تمشوا منو وين؟

وكما هنالك تاجر خردوات وتاجر إسبيرات فهنالك تاجر (إغاثات) ولكن الفرق بين التاجرين الأولين وكل تجار السلع (العادية) أنهم يذهبون لشرائها من (أسواق الجملة) بينما تجار الإغاثات يذ1هبون لشرائها من (مكاتب) معدومي الضمير من (المسؤولين) الذين إذا رايتهم حسبتهم من (الصحابة) أو التابعين (على أقل تقدير) كيف لا وهم يسمون الله عند بدية كل (فقرة) من كل حديث ويستشهدون بآيات الله بسبب أو بغيره ولا تفتر السنتهم من ترديد أحاديث المصطفي لا سيما تلك التي تحث على التعاطف والتوادد والرحمة والعدل ولا ينتهي حديثهم إلا وقد إستخدموا عدداً وفيراً من عبارة (أحسب ان) خوفاً من (أظن) التي بعضها إثم !
جاء يا سادتي الأفاضل في صحف الخرطوم تصريحات للسيد نائب رئيس المؤتمر الوطني بولاية الخرطوم (مندور المهدي) يعلن فيها أن بعض المواد الإغاثية التي يفترض توزيعها على المحتاجين والمنكوبين في مناطق الكوارث قد ضبطت في مخازن التجار في أم درمان وبعضها قد عرف طريقه نحو الأسواق وليس للمتأثرين والمتضررين المحتاجين لتلك المواد.
أي نفس إنسانية (سليمة) يمكنها فعل ذلك؟ أمسلمون هؤلاء منزوعي الرحمة والضمير؟ ولماذا لا يعلن السيد (مندور) عن إسماء هؤلاء التجار؟
ولماذا لا تأت الصحف بصورهم وإسمائهم وأماكن مخازنهم ؟ إنه بلا شك (فقه السترة) سترة من يستولون على حقوق من هم في أضعف حالاتهم بعد أن فقدوا كل شئ في هذه الدنيا الفانية فأصبحوا في لحظات بدون مأوى ولا غطاء ولا كساء ولا طعام ولا وجيع !
هل تعجز السلطات عن تتبع هؤلاء (الوحوش)؟ لماذا لا ترسل لهم تلك البكاسي (المظللة) والكتائب التي تحمل الهراوات والخراطيش (السوداء)؟
إلى من تسلم (الإغاثات) التي تأتينا ونحن منكسي الرؤوس نشكو الضعف والهوان؟ ، هل تسلم إلى موظفين في أدني السلم الوظيفي أم إلى مسؤولين في قمته؟ ، من يكشف عن هؤلاء الذين يتسلمون (الإغاثة) بيد ويبيعونها باليد الأخري إلى السماسرة والتجار؟
والله إنها لأفعال يندي لها الجبين لإناس يرددون (لا لدنيا قد عملنا) بينما هم في (الدنيا ذاااتا) يعملون أرزل الأعمال والعياذ بالله وهل هنالك أرزل وأفحش وأنتن وأجيف وأقرف من أن يستحوذ شخص ما على (حق ضعيف) ؟ ليست هي المرة الأولى التي تضل فيها مواد (الإغاثة) طريقها إلى الأسواق ففى كل خطب ونازلة ما أن تنهمر على المواطنين المساعدات حتي تجدها تتجه نحو (المصب) الذي هو (كروش) هؤلاء (الأبالسة) وهنا نطرح سؤالاً (غبياً) وهو : بما أن هذا يحدث عند كل إغاثة ، ماذا فعل المسؤولون من خطوات تأمينية وإشرافية حتى لا يحدث ذلك مجدداً؟ ولعل الإجابة التي لا تحتاج إلى كثير (غباء) على هذا السؤال هى : يعني المسؤولين ديل لو (أمنوا) المسالة والإغاثة مشت لأصحابها طيب العمارات الظهرت (فجأتن) دي يتموها كيف؟
إن تصريح السيد نائب رئيس المؤتمر (الوطني) بولاية الخرطوم عن ضبط مواد إغاثة بمخازن التجار إن لم يتبعه القبض على هؤلاء التجار وعلى المسؤولين الذين باعوا لهم هذه المواد الإغاثية .. إن لم يتبعه ذلك فهو لا يعدوا أن يكون الغرض منه إمتصاص دهشة وغضب المواطنين بجعل المسألة (معلومة) ومعروفة بحيث إن قال مواطن لأخية المواطن :
– ما شفتا الحصل شنو؟
– شنوووو؟
– مش لقيت ليك مواد الإغاثة بتتباع في سوق ليبيا؟
– قديييييمة .. (مندور) زمااان قال ليكم كده

كسرة :
إن عذاب الله لشديد … تمشوا منو وين؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

31 تعليق

    1. و للأسف الاسيف ان هذا ما يمنع الناس من عمل الخير,, ففى نفير عملناه هنا فى بلد الغربة وسط اولاد البلد و حتى من مواطنيها لمساعدة اهلنا بالسودان, كان بعضهم يتردد كثيرا فى ان يتبرع قائلا: هو انتوا متأكدين ان المساعدات دى حتوصل لمستحقيها و الا تتلغف فى النص فى بطون (الجماعة)؟ و بصراحة معاهم حق فى ترردهم دة من اللى شايفينو نحنا و انتو و هم , و لا واحد بيحرك ساكن من المسئولين ,, الله المستعان ,, حسبنا الله و نعم الوكيل ….

      1. عشان كده كان تبرع الملك عبدالله بالتنسيق مع المنظمات العامله وبلا خجله يذاع الخبر فى اذاعه امدرمان …. يعنى ما عندكم حكومه موثوق فبها

      2. فلاديمير ياخوي هم ديل بيتقدروا ! هسي بكره يقولوا
        اثبتت التحقيقات انو التجار ديل اشتروا مواد الاغاثة
        من منظمات طوعيه وما بعيد يختوها فوق اولاد نفير ..
        مع بداية الكارثة وفي تجوال الكاميرا نفس تلفزيون
        السودان جاب واحده اختنا وقالت بالحرف انو المواد
        قعد يدوها لي ناس اللجان الشعبية وناس اللجان يدوا نفرين
        تلاتة والباقي يسدوا جوه مخزنهم طيب من اليوم داك مافي
        مسئول سمع كلام المره دي ؟!ولآ قايلنها شيوعيه وما
        دايره النظام الاسلامي ده ؟

  1. من الأفضل أن تقوم الجهات المتبرعة والداعمة بنفسها بعملية التوزيع للمحتاجين والمتضررين مباشرة

    1. الاحسن نركب الشارع اصل الشارع هو البيعلم

  2. لهم الله بروف ويوم الحساب اتي لا ريب فيه

  3. بمشوا كدة ,,, مشى الهوينى كما يمشى الوجى الوحل من الشايلنوا !
    يشيلهم امر الله اليوم قبل باكر ,,

    1. شمباتي ! المشية دي مااا عندها ناصية سمحة في الخيال مااااالك دار تخربا لينا ياخ ؟ قول يمشوا زي السكاري وما هم بسكاري ولكن عذاب ربك شديد !! امانة الله ما ح … أم حلتهم ,,,

      1. ههههههههههههههههههههههه,,,
        نواصيك ما بتخليك !!
        وهم سكارى جد جد ! انت ما عارف ولا شنو ؟؟
        هيييييييق

      2. اخي جنوبي سلام وزي ما قال شمباتي وله التحية ايضا انت ما سمعت بالدفع الرباعي في رمضان والا ما كان رباعي الرباعي في الشقة والرباعي الباقي في بيوته قال فياجرا قال

  4. محمود محمد علي | رد

    أستاذنا الفاضل الفاتح جبرا بعد التحية والاحترام
    نشكرك لتسليط الضوء علي هذه القضية ( سرقة الاغاثة للمتضررين) ولكن نحن الارتريين عانينا من هذه القضية سنين عددا من سرقه الاغاثة التي ترسل للاجئين الاتريين في معسكرات اللاجئين والتي لم يصل منها الا الفتات لكن نقول شنو ونسوي شنو عاد( ما لاجئين وكدا) وهي اصلا حقوق المواطن وضايعه حقوق شنو اللي نحن بنطالب بيها …الله موجود

  5. اكيد حايظهر بعد ده السيد البالي علي قول jewaile hassan علي طريقة (برز الثعلب يوما في ثياب الواعظينا) او في ثياب والينا ويقول لينا بفصاحة وبي وش قوي وبي عين بيضاعلي قول حبوبتي انو الكارثة هي بيع نصف الاغاثة وممكن نسميها ازمة وليس كارثة علي فكرة ياوالي ياما غالي انت مسئول عن كل مايحدث في ولايتك وليس المواطنين وبراك سويتها في نفسك واتخاففت ورفعت يدك لما قالو ياجماعة العايز يكون ووالي الخرطوم منو انت رفعت يدك ورجلينك وراسك زاتووحسيت انك زول كويس لكنك طلعت زول حوامة وقعدات في شارع النيل ساي (شفتك بي عيني مافي زول قال لي).

    منو البسأل منو البعرف
    غتايات جاية للاطفال
    عشان تتصلح الاحوال
    بتتباع بي زهيد اموال
    ياخ خلاص كفاية جدال
    شفتو زمانا كيف اصبح
    وضوح السرقة سترت حال
    بتسرقو حق طفل حزنان
    عايز يلقي كل حنان
    تشيلو تبيعو حاجاتو
    شفتو مهازل الازمان
    رجال لابسين هدوم اشراف
    بدون يقين واطمئنان
    جيبو اغاثة الاطفال
    سرقتو وشلتو بالاطنان
    غايتو استنو رب الكون
    مابهمل ظلم انسان

    1. يسلم فمك ويراعك …

    2. والله يا خوي صابر برز الثعلب دي حلوة وفي ثياب الواعظينا كمان ههههه الحمد لله ما برز ساكت (ام فكو) وحلوة المعاناة الطالعة منك وصراحة لمست فيني جروح كثيرة خاصة والعبد لله بعيدا بعيعدا لا يعرف متى يرجع وبيني وبينك قلبك قوي تكتب ليهم بيوت زي دي في المطرة دي هع كع كرع

      1. لو برز جزء منو لاتعتبر كارثة فالكارثة هي ان يبرز نصو اما لو برز (ام فكو) فتعتبر الخرطوم خالية من السكان..

  6. يا اخوانا الناس ديل باعو نص البلد بي ثرواتة و ناسة و تاريخة يعني شنو بالنسبة ليهم الاغاثات
    اللهم احضهم عددا
    واقتلهم بددا
    و لاتذر فيهم احدا
    قولو امين

    1. ديل بتمنوا في كل لحظة كارثه لمص دم الغلابة وصراحة محجوب شريف ووردي كان يستثناهم من ديل اولادك ديل اولاد ….. لا فض فوك

  7. الموضوع خطيييييييييييييييييييييييير ولا يقتصر على المحتاجين بل يتعداهم الينا جميعا كسودانين وذلك فيما يخص عزتنا وكرامتنا السودانية – يعني بالتنسيق مع المنظمات العاملة دي ما شينة شدييييييييييييييييد – والحسرة انه الحكومة فيها النظيف العفيف الا انه يلتزم الصمت او لا يعلم وكلا الخيارين يمسحان النظافة والعفة؟

  8. بقينا مسخرة… فقد تحدث السفير الياباني بعد أن سلم لأولئك الوحوش تبرعم (أرجو أن تجد هذه المعونات طريقها للمحتاجين له)
    فضحتونا
    أما من مصدر مسعول من الخير قال أن الخيام القطرية تم تجريدها من الأربعة سراير والمولد الصغير وفلتر المياه والتربيزة وحتى الخيمة الفاضية ما بدوك ليها بالساهل…
    حيوانين….!!!!

    1. حيوانين….!!!!حيوانين….!!!!حيوانين….!!!!

    2. جردوها بس الجردوهو شوية والشردوه شوية والجرجروه شوية والجهجهوهو شوية والجننوه شوية والجهبزوه من البلد شوية ياخ لك تحيتي او العز

  9. اميييين ياشرقاوى اللهم هدهم هدا ولاتذر فيهم احدا واجعلهم عبرة واخسف بهم الارض عشان الشعب الفضل يرتاح اللهم اميييييين

  10. غايته بس ما عارفه أقول شنو!! غلبني الكلام، لما أتذكر الناس ديل و معاهم أطفال و مرقو باللابسنو بس و الله رسل ليهم زول يحن عليهم ( غير حكومتهم المسءوله منهم) ، يقومو يتطرقوا في منحتهم ،!!! و هم مكتوفي الأيدي لا حول لهم و لا قوة، !!!غايتو أي زول اشترك في الجريمة دي و لو شاف السرقة دي بتحصل و التسريبات من المطار لم ملمحة ساكت حيت سال يوم القيامة سؤال شديد و عذاب الله حيل حقو في الفانية دي قبل القيامة. الله معاكم يا ناس بس ما عارفين نسوي شنو غير الدعاء

  11. صراحة (توقت لغة الكلام ) ما تنط ليا يا جنوبي اتزرقنت المجنني ومجنن ……الناس راجيه شنو انا اتخرت في سنة ونص غربة 21 سنة وهسع طفشت واقسم بالذي سمك السماء كاد الانسان ان يكفر ولكن قناعة تامة الان بان كل الكيزان في النار وقناعة تامة يمكن عمايلهم دي تدخل اهلي الطيبن الجنة لو فيه عدل

  12. كتمت كتامة يلا ياناس

  13. يرضوا تقولوا منظمات وطتية—————-

    1. منو القال قالوا منظمات مؤتمرية انت ما بتسمع مالك اضانك (زي اضان الحامل) لك تحيتي وتقبل مروري ممكون وصابر وكمان غلباااااااااااااااااااااااااااااااان

  14. اهل القمردينة لكم التحية وبرضه كتمت

  15. شكرا
    مدونة رائعة و تستحق المتابعة يومياً

  16. السلام عليكم
    مدونة رائعة
    تدوينة مميزة
    http://www.kollshi17.com

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: