آهـ يا مراااارتي

ما زلنا في جمعية (مستغرشون) نعاني إستغراشاً يومياً بسبب ما يتداعى إلينا من تصريحات المسؤولين .. وخلافاً لأي خبر أو تصريح (مستغرش) كنا قد أوردناه سابقاً فإن جمعية مستغرشون تنصح القارئ الكريم قبل أن يقوم بقراءة الخبر (الجاي ده) بعمل كافة التحوطات الصحية خاصة ناس القلب والضغط والسكري وإلا فإن الجمعية غير مسؤولة عن أي مضاعفات أو أي حالات وفاة تحدث لأن كل التصريحات الفاتت دي كوم والتصريح ده (كوم تاني براااهو) !
الخبر ورد قبل عدة أيام على هذه الصحيفة (الخرطوم) بعنوان: البرلمان: نسبة الفساد بالبلاد لا تذكر مقارنة ببلدان اخري ويقول الخبر (اكد رئيس اللجنة الاقتصادية و المالية بالبرلمان د. عمر محمد الامين ان نسبة الفساد بالسودان لا تتجاوز ال 1% ، و قال ان تلك النسبة مقارنة بالفساد الموجود في الدول الاخري لا تعني شيئا) !
تنبيه : بعد قراءتك للخبر إن أحسست بأي أعراض رغم تناولك الدواء فواحدة من إتنين (يا الدواء ضارب ومغشوش أو أن الخبر من فصيلة الأخبار الإستغراشية البتلحق أمات طه)
معظمنا أيها السيدات والسادة يعلم بأن النسبة المئوية هي طريقة للتعبير عن عدد على شكل كسر من 100 (مقامه يساوي 100) ويرمز للنسبة المئوية عادة بعلامة النسبة المئوية “%” .
نعم (البيه) الدكتور وفي ظل هذا الفساد (غير الخجول) الضارب بأطنابه والذي سارت بذكره (الكسرات) والركبان يقرر أن النسبة (لا تتجاوز) الواحد في المية !! (ياااخ قول ليك كلام تاني) فما ضعضع الحالة المالية للدولة وجعلها تقف هذا الموقف (المنهار) إلا إستباحة المال العام بهذه الصورة المأساوية والتراخي المفرط في محاسبة الفاسدين (بدليل آلولو الفي تحت المقال دي) !
كان من الممكن أن يكون تصريح الأخ الدكتور (مبلوعاً) ومهضوماً وحقيقياً لو أنه صرح بان نسبة قضايا الفساد التي تمت محاكمتها لا تتجاوز الواحد % (ودي ذاااتا كتيره) ، ولكن الأخ الدكتور (للأسف) يقصد بهذه النسبة حالات الإعتداء على المال العام (عشان الفساد خشم بيوت) وعلى الرغم من عدم معرفتنا بالطريقة التي تم له بها إستخلاص هذه النسبة دعونا نقول أنها تمت بحساب (الأموال المعتدى عليها) مقسومة على ميزانية الدولة (5.7 ) مليار دولار (مضروباً في 100) ، فهل يعلم الدكتور بان قيمة كفالة المتهمين (كفالة بس) في فساد شركة الٌأقطان (وحدها) يساوى 89 مليار جنيه سوداني ؟ طيب شوف لينا يا دكتور الـ 89 مليار دي بتعمل كم في المية؟ (دي كفالة بس .. خليك من حجم الفساد الفعلي) !
وطالما القصة جابت ليها (نسب مئوية) هل يعلم الدكتور بأن حجم الاعتداء علي المال العام بولاية سنار بلغ 318 مليون جنيه و314 جنيها، من جملة ميزانية الولاية للعام 2013م والتي لاتقل عن 600 مليون جنيه (يعني بنسبة فساد بلغت 52.3 % ) فهل يعقل أن يكون حجم الفساد المالي في ولاية واحدة 52.3% بينما الفساد في كل ولايات السودان لا يتجاوز الـ 1% ؟؟ (بالعقل كده لو فضل لينا فيها عقل) !
هذان مثالان فقط لمئات الأمثلة التي تم فيها إستباحة المال العام بشكل صارخ (وعيني عينك) لا نريد أن نوردها هنا لأنو (الناس ملت الكلام ده ) وملت (الكسرات ذااااتا) لأنو الفساد (أبو 1%) ده أصبح على قفا من يشيل وما عاوز ليهو دليل حتى أنه من فرط إنتشاره طال مؤسسات لها قدسيتها كالأوقاف والزكاة والحج والعمرة لكن يبقى التساؤل مشرعاً هل السيد رئيس اللجنة الاقتصادية و المالية بالبرلمان د. عمر محمد الامين هو (جاد) في ما يقول وللا يكون (بهظر سااي)؟
العبدلله عن ذات نفسو يعتبر (الأخ الدكتور) للأسف الأسيف (جادي في كلامو) بدليل إنو كمان (قاعد يقارن) بقوله بأن تلك النسبة لا تعني شيئاً مقارنة بالفساد الموجود في الدول الأخرى وأجده صادقاً في مقارنته هذه لو أنه قد قصد بالـ (دول الأخرى) تلك الدول التي تأتي بعدنا متذيلة تقرير منظمات الشفافية العالمية.
عزيزي القارئ :
لا زال بعض الإخوة المسؤولين في البرلمان يصدقون ويتحرون الصدق حتي يكتبوا عند الله صادقين .. فها هو السيد رئيس اللجنة الاقتصادية و المالية بالبرلمان د. عمر محمد الامين يقول لكم بان نسبة الفساد بالسودان لا تتجاوز ال 1% .. يعني بالعربي كده بيقول ليكم أيها الشعب السوداني الفضل (الفساد في حكم اللا موجود) .. أها (في زول عندو كلام) !!

كسرة :
آه يا مراااارتي !! .. هاتو الحبوب يا أولاد ……

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

20 تعليق

  1. مستغرش رقم واحد

    1. طواااااااااالي انتو الاتنين كده ؟ انتو رادفين بعض ؟

      1. هييييييييييييييييييييييييييييي

  2. الناس ديل يا متخلفين يا مجانين .. يا اخي لو سكتوا مالو .. احنا الفينا مكفبنا .. وانت في دة ولا مصطفي عثمان قال في رده علي رفع الدعم.. الشعب السوداني اتعود علي الرفاهية وبقي فطامه صعب .. الفطامنا صعب نحنا ولا هو اللاصق في الحكومة من 89 وقدر ما الجماعة دفروا عشان يرجع يشوف لي شغلة لكن لصق جنب القصر لمن خلقوا لي منصب وزير في الاستثمار وهاك يا سفريات في الفيش ومافيش ..قال رفاهية قال ..اللهم ان سلطت علينا الاغبياء فاجعلهم ينكتمون…

  3. منو يحاسب منو
    بتتذكر أفلام ديجانقو
    تطلع مسدسك اطلع مسدسي

  4. هو بالله نحنا عندنا لجنة اقتصادية ومالية !؟ سمح مالنا كده ؟
    هسي بالله رفع الدعم داير ليهو وزير مالية ولآ لجنة اقتصادية ؟ ولآ داير ليهو حكومة من أساسو ؟
    هو ذااااتو بلد نص ايراداتا مجنّبة نسبة شنو كمان ؟ الوراهو الدخل الحقيقي منو شان يقدر يطلع عليهو نسبة ؟
    هييييي الزول ده بجلطني انا ما داير معاكم …

  5. طيب أها قولوا لينا قروش رفع الدعم دي حاتمشي ويييين ؟؟؟؟ وهو دعم شنو القاعدين يسوهو ما زيتنا في بيتنا ما جايبين شئ من بره !!! كدي فهموني أنا زاااتي ما فاااهم يا بروف ويا جنوبي ما قلت ليكم أنا بلييييد في الحسااااب ؟؟؟ الله لينا من ديلا …

    1. يعني نحنا عرفنا القبليها مشت وين ؟

    2. اووووووووووول انتي على قول عادل امام والله عايشين كوميديا سودااااااااااااااااااااااااااااء الله لك يا بلدي

  6. سلام ، والله يا بروف كنت عاوزة ارشح ليك التصريح ده بالذات لمستغرشون لكن سبقتني. غايتو عشان أكون الأولى باقتراح تكوين جمعية مرضى أنفقاع المراره و جمعية أصدقاء مرضى أنفقاع المراره ( على وزن ناس الكلي) عشان شكلو المواضيع دي حتطول و المرض ح يعشش فينا و ما حنقدر كل مرة نمشي المستشفى مع مستشفياتم المتكتل دي ، أخير ناسس مراكزنا برانا وأنا حالم ليك القروش من اشتراكات الجمعية، كل ما واحد يقرأ خبر حنزيد مريض وكل ما نزيد مريض ندفعو وكل ما ندفعو حيقرا خبر و كدة لحد ما نبني مراكز يستغرشون لمرضي الانف قاع المراري. رأيك شنو؟

    1. تطير عيشتنا نحنا !! للحكومة ندفع , نجيكم بررررضو ندفع !؟
      يا بت هييييي انتي من حبك للقروش مؤهلة تكوني مؤتمر وطني ( من بكره * الصُمح * تربطي شعرك وتقيفي قدام المراية ساعة تشني فيها نفسك وتمشي عليهم ) وتعيشي في سبات ونبات وتلمي يورو ودولارات وريالات …

      1. يا جنوبي ياخوي أنتو ما بقيتو مارقين ، الفصاحة البتتفاصحوها دي ما فصاحة ناس قاعدين في الخرتوم ، أخير ناكلكم إحنا بدل يأكلوكم ناس جهاز النصابين داك.والله لكن ساعة بس قدام المرايا لشناتم ما بتكفي ، إها الحقد الجواهم ده دائر ليه كم ساعة كمان؟

  7. اسال الله ان يرينا فيه ما نحب فى سمعه وبصره وكافة اعضائه ,,,,

  8. كدى يابروف ورينا الماتفقع عندنا شنو رفع الدعم رفع
    الضغط والكلسترول الله ينتقم منهم واحد واحد ويفقع
    مرارتهم غايتو كان قعدو اكتر من كدى اكيد ماحيفضل ولا واحد من الشعب السودانى الفضل

  9. ياخوانا ديل لابستحو ولابخافو من رب العالمين يقولو
    الكذبة ويصدقوها وكمان بستخفو بعقل الشعب
    السودانى ماعارفين انه شعب معلم وفاهم واعى

    1. والله معاك حق واعي وفاهم وفاهم واصلوا ما بنسي

      1. بس معترس ما داير ينزل الشارع وهي كاتمه والله كتمت

  10. فقع المرارة هين ما انفقعت من زمان المشكلة في البرج دلوقت مش البرج الوقع هع كع كرع

  11. يا سادتي الدكتور يفصد الواحد% من فيمة المأكول عالمياً.. ممكن تكون معقولة مش كدا؟ خاصة لو وضعنا في الحسبان قيمة جنيهنا!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: