إذا توقف

• إذا توقف المسؤولون عن التصريحات فسوف نحافظ على ما تبقي من (المرارة)
• إذا توقف التحصيل دون إيصال 15 فالقصة ح يكون فيها خراب بيوت
• إذا توقف الفنانون الواعدون عن الغناء فسوف يساهم ذلك في تقليل نسبة التلوث السمعى
• إذا توقف السيد مدير مرفق المياه عن التحدث عن (نسبة العيكورة) يكون (رحمنا) .. ياخ الدنيا دي كوووولها ما قاعدة تشرب (من دون عيكورة)
• إذا توقف مولانا (جعفر المستشار) من السفر إلى (بريطانيا) شوية (إحتمال يحلل المرتب) !
• إذا إذا توقف سعر الدولار (في حتتو دي) تكون دي كارثة ولو (ما وقف) تكون مصيبة
• إذا توقف توقف ضخ البترول أو ما توقف (يعني شنو)؟ هو أنحنا شفنا منو حاجة؟
• إذا توقف المواطنون عن أكل البوش فأعلم إنهم بعد كده ح ياكلو في خاطرهم
• إذا توقفت الأسعار في (مكانا الهسه) فتلك كارثة (خليك من مواصلة الإرتفاع)
• إذا توقفت المذيعات عن إستخدام نقش الحناء فسوف يقللن من إستخدام أياديهن عند التحدث
• إذا توقفت السيول والأمطار سوف تبدأ المعاناة مع الذباب والباعوض والأمراض
• إذا توقفت بصات الوالي عن العمل فلن يؤثر ذلك في (المواصلات)
• إذا توقفت التحقيقات في تجاوزات المدينة الرياضية فهنيئاً للمفسدين
• إذا توقف دولاب العمل لمدة ساعتين بسبب الفطور فأعلم إنك في مرفق حكومي
• إذا توقفت إذاعات الأف أم عن البث (البنات) البيضحكوا بسبب وبدون سبب
ديل يشوفو ليهم شغلانية تاني
• إذا توقفت الكافتيريات والمطاعم عن إستخدام الوافدين ( ح تقفل عديل)
• إذا توقفت مسألة بعد كل فترة تعديل وزاري فسوف نوفر على خزينة الدولة (مالو يعني لو الناس قعدت في مكانا) بدل كل مرة (الشكة دي) !
• إذا توقف دعم المانحين للمتأثرين بالسيول والأمطار ح يكون السبب أكيد (ضعف الرقابة) و (ضعف النفوس)
• إذا توقفت الصحف عن نشر أخبار الجريمة (يكون كويس) هو بالله أنحنا ناقصين؟
• إذا توقفت التهانئ للمسؤولين في الصحف عند تبوءهم للمناصب فأعلم إنك لست في السودان
• إذا توقفت تبريرات المسؤولين عما حدث بسبب عد التجهيزات لمقابلة الخريف (يكون كويس) لأنهم ما عندهم حاجه يقولوها
• إذا توقفت عمليات نقل النفايات عن الأحياء (الناس تشتكي لمنو ؟) !
• إذا توقفت مساعدات المغتربين لذويهم ح تلاقي نص البلد في الشارع
• إذا توقفت عمليات (الزواج الجماعي) التي تطل من أونة لأخري يكون عين العقل .. زواج مين يا عم (ياخي طلب الفول بي خمسة ألف) !

كسرة :
إذا توقفت الكسرات التحت دي تكون حاجة من إتنين يا العبدلله مات وإتكل على الله وللا يكون تم تنفيذ توجيهات الرئيس وكده !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و

Advertisements

29 تعليق

    1. سلامات و حبة يا ود العبيد !!!

  1. بعدين كيف يكون توقف الاسعار كارثة؟ ما هو سعادتو قال انو مافى كارثة الا بعد ما يتلحس نصفنا،، و نحنا لسة الحمد لله فينا اكتر من النص فاضل،،، يمكن خريفين تلاتة كدة لمن يجيبو نصفنا !!!!

  2. اذا مسكت انت رئاسة دولة السودان حاسس انك حتخليها الامارات السودانية المتحدة …

  3. انت كمان يا جبرة عاوز تدخل في حق ربنا؟ ما تسيب الناس تكمل نص دينها…رب العزة قال في ما معنى الاية نحن نرزقكم و اياهم…. هسي لو جا عريس لي بنتك ح تقول ليه لا عشان المعيشة غالية….ياااااااااااااااا رااااااجل.

    1. يا محمد النبي قال : من استطاع منكم الباءة فليتزوج لاكين الحكومة بقت تتبوبر بالزواج الجماعي وما بهمها الناس دي عندها قدرة ولآ ما عندها المهم الاعلام يقول الف زيجة والسلام وفي الحالة دي العرس بيبقي زيو زي العرقي ضرره اكتر من نفعه ونص الدين الفي ذاااتو بيطلع !

      1. الحكومة اصبحت تتبوا فينا (بس بتاعت عادل امام) لك التحية اخي جنوبي وااااااااااه كان جنوبيا هواها

  4. حا يحصل إيه ما توقف رحم حواء السودانية من إنجاب وزراء منذ ١٩٨٩ إها الحصل شنو ما هديل وزراءنا قاعدين ليهم ربع قرن وكوبييييييييين

    1. كان بقت لي وزرانا الحاليين هينه وشوف كمان الثلاثي المرح ورابعهم كلبهم ما قادرين يطلعوا مظاهرة (رابعهم كلبهم اسأل عنها الرفيق فلادمير)

  5. الكسرة حتقيف لمن انت تموت او ينفذو تعليمات الرئيس يئست خلاص (من لحس الكوع) انا اتم ليك او الانقلابيين ديل ينصرفو
    والله المستعان

    1. والله كان راجين مظاهرة انسو لانه الديناصورات من ما انا عمري 9 سنوات هم هم هم مع العلم انا الان 50 بالتمام والكمال (ما تفتكر خمسين بتاعت الكوشتينه كمان) جناح ام جكو وتيس ست نفيسه والساحر وحتى ناس الشمال(اليسار) ياهم زاتهم بي شحمهم ولحمهم الشغلانة عاوزه فهامة بس مش ميد ان جاينا

  6. أنتو يا خوانا قائلين لحس الكوع ده ما ممكن؟ممكن، بس يتكسر عظم العضد حتتين كده و تلحس كوعك عااادي. احفظوا الطريقة دي يوم بتحتأجوا ليها

    1. الله يسعلك بنبقي في الزي ده !؟

      1. يا جنوبي أخوي عشان مافي زول يزايد علينا، يقولوا لينا ألحسوا كوعكم نقول ليهم ها قالينا ما بنقدر و نكسر أيدينا و نلحسو ليهم

    2. والله في كسير حتت حتت الله لا وراك بيت شبح من الاشباح

  7. السيد جبرا و السمار
    انتو البلد دي تعبانة كيف و المعانة دي وين ما اعتقد انو السودان فيهو كوارث و لا اي مشاكل من اصلو اذا الرئيس عمر البشير اطال الله بقاؤه اتبرع لي اثيوبيا بي 2800000 $ ( فقط اثنان مليون و ثمانمئة الف دولار لاغير ) و ذلك لبناء ضريح للراحل زيناوي و انشاء مكتبة بي اسمو يعني خزينة الدولة فيها فائض كتيييييييير و الزاد مكفي ناس البيت و زيادة و لو في ناس منكوبة يعني رئيسنا الهمام مش كان من باب كلكم راع و كلكم مسئول عن رعيته وهو رجل ورع و تقي و ( شوية كدة دمعتي حتفر ) حيخصص كل مجهودات الدولة لي الناس ديل المنكوبين اعتقد انو الناس الغرقانين ديل هم ما عرقاةنين لكن حابين يسكنو على النيل
    قال عمر الخطاب (لو تعثرة بغلة بالعراق لخفة ان يسالني الله لم لم تسوي لها طريقها يا عمر )
    و علي الحلف ربنا كن سال الحكومة دي من الشوارع و التصريف يدخلو النار خلي الباقي
    كسرة:
    حكم الانجليز كان مالو عيبو لي الله يسامحك يا ازهري

    1. البحير مش المبلغ البحير اثيوبيا هاك اثيوبيا دي المهاجرين ليها كل الجماعة وهاك يا ويا

  8. المذيعات مااااالك عليهن ! هو بلا ده البخلينا نفتح قنوات السودان شنو ؟
    جعفر سامنو علي جعفر الطيار وسيدي شايل اسمو يطير ساااااااااكت !
    بعد الشر عليك ان شاء الله الرئيس وبررررضو الكسرات بتقيف .

  9. اذا توقف الموظفون عن الفطور في المصالح الحكومية لقضيت حاجيات المواطن،
    والله العظيم مشيت لناس الاراضي و احد الموظفين حتي الآن في الفطور
    اليوم الأول جيتو الساعه تسعه قالوا في الفطور انتظرتو اكتر من ساعتين زهجت ومشيت
    جيتو اليوم التاني الساعه حداشر ونص وقالوا في الفطور ولمن جا قالوا الصلاه
    اليوم التالت جيتو الساعه واحده ونص ولقيتو ماشي علي الفطور قمت قلت ليهو وريني بالظبط فطورك الساعه كم،سؤالي يا جماعه انتو قصه الفطور دي شنو,
    فإذا توقف الفطور في المصالح الحكومية بقرار من الحكومه ح يحصل شنو

  10. قصة الفطور دي يعني تديهو حق الفطور وفي الحالة دي هو ح يقول للفطور انا ماشي عبيد ..

    1. هههههه
      ولكن وين المثل والأخلاق ودي بتبقي رشوه وكده نكون دخلنا في الحرام ،بالله معقوله يكون قاصد كده،

      1. انا وعوذ بالله من هذه الانا لا امتلك اي شبر في ارض المليون (اسف كانت) لا بيت ولا يحزنون وات يا العبيد ماك عارف ما غشونا في السفارة ولم نجد اراضي (دي قصه ثانية) وهسع طربت طناش وفي النهاية يا هو الشبير في جمهورية الخرتيت او في خلافه

      2. مُثل / أخلاق / رشوه / حرام !!!
        علي الطلاق انت مرقت من السودان قبل ثورة الانجاس !

  11. الله يطول فى عمرك يااخوى جبرة لكن كان راجى ينفذو قرار
    الرئيس تراها واطاطنا صبحت الكلا ده مابتنفذ الا السودان يصبح
    خالى من الفساد والمحسوبية والغش والاحتيال واكل الاموال
    بالباطل والظلم والتدليس والرشوة يعنى بالعربى كده لمن كل
    الحماعة يمشو برئيسهم اما الموظفين تانى ذاتو ماحيلاقو
    حق الفطور اما الزواج نخليه لاولاد وبنات الوزراء

  12. كتمتكتمتكتمتكتمتكتمتكتمت

  13. إذا توقفت تصريحات المامسئولين من الخير يتوقف غضب الله علينا قبل كل شئ..

    1. تطير عيشتنا البوقفها شنو

  14. كل ما ادخل ما احصل حد راح اقول كتمت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: