المادة : تدبير

إسم الطالب : محمد أحمد الغلبان
المادة : تدبير

معطيات :
المادة التالية تم نشرها عند رفع الدعم عن المحروقات (الماضي) .. وفيها تجد بعض الحلول والإبتكارات لمواجهة الحياة اليومية بعد أن إرتفعت الأسعار (حينها) إرتفاعاً جنونياً وصار كيلو لحم الضأن 40 ألف (الآن 60 ألف) .
السؤال :
قم بتعديل هذا المقال (الترشيدي) الذي كتب عند رفع الدعم (الماضي) ليتناسب وإرتفاع الأسعار بعد أن يتم رفع الدعم (القادم) والذي تبشرنا به الحكومة وأصبح تنفيذه مسالة وقت (وصفقة) …
تنبيه : يمكنك إضافة أي حلول وإبتكارات تراها مناسبة

إبتكارات وحلول رفع الدعم الماضي :

(1) التوم :
التجهيز : يتم دق الثوم ناعماً ووضعه داخل علبة مصمته لعدة أيام
طريقة الإستخدام : تفتخ علبة الثوم أمام فوهة (الحلة) لتنداح منها رائحته على الملاح مباشرة
تحذير : يجب أن تكون العلبه موجهة لفوهة الحلة بدرجة حاده حتي لا يندلق الثوم داخل الحلة والميزانية تبوظ
تنبية : بعد الإستخدام تأكد من أقفال العلبة بشكل محكم حتى لا يتسرب (غاز الثوم) من العلبة
وتكون الطبخة الجاية من غير توم !

(2) البصل :
التجهيز : يتم إزالة طبقة خارجية وااااحده عن البصلة ، بإستخدام إبرة وخيط قم بإدخال الإبرة في منتصف البصلة واجعل الخيط يتدلي منها ، قم بعمل خرم صغير في منتصف غطاء الحلة
طريقة الإستخدام : إدخل طرف الخيط داخل الخرم الذى في غطاء الحلة ثم أعقده لتصبح البصلة متدلية داخل الحلة ثم قم بقفل الحلة بإحكام حتى تتسبك رائحة البصلة مع محتويات الحلة .
تحذير : تأكد من أن البصلة المتدلية لا تلامس محتويات الحلة حتي لا (تتهربد) مع المحتويات وحقك يروح
تنبية : بعد إكتمال الطهي تأكد من فك الخيط ووضع البصلة داخل علبة وتأكد من أقفالها جيداً حتى تتمكن من استخدامها طوال الشهر .

(3) معجون الاسنان

– أمسك المعجون باليد اليسري بعد أن تقوم بفتحة
-أمسك الفرشاة بيدك اليمنى
-قم بتمرير رأس الفرشاة على فتحة صباع المعجون لمدة 20 ثانية
-(تسوك على بركة الله)
– تنبيه ؛ لا تنسي أن تغسل الفرشاة بعد الإستخدام للتخلص من بقايا المعجون (ههههه) !!

(4) الأحذية :

– قم بإحضار (جوز) من قارورة مياه معدنية فارغة (موبايل) للذين يرتدون مقاس 39-41 أو(فاميلي سايز) لمن مقاساتهم أكبر
– قم بواسطة المقص بقطع الجزء المسلوب الذي يلي رأس القارورة
– قم بقطع القارورة طولياً إلى نصفين متساويين على مقاسك
– أقلب نص القارورة المفتوح إلى أعلى ثم ضع رجلك داخلها بعد ربطها بخيط قوى ويلا أكسح على بركة الله
– لو الواطة سخنت يمكنك وضع (قطعة قماش قديم) كأرضية تحت الرجل مباشرة وكان المسألة (سخنت أكتر) يمكنك رش بعض الماء عليه للتبريد وكده !

تحذير :

تأكد من وضع الحذاء في مكان آمن عند دخولك إلى المسجد حتى لا يسرق !

(5) ود عماري

– قم بشراءعدد 2 كيس بلاستك (فاضي) ذي (تخانة) تجعل محتوياته نحتفظ بالرطوبة
– أكتب بقلم الشينى على الأول (الجديد) وعلى ظهر الكيس الثاني (الراجع)
– بعد أن ينتهي مفعول (السفة) قم بدردمتها ووضعها في كيس الراجع ثم تأكد من إقفال الكيس جيداً منعا من دخول الهواء وحتى تحتفظ السفة بحيويتها وموادها (المسرطنة)
– كرر هذه العملية حتى (يكمل) التمباك الذي في الكيس الجديد وعندها قم بإفراغ (التمباك) الذي بداخل كيس (الراجع) في (الكيس الجديد) ! لتبدأ الدورة الثانية فالثالثة وهلم جراً حتي يتحلل (التمباك) إلى عوامله الأوليه وعندها أحتفظ به في حرز أمين فالظروف ما معروفة إحتمال يكون في رفع دعم تااااااني !!

(6) العلاج :

– توجه إلى التيمان وقم شراء الآتي وضعه في صيدليتك العائلية :
– شوية زيت سمسم+حبة قرض+حبة كمون+شوية عسل+شوية حبة سوداء +شوية حرجل
– لا تنس أن تسأل (العشاب) عن طرق الإستعمال والجرعات وبلاش تسألو عن (الأعراض الجانبية) لأنها مش ح تكون أسوأ من النحنا فيهو ده

كسرة :
قم بوضع الحل في ظرف وأرسله على عنوان (أمنا الحكومة) !!!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

64 تعليق

  1. مستغرش رقم واحد

    1. معااااااااااااااااااااااااااااك

    2. لاكين الاستغراش ما عندك يا ود العبيد !!!

      1. سلامات يا حبيبنا فلاديمير
        البروف يقول من غير بصل وتوم وانا مشيت لنادي قلنا للجرسون كتر السلطة وحاتك السلطه كانت بس بصل حيرنا في كتر السلطات وقلنا ليهو وين مكونات السلطه
        قال لينا البصل كويس ومغذي وقرب يدينا محاضره في مكونات البصل وفوائد البصل وتفاعلها في جسم الإنسان ولكن اتوكلنا واكلنا البصل كسلطه ،
        بالله شوف الجرسون ده استغشرنا كيف وحتي شعرنا بالاستغشار بعد اكل البصل اقصد السلطه

  2. لكن قصة البصلة والمعجون ديل حامضات !
    والالذ الضحكة (هههههه) !
    هههههههههههههههههههههههههههههههههههههه,,
    رفعهم بلا يخمهم كلهم وما يفضل فيهم نفاخ النار

    1. لكن (ود عمارى) دى مبالغة عدييييل كدة ،،، و هو زاااتو بعد (الرفع) دة العندو مزاج للسفة منو؟؟

  3. غايتو يا بروف انا شخصيا ما حاضحك لأني احتمال كبيييير اعمل بي نصائحك دي

  4. خاصة نصيحة البصلة ، والله قابلتك حتقول كل حلة نستعمل فيها طبقية من البصل أية لكن نصيحتك اجدي

    1. اختنا (بت وراق) عندها وصفات و طرق تقشف بتستعملها من زماااان حتى قبل الرفع الاول كمان،،، أصبحت بفضلها تستطيع تكملة الستة شهور بربع كيلو لحمة ،، بالله شفتى اجدع من كدة ؟؟ كسر و الا ما كسر !!!!

      1. يا فلاديمير انا شاكي انو نونا دي ياها بت وراق ذااااااتا !

      2. له يا جنوبي لا بت وراق لا حاجة ، مع أني اتشرف. انا وافدة جديدة و متابعة جيدة عشان كده نزلت انتخابات في يستغرشون ( أمانة مال ، ما أمانة مراة. عشان ما تفكوا النسوان يقعدوا يظعطوا في بعض! )على الأقل يمكن نطلع مقرشون. مسؤولين من الخير اسم الطالب دم مايا هو الغلبان ألوااحد ده. وأنا أقول مالو ما ظاهر ، تاريهو ممتحن

      3. صحي الغلبان وينو ؟
        اديناك امانة المال بس قدمي اقرار ذمة للنائب العام بت وراق
        ونحنا اقرارنا قبل وماااا زي ناس كده بعد ..

      4. الغلبان يمكن كتمت معاه

      5. الغلبان كاتمة معاو من زمان,, بس الخوف ما تكون قالت : بم معاو و هو بعيد هناك فى بلدة الزنتان !!!

  5. الحكومة دي ( حكومة مجازا طبعا ) تقعد ترفع في الدعم
    كده لااااامن يوم راسو يلف ويقع …
    جني جن تجريب الشئ المجرّب ! هسي بكره كمان يقعدوا
    يقولوا رفع الحد الادني للاجور ! ويوم واااااااااحد
    ما فكروا في خفض الحد الاعلي للأجور !!
    بالله وزير يتعالج مجان ويسافر مجان واولاده يقروا ويتعالجو
    مجان والكهرباء مجان ومرتو يدوها عربية حكومة توديها لي
    صاحباتا وناس امها وأييييييي شئ مجان تاني يدوهوا
    راتب 40 و 60 مليون لي شنو ؟ هي زاااتا كترة
    القروش في يد الزول غير تعلموا السفاهه وشراب
    السجاير …

    1. سجاير !؟ نان فضل ليهم شنوووو !!؟
      اهو دا البجيب الهناى الفكرى داك !
      وااااااااااااااااااك

      1. هههههه
        هي ميري ما اتعلمت شراب السجاير بعد الشئ داك ,
        والله يا شمباتي انا اكلت سنوتش عيشة محشية طحنية وعليها
        رُترُت جبنة بي قرش واااحد , يجوا شُفعي الليلة ما يلقوا
        الياكلوهو ؟
        تبت يدا علي محمود وتب اين مال البترول والذهب

      2. انتى من زمن القرش يا ميرى !!؟
        وى وى وى

  6. هم عملو شنو في ترشيد الصرف الحكومي اولا ووينو التقشف القدونا بيهو و تاني حاجة العائد الحايدخل للحكومة بعد رفع الدعم حايتصرف في ياتو ناحية من نواحي العجز او حايسدو بيهو ياتو خرم من اخرام اللاقتصاد المنهار دا؟؟؟

  7. يا بروف الفاتح نحن فهمنا القصد من المقال لكن بصراحة مقالاتك اصبحت تاخذ طابع ساخر زيادة عن الزوم يعني زمان كنا بنستمتع من المقالات اكتر ,,,, هسي بقا في توم و بصل و حاجات كتيرة … نحن عايزين سرد اكتر لي وقائع و حقائق يعني باختصار شديد المقالات بقت المضمون منها قليل الي حد ما….
    مع احترامي الشديد لك و في النهاية دي وجهة نظر
    شكرا جزيلا

  8. يا جنوبي هوووووي أعمل حسابك شديييد ، من الناحية الشرعية ما يجوز ليك تستخدم تعابير مقتبسة من كلام الله تشابه آيات القرآن الكريم !! خاااصة عند مخاطبة الجماعة الأنجاس ديل ، وأنا كنت زمااان في الغرب بشتري الخروف حي بي لحمو ودمو (بجنيه واااحد) ولمن تشتري عشرة بدوك واحد زيادة !! شووف هسة زي ما قال البروف الكيلو الواحد بي ستين ألف ، تقول لي سندوتش بي قرش !!
    كسرة متحركة من وقت لي آخر:
    أخبار قضية بتنا نسرين السرقوها نص نهار رمضان في شارع النيل بالخرتووم شنو يا معالي وزير الداخلية ؟؟؟

    1. خااصة عند مخاطبة الجماعه الانجاس يمكن ! لاكين انت متأكد من حتة الناحية الشرعية دي ؟
      انواع الاقتباس كتيرة يا نانو وبرضو ورد الاقتباس علي لسان الصحابة والشيوخ والشعراء والغير جائز حسب علمي هو حشر آية كاملة في موضع ينسبها للاستهزاء والعياذ بالله .
      ايضا من انواع الاقتباس اقتباس المعني : الشجر اقلام جميع والنيل مداد لو كتب اشعاري ليك ما عددا ..
      هههههه عشرة ويدوك واحد هواده !؟ ظنيتك من اللعبو شدت مع علي دينار …

      1. ههههه سلامات يا جنوبي

    2. الله الله البت دي مؤتمرجية والا شنو

    3. بالله هو فيه وزير داخليه يطرشنا

  9. يا بروف
    الحاجات التانيه يباصروها كيف زي المواصلات وقروش المدارس والعلاج ودفع حق الفطور والذي منو لموظفين الحكومه بس دي يباصروها ويدبروها كيف بالله افيدونا لمن نجي تاني

  10. عاد لكن يا بالبروف ما بااااالغت عديييييل كده !!!
    البذار ده كلو لشنو ؟؟ مافي داعي للتوم والبصل ديل أصلن والحلة من غيرن بتبقى !ّ!ّ

    كسرة
    أخبار اللمة شنو يااا إنتو ؟؟

    1. هههههههههههههههههههههههههههههههه,,
      لمتكم المن غير بصل وتوم دى !

      1. وين وين وين تلقو زي ده ..
        ( مع مد اللسان إمعانا في المكاواة )
        يا انتو وين انتو ما بنتو وروا قلوبنا وين انتو
        الحبيتا ديك جاهله مااااداريه
        الناسيانا جافيانا مااا طاريه
        خلو النوح في الدموع وخلو الروح في الضلوع
        لعزالنا واعدانا شمتو يا ناس انتو وين انتو
        المندهش .. اليومين ديل قعد امرق بره الرياض كتير خلوها بعد اسبوع كده .. خصمتكم كان شمتو فيني شمباتي ..

    2. المندهش سلامات
      كيف اخبارك وانشاء اوضاعك موفقة …. واذا دار محور سؤالكم عنا فنحن بخير لم نفقد شي سوي رؤياكم الغالية …..
      ابشرك انشاء الله اللمة تكون قريبة وقريبة جدا كمان….
      بس جنوبي دا الله يهديهو ويقعد في الواطه دي ,,,, ياخي دا عامل زي المرا الطلقوها …. هسي في بيت ابوها وبعد شوية في بيت اخوها وبعديها في بيت الجيران …..جيرنا زاتو

      1. هييييييييييييييييي البوديني بيت الجيران شنو كمان !؟
        يجرجروك بالواطه ……….

    3. البجنن الحلة الشغالين ليها توم هوائي وبصل بالقطارة دي جواها شنو؟؟؟؟

    4. سلامات يا أمم :
      جنوبي , مندهش , الحبيب ومرحب بالضيوف : منتصف الاسبوع القادم اتصالات لتحديد موقع جنوبي الجغرافي ومن ثم تحديد اللمة ومن أسي انا علي البصل والتوم ( كيتا على فلانة ديك ) !!!!!!

      1. تمااااااااام يا عباس دكام انا من يوم التلات ثابت …
        وبرضو مرحب بكل قمرديناب الرياض ..
        فلانه واااااحشانا ..

      2. امممممممممممممممممم,,,
        جمس الهيئة الما خمج !!!

      3. هههههههههههههه
        بنلبس طويييييييييييييييييييييل
        الله ليكا انت ..

  11. طريت الناس وظلم الناس رضيت يا دنيا شلتا احزاني فوق الراس ….. اكان يا دنيا تنجمي ….. انجمي هوي انجمي…. ينصر دينك يا القدال ….
    والله وتالله غير الشارع ما عندكم حل ……. لانو حتي الناس الشالت السلاح اهو غير الخراب ما حصلنا شئ ….. لكن لا باس بالعيدان من علي شاكلة عود القذافي ونحوه …… استخدامو لمرة واحده
    والماشي درب الكار يغور والتاب من التمباك يتوب …….

    1. عود !!
      اممممممممممممممممممممممم

    2. كلنا صرنا قدال من كثرة العصر

    3. دين امممممممممممممك دا الكلام ينصر دينك آآآآآآآآآآآآآآآكتلوني لازم الشارع اما الاحزاب المرطبة دي ما بتنفع معانا وجربناهم والاسلاميين جربناهم عاوزين ناس الشارع زاااااااااااااااااتم ناس الوجعة مش يجونا طايرين من وين وكل واحد فيهم ورجع ورجع ورجع وهلم جرا لانو انحنا بنسمع في المومياوات دي من عمرنا سبع سنين وهم هم والان بلغنا الخمسين كفاية حتى انحنا ما عاوزين فوق الناس التحت الخمسة واربعين هم اللي يحكمونا كفانا بهدلة ويلا الناس تحرض على الشارع بس كتمت كتمت

  12. يا جنوبي سلاااام، لعلمك يجوز اقتباس المعني ولكن ليس النص القرآني !! وبعدين أنا ما لعبت “شدت” مع علي دينار لأنهم ما كانوا بعرفوها في الغرب لكن لعبت معاه (دافوري بالتيوه) أها إنت بتعرف التيوة ؟؟ وكان علي دينار هو الهداف والسنترفورواد ، والباكات الملك محمود الدانديقاوي والمقدوم شريف ، لقد كانت أيام حلوة إستمتعنا فيها بأكل الخرفان أمات جنيه واااحد !! و بالجو الحلو كل السنة والخضرة الرائعة في الخريف (الما بغرق الناس ويكسر البيوت) لمن يجيبو لينا الإغاثات من بره ويمنوا بيها علينا !! ونسوا أنو علي دينار دا كان بودي كسوة الكعبة (المحمل) وعندو ( 3 تكايا ) في جدة ومكة والمدينة تقدم الأكل والشراب مجاناً للحجاج ولي أهل البلد الكانوا فقراء ما عندهم شئ ، (سبحان مغير الأحوال) وكمان يؤمن الحماية للحجاج من قطاع الطريق (أنا كنت قائد فرقة الحماية) .. وبرضو عمل أبيار علي ميقات أهل المدينة ومن يمر عليها ورسل سدنة (الأغوات) لخدمة البيت وتعليم القرآن الكريم للرجال، وبالنسبة للنسوان كان في واحدين (مخصيين) لتعليمهن القرآن في البيوت .. أها فهمت ولا لسة ؟؟ أكان دايرني أزيدك قول لي وأنا حاااااضر ..

    1. هييييييييي وانا بتين اقتبست نص ؟
      هههههههههه انت عارف يا نانو التيوة دي اظنها جاتنا مع المستعمر ولحدي ما المستعمر مرق كان ياها التيوة الا بعد الخواجات مرقوا مننا وغنيتوا ليهم يا غريب يلا لي بلدك , قامت اخبارن انقطعت منكم وهم اتاري مشوا بي هناك وطوروا التيوة وسموها كريكت وانتو ولاااا جايبين خبر تلعبوا في التيوه سااااااااااكت ( اها لقيتني كيف ) ..
      كسوة الكعبه قبل كده جابو تقرير في تلفزيون السعودية عن الكعبه وذكروا انو مصر كانت بتكسي الكعبه في زمن ما إلا كسوة علي دينار دي اصلوا ما ذكروها ما عارف ليه ؟ وحتي آبار علي نسبوها لي علي بن ابي طالب !!
      الرجال المخصيين ديل قبل كده قالم لي واحد سعودي عجوز اتونسنا سوا في الحرم وحسب كلامو هم كانوا من بني جلدتنا في اللون وكانوا مخصصين لخدمة الحريم في الحرم وبرضو قال لي ناس جده كانوا بيتظروا السنابك والباخره السودانية تجيب ليهم العيش من السودان !!
      هاك المعلومه دي : أبوي رجع من السعودية سنة 59 ( قال شنو عشان السودان نال استغلاله قال ! ) شفت الراجل ده سوا فينا شنو ؟ المهم قال لمن هم كانوا هنا في السعودية اخوانو الفي السويد وبريطانيا كان لمن يرسلوا ليه برقية بتجي عن طريق بورسودان وقال السعودية الزمن داك العالم ما بيعرفا ذااتا يعني زي لمن اكتب في الظرف الاخ نانو ابو احمد ومنه مشكورا لفلاديمير !!
      إييييييييييييه زمن والكوز لا يؤتمن … دول طلعوا سلسفيل صليبنا ..

      1. جنوبي طلع امم متحدة يا رجالة

  13. قبيلك قلت يا الكضاب لحام وشراره…

    دكن مصنع اليرموك وسون غاره…

    يا الكضبك بيان مابدورلو دق نقاره…

    عقب مرقوك وليد قالو الكبار طياره…

    ديمه بتمرق الكضبه وتكب الشرده…

    يا والى العويصمه البى الوسخ منفرده…

    الفين بص حسابهن يا المغفل جرده…

    يا كيشة الدكاتره الباعو ليك الخرده…

    شباب الفيس تقول خونه وبواقى عماله…

    وانت الخاين الدوله ومبعزق مالا….

    شبابنا النصو هاجر والبقيه عطاله…

    تارنا بناخدو منك والسنين مياله…
    ( محمد الحسن ابنعوف )

    1. احزاب الخيبه

      المتوافقين

      وكت اتفقو مع حكومتنا

      ورفعو الدعم من البنزين…

      عشان السكر

      احلق طاير

      يتوارالنا لبن وزين…

      ياوجعتنا

      القصه قديمه

      ان تطروها من التموين….

      يوم جابولنا الكرت اللخدر

      كل تلات انفار

      رطلين…

      والرطلين زاتن شالوهن

      اسسو بيهن للتمكين…

      التمكين الما خبرنالو

      غير البشتنه

      فجخى وطين…

      رغم السد والزيت الدافق

      مال الهمبته

      والتعدين…

      احلبو هن فى شطور الدنيا…

      ونحنا

      مسكنا قرون الدين…
      ( محمد الحسن أبنعوف )

    2. ينصر دينك (ما دين الكيزان)

    1. أخوى آآآآآآلغلبان,, كدى انسعلك,, اسم الطالب: محمد احمد الغلبان الفوق دة ياهو انتا زاااتك و الا تشابه اسماء؟؟

      1. يظهر البروف اقتبسه برضه ههههههه

  14. قرار رقم واحد. بسم الله و بعد الصلاة علي رسول الله ،، على كل قاريء دفع رسم استغراش ( دبل) عشان استغربتوا و اندهشتوا سوا، قرار نمره اتنين على كل مشارك دفع رسوم مشاركة استغراشية ( ده غير رسم الاستغراش) . تورد الرسوم في بنك مفلسون حساب باسم نونا بت احمد ( سلة ما قدرت افتح باسم الجمعية ) و ما تتفاصحوا ادفعوا بس بعدين نتفاهم . البروف نعدو تخفيض ٢٠٪

    1. ما باقي ليكي الا يقوم ليك دقن !!

      1. والقال ليك منو ما عندها !!؟
        ههههههههههههههههههههههه ,
        تحياتى يا نونا المجنونة ,,
        تعليقك حامض واصلى ,,

  15. ” وزير المالية يواصل اجتماعاته بقادة احزاب المعارضه تمهيدا لرفع الدعم ”
    هي في احزاب معارضه ؟ ولآ يا ربي قصدهم احزاب المعاضضة ! هسي
    يرموا لي كل واحد عضمه يعضي فيها ويسكت !!!

    1. إها و كان قالوا موافقين ولا حتى ما موافقين حي حصل شنو؟

  16. مصادفة عجيبة في مسيرة الرؤساء العرب !!!

    1) جمال عبد الناصر ولد سنة 1918 وحكم 18 سنة وجاء الى
    الحكم بانقلاب عسكري في عام 1952 ومات وعمره 52 سنة!!
    $$$$$$$$$$$$$$$$$$$$

    2) حافظ الأسد ولد سنة 1930 وحكم 30 سنة وجاء الى الحكم بانقلاب عسكري في عام 1970 ومات وعمره 70 سنة !!
    =================
    3) صدام حسين ولد سنة 1937 وحكم 37 سنة وجاء الى الحكم بانقلاب عسكري في عام 1979 وقتل وعمره 79 سنة !!
    &&&&&&&&&&&&&

    4) القذافي ولد سنة 1942 وحكم 42 سنة وجاء الى الحكم بانقلاب عسكري سنة1969 وقتل وعمره 69 سنة !!
    ==========================
    5) والآن جاء دور زولنا عمر فبناءاً على المعطيات السابقة فإن !!!

    عمر البشير ولد سنة 1944 وهذا يعني أنه سيحكم 44 سنة !!
    وقد جاء الى الحكم بانقلاب عسكري كسابقيه في 1989 يعني حيموت وعمره 89 سنة
    (الأعمار بيد الله لا يعلمها إلا هو !!)

    أها شدو حيلكم ووووووووووب عليكم !!!

    1. نستلف الواحد = 9 وتاني نستلف الواحد = 6 – 89 = ( 20 )
      إيييييييييه يلا فات الكتيييير وما باقي الا الكتير
      يا نانو كدي اتأكد لينا تسنين ولآ ميلاد اصلية ؟

    2. دي بالغت فيها عديل تعرف حاولت اعمل حريف واقلب الاحاد محل العشرات برضه ما لفقت

  17. يا جنوبي كل الشهادات أصلية وطالعة من مصلجة الأحصاء في كل بلد وكمان موثقة من وزارات الخارجية والسفارات الأجنبية !!!
    صدقني أما طلعت (كيييييت) من معادلتك دي ما فهمت منها ولا حااااجة !!! أصلي بلييييد في الحساااب (زماان) مش رياضيات هسع.

    1. يا نانو الظاهر رفع الدعم عمل ليك تشويش
      الفي بالي بالك عمره الان 69 وباقي ليهو 20 سنة وحكم 24 وبرررضو
      باقي ليهو 20 سنة ..
      1/ مسموم 2/ عتّت ورحو دي زهجت منو ومرقت 3/ مكتول 4/ مكتول
      5/ ؟؟؟؟ اكمل الاجابة التاقصة باعتماد نظرية رؤساء غورث ..

  18. الرفع الجاى لابصلة ولاتومة شوف ليك وصفة تانية يابروف

  19. مصطلح محروقات دي فضفاضة وعشان ما تبقي زيها زي محاربة الارهاب
    نحنا دايرين الحكومة تعرّف المحروقات اولا ..
    قالوا والي غرب كردفان فرض رسوم اضافية علي حطب الطلح !!
    حطب الطلح محروقات والغاز محروقات وحلة الملاح بكل مكوناتا طالما
    بنخطها فوق النار تبقي محروقات , والحكومة مفروض تعمل مؤتمر لتعريف
    المحروقات ( واهو بالمرة المؤتمر يسترزقو منو ناس ) قبل كمان يجونا
    ناس النفايات برسوم جديدة باعتبار انها محروقات !!

    1. كل شئ عاوزين يشيلو منه قروش راح يسموه محروقات ان شاء الله برسيم زاتو (محروق من زرعة برسيم)

  20. في النهاية لم نعرف حلة البروف جواها شنو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: