يخسي عليكم

وقف العبدلله متأملاً تلك العبارة التي أطلقتها النائبة البرلمانية في وجه نواب البرلمان وهم قد أجازوا عقداً ربوياً قائلة وهي تلملم أوراقها متجه إلى خارج القاعة (يخسي عليكم) ! ومصدر تأملي لهذه العبارة كونها جديدة على الإستخدام (البرلماني) وتفتح باباً لهذا النوع من (الأدب) فما بالكم لو أن رهط البرلمانيين المخاطبين في القاعة قد ردوا عليهل ردة رجل واااحد : يخسي عليكي إنتي
يبدو أن النائبة المحترمة قد سقط (إخوان الطريق) من عينها وهي تراهم قد أشتروا بِعَهْدِ ٱللَّهِ وَأَيْمَانِهِمْ ثَمَناً قَلِيلاً وهم يجيزون ما حرم الله فقالت عبارتها تلك والتي تنم عن (خيبة أمل) فيمن حسبت انهم لا لدنيا قد عملو !
والعبدلله يحسب أن (خيبة الأمل) هذه قد جاءت متأخرة كثيراً فلا أظن أن هذه هي المرة الأولي التي تري فيها النائبة المحترمة ما يخالف الدين ويجانب السيرة العطرة وما ملفات الفساد المفتوحة و(المقفولة) و المفتولة (لا معروف مفتوحة وللا مقفولة) إلا شاهداً على خيبة أملنا (نحنا) الكنا قايلين القبه تحتها فكي قبل خيبة أملها (هي) !
يخسي عليكم .. كان ما المفترض أن تعقبها النائبة المحترمة بـ(يا ما عندكم دم) فأي ضرورات يراها هؤلاء النواب تبيح (الربا) حتي يصيبنا غضب الله وسخطه (ده لو لحدت هسه ما اصابنا) والمسؤول عن لجنة فساد شركة الأقطان (مولانا بابكر قشي) يصرح بأن ما تم إسترداده وهو جزء بسيط من الأموال المنهوبة هو 23 مليون (يورو) و 987 ألف وما قيمته 30 مليار جنيه سوداني يعني (لو حولناها دولارات) تكون حوالي (34) مليون دولار بينما هذا القرض الربوي بقيمة (85) مليون دولار يعني إذا ده جزء بسيط فالأموال المنهوبة بلا شك تتجاوز قيمة هذا القرض الربوي فتأملوا يا جماعة الخير وأفتونا يا علماء (الســــودان) .. شركة (واااحده بس) تنهب أكثر من 85 مليون دولار وتجي الحكومة تقترض 85 مليون دولار (بالربا) .. بربكم هل هي الضرورات أم فساد الذمم؟
يبدو أن النائبة المحترمة حانقة على (نوام الشعب) لذا فلن نستغرش (نستغرب ونندهش) إذا ما وجدتهم في الكافتيريا وهم يأكلون فقالت لهم وهي تشير لهم رافعة سبابة يدها اليمني : تجيزوا في الربا وكمان تاكلوا .. تاكلو إن شاء الله الحمت رمت.
اما إذا وجدتهم بعد الأكل يشربون (كمان تشربوا؟ تشربوا الشربتو حميرا) وحميرا هذه ما معروف شربت شنو لكن الشربتو الظاهر لحقا أمات طه .
أما إذا ما سمعتهم وهو يجيبون عند التصويت بـ (نعم) وهم يجيزون زيادة الضريبة عل سلعة ضرورية لملمت أوراقها وهي تنسحب من الجلسة قائلة : بس تعرفو لي نعم؟ النعامة التزوزي بيكم وتعرفو لى زيادة الضرائب يضربكم الضريب شقاق العناقريب لكن قبل أن تغادر القاعة تشاهد النواب وهم يصفقون عند إجازة الزيادة فترفع رأسها تخاطبهم : وكمان تصفقوا. إن شاء الله تصفقو بلا إيدين .
أما عند دعوة السيد وزير المالية بإقامة صلاة إستسقاء عشان الأمطار ( تجي ) فسوف نشاهد النائبة المحترمة وهي تخاطب زملائها النواب قائلة : تجيزو ليا في الربا وعايزين المطرة تجي؟ تجيكم الطاوية حبالها !!

كسرة:
طيب أقلعوا لينا قروش خط هيثرو من الجماعة وأعملو بيها كهرباء الشرق دي .. وبلاش القرض بتاع الربا ده .. قال ضرورات قال
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟

Advertisements

32 تعليق

  1. بيرنجيتون من بعدى طولى غيابون !!! (بالتنوين كمان ما عاجبكم)

    1. مبروكن ,,
      يخسي عليك انت ما باركت لي برنجيتي ..

    2. يخسي عليكون يا فلاديميرون لييون مون باركتون برنجيتون كتيرون بتاعون انون

    3. حيييي انا ,,,
      ما قلتوا نوبة !؟
      وينها نقارتكم ؟؟
      كع

  2. يخسي عليكم
    وتفووووء عليكم
    برلمان مامحترم

  3. كانت تقول ليهم يخسي عليكم يا باطلين ..
    وهناي كان قاعد ؟ ما عامل فيها تخصص طهارة ! ولا
    فهمو للطهارة في شيتاً كُتر ؟ هسي كان البنات لعبن
    الكورة عرااايا ما اخير من جنس ده ؟
    يخسيييييييييييييييييييييييي

  4. المفرح في الامر ان اثر التعامل بالربا لا يأخذ فتره طويله ويظهر اثره واتمني ان تضيق صدورهم وتشتعل احشاءهم نارا نري اثرها عينا وان تزول هذه الطغمه ولكني اعود واقل ان الشعب هو الذي يفرط في حقوقه عندما يعطيها لكل كلاب الاحزاب التي لاتريد ان تتغير شخوصها ولا تجاربها

  5. عزيزي البروف
    بغض النظر عن نزاهة أو عدم نزاهة الانتخابات التي جاءت بهؤلاء النواب، نأمل أن يكون المواطن على دراية تامة بسلوك وتصرفات هؤلاء النواب، وأتمنى أن تكون مساحة التوعية مناسبة لفضح أي نائب لا يستحق أن يكون ممثلاً لمواطنيه.
    أتمنى صادقاً أن ترسي هذه الممارسات ثقافة جديدة تؤدي إلى انتخاب وجوه جديدة تعي المسئولية وتراعي الأمانة.
    ودمتم

    1. حلم الجيعان عيش ديل بيجيبوا العيش ايام الانتخابات وكده

  6. البروف والسمار .
    سلامات .
    والله ثقافة (يخسى عليكم ) دى ثقافة جديدة علينا ومفادها إنو نقنع من خيرا فى الجماعه ديل لأنو لو لوموهم بدون نبز كان يكون فى أمل للاصلاح أما وقد وصل الحال الى يخسى عليكم فهذة قمة الانحطاط من هؤلاء الميؤوس منهم .
    الله فى …

  7. سلامات يا اهلنا الطيبين
    انا امبارح قاعد في الركوبة بقرا كلام الزولاية دي والله اتحيرتا لكن بعد شوية بديت اتذكر في ثقافة (سخافة) قلة الادب الجابوها لينا البجم ديل اول شي استوقفني (بلو واشرب موية ) والله العبارة دي بالذات واحنا صغار ما نقدر نقولا قدام الناس يجي الهمبول دا يجويعر بيهو قدام الخلوق …فضحتنا الله يفضحك في لاهاي يا رب قولو آآآآآآآآآآمين …… والزارعنا غير الله اليجي يقعلنا ….. والانسان الذي كرمه الله يصفونهم بالحشرات (الحشرة الشعبية) …. وحسبو نسوان والعفانة والطهارة انشاء الله يطهروك في الشتاء …. ولحس الكوع …. انشاء تلحس …… والمفردات السخافية كتيرة وشكلو حيكون موضوع بحثي …..لكن لامن تصل حتي النسوان وفي البرلمان وتقولو لنوام البرلمان دي الا ماسكة ليهم زلة كلهم ….. وانا بقول يخسي علينا نحنا الي هسع ما قادرين نقلعكم …. ويخسي عليكي انتي يا الما عندك ….. خليناهو لاحسن جنوبي يزعل …
    يخسي علي دي حكومة

    1. ما قت بتجينا يا حليل مجيكا !
      النصيحة سعاد دي شدة ما عجبتني لمن فكرت اودي ليها
      طشت تراب واختو ليها جوه البرلمان شان المره الجاية
      تبقي يخسي عليكم مع قبضة تراب في وشيهم .. شاحد الله
      دقونن دي تقوم لاجوه قادر يا كريم ….
      يخسي عليك طهورة الشتا ما حااااره

      1. والا تسوي الحي ووب وتكتح راسها يمكن نحنا نتمرجل ونعيد امجاد اكتوبر وابريل

  8. ارجو تعميم الثقافة الجيدة في المدارس … فيكون عندنا امل قالت يخسي عليكا … قام بدر رد ليها … هوي يا بت صني دا كلام رجال.

  9. ارجو تعميم الثقافة الجديدة في المدارس … فيكون عندنا امل قالت يخسي عليكا … قام بدر رد ليها … هوي يا بت صني دا كلام رجال.

  10. الله يكوم في العون والقدم احلى

    1. ارجو تعميم الثقافة الجديدة في المدارس … فيكون عندنا امل قالت يخسي عليكا … قام بدر رد ليها … هوي يا بت صني دا كلام رجال.

  11. تحيه طيبه يابروف
    انت شكلك لقيت البفشك الله ادينا البفشنا نحنا؟؟؟؟؟؟!!!!

  12. ياأستاذ القروش الراحت دي الجماعه قنعو منها ومافي غير القروض دي وحتي الدول الإسلامية بتتعامل بيها ولعلمك القرض دا جاي من الكويت …طيب العمل شنو؟؟؟؟؟؟؟؟؟

  13. ياجماعة الظلم اتفشى والمغسة كتلت الناس كدى ورونا الحاجة الكويسة الشنو العملوها الجماعة ديل دخلوا علينا بالساحق والماحق والبلى التلاحق وين حب الوطن حب الغبش حب الدين حب العقيدة اخخخخخخخخخخخ عليك يابلد واه عليك

  14. ان بقت على يخسي عليكم هينه … كعب الكلام التاني

  15. والله عفيت عنها …..قدرت تقول الكلمه داخل البرمان وهذا دليل قاطع لا…لا….يوجد رجل رشيد تحت قبة البرلمان ألهم أرنا عجائب

    قدرتك فيهم جميعا. من رفعوا شعار نسرق مما نزرع ونأكل مما نسرق..ونضحك مما يقول الشعب.ألهم أنزلهم نزل ( بضم النون )

    أبوغريب. ألهم لف جميع خطوط الدنيا حول رقبتهم ألهم جرهم بخط هيثرو من أمبده الي لاهاي يارب العالمين .

    ا

    1. ياخوي لاهاي (دايركت) مش عن طريق هيثرو

  16. النصيحة حضرة النائبة ما قصرت تب ,,,
    يخسى عليهم فردا فردا ,,,

    1. سلام يس ياسين شمباتي بعد غيبه وفرده فرده دي ذكرتني الجزم ليه يا ربي جنوبي عارف

      1. هههههههههههههههههههااااى,,
        والله ما قصدت لكن اسه قاصد !
        كع

      2. في دي كمان , كل فردة من بلد !!

  17. رجو تعميم الثقافة الجديدة في المدارس … فيكون عندنا امل قالت يخسي عليكا … قام بدر رد ليها … هوي يا بت صني دا كلام رجال.

  18. llllllllllllllllllllllllllllllllllllllllllllllllllllllllllllllllllllllllllllllllllllllllllllll

  19. يا بروف إذا كانوا هم نوام البرلمان أكيد حتكون دي السخافة الإتعلموها من صغرهم وجايين يطبقوها هسي (تجيهم الطاويه حبالها يا رب) الله يهد حيلكم يااااااااا أجانب السودان (لأني ما قااادر أوصفكم بالسودانيين) لأنكم ما بتستاهلو تكونوا سودانيين والسودان برئ منكم براءة الذئب من دم يوسف *** شابكننا تقشف تقشف لمن الواحد بقه يطبق زي القميص واحد (شحدت ربي وانا صايم يكشف حالكم وحال كل مسئول في الحكومه ما داير أقول ضارب الخزينة لأنو مستحيل يكون في واحد منهم ما ضاربها لكن بقول كل مسئول في الحكومه ما قايم بي مهامو كما يرضي الله وضميرو دا لو لسه فيهم ضماير الله يكشف حالو ويقلل مقدارو)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: