..
    كسسسسسسسسسسسسسسسسسسرة
    تاكلو الراس وتخافو من عيونو ………………

    1. ههههههههههههههههههههههههه,,نان نخاف من شنو !!؟
      وروروووووووووك

  6. ومادايرين دقيق فينا قمحنا كتير بكفينا
    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
    كسرة خارج الموضوع
    انتو الحلل الرشوة للمؤسسات الحكومية وقال الذنب علي المرتشي ده منو؟؟؟؟؟؟؟؟؟
    الدين واضح والناس تتزاوغ منو

  7. لسه انتو شفتو حاجه عن قريب جدا حنشوف النجوم عز الضهر وحنشوف اليل وسهر الليل

  8. لطفي طلال عبد اللطيف كرار | رد

    شنو يا جماعة مالكم ما نشرتوا تعليق مازال معلق الحاصل شنو

  9. هووووووي أعملو حسابكم
    الناس ديل ما تنضمو فيهم !ّ
    يلحقوني وينجدوني ،،، ديل من أولياء الله الصالحين
    ودا الدليل

    1. والله الجماعة ديل بالغوا عدييييييييل كدة وثانيا من قال رأيت وهو لم يري لا تجوز لقوله صلي الله عليه وسلم :« من تحلم بحلم لم يرد كلف ان يعقد بين شعيرتين ولن يفعل» رواه البخاري . وقوله صلى الله عليه وسلم: «من افرى الفرى ان يري عينه ما لم تر» رواه البخاري. فنسأل الله العافية

      1. لا يا مندهش !
        ما تهظر ياخ !
        ما معقولة ابدا !!!

  10. هههههههههههههاااااااااااااااااااي ..
    انا ذااااتي يمحقوني وينجضوني .
    جأووا لوالد الشهيد المزعوم وقالوا له إبشر أباء الشهيد إنا شممنا ريح المسك في دمه وكنا نحفر فبره وكأن الارض معطونة بالمسك من طيب ريحها فهللوا وكبروا وأودعوا والد الشهيد جوالات سكر وجركانات زيت وبعض النفاق , شهور قلائل مضت واذا بطارق لباب والد الشهيد , فتح الباب واذا بالشهيد شحما ولحما امام والده بعد ان اطلق العدوا سراحه !!!!
    هو ما يقول انا برشح د. نافع لخلافة البشير ويخلص , مااااالو داخل في الشبك دي كوووولها مع الرسول !؟ هسي ده حال مجتمع اقاموا فيه الصلاة ولآ آتوا زكاة 24 سنة ؟
    هسي بعدين وكت الشفاعة كان الرسول قال ليهو : انا متين حلّمتك ؟

    1. اريتها كان وقفت على التحلم !
      اخخخخخخخخ يا بلد ,,,

  11. لكن الطلبة غلتانين ثم غلتانين !
    ياخ دا ضغط ما طبيعى على الجامعة والحكومة !
    خخخخخخخخخخخخخخخخخخخخخ

  12. ضغط شنو اااااااااااااااا بروف

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: