الصيدلة تتدهور

افي آخر مقال لنا تحدثنا عن بعض أوجه التدهور بجامعة بحري (الوليدة) واليوم دعونا نتحدث كما وعدناكم عن كلية الصيدلة بجامعة الخرطوم (العريقة) .
جامعة الخرطوم تعاني مشكلات كثيرة و كلية الصيدلة بالتحديد يعاني طلابها أشد المعاناة من تدهور مريع جدا في جودة التعليم الصيدلاني بالجامعة مما إنعكس على مشاكل الرعاية الصحية الدوائية بالسودان، و قد ناشد الطلاب المسؤولين بالجامعة بإصلاح هذه المشكلات من أجل تعليم صيدلاني أفضل ولكن يبدو إننا نعيش في عهد (الصهينة) !
ومن هذه المشكلات كما قاموا بإيرادها :
• عدم التدريب الكافي لطلاب الصيدلة في مؤسسات التعليم الصيدلي
• وهذه المسالة واضحة فعند دخولك لأي صيدلية تفاجأ بأن الصيادلة صغار السن لدرجة الإندهاش ولا تملك إلا أن تسال روحك (يا ربي ديل إتخرجو وللا تحت التمرين) !
• كثرة الأخطاء الصيدلانية :
• وقد كتبنا عنها مراراً ولتأكيد ذلك (بيان بالعمل) أن صيدلانية باحثة في الماجستير قامت ببحث ميداني على معظم الصيدليات الرئيسية بولاية الخرطوم في إختبار قدرة الصيادلة على إختيار الدواء المناسب لحالة طفلة صغيرة مصابة بالإسهال، و كانت النتيجة أن أكثر من ثمانين في المائة 80% أعطوها الدواء الخاطئ (شفتو كيف؟) !
• قلة العمل على زيادة الثقافة الدوائية في المجتمع :
مثل عدم إعارة الإهتمام لخطورة صرف المضادات الحيوية من غير وصفة أو روشتة علاجية (ودي ما بتحصل إلا عندنا) وأيضاً قلة التأكيد للمريض أن يكمل كورس العلاج حتى بعد التعافي
• قلة تقديم النصح الإستشاري في إستخدام الأدوية :
طبعاً من النادر جداً أن ينصحك صيدلي مثلاً بان المداومة على تعاطي الدواء المعين يسبب لك كذا وكذا أو أن الأعراض الجانبية لهذا الدواء هي كذا .. أو لو عندك المرض الفلاني ما تاحد الدواء ده (مع إنو دي مهمتو) !
• إنتشار ثقافة العلاج بالأعشاب على حساب الثقافة الدوائية الصحية العلمية :
وهذا يرجع إلى فقدان الكثير من المرضى لثقتهم في أدوية الصيدلية و إعتقادهم بأنها كيماوية) ضارة) و أن الأعشاب هي طبيعية) لا تضر) ، و هذا بسبب قلة نصح الصيادلة و إيصالهم لرسالة أن أدوية الصيدلية هي أدوية نقية و لا تسبب الأعراض الجانبية الخطيرة التي تسببها الأعشاب و أن كون الأعشاب طبيعية لا يعني أنها نقية و لا تسبب عللا أخرى.
• الترويج للمضادات الحيوية التي أصبحت تصرف عشوائيا بسبب المنافسة بين شركات إستيراد و توزيع الأدوية بالترويج لأسمائها التجارية لدى الأطباء عن طريق الصيادلة الممثلين لهذه الشركات و تخفيزهم للأطباء لكتابة الروشتات للمضادات الحيوية بالإسماء التجارية الجديدة من غير الإنتباه لأطيافها و قوتها مما أدى أن يكون الكثير من هذه المضادات الحيوية لا يجدي علاجا بسبب مقاومة الممرضات لها .
إنتهت (مقتطفات) مبادرة أولادنا بصيدلة الخرطوم وقد أوردناها هنا حتي نتلقى الرد ممن يهمهم الأمر عشان نشوف وجهة نظر المختصين شنوووو؟
كسرة :
العبدلله يرى أن ما نراهو من تدهور في كليات الطب والصيدلة كفيل بتعجيل إنتقال بقية الشعب الفضل إلى الرفيق الأعلى !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟

19 تعليق

  1. يا أستاذنا
    سؤال في سؤالين سريع كدة من شباك الحافلة وهي ماشة
    عرفنا انه يحفظ الدواء في درجة حرارة 25 وطبعا الصيدليات مكيفة
    س1: درجة حرارة مخزن الصيدلية كم؟
    س2: درجة حرارة مخزن شركات الادوية كم؟

    1. عشان كدة يا حاتم يا اخوى الصيادلة اخدوها من قاصرها و قلبوها بوتيكات عدييل كدة,,, ادوات تجميل و كريمات و صابون و بامبرز و قدر ظروفك و (دقة دوم) و شنو ما بعرفو داك ,, و بالكاد تستطيع ان ترى بعض الادوية بخلاف البنادول و كم فتيل مضاد حيوى بودرة و شوية حقن ,,,,,,

      1. وديل ذاتهم لو قلبت العلبة وعاينت الصلاحية حا تندهش !!!

      2. نسيت الشوكولاتة والشباشب يا فيلاديمير !
        نفسي اعرف صيدلية حديثة يعني شنو ؟

  2. قصة منقولة من لسان مندوبة شركة ادوية عند زيارتها لاحد الاطباء في عيادته:
    بعد ان اكملت عرضها للدواء وميزاته علي الطبيب . قال لها :
    يابتي . شايفه العربية الواقفة هناااك ديك ؟ دي جابوها لي ناس شركة فلان .
    دحين عندكم حاجة زيها كدة ؟
    !!!!!

  3. طيب العمل شنو والشعب يعمل إيه

    1. ياعفراء يا اختى الشعب زى ماقال البروف بقى صهيونى؟؟؟؟؟؟؟؟؟؟؟؟؟؟؟؟؟؟؟؟؟

    2. هو الشعب ده بتغلبوا حاجه يا بت مدني !؟
      ما زمااااااااان عمل شربات مورينغا,,,

      1. ولا مورنقا ولاغير يعمل نايم وخلاص

  4. يعمل صندوق مع الحكومة و يشيل الصرفة الاخيرة دة لو ادوها ليهو

    1. الصرفة الاخيرة حاجزاها المعارضة ,,
      يدفع سااااااااااكت ..

  5. في السعودية لو الشئون الصحية لقت علبة دواء مفتوحه
    وناقصة شريط .. غرامة وانذار للصيدلي وتاني مرة غرامة
    للصيدلي وصاحب الصيدلية وممكن يقفلوا الصيدلية .
    في السودان الصيدلي بلا يشاورك يفتح العلبة ويديك
    شريط ويقول ليك ده بكفيك ! ما يفضل الا يقول ليك
    الفقرا اتقاسموا النبقة ,,
    هسي العطور دخلها بالصيدلة شنو ؟ تكون عشان بتريح
    الاعصاب !؟

  6. الله يكون فى عون الشعب الفضل

  7. كدى ياجماعة ورونا المااتدهور شنو كله محصل بعضه ولسه التقيل جاى وتانى مافى شعب حيكون فضل

  8. السلام عليكم ورحمة الله
    انا عملت في صيدلية 5 سنين في السودان ويوم من الايام الصيدلي في وردية الصباح صرف لواحده كلوروكين منتهي الصلاحية وتم فتح بلاغ وهاك يا حماية المستهلك جرةجرة شديدة اها جا بتاع المباحث وقال لصاحب الصيدلية والي هو صيدلي ليهو ضل قال تدفع لي الزول الفتح البلاغ مبلغ كذا ونحن كمان نمسح شنبنا والبلاغ دا نغطس ليك حجرو والدكتور بلع الطعم والشغلانة بقت زي المنشار صاحبة البلاغ كلما تفلس تتصل تقول الايام دي الظروف شوية تعبانة والدكتور يدفع وبعدها يتصل بتاع المباحث يخبر الدكتور بان صاحب البلاغ قال عايز يحرك البلاغ فانت رايك شنو ….خلاس بدفع ليك 300 بس ودر البلاغ ما يتلقي اصلو واستمر الابتزاز فترة من الزمن …. وفي الاخر اكتشفنا انو الصيدلي الصرف الدواء لا صيدلي ولا عندو علاقة بالصيدلة قال بس كان نفسو يبقي صيدلي وما قادر قام ابوهو صاحب القروش الكتيرة فتح ليهو صيدلية وقال ليهو انت المسؤول ….. لامن قطع الصيدلية والباقي جردو لينا وبالمرة اشتغل معانا صيدلي لغاية ما الكفوة دي جات واكتشفنا المستور … وما عارف لغاية الوقت داك يكون كتل ليهو كم زول ……..
    والادهي والامر عند حدوث ذلك طلب منا صاحب الصيدلية جرد الادوية منتهية الصلاحية في الارفف والمخزن وكانت المفاجأة ان وجدنا اودية من العام 1984 ونحن وقتها في العام 2003 والله العظيم انا قربت اجن يا دكتور طيب الدواء من ليهو 20 سنه بتسوي بيهو شنو ما توديهو ادراة الصيدلة …………والله 2 عربة صغيرة محملة بادوية من سنة حفرو البحر وكان بقول لي الدواء دا من زمن البندول كان بالصف ….. طبعا لازم الصيدليه تكون خاليه من اي مخالفات عشان ناس الرقابة جايين تحت اي لجظة ….. وعشان نتخلص الالسموم دي 3 ايام تلته ادارة الصيدلة …..وشنو وتدقع هنا وهناك …..
    والقصة طويـــــــــــــــــــــــــــــــــــــــــــــــــــــــــــــــــــــلة يا اخوانا
    والله سودانا دا غريب غريب غريب

    1. ياخ غريب انت البتجيب الحكاوى المؤلمة دى !
      اخخخخخ يا بلد ,,,
      حبى واشتياقاتى…

  9. د. احمد نادر محمد خير عتمان | رد

    الأخ الأستاذ و الكاتب الساخر الجاد جبرا..
    قرأت مقالك عن حال الصيدله و الصيادله اليوم ببلدنا المنكوب و الواقف في
    مفترق طرق تعصف به كوارث سمها ما شئت من تردي و فساد و هيمنه و إهمال و
    تمكين.. و اليوم تصيبه المصائب في مقتل و هو مستوى العاملين بالحقل الصحي
    تلازماً بالتردى في مستوي التعليم و ما أدراك ما التعليم بسودان اليوم.
    كاتب هذه السطور أخيك أحمد نادر محمد خير عثمان، أكاديمي و استاذ مساعد
    بكلية الصيدله بجامعة قطر. و أنا من هؤلاء الذين امضوا سنوات العمر
    مهاجرا ما بين بلدان طيرها عجمي و أخر خليجيه كحال الملايين من المهجرين
    و الذين اكتتوا بعذابات البعد عن الاهل و الوطن مكرهين. و لكني كغيري ممن
    حظوا بقدر من التأهيل الأكاديمي الذي نشعر في غرارة انفسنا بأن بلدنا و
    أهلنا في أشد الحاجة اليه و لكن لا ندري كيف و متي و اين نستخدمه في بلد
    صرنا فيه غرباءاً و اقليه لعدم انتماءنا لحزب الله المختار،، و صدقني
    كلما حط بي الرحال بالوطن و قادتني قدماي الي صيدليه او مستشفي، انتابتني
    مشاعر الغضب و الأسي و قلة الحيله بما وصل اليه الحال من تردي يقارب
    المأساة. و الكارثة ان أبناءنا الطلبة لا يعوزهم الذكاء و المقدرة علي
    التحصيل و التفوق، و لكنهم كغيرهم أضحوا ضحايا منظومه تعليميه تحكمها
    الربحيه و قصر النظر و التسطيح. و هذه مصيبه كارثيه لا حل لها سوي تحول
    كامل في السياسة و الفلسفة التعليميه لا أتوقع حدوثه الا كجزء من تحول
    سياسي اكبر و اشمل. اعتذر عن عدم مقدرتي علي الاسترسال حيث اكتب إليك من
    مطار دبي و طائرتي علي وشك الإقلاع و لكن أعدك بان أواصل النقاش في حال
    استلام رد منك علي هذه الرسال، مع احترامي.

    د. نادر خير

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: