العصر السيراميكي

(بطلوا ده وأسمعوا ده) عبارة ترددها (معلمات) السينما المصرية وهن يضعن ايديهن على خواصرهن في إندهاش مما طرق اسماعهن من حديث (غريب) وما (راكب عدلو) ، هذه العبارة تذكرتها وأنا أقرا تصريح السيد معتمد الخرطوم اللواء (نمر) الذي يقول ( لإن ولاية الخرطوم سوف تمنع بناء المنازل من الطين والجالوص تماماً) .
وهكذا عزيزي القارئ قام سعادة المعتمد وبضربة لازب بتشخيص (أمراض الخريف) وكوارثه لدينا وذلك بوضع اللائمة على المواطنين الذين (سامحهم الله) تركوا الطوب والسيخ والاسمنت وقاموا ببناء منازلهم من الطين والجالوص !
يبدو ان منازل الجالوص هي السبب في هذا الحال (المايل) بعد أن قامت معتمدية السيد (نمر) برصف الطرق عبر مواصفات عالمية تقوم بها شركات مؤهلة ذات تاريخ طويل في عمليات الرصف لا شركات يتم تسجيلها لدي مسجل الشركات قبل أيام من رسو العطاء (ده لو ما كان بعدو) !
يبدو أن منازل الجالوص هي السبب بعد أن قامت معتمدية السيد (نمر) بشق قنوات الصرف بعد دراسات قامت بها بيوت خبرة عالمية وليس ناس (قريعتي راحت) الذين قاموا بتشييد (نفق عفراء) الذي (مسك موية) من أول مطرة !
يبدو ان منازل الجالوص هي السبب ومعتمدية السيد (نمر) تقوم بتوزيع أراضي الخطط الإسكانية داخل مجاري السيول حتي تقوم الجهات (الحالبة) بتحصيل ثمن الأرض من أجل زيادة الإيرادات (الما عارفنها بتمشي وين) !
من الواضح (الفاضح) أن معتمدية السيد (نمر) لم تقم بواجبها في التجهيز لمقابلة فصل الخريف وأن مسالة التصريح بمنع المواطنين البناء بالطين والجالوص إنما جاءت لتعطي المتلقي فهماً بأن القصة كوووولها في (الجالوص) مع أن المسألة لا تعدو أن تكون تقصيراً من الجانب الحكومة ومعتمدها السيد (نمر) ذات نفسو !
الجالوص الذي يتحدث عنه السيد المعتمد قد بنيت به منازل منذ عشرات السنين يوم كانت البلد كوووولها من طبقة واااحدة وهي لا زالت تقف صامده شامخة في وجه الدهر وأتحدي أى مسؤول من مسؤولي هذا الزمن الكئيب أن لم يعش طفولته في منزل جالوص قبل ان ينتقل إلى مباني الموكيت و(النجف) والبلكونات !
العبدلله يحسب (حلوه يحسب دي) أن تصريح السيد المعتمد تصريح مستفز للغاية خاصة إذا علمنا أن تكلفة بناء غرفة 4X4 متر من الجالوص تكلف أكثر من خمسة مليون بالقديم في أدنى حالاتها وهذا مبلغ (لو تعلمون) عزيزي المعتمد يحتاج إلى (نفرات) و(ديون) و(سلفيات) وإحتمال دخول في صناديق (وختات) من أجل تدبيره ، هذا لغرفة واحدة فأحسب معي (يا سعادتك) تكلفة بناء منزل صغير بغرفتين وبرنده (دون مطبخ أو حمام أو سور ذاااتو)
مشكلة أخواننا المسؤولين من وزراء وولاة ومعتمدين وخلافه أنهم يقومون بالنظر إلى مشكلات المواطنين (على مقاسهم) دون أن يكونوا على وعي و معرفة بما هو حادث فعلاً على الأرض.. كذلك الوزير الذي صرح من قبل بأن على المواطنين التقشف والإتجاه لتناول (الكسرة) بدلاً عن الرغيف وما درى صاحبنا بأن الكسرة أغلى ثمناً !
العبدلله إنابه عن مواطني الشعب الفضل يشكر السيد المعتمد على تصريحه بمنع البناء بالطين والجالوص وفي إنتظار أن يوفر لنا مواد البناء المسلح من أسمنت وطوب وسيخ وذلك حتى ننتثل من العصر (الجالوصي) إلى العصر (السيراميكي) بفضل رعاية الإنقاذ ومشروعها الحضاري .
كسرة :
تكل صاحبنا (عجلته) على الحيط ودخل إلى الطابونة لشراء رغيف وعندما عاد بعد ثوان لم يجد العجلة فصاح مندهشاً : يا جماعة الحرامي ده يكون جيت رادفو معايا !
هسه مواد الإغاثة دي يومين ما أخدتا الحرامية ديل كانوا مردوفين معاها وللا الفهم شنو؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟

37 تعليق

  1. يا استاذنا ده اسمه اعلام التجهيل يعني الجماعة لمن مشو لمرابيع الشريف المنكوبيين قالو ليهم حصاد المياه والخيطة الكنتورية ولمن يمشو للرطانة يقوليهم الحبوبة الفطست توبة و كده وناسين زلابيع الباع حتى الاغاثة
    كفاكم يا جماعة 24 سنة (ولا عندهم نيت التوريث)
    انصرفو ووووووووو
    والله المستعان

    0

    1. هههههههه
      حلوه انصرفو دي لاكين باقي ليك مع السُفلي بتنفع ؟

      1. والله آآآآآآآآآآآجنوبي مع السفلي ما بتفع ومع العلوي كمان ما بتنفع وفوق الفوق لا حر لا سموم لا سوافي

  2. السلام عليكم تعرف يا استاذ متمني من الله شئ وااحد بس .. انك تمسك حومتنا ومتاكد ثقتي فيك كبيرة ما ح تخذلنا …

  3. كفيت و وفيت يا بروف

  4. سلام عتباني وسلامين جنوبي انا ما عندي غير كتمت وهسع انا في الكتمة زاتها (ليبيا) وكان سمعت بم انا حاجز مسجد النور هعغ كع كرع

    1. انا كان لي يا الغلبان أي مسجد بنوهوا الجماعه ديل
      بكسّروا شان الله طيب ولا يقبل الا طيبا .!! هسي مسجد
      النور ما كان عمل 100 وحدة غسيل كلي ومسجد الشهيد
      ده باننو في حتة ما فيها سكان ذااتو !

      1. آآهـ يا علمانى يا فاجر !!

      2. نوووووور!!!!!!!؟؟؟؟
        وليلنا ضلمة،،،،،!!!!!!
        بخصوص البناء والعمار والمعمار
        نظرية السكان والتساكن والمساكن ما مشكلة،،،
        نظرية ( التشاهد ) ودي من شاهد يشاهد ليشاهد
        متبوعاً بنظرية ( القادمون ) لمؤتمرات وسمنارات ودون ( ذلك )،،،
        مقرونا بنظرية ( جمال المعالم ) وكدهـ،،،،
        أأأأأأأخ يا وجع،،،،

      3. بتاع الدفع الرباعي في رمضان كان جاب جهاز غسيل كلى

  5. لا حول ولا قوة الا بالله !!

  6. قلنا من قبل وسوف نظل نردد دي حكومة( حكم قرقوش) وحكومة الرد السريع بدون فهم العاجبه يعيش والماعاجبه احسن حل واسلم حل الهجر اذا لم تريد الهجر فاذن انت تجلس وتسمع ونحنا مازلنا نسمع ونضحك ونفراء المقالات من ومن جميع الناس وبدون فائده امت ومتي ان نفيق ياناااااااااااااااااااااااااااااااااااااااااااااااااااااس تعبنا من القربه

  7. بقت علينا حكاية الملكة أنطوانيت لمن قال ليها الشعب جعان عشان رغيف مافي قالت ما يأكلوا كيك بأخي أنتوان خليتو للمساكين حاجة ما نشف توها بي قطنة

    1. هههههههه سلام ابو الشوش لكن صاحبنا قال اكلوا كسرة وما هو عارف انه الكسرة اغلى من الرغيف بالله شوف

  8. باع له قطعة ارض في مجري السيل وقال له اياك ان تبتل بالماء
    بالله ناس تشحدك في المشمع اليداريهم تقول ليهم ما تبنوا جالوص ؟
    هو الزول ده وكت لواء ما يمشي يتفولح محل اللواءات هسي معتمد
    ده منصب عسكري ؟ طيب الخدمة المدنية تكون وين ؟ ابكرشولا ؟

    1. حلوه و ملعونة هاها، رأيك شنو وزير التخطيط فريق !!!!!

      1. قصدي ملعوبة لكن ما مشكله هم أصلا ملعونين

      2. فريق طايرة والشعب هو الكورة هع كع كرع

    2. اخي جنوبي انت لواء دي من لولوة والا من شنو

    3. آآآآآآآآآآآآآآآآآجنوبي انا باعو لي قطع في الهواء اخير مجرى السيل بروح السيل وبتلقى الواطه هع كع كرع

  9. انا في الموضوع الجديد ده بس ما مفرح نئ إلا انو البروف رجع سالم، الحمد لله و الله كنت خاته ايدي في قلبي إنشاء الله انبسطتو في الرحلة

    1. ختي يدك حتى في موية تلج الجماعة عاوزننا نورجع ساكت لكن لو اتلمو في شارع عام اقوليك وتخفي السر (لو قالوا هي لله هي لله بي صوت عالي بتعتبر مظاهرة ) لانها ماركة مسجلة ليهم براهم

  10. يا عبيد، فلاديمير،جنوبي،الغلبان، المدهش، كتلوني و لسه حي، شمباتي مالكم إنشاء الله خير؟ عندكم اكتءاب ولا شنو؟ بطلتو البرنجيات و الشكلات فيها؟ و الله كنا متابعتها و بنشجع اللعبة الحلوة

    1. الابنه نونا تحياتي وتقديري
      لقد سعدت كثيرا بالتعرف الي الاخوه والأخوات وأسرهم في الرحله الترفيهية فلقد كان يوما جميلا وسعيدا ولقد حرص كل منا بالتعرف الي جميع من حضر واهو خففت من الإحباط والاكتئاب فلقد كان بالفعل يوما جميلا،تحياتي

      1. ربنا يزيد أفراح كم يا رب

    2. والله انا من الغم الفي البلد اصبحت في بلد طيرها عجمي وناسه بم بم بم طول اليوم بعد ابوظبي والسودان بي حلاوة ناسه ودتني الانقاذ الى ليبيا بس ما يهمك تعودت على البم يا جيت راسي عديل محل الناس شايله السلاح والا اصبحت اعظم قائد للمظاهرات بس حضري لي اثنين ثلاثة انتحاريين

      1. والله يا لغلبان وكتي ده كلو افكر ليك في الانتحاريين، (عمك عبيد متخندق ومحتسب)’فلاديمير شكلو كده ريحه احمر، جنوبي ما بجازف ليك عشان شمالي، شمباتي قالو الله مرقو من السيل، المندهش ما فكت حيرتو لسه، غايتو إلا كان كتلوني ولسه حي اهو أصلو كدة كدة ميت ( لكم جميعا إخوتي العتبي حتى ترضون)

  11. سمعتا يلبروف بالفلهمه العوره وشيل البطاريه في القمره

    1. و الا بالعريان و لابس سديرى !!!

      1. هى لا !!

  12. نعم وكان كلام السيد المعتمد وصلة مثل وصلة الملاح لما يكمل والناس ماشبعت او تمومة او قدحة ثومية لكلام السيد الوالي حيث ان المعتمد يفكر بطريقة لو مابقت نص البيوت سيخ واسمنت لاتعتبر كارثة، يرحم والديكم انتو الاتنين كلامكم كلام الطير في الباقير وحديثكم ليس ذو شجون وحيلة العاجز الحيران وشورتكم خايبة.. ولو ماعندكم حاجة تقولوها اسكتو ساي ولا التزموالصمت البريحكم اختارو واحد في ديل لانو اكرم ليكم من الكلام الماعندو لازمه ده، بالمختصر المفيد كده محتاجين لإغاثه سيخ واسمنت ونعمل مشروع نسميهو مشروع بيت مسلح لكل مواطن وتكون كل مدن وقري الخرطوم رياض ومعمورة وخرطوم 2 وكده. اتخيل معاي بيت مسلح لكل مواطن ولو تحقق ذلك تكون خلاص قيامتنا حتقوم وحتكون علي بعد مترين مننا وشكلو المعتمد عايز يقرب لينا القيامة لانو من علامات الساعه التطاول في البنيان.. خلاص يعني داخلين الجنة بالمزيكا ولا انهار الجنة حتفيض وحتسيل فيكم.. ولا منتظرين نص السكان يموتو عشان توفرو سيخ واسمنت.. يلا ارفعو سعر السيخ والاسمنت واسرحو فيهو كما يحلو لكم واغنو اكتر تعيشو اكتر..ونحن نعيش وناكل غيرها..

    1. اخي محمد صابر(صابر) كلامك كله وجعه ويا ريتك كنت صابر صابر

  13. نحن تحكمنا عصابة لا تتورع عن فعل اي شيء

  14. في إعتقادي وتقديري الخاص أنَّ وراء هذا القرار أطمااااع من السيد معتمد الخرطوم وحاشيته في أراضي هؤلاء الغلابة وإجبارهم على بيع أراضيهم بأثمان بخسة… وووووووووووووووووووووووووووووووو

    1. هم وراء كل شئ رزيل وربك هو القوي العزيز ياخذهم اخذ قوي مقتدر ليس لنا الا الدعاء

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: