الذكرى نصف السنوية

تحل اليوم الذكرى نصف السنوية لتوجيهات السيد الرئيس بخصوص (ملف هيثرو) فقبل حوالى ستة أشهر وتحديداً في اليوم السادس من مارس من العام الجاري وجه السيد الرئيس بمحاسبة الجهات المتسببة في فقدان السودان لخط هيثرو الجوي واعادته او اعادة قيمته واتخاذ الاجراءات اللازمة لحفظ حقوق الخطوط الجوية السودانية ، واكد حينها السيد وزير النقل والطرق والجسور احمد بابكر نهار فى تصريحات صحفية عقب لقائه الرئيس ان لجنة التحقيق في فقدان خط هيثرو توصلت إلى نتائج دامغة في القضية تدين مجلس الادارة السابق .
من الواضح أن هنالك شيئاً ما (قوي وشديد) يعيق وضع الملف أمام العدالة فإذا ما ربطنا بين توصل السيد وزير النقل إلى نتائجه الدامغة وبين توجيهات الرئيس بمحاسبة (الوالغين) في القضية فلا يمكن بأية حال من الأحوال أن تأخذ المسألة (ستة شهور) وما معروف تاني (تاخد ليها كم) ؟
العبدلله عمل ليهو فنجان قهوة وقعد في ضل الصباح وبدأ ينجر في مخو ويسأل في نفسو (الملف ده ما عايز يتحرك ليه) .. (الرئيس ووجه بالمحاسبة أها تاني شنو؟) … حتي قبضت عليه (المدام) بالثابته حين فوجئ بها وهي تصرخ قائلة :
– والله والله أنا عارفاك من زمان ح توصل للحتة دي .. وووب عليا كمان بقيت تكلم نفسك؟
المدام لا تعلم أن مرحلة (كليم النفس دي) مرحلة فتناها زمااانك وقبلها مرحلة (فقع المرارة) وأن المرحلة الحالية هي مرحلة الشلل القولوني الإرتعاشي والذي يعتبر (ملف هيثرو) إحدي مسبباته !
– إنتا الحاجه الما عارفا ما تسأل منها إحتمال تلاقي ليكا زول عارف يقول ليك !
– فكرة والله كدى النطلع على شلة (الضمنة) دي إحتمال ربنا يضع سرو في اضعف خلقو ويكون فيهم واحد عارف التأخير ده سببو شنو !
وعلى طول لبست (سفنجتي) ودرعتا جلابيتي وعلى (شلة الضمنة) حيث وجدتهم يجلسون كعادتهم تحت شجرة (النيم) امام منزل عم حسنين النجار .. وما أن جلست على أحد (البنابر) حتى توجهت بالسؤال للاسطى حسنين :
– يا أسطي حسنين تفتكر ملف خط هيثرو ده المعطلو شنووخاليهو ما يتحرك؟
– يا استاذ ما تستعجلو ساكت مش ممكن يكون فيهو (غراء) كتير ماسكو ما يتحرك؟ أو تكون (الضلف) بتاعتو (كابسة) وعايزه ليها جرة جرتين (بالفاره) ؟
وهنا تدخل المعلم نصر الميكانيكي وهو يشير نحوي بيديه الخشنتين :
– يا استاذ الملف ده عاوزنو يتحرك كيف إذا البلالي بتاعتو (عاضة) والإستارتر بتاعو حارق فحمات ومفوت (جلب) الملف ده يا استاذ عاوز ليهو تحقيقات أقصد إسبيرات (أصلية) إسبيرات السوق الشايفنها دي كووولها ما نافعة ولو منتظرنها تعمل حاجة واطاتكم أصبحت !

وهنا ضرب فوزى الجزار بقطعة الضمنة على التربيزه ضربة قوية وهو يقول لهم :
– أها قفلتها ليكم يلا عدو العندكم .. ثم يلتفت نحوي قائلاً :
– يا جماعة الخير الملف ده موضوعو منتهي شوفو ليكم حاجة تانية .. عارفين ليه؟
– (بصوت واحد) : ليه؟
– عشان ده ضبح (إسلامي) !!
– (في خيبة أمل) : هسه يا جماعة أنا جاييكم توروني سر الملف (الغاطس ده) تقعدو تعملوها ليا (ضلف كابسة) و (بلالي عاضة) وضبح إسلامي وما عارف شنو؟؟
– (جميعهم بصوت واحد) : يأ أستاذ ده العندنا أنحنا ناس (معاشات وضمنة) إنتا قايلنا (أمن إقتصادي) !!

كسرة :
من المؤسف (حقاً) أننا في حاجة إلى (توجيهات) رئاسية للإسراع في تنفيذ (التوجيهات) الرئاسية .. وللا الفهم شنو؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

34 تعليق

  1. يا ربي برنجيه ؟

    1. اى والله،،، اول برنجية بعد الاحتجاب ،،،، و سلامات يا ود العبيد ….

      1. أي يوووووووووووووووووووووووي امانه ما كسحتكم الليله

      2. ود العبيد شالتو نومة ساكت

    2. الله يجازي المواصلات شويه كده كنت ياجنوبى فى المقعد الورا

      1. ههههه تاني اقعي الركشات بتساسق مساسقه .. زول بريطانيا ظنيتو لسه قاعد في السودان والزمن خانو !
        انتي ما تباركي عدييييل زي فلاديمير ماااالك تتعذري ؟

      2. برضه محظوظين بتقدروا تدخلو النت ولو متأخر نحنا هنا تلفوناتهم ما بتشتغل يا ستي وانا كم مرة بحاول ادخل بس لا جدوي تقبلي مروري

      3. مججججججججججججججججج ! مع لوية خشم

    3. دي برنجية بتوجيهات رئاسية لانها جات متاخرة آآآآآآآجنوبي

      1. الغلبان .. اريت باقي التوجيهات كمان تجي حتي لو متأخره
        شمباتي .. مع دوران الكتف نص دائرة في عكس اتجاهك
        واصدار ذاك الصوت إثر عض النواجذ وشفط الجضوم الي
        الداخل وكمان مع رفع الحاجب !!

      2. ههههههههههههههههههههههه,,
        خبرة !!

  2. وانت الصادق نحنا في حاجة الي ( رئاسية ) اولا ثم بعدها الي اصدار ( التوجيهات ) !!
    امبارح بروف راشد دياب قال : انا اتمني من الرئيس يعفو عن النقيب ابوزيد وقال انا عارف الرئيس زول طيب !!
    بالله وصلنا المرحلة دي ؟ زول مقدم ادلة تدين ناس مفترض يحموا البلد من المفسدين يقوموا يطلعوهو هو المدان ويطلبوا ليهو العفو من الرئيس الطيب ؟ ما يا ادلتو صحيحة ويتحاكموا الناس يا ادلتو كذب ويتحاكم هو ! هسي بكره كمان يجينا واحد ويقول انا عارف الرئيس زول طيب واطلب منو انو يعفو عن السرقوا خط هيثرو .

    1. طيب وكله طيبه (بالعربي ساذج)

    2. الرئيس حقو يدي التوجيهات دي للجن بتاع الشمالية الكان قبل كم يوم كان ما نفع يديها الجن الاحمر ولو ما نفع ما فيش غير هاروت وماروت الملكين يمكن الشغلانة عاوزه كده

  3. يعني خط هيثرو دا ما بره البلد والدوله أمينه جداً باسترجاع هذا الخط
    اما داخل البلد فمافي اي فساد ومافي حاجه بتسرق ما شاالله حكومه أمينه أوي
    والعده والحمدلله ما اتسرقت حتي هذه اللحظه وما معروف بكره ح يحصل ايه
    تحياتي لجنوبي وخوفتنا من سل اللسان وسلام وحبه للعزيز فلاديمير والاحبه في القمردينه

    1. اي شي بسرقوه ال عبيد حتي خطوط الطول والعرض اي شئ يخطر ببالك بسرقوه ياخي دي سرقوا العمر بالله عليك اخير سرقت العمر والا سرقت الخط وبقينا نضاري من الرصاص اخوك الغلبان يرسل تحياته من على البعد من بلد الكركبه والعكننه والبم بم بم بم

  4. البروف والسمار سلامات
    انت ما عارف انو قرارات الرئاسه دي طلعت ماسوره وكمان ضاربه

    1. قرارات الرئاسة يا بت وراق والا ابو كبير زاتو

  5. بمناسبة المناسبه دي انا عندى ليك راي رايك شنو تكتب سلسله من المقالات التى تخص عدم تنقيز القرارات الرئاسيه

    1. هييييي ما تصعيبها إنتي كمان ! يكتب شنو ولا شنو ؟ لو كان شجر ابروف اقلام ويقعد فوق الكورنيش الجديد يطمّس في البحر ويكتب لنفد البحر قبل يكتب ولو جئنا بموية المطر مددا …… أجي يا بت وراق !

      1. بالله آآآآآآآآآآآجنوبي هي كثيرة كدي غايتو انا شالوا مني بين بورسودان والخرطوم ايصال ضريبة ولائية ولما قلت الرئيس لغاها قالوا اقطع وامشي اشكي للرئيس الشكية لبيدا قوية

  6. كدي خليهم يحاسبوا فساد الخطوط الفي الارض من شوارع و صرف صحي و تصريف مياه أمطار و بعدين يمشوا الخطوط المعلقة في الهوا .مسئول من الخير أنت الواوات دي بتجيبه من الضمنة واللا داير محاضرة من الشريف و عابدين بثنائية ميرغني المامون و أحمد حسن جمعة عن عدم جدوى الاستدلال على التأخير بكثرة الواوات من كتاب فقه المحاججات في كيشية الادارات..

    1. عوووووووووووووك امحمد ود عثمان دي لوحة سريالية هم قاصدينها انت ما سمعت والا شنو؟؟

  7. (ابد ماهنت ياسوداننا يوما علينا) من يعتقد اننا نعلق ونكتب من اجل الكتابة وفك الزهجة والقرفة فهو واهم ومامسئول ومن كان يعتقد اننا نكتب من اجل شوفوني انا بكتب فهو ظالم كفور بربه جهول فنحن نعلق من اجل بلادنا لانها وان جارت علي عزيزة ومسؤليها وان عدلو فيها برضو لئام..نرجو ارجاع مالزم ترجيعه..ونرجو ولا نعتقد ولانصدق بأنه سوف تتم محاسبة الحرامية والنصابين لصوص هيثرو..عليك الله دى ماحاجة تحير خط وطني مرة واحدة لا مابتحير القال ليك بتحير منو؟ اي شئ عندنا وباي شئ عندنا بس انت قرب وشوف العجب وعينك ماحتشوف الا العمي والضبابية ولزليز الملفات تحت ومضاراتها زي فتاة عشرينية وقت يدخل غريب في الدار..
    عادي بلاد ناسا تظلم الناس وحتي الطير يجيها شبعان متمبل وملزوز الكرش لانو قنعان من خيرا فيها ولانو بلادي..غريقه كسيحة..

    1. كده يا محمد صابر اصبح معي واحد ثاني قرفان لو تمينا لينا عشرة الحكومة انقلبت

  8. يا خوانا صلوا ع النبي، ما كل يوم سنوية سرقة قديمة و كمان كل يوم سرقة جديدة لنج ! الجد شنو زعلانين كدي!! حسي أنتو فتونى طفيىتو الشمع ولا لحقتكم؟

  9. يا أخونا هوووووي كيفنكم .. أنا داير أعرف الخط دا باعوه كييييف ؟؟ المسأله ما سااااهلة زي بيع التوسان والبرادو تبيعا زي ما داير وفي أي وقت !! المسألة دايرا ليها تصديق من منظمة شركات الطيران العالمية IATA – وكمان ناس الطيران المدني في البلدين (البائع والمشتري) والإدارة القانونية في منظمة الطيران المدني الدولية – ICAO ودا غير السماسرة من الطرفين !! طيب النقول ديل كووولهم (رشوهم) أها الفضل ليهم شنو عشان يتقاسموا مع الناس الكباااار الغطسو حجر الملف دا ؟؟؟؟

    كسرة: أخبار قضية بتنا نسرين السرقوها نص نهار رمضان وفي وسط الخرطوم شنو يا وزير الداخلية ؟؟؟

    1. يلا مفيش غير كتمت كتمت كتمت

  10. ان شاء الله حتصل 12واو مع شهر مارس 2014

  11. تنفخ في غربه مشروطه شرطه عدوك ارجا يوم القيامه الساعه ساعه وربع بتم المحاسبه بحول الله

  12. ازيكم كلكم و ان شاء الله المرة الجاية اسلم عليكم و البلد حالها احسن من كده . لا عندي في السياسة و لا الحكومة عملت و لا ما عملت . لكن ببساطة لا يغير الله ما بقوم حتى يغيروا ما بانفسهم . بطلب من كل واحد كتب تعليق يذكر لنفسه هو عمل شنو علشان يحارب الباعوض و الذباب بسبب الموية الكانت واقفة جنب بيتهم او في شاريعهم حتى انشفها الله بالشمس . لو عمل حاجة سيقى من حقه يكتب تعليق على اي وضع غلط و لو ما عمل اى شى و وفر للباعوض و الذباب بيت كبيييييييييييييييير و جاب المرض لاولاده يبقى هنا تكون الاجابة عن ليه كلف خط هيثرو ما عملوا فيه حاجة . في مليون قضية خربانة جوة البلد اهم من مليون خط جوى
    ياريت يخصل فيها حل … اسعار خرافية… شوارع حدث ولا حرج …. ازمة علاج …. ازمة سكن …. و غيرو كتييييييييييير

    لاننا و بكل فخر شعب لا يجيد و لا يتقن حرفة سوى الكلالالالالالالالالالالالالالالالالالالالالالالالالام .
    على فكرة انا اول مرة اعلق على مدونة فى النت و آخر مرة بس بقرأ كتيييييير و استفذتنى ملاحظاتكم .

  13. امبارح بروف راشد دياب قال : انا اتمني من الرئيس يعفو عن النقيب ابوزيد وقال انا عارف الرئيس زول طيب !!
    تعرف يا جنوبي زي ديل أعفن ناس !!!! لو لمّ خشمو عليه أحسن !!!!
    المرحوم ابوداؤود الجماعة كلموهو عشان يكلم نميري يفك وردي من السجن بحكم العلاقة الكويسة مع نميري ,, أول ما ابو داؤود قال لنميري : ياخي وردي دا ,, نط نميري وبصوت عالي : مالو ؟؟؟؟ ابوداؤود : ياخي ما تعدمو وتريحنا منو !!!!

    1. هههههههههههههههههههههه,,,
      مرا !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: