رسوم لياقة

أرسل لي قارئ يطلب مني التدخل السريع العمل على إيقاف أحدى الرسوم والجبايات الجديده لنج والتي أصدرتها إحدي المحليات الطرفية ،ولأن العبد لله حريص كل الحرص على عدم الدخول في شبكات (الدعاوى القضائية) والجرجرة والمحاكم فهو يتحفظ على تسمية (المحلية) حتى يتأكد من الواقعة على الرغم من أن كل الدلائل تشير إلى صدقها ، فمحلية قامت بتأجير الكراسي والبنابر (لستات الشاي) لا تتورع عن فرض أي رسوم حتى إن كانت رسوم (لياقة حمار) !
نعم الحمار الوااااحد ده ، قال أيه؟ لازم (الحمار) الذي يستخدمه المواطن في (الكارو) أو بدون كارو في حمل الأغراض في الأسواق داخل المحلية أن يكون حماراً خالياً من الأمراض في اتم الصحة والعافية عريض المنكعين شلولخ !
وحتي تأتي المسألة (أكلها) ويتم تقسيم حمير المحلية إلى (حمير صالحة) وحمير طالحة فقد قامت المحلية بنشر اتيام من البياطرة يقومون بالمرور على أصحاب الحمير لفحصها (ميدانيا) وتسليم صاحب الحمار السليم بعد (الفحص) شهادة بانه لائق طبياً لمزاولة (المهنة) – الحمار طبعن – وذلك بالطبع بعد دفع مبلغ من المال قد يقول قائل (من المرجفين) أنه (المال) هو بيت القصيد والهدف الاساسي من هذا المشروع الإنساني الذي يوضح جلياً حكمة وإنسانية المسؤولين بالمحلية ورقة عواطفهم وحسن طويتهم وعظيم إحساسهم بالحيوانات عامة والحمير خاصة .
نعم ها نحن (نفوق العالم أجمع) فمعظم إن لم يكن كل المحليات والمقاطعات الأوروبية التي تتبجح بحقوق (الحيوان) لم تقم بما قامت به محليتنا هذه بإشاء نقاط (لفحص الحمير) فكل حمير الدنيا التي تستخدم في الأسواق يتم الكشف عليها مرة واحدة كل عام لكن محلياتنا (ما شاء الله) تهتم بصحة البيئة والحيوان وتترك (الإنسان) يواجه مصيرو (الأسود) !
غير أن الشئ المحير كما أخبرني جالب الخبر هو أنه يمكن لصاحب الحمار غير اللائق طبياً أن يقوم بدفع (غرامة) عدم لياقة للمحلية فتقوم الأخيرة بترخيص الحمار للعمل!
يللا نركب الفهامة .. الهدف من القرار هو منع أي حمار غير لائق طبياً من العمل .. طيب لمن سيدو يدفع الغرامة ح يكون لائق؟ الفهامة بتقول يكون لائق ونص وخمسة .. مش في رمضان المطاعم والكافتيريات بتقفل عشان الشهر الكريم ؟ طيب لمن سيد المطعم (يدفع) بيدوهو ترخيص يفتح ليه ؟
خليك من ده كوووولو مش زمان الزول لو قبضوهو عندو طبق فضائي (دش) بيصادروهو ؟ يقولوا ليك ده (إستلاب الحضاري) ودي فضائيات كووولها خلاعة ومجون بتاعت .. وأول ما المواطن (يدفع) ويطلع ترخيص بسيبوهو يتفرج على الخلاعة والمجون !!
كسرة :
– أيه الرأفة دي؟ (الزول الراكب) الحمار ده لو (ذاااتو) فحصتوا ليهو ح تلاقوهو ما لائق طبياً !

– كسرة ثابتة (قديمة) :
– أخبار ملف خط هيثرو العند النائب العام شنو(وووو وووو وووو وووو وووو)+و؟

– كسرة ثابتة (جديدة) :
– أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

Advertisements

24 تعليق

  1. قالوا البعيش كثير بيشوف كثير وياما نشوووووووف ونبكي ونضحك

    1. عليك الله يا ود الحكومة اسمك دا غيرو يا خ يعني شوف قصه الحمار الفوقانيه دي واول زول القاهو كاتب اسمه ود الحكومة ما لك علينا ياخ معطرن عيشتنا بالاسم دا

  2. سلامات وانا في السودان والجماعة في الفطور

    1. سلام العبيد وانا هنا وطاخ طاخ طيخ ليبيا

  3. رسوم لياقة حمار ولياقة قميص عادية وبحارية
    غايتووووووووووووووو عشنا وشفنا!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

    1. هوووووووووووي انت قاصد باللياقة شنو ………………ال ………غنيه

  4. دائما ماتجتهد المحليات في ايجاد طريقة لجمع المال بغير حق من المواطنين او اصحاب المهن البسيطة فتتفنن فيها وفي طرق تنفيذها، إذن لاغرابة في ان تكون هتاك رسوم لياقة او شهادة لياقة للحمار فهي برائة إختراع بمعني الكلمة السؤال هو هل ستنعش هذه الرسوم الاقتصاد الوطني وستنقل المواطن المسكين من حال الي حال افضل ام انها رسوم والسلام،
    فكلما ذادت بساطة المهنة ومحدودية دخلها كلما ذاد ضغط المحليات من الجبايات والرسوم فهل ياتري الهدف هو ضغط المواطن المسكين بكل الطرق وجعله منكسرا ذليلا منخفض الرأس. ام هي محاولة لقتل نصف السكان الاخر.

    1. الدفع لناس المهن البسيطه الهبر لا والدغري لا واحد ملدوغ وطفش ليبيا

  5. ياما نشوف اكتر مع الجماعة

  6. الحمير خلوها اسي الوزراء بعد الاستوزار ربع قرن الا كم شهر بيكونوا لائقين بدنيا , وانا بصراحة ما دائر اجيب سيرة اللياقة العقلية بتاعة وزير الد… تمو الباقي براكم

    1. قاصد اللمبي انا ما قلت اسم هع كع كرع

  7. بعد إختبار اللياقة للحمار ستأتي بدعه جديده هي إختبار المنشطات وما بعيده كمان يحرم الحمار من المشاركات الدولية او يحرم من الشوارع الرئيسية في حال ثبوت تعاطيه المنشطات.
    ياربي الحمير دي تكون عايزه تلعب في ريال مدريد ولا شنو؟؟

  8. عزيزي البروف
    بربك قل لي ماذا تفعل هذه المحليات الكسيحة لتدبير أمورها المالية والصرف على جيوشها الجرارة من الموظفين والمستشارين والمنتفعين.
    أخشى أن تبتكر هذه المحليات يوماً رسوماً لمجرد مرور مواطنيها في طرقاتها الترابية المليئة بالقاذورات والوحل.

  9. عليكم الله البيعرف سيد الفكرة دي يعرفني بيهو .
    سااااكت نحنا مودرين قروشنا في الاصناف المضروبه ياخ !!

    1. افكار شيطانيه وآيات شيطانيه ميكافيلي وسلمان رشدي هاك الخميني دا يا عملك سلوكنا كلها ضربت

  10. غايتو الفاتح جيرة دا….
    ماتخلي الناس تشتغل. حسي دا ما رفق بالحيوان وعبقرية اقتصادية في زيادة دخل المحلية وكمان شغل لمجموعة من البياطرة الما لاقين وظائف… 

  11. كتمت كتمت كتمت يا هووووووووووووووووووو

    1. والله يا الغلبان تقعد لي في البلد الزي الجلابية
      الانصارية دي تجن عديييييل كدي . هسي ليبيا دي
      يعرفو قداما من وراها كيف !

      1. اخي جنوبي لك التحية وانت تسأل عن احوال العبد لله انا كنت بالامارت 20 سنة وحصيلتي كانت سيارة جديدة نصف نقل وشركة نظافة حديثة بنيت منزلي تم التوطين بابوظبي قلنا نرجع بلدنا يا ريت لو ما رجعت وشفت لي اي مصيبة او اي داهية ليك امان الله سنة ونصف وكنت على الحديدة وطبعا هناك الكثير من المواقف والاشياء الغريبة في عطاءات النظافة وووو قالوا اعمل دقن وابقى لابس مسلم صراحة لم تركب لي العملية في راسي وفضلت من خسارة الى اخري هذا غير الكيزان الباعو لي اراضي ظهر انها لا اراضي ولا ولا ولا يعني خرت ساكت البلد قبلت يمين قبلت شمال وانا عندي مسؤولية طفشت الى ليبيا وعمل خاص بي مش (عمل) عقلك لا يروح بعيد وقررت ان اموت خارج تلك القرية الظالم اهلها وان شاء الله لو ربي وفقني عموما هذه جزء من قصتي حكومة السجم والرماد ليها 60% مما حدث وهذه يطول شرحها وجماعتهم لهم 30% الباقي روحت بيهو ليبيا عملت بيهو المصيبة الشغال فيها الان وان كنت ازمع نقلها الى السعودية لو وجدت من يدرس لي الامر هنا مع خالص تقديري اخي

  12. أولاً :-
    أنا أقترح لي ناس المحلية بعد ما فرضو ضريبة (لياقة الحمار) يفرضو ضريبة أو غرامة على برميل الموية الجاريهو الحمار زاتو لو لقوهو مصدي من جوه يفرضو ضريبة غرامة على صاحب الحمار ولو لقوهو نضيف يسلمو صاحب الحمار (شهادة صلاحية أدوات العمل) أو عشان ما يخسرو أوراق كتيرة وحبر يلزمو صاحب الحمار بشراء دفتر أو (كراس) يتم الختم أو التوقيع عليهو من قبل المحلية بعد الفحص وبرضو بنحاول نشوف ليهم طريقة توفر ليهم الحبر حق الختم أو توقيع القلم على الكراس عشان الإقتصاد السوداني ما يتدهور. وممكن نفس الضريبة يفرضوها على صاحب الحمار لو لقوهو لابس (سفنجة) لأنها مع الطين بتمسك في الواطة وتتعرض للقطع بعد المقاومة في المشي مما يضطر صاحب الحمار أن يرفعها ليحاول إصلاحها ومن الممكن أن يتناثر منها التراب على (جركانه الموية) ويلوث الماء ….. تفووووووو عليكم يا ما بتستحووو (ودي محلية لو كان المقر الدولي بالسودان ماذا كنتم فاعلون ياااااااا حكومة الضرائب والدمغات الغرقت الناس في الدمعات) وزي ما قال (أنحنا في الدمعات غرقنا) وبرضو المحلية بتقول ليكم أنحنا ما بنخليكم في حالكم تعرف لييييييه ؟؟؟؟؟ لأنو الحكومة دي إسمها حكومة (يخسي) .

    ثانياً :-
    والله حكومة الجنوب (جنى أمبارح) أحسن من حكومتنا لأنها إجتهدت لمصلحة البلد بتغيير الوزراء تغيير جزري وإشراك عناصر جديدة لا تمت للحكومة القديمة بصلة لا من قريب ولا من بعيد رغم إخفاقها في بعض الوزراء الغير مؤهلين زي الوزير الشهادتو مزورة داك مثلاً المهم رغم ذلك يحسب لحكومة سلفاكير – مش تجيب لي وزير جديد وانت عارف إنو لو لقا فيك طريقه ياكل كبدتك (زي ما أكلت هند كبدة سيدنا حمزة) (هند طبعاً حقت زماااان) (هند الخلا ما هند الليلة الما قادرة تاكل اللبانة دي) المهم نرجع لي موضوعنا … إنت زول بتحسبو خائن وظالم وتحبسو وهو في حبسو صرح وقال ليك أنا حاولت أقلبك وبكرة لو طلعتني برضو بقلبك … تقوم فجأة تطلعو من الحبس وترشحو لي أكثر وزارة حساسة ومقر الإنقلاب … الكلام دا واحد من إتنين يا إنت كنت غلطان في حقو وظلمتو وحسيت بي كدا وداير ترشيهو أو تشتري منو إحساسو بالظلم بي كرسي الوزارة (طيب كان ممكن ترشيهو بي أي وزارة تانيه غير دي) ولسان الحال هنا بقول انك فاشل زي فشل تسجيلات اللاعبين عندنا وبتلعب بي أمة كاملة (جلداً ما جلدك جر فيهو الشوك) وطبعاً الكلام مسلم بيهو ومقتنعين من الفشل وعدم التأهيل ولكن توضيحاً للنقاط فقط نسرد هذا الكلام – ويا انك مقتنع بي قدراتو وقوة شخصيتو وخفت على مكانك وكرسيك وكنكشت فيهم وقلت طظ في الشعب والبلد وان شاء الله حالها ما ينصلح أنا مالي وبرضو لسان الحال هنا بيوصفك بعدم الأهلية والتأهيل لهذا المنصب.

    غمزة: والي الخرطوم القديم دا ما نافع يبقه وزير تاني …… الله لا عافاك يااااا …….. تمو خيال (هكومة تاع جنوب ما ممكن سلفنا سلفاكير واهد شهر بس شان سوي ترتيب وزراء جديد تاعنا بعدين رجعو لي جنوب تاني؟؟؟)

    1. جننت الضريبة وجننت الحمير ورحم الله حمار الحكيم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: