أهو كلمناكم

العبدلله بصدد تكوين جمعية بإسم (مستغرشون) تضم جميع أفراد الشعب الفضل الذين يعانون من الإصابة بحالة الإستغراب والإندهاش إزاء تصريحات المسؤولين في الجهات الحكومية المختلفة ، وقد جاءت الفكرة بعد العديد من التصريحات المستفزة والمشاترة و(الما فيها منطق) التي (تندلق) بين الفينة والأخري من أفواه (ولاة أمرنا) ولعل آخرها التصريح الصادر من وزارة التربية والتعليم العالي عبر مدير ادارة الاعلام بالوزارة اسامة العوض والذي يحذر فيه المواطنين ذوي الطلاب موضحاً لهم بأن هنالك 14 مؤسسة تعليمية عليا غير معترف بها ناصحاً لهم بانه في حال تسجيل الطالب بتلك المؤسسات فإن الامر سيكون ضياعاً للزمن وهدراً للمال !!
طيب .. كيف يتعرف المواطن (المسكين) على هذه الجامعات والمؤسسات التعليمية وقد خلا التصريح من إيراد أسمائها؟ وماذا يفعل المواطن في هذه الحالة ولسان حال الوزارة يقول (يلا كل مواطن وشطارتو) .. وفي هذه الحالة بالطبع لا توجد لدي المواطن خيارات سوي إنو (ينوم بالخيرة) مثلاً أو يستخدم (يا أيدي شيليني وديني ) أو يستعين بالتومة الوداعية لمعرفة (الجامعة المسجلة) من المضروبة وذلك حتى لا يضيع زمنه ويهدر ماله كما في وصية الوزارة !!
في وقت لا يستطيع المواطن أن يشيد (كشك ليمون) دون أن تطلع روحو وأرواح اللى خلفوهو من إستخراج تصاديق وزيارات ميدانية من مختلف الجهات .. شئون هندسية .. رخصة صحية رخصة تجارية .. رخصة صحية .. التأكد من صحة العاملين .. المش عرف أيه .. في هذا الوقت نجد ان هنالك من يقوم بإنشاء جامعة .. يستأجر لها المكان .. ويستوعب لها الأساتذة والموظفين .. ويفرد لها الإعلانات في الصحف والقنوات والوسائط المختلفة .. ثم يفتح لها باب التسجيل .. ويستلم الرسوم من الطلاب ويدخلهم إلى قاعات الدرس !! ولا جهة حكومية واحدة تساله (تلت التلاته كم) !! ليس هذا فحسب بل أن ذلك يتم تحت نظر وبصر الوزارة المعنية (التعليم العالى) والتي بدلاً عن إستخدام (القانون) في (قفل) تلك المؤسسات التعليمية غير القانونية (بالضبة والمفتاح) تكتفي بتحذير المواطنين دون حتى أن تذكر أسماء تلك الجامعات حتى لا يقع المواطن ضحية لها في بلد تكلف فيه السنة الدراسية الجامعية ما تكلف من ملايين الجنيهات !!
ده ممكن الواحد يسميهو شنو؟ فساد؟ نعم فساد ونص وخمسة فالوزارة لا تجرؤ أن تعلن عن اسماء هذه المؤسسات التعليمية المخالفة وهذه مسؤوليتها وذلك لأن ملاكها من المتنفذين في الدولة الذين أرادوا الثراء على حساب أفراد هذا الشعب المنكوب (الما عارف يلاقيها من وين وللا من وين) وإلا فلتقل لنا (الوزارة) سبباً واحداً يجعلها تحجب أسماء هذه المؤسسات الهلامية حتي لا يقع المواطن المسكين فريسة لها ؟
والأمر هكذا سادتي الأماجد فلن نندهش ولن نستغرب ولن نتعجب نحن أعضاء جمعية (مستغرشون) إذا طالعنا تصريحا على نفس النسق للناطق الرسمي بوزارة الصحة يحذر فيه المواطنين من مغبة التعامل مع 14 صيدلية غير مسجلة بالوزارة (دون أن يفصح عن أسمائها) أو يرسل قوة (لتقفيلها) ويختتم تصريحه قائلاَ (إن تعاملكم مع هذه الصيدليات سيكون ضياعاً للزمن وهدراً للمال وأهو كلمناكم ) !!
أو إذا طالعنا تصريحا لوزارة الصحة أيضاً تحذر فيه المواطنين من مغبة التعامل مع 14 مستوصف خاص غير مسجل بالوزارة (دون أن يفصح عن أسمائها) أو ترسل قوة (لتقفيلها) ويختتم تصريحه قائلاَ (إن تعاملكم مع هذه المستوصفات سيكون ضياعاً للزمن وهدراً للمال وأهو كلمناكم ) !!
كما يمكننا أن نستمع لتصريح من (المجلس الهندسي السوداني) يحذر فيه المواطنين بوجود عدد 14 شركة ومكتب هندسي غير مسجل ويمارسون البناء والتشييد ورسم الخرط مختتماً تصريحة (إن تعاملكم مع هذه المكاتب والشركات سيكون ضياعاً للزمن وهدراً للمال وأهو كلمناكم) !
مثلما (لن) نطالع تصريحاً لمسؤول بأجهزة الشرطة يقول أن هنالك 14 منزل (ست عرقي) بمنطقة (الحفر) يروجون (عرقي) يحتوي على مادة الميثانول السامة مختتماً تصريحة بأن تعاطيكم من هذه المنازل سيكون ضياعاً للزمن وهدراً للمال و(إحتمال يلحقكم أمات طه) !
وأهو كلمناكم !
كسرة :
إنه فعلاً تردي (يطمم البطن) .. نحن في إنتظار (التشكيلة الوزارية الجديدة) ربما يتحسن الأداء فننتقل من مرحلة (الطمام) إلى مرحلة (القرف) !!ّ

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

32 تعليق

  1. الناس وين نايمة برنجية وكتمت كمان

    1. شنو الليلة تلفوناتكم اشتغلت ولآ شنو ؟

      1. والله يا اخوي جنوبي هنا ما فيش تلفون بيضرب ابدا الا ضرب نار هههههه

      2. صدقت و الله يا جنوبى ,, خذلنا التلفون الليلة !!

    2. بخييييتة و مباركة عليك آآآآخوى آآآلغلبان ,, و طول الكتمة يبلغ البرنجية ,,

      1. طول الكتمة يبلغ بم ان شاء الله قريبا

  2. دى كارثه كبيييييييره جدا وخطيره للغايه ارجو احلالها محل الكسره الثانيه بل امل ان تفتح بلاغ رسمى فى الشرطه عن هذا الموضوع الخطير وتبعاته الاخرى التى ذكرتها

    1. يا عباااااااااااااس الكسرات كثيرة البلد كلها كسر يكسر كاسر مكسور

  3. فشفاشنا اتنفش و مافى زول يفش غبينتنا

  4. انتا مسعول من الخير
    المسعولين ديل مافى زول بقرا الكلام دا
    تانى حقوو عمودك تخلليهو فاضى و كل زول يتخيل الموضوع شنو وكترت التكرار بتعلم ابو الحمار

  5. ونحنا ماشين نسجّل الولد نشيل معانا مصحف ونقول لمدير الجامعه خت يدك وقول : اقسم بالله العظيم وكتابه الكريم انو جامعتنا دي ( ويسميها ) مسجلة في وزارة التعليم العالي وانو الشهادة الحنديها لولدك لمن يتخرج معترف بيها في السودان وبره السودان والله علي ما اقول شهيد .
    نقوم نديهو القروش ونسجل الولد , وكل يوم ندي الولد سندوتش يديهو للمدير ياكلو واليوم النلقي المدير صايم طواااااالي نطلع الولد من الجامعه دي ونعيد القصة مع جامعه تانية ..
    أحيييييييييييييي يا ثورة التأليم الالي !

    1. كله ولا صيام الاثنين والخميس علامة مسجلة للدجل والشعوذه

    2. سلامات يا ناس سنار اخبار السيول عندكم شنو

      1. الغلبان .. صيام الاتنين والخميس سنة الا الخوف صيام الكفارة
        كتلوني .. ههههههههههه دق علي يا مسخوط رقمك راح مني

    3. وآآآآآآآآآآآآآآآآآآآآآآآآآآآآآآآآآآآآآآآآآآآآآآآآآى ووووواب على انا هسع اعمل شنو ياجماعه بتي سجلت ليها في الجامعه ودفعت ليها من لحمي الحى وكمان كااااااااااااااااااااش انا كده بادووووب عرفته سر الاعلان بتاع الجامعه انو ابتدا من هذا العام الرسوم للسنه الاولى تكون كاش يعني هسع ياجنوبى الراي شنو نرجع نحلفون ولا نعتبرانو ركبنا ماسوره
      اهئ اهئ اهئ

      1. سلام اختي بت وراق بي حسبة بسيطة الدراسة في الهند او باكستان او في الفلبين ارخص كثييييييييييييير من السودان كان البنية ليها اخو اصغر خلوه يلحقها وسفروهم هناك وكان كمان العكس طلعوهو من جامعته الهنا وخلوهم الاثنين يبدوا هناك وكان ولادتك كلها بنات زي العبد لله الرماد كال حماد انا عن نفسي سوف اعمل بذلك ان شاء الله امهم تمشي معهم او امشي انا معهم وماله ادرس من تاني هع

      2. هههههههههههههههههههههههه,,
        منطق برضك يا بت وراق !
        هى لكن كدة الحيكومة دى كووووولها طلعت هناى !
        وى وى وى

  6. والله لايجب علينا السوال عن الجامعة او تسجيلها علينا ان نسال من هو الذي امر بتعيين مثل هذا البغل بالوزارة وان يتم عمل مشنقة بالميدان له ولمن قام بتعيينه ومن صرح له بالتصريح للقنوات الرسمية التي لم ولن نفرق بين تصريحات المسؤولين وغناء البنات لانها صارت مفتوحة لكل من هب ودب …. الله يخارجنا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

  7. هههههههههههههههههههههههههههههههه

  8. تعليقك بانظار الموافقة بالنشر
    هههههههههههههههههههههههه
    وتاني جيتكم ………. انا من الرمضان قاعد تجيني الرسالة اعلاه
    نننننننننننننننننننننننننمممممممممممممممممممملللللللللللللللللللللللل

  9. الناطق الرسمى دا ما كويس !
    وكمان الوزير بتاعو ,,
    والرئيس حقهم كوووولهم !
    هاكم دى ,,
    يا اولاد الهرمة ,,
    والله مهازل ….

    1. انت عارف ياشمباتى ديل ما اولاد الهرمه ديل اولاد( الح )انا ما بفسر وانت ما تقصر
      بلمناسبه دى قبل ابام كنا فى نقاش عن مفهوم اولاد الحرام المعروفبن فى المجتمع وتوصلنا عبر النقاش بانهم ليسوا ابناء حرام وانما يمكن ان نطلق علبهم ابناء الرضى آآآآآآآآآآآآآآى ابناء الرضى لان حضورهم الى هذه الدنا جاء عبر رضى البنت والولد يعنى ما جاوا بالقوه ووجد نا ابناء الحرام هم من تم حضورهم الى هذه الدنبا بقسيمه وحفله للصباح واشهار ولكن تربوا على مال الحرام باكلون الحرام ويشربون بمال الحرام ويبنون ويسكنون يمال الحرام وكل لحم نبت بمال الحرام فلنار اولى به فمن باب اولى فهم ابناء الحرام

      1. ههههههههههه وحات الله نقاشكم كان منطقي جدا ,, خلاص خلوهم اولاد ( الهرام ) زي مستغرشون …
        شوفوا يا جماعه , اهلنا قالوا البتبلبل يعوم , وبما انكم عودتوا المسئولين انو كل حاجه تعملوها انتو زي جنيه الجمعه ونفير وشنو وشنو هسي من بركة تخصصوا رقم لتحويل الرصيد هي اقصد لتحويل اسم الجامعات الكيري .
        وأحييييييييييييي استغفرتك يا مالك روحي ..

  10. ما هو ده المخلينا نكون اول اعضاء مستغرشون اذا كان التعليم العالى خاتي الجامعات دي في دليل التقديم وللا قول لي كيف يقدم لها المواطن اصلاً؟؟؟؟؟؟

  11. والله قصص
    لكن يا استاذ هي الجامعات المسجله زاتا معترف برا السودان والله كلو محصل بعضو مسجل وما مسجل واحد لانو انا شايف انو وزارة التاليم دي زاتا ما مسجله

  12. عرفنا الجامعات المعترف بها في حالة بطالة ويرثي لها (بشتنة ورقاد واطة) وشفت بي عيني مافي زول قال لي وللأسف هي جامعات بها كبار اولاد المامسئولين، كمان جاتنا جامعات مامعترف بها والله ياهو الفضل، وفعلا هذا زمانك ياتصاريح فأمرحي وكل زوول عندو تصريح يرفع يدو ويجي بي جاي، اي تصريح يعني اجوف ولا ملئ، كلو يرفع اصبعو، والمارفع اصبعو يحاول يجتهد يشوف ليهو تصريح فارغ كده واجوف عشان ندخلو لجنة الاختيار للتصاريح العامة، والماعندو تصريح يشتري أو يشوف ليهو تصريح إغاثة، وبالمناسبة في حلل للماعندو تصريح وهو (التصريح بالنظر)، واي زول مابتعجبو التصريحات يلحس كوعو.

    1. اها يا محمد ود صابرفي كتمة اكثر من كده كتمت كتمت كتمت

  13. ايوه كدا يادوبو الواحد يقدر يتابع ويدخل في النت حيث أنني كنت مستغرشون في السودان.
    وسلامات من علي البعد

    1. بركة الجيت بركة الجيت آآآآآآآآآآي
      انت قايلا سمحه
      ياما تشوف

      1. قضيت الاجازه السنويه في السودان وانطباعي عن السودان كان محزنا،السلوكيات تغيرت تماماً وياتري منو المسؤول ،الشي الوحيد الجميل زياره الأهل والصحاب وستات الشاي ولكن بخلاف كدا اي حاجه بقت بايظه، لم أنجز اي شئ في اجراات الاراضي ولا يزال الفايل في مكانه واتحيرت هل معقول يكونوا دايرين رشوه لكي تسير الإجراءات بالصورة الصحيحة ،يعني وين الصح،افتونا وهل هنالك فتوه شرعيه بدفع الرشوه في المصالح الحكومية ،ليه كدا

  14. ناس الفتاوي ما فاضلين يا عبيد ، كان بودنا، لكن مشغولين بيفتوا محمد صبحي حلال يصور سنبل في السودان و لا لاء؟الله يعينهم! ههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: