رفع تااااني؟

هذا المقال نشر عند (رفع الدعم الأول) نعيده بمناسبة إتجاه الحكومة لرفع الدعم (تااااني) .. تقول الحكاية :
أنه في غابر الزمان كان هنالك حاكم يحكم أحد شعوب (اليونان) ولما كبر هذا الحاكم في السن وداهمه المرض وأصبح لا ينفع معه زيت سمسم ولا قرض أحس بقرب نهايته فطلب من الحراس أن يأتوه بعبايته ثم أن يأتوا له بابنه الوحيد وهو شاب عنيد لاشك أنه سيخلفه في حكم الدولة لأنه بذلك أولى !
ولما مثل إبنه بين يديه قال له : يا بني اني أحس بنهايتي الأليمة وسأوصيك بوصية عظيمة يجب عليك أن تنفذها بالحذافير مهما سوف يصير وهي أن وجدت نفسك يوما في زنقة شديدة لأن دولتك أفلست وبقت على الحديدة فاذهب إلى تلك المغارة المظلمة خلف القصر وذلك بعد وقت العصر فستجد بها حبلا مربوطا إلى السقف خذه دون دوران أو لف واشنق نفسك دون خوف أو رعب لترتاح من محاسبة الشعب ، وما كاد الحاكم ينتهي من الوصية (على طريقة الأفلام الهندية) حتى أغمض عينيه ومات.
وما أن تولى (الوارث الوحيد) الحكم وأصبح ذا مكانة حتى تحلقت حوله البطانة، من وزراء ووجهاء ومستشارين وكمان بعض رجال الدين (اليوناني طبعن) فأخذوا يبعثرون الثروة ويبددونها غير عابئين دون أن يرف لهم جفن أو عين حيث أقاموا الفلل والعمارات وإمتطوا الفاره من العربات وأكتنزوا الدنانير ومختلف العملات التي أبانتها بالصدفة بعض السرقات، يلغفون دون أن تطالهم يد العدالة وهم مطمئنون إنو مافيش (إقاله) يفعلون كل ذلك ببرودة دم لأنو عارفين مافيش زول ح يسالهم (تلت التلاته كم) ، فما لبثت فضائح الفساد قد أضحت داوية مما جعل (خزنة الدولة) تصبح خاوية ، وأصبح الوارث الجديد (مزنوق شديد) ، وهنا تذكر وصية أبيه الحاكم الحكيم فقال مخاطباً نفسه في تسليم (لابد من النهاية بعد أن جاطت الحكاية) لابد أن أشنق نفسي وأستريح وأتخارج من هذا الموقف القبيح ، فذهب صاحبنا في الحال إلى المغارة ليشنق نفسه حسب الوصية فقام بدخول المغارة المظلمة في جدية ، فوجد الحبل متدليا من الأعلى مما يوكد أنها طريقة موت سهلة، فما كان منه إلا أن أغرورغت عيناه بالدموع حيث لا مجال هنالك إلى الرجوع ، فلف الحبل على رقبته ثم دفع بنفسه في الهواء في منظر يبعث على الرثاء، ولكن ما أن تدلي الحبل ونظر إلى الخلف حتي وجد النقود تنهال عليه من السقف ، بينما رنين الذهب يصم الآذان في منظر تقشعر له الأبدان ، ثم وجد نفسه مستلقياً أسفل المغارة وإلى جانبه ورقه في شكل رسالة كتبها له أبوه الحاكم يقول فيها يا بني هذه نصف ثروتي كنت قد خبأتها لك لهذه اللحظة بالتحديد عشان عارف رجالك شغالين تبديد، فعد إلى رشدك واضرب بيد من حديد على كل من يحاول أن (يلغف) من هذه الثروة من جديد ، حتى لا تصل إلى ما وصلت إليه الآن من (فلس) عشان تاني ما تتزنق وتدق لينا (جرس) !
إنتهت قصة الحاكم اليوناني .. طيب نحنا جبنا القصة دي ليه؟ طبعاً عشان نشوف الحكومة دي آخرتا ايه؟ لأنها قررت أن تدخل مغارة (رفع الدعم) المخيفة بعد أن عدمت الخزنة (التعريفة)، وتقوم تلف الحبل على رقبتها دون عناء ثم تدفع نفسها في الهواء وظنت أنها ما أن تفعل ذلك في إقتدار حتي ينهال عليها الجنيه والدولار، كما جاء في حكاية الملك اليوناني الماعاوزين نكررا تاااني !
ولكن أمنا الحكومة ما أن تلف (المرة دي) حول رقبتها حبل (رفع الدعم) حتي تصيبها الحيرة والغم فبدلاً من أن تنهال عليها أوراق النقود والذهب ستجد نفسها في موقف صعب إذ سوف تنهال عليها هتافات المواطنين وهم يصيحون في غبن وأنين :
– رفع تااااني؟ والله إنتو كترتوا الشغلانه .. يلا حلوا عن سمانا

كسرة :
عاوزين يا ناس الحكومة النصيحة ؟ دخول مغارة (رفع الدعم) المرة دي بالذاااات مخيفة … فحاولو أدرسوا الحكاية دي شديد عشان الشعب بقي ماشي على (عجل الحديد) وأهو نحنا قلنا ليكم والكلام فات أضنيكم !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)؟

Advertisements

31 تعليق

  1. very valuable advise but do think they will listen……………i doubt

  2. الترفع ساااكت كان دايره , هسي الحيكومة دي قصرت
    معانا في شنو ؟ نحمد الله قاعدين جوه بيوتنا و أدتنا
    رتب عسكرية !! وبكره نسمع بي محاكمة المدني اركان
    حرب !!!
    انت من زمن بنصيح ونئن وحات الله التقول
    كووولنا عملنا عملية بواسير في يوم واااحد ! الترفع
    رفعا سااااكت زولا بصيح مافي !
    ” العقيد مدني جنوبي “

    1. السلام و عليك وم ، يقول لك واحد من اخوانا الغادروا زمن نميرى ، وقف فى مجلس الشعب و بى طول حسو قال: رئيس بتاءنا رفأ مره فى مرتبه اليه ، ياهو ده الرفع ياهو ده الرفع ، يرفعونا كيف اكتر من مرتبه عاليه

      1. كوكو
        وين انت ياخ ؟؟ الشوق شقانا

      2. كوكو .. حمدلاك بالسلامه .. وينك ياخ ؟
        يا حليل زمن نميري والشعب الكان !!!

    2. الاخ جبرا والاخوه السمار
      سلامات
      لقد مات هذا الشعب دماغيا ونحن فى انتظار الموت السريرى واستخراج شهادة الوفا

      1. اها وبتدفنوهو وين ؟؟؟؟؟

    3. لاخ جنوبي انت في اجازه فى السودان ولا شنو

      1. يا رييييييت ..
        وحاتك داير اجي ونهاااااائي لاكين كل ما اجيب طاري
        الجية أمي ومرتي يسكلبن , اقوم تاااني اقعد شوية ..
        الله يلعن ابو الخلي الام والمره يرضن ليك الغيب
        ليأتيهن ما في الجيب !!
        عليك النبي كان ما قابلتي شمباتي , انتي بس رني ليهو
        والركشه ده براهو بترتر ويجيكي ..

    4. انت بي صحك انا ذاتي بسكلب
      اما شمباتى انا في الانتظار والله يعدل درب الركشه

      1. هههههه .. شمباتي ده كل مل ادق ليهو القاهو يا ماشي مدني
        يا جاي من مدني !! اها المدنية ذااتا لغوها .. قالوا ناس
        الستين ينزلوهم معاش بي هنا وتجي الخدمة الالزامية تشيلم
        بي هنا !!! انا خايف بكره يربطوا صرف المعاش بي خلو طرف
        من الالزامية ,,

      2. هييييي ,,
        ترترة لا !!
        طاااااااخ

    5. اقعد باري لي في الشعب رفعوهو والشعب نزلوهو لامن قروشك تكمل في مريسة الصافية ومشاريعك الزراعية تقوم (مشك) بضم الميم والشين …ساكت
      احذر ثورة الجنقو

      1. بضم الميم والشين وتسكين الكاف , وهي مدرة للبول
        وتفيد في تنظيف الكلي والمسالك ومقوية للدم تفيد
        مرضي فقر الدم ريخصة في ثمنها لزوي الدخل المهدود ..
        كلنا تجسدنا ود أمونة مضمونا و إن خالفناه في الشكل
        فتمثلت الحكومة لنا بيت الام واوهمنا
        انفسنا ان لا عيش بدونها ..
        والله تباري لي عبد العزيز بركه ده الا يمرقك الشارع بدون هدوم !1

  3. أحياناً يغرقنا الحزن والغربة عن أرض الوطن حتى نعتاد على الحزن والألم والأسى والأسف
    وننسى أن في الحياة أشياء كثيرة يمكن أن تسعدنا ،، وأن من حولنا أصدقاء يمكن أن يضيئوا
    في ظلام أيامنا شمعة،،، شكرا عباس ركس وتقديري ل كتلوني ولسه حي وإمتناني لجنوبي ،،، وفاتتك ياشمباتي
    وكل الشكر يابروف لولاك لما كانت هذه السهرة التي تؤرخ ،،،، والسودان لسه بخيرو طالما فيه أمثال هؤلاء النفر

    1. سنين قضيناها في ( السوء ديه ) كما ينطقها ربعي واظنهم اصابوا بالخطأ , لم نحصد منها الا معرفة امثالكم . شكرا لله و للقمردينة ..
      وكما قال كتلوني : علي النجيلة جلسنا ..

    2. انه السودان وناس السودان مهما تكالبت عليه بغاث الطيور والاحن والمحن … يظل انسانها هو انسانها بكل ما تحمل الكلمة من معاني ودلات …. ربنا اخليكم ويحفظكم ويرجعكم الي اهلكم سالمين وغانمين…. وكن حيين بنتلاقي في ضل الحرية ام همبريبا طالق
      ….

      1. ترااااااااااااااااح

  4. هههههههههه,آيييي دا الرفع دا الرفع ,,,

    1. امس افتقدناك يا حبيب ..

    2. والله فاتتك …. فاتتك ….. فاتتتك
      امس خمينا جنس رماد …. باقيهو لاسع موجود
      الشعب المرفوع وين …. وين الملايين

      1. الله اكبر عليكم ,
        اهئ اهئ اهئ

  5. سلامات يا شباب , كيف اصبحتو ؟؟؟؟؟

    1. اصبحنا ممعطين النجيله ..
      ياخي جيدا جيت وتدنا قلوبنا طله .. عقبال بقية الاسماء المجمدة النشاط …

    2. الحمد لله ايها العزيز لعلك بخير
      شكلو كدا امس كترنا من الرماد وفول الحاجات
      اصبحنا ووجدنا الشعب مرفوع تااااااااااااني

  6. السلامو عليكوم ، البرف و الاخوان ، قاعد والله اقرا فى كتابكم ، و مره اضحك و مره ابكى و مره اتحملها ساى …… عجبى

  7. اشد ساعات الليل سوادا اقربها للفجر
    فالنستبشر بجر جديد
    غد جديد
    سودان جديد
    و سوداني شامخ و صامد كالنيل

  8. والله يا حماعة الشغلانة بقت عود العشر بس ……. لا قادرين نقوم لا قادرين نقعد
    ربنا يكتر المسهلات

  9. كتمت الغلبان يحي الجميع

  10. ياخ جبرة الجماعة ديل مفترين الايرين يعملوه بيعملوه مافى
    حد هماهم يرفعو على كيفهم يعنى حصل شاورونا فى حاجه
    يعنى الشعب الفضل يلحس كوعو وبس وكان مات الفضل
    يبقى ريحهم لينا رب كريم يرحمنا وياخذ حقنا منهم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: