أفطمونا

في وقت أصبحت الهموم والمعاناة والضيق تجري منا مجرى الدم (لو كان فضل فينا دم) وعلى الرغم من شظف العيش والحياه القاسية التي يكابدها معظم أفراد الشعب السوداني الفضل .. على الرغم من كل ذلك يخرج علينا بعض الساده المسؤلين أطال الله بقاءهم أكتر من كده (علشان يطلعو عين الخلفونا) بتصريحات ما أنزل الله بها من سلطان تتعدي مرحلة (الإستغراش) إلى مرحلة (الإستفشاش) والذي هو نوع من إصابة الفشفاش بالتمزق الميترالي المزمن !
أنظروا سادتي ونحن نعيش في هذه الأيام الحوالك نشكي من سوء الحال والخوف من المآل
وما يحيق بنا من مسغبة و فقر و(فلس) لا يبارح جيوبنا أنظروا ما صرح به السيد مصطفى عثمان إسماعيل وزير الإستثمار (حيث لا إستثمار) قال لا فض فوه وهو يتحدث عن قرار رفع الدعم عن السلع الأساسية المرتقب (الشعب السوداني تعود على الرخاء ويصعب عليه الفطام منه) !!
بعد قراءتي للتصريح وضعت نظارة القراءة على (منضدة المامبو) التي أمامي وتفرست في مياه (المسبح) الزرقاء وانا أرتشف من كوب (الكباتشينو) وأمسك بـ(السيكارالكوبي) بعد أن أخذت جرعة من عصير البرتقال قائلاً لنفسي :
– بالله الوزير ده مش بيبالغ ؟ يفطموا لينا شنو ؟ هسه (الرخاء ده وينو) ؟ حاسدنا على شوية النعمة دي !
قمت بأخذ (غطسة) في المسبح وخرجت وأنا أصيح للمدلك طالباً منه الحضور فوراً لعمل حصة (المساج) الصباحية قبل أن أرتدي بدلتي متوجهاً إلى العمل .
وأنا في طريقي إلى العمل طلبت من السائق أن (يغشى) جارنا (عباس سخانة) وبعد التحية والسلام سألته إن كان سوف يتنازل عن بعض الرفاهية التى يعيشها هو وأطفاله الخمسة وزوجته ..
– يا أستاذ والله ناس الحكومة ديل حاسدننا الظاهر على شوية النعمة دي .. شنو يعني لما المواطن مننا يفطر ليهو بشوية شوربة مع سلطة خضروات معاها كم قطعة جبنه (فلمنك) وسمكة سمكتين مقليات؟ (مواصلاً) أنا غايتو يا أستاذ ممكن (أخفض) ليهم في وجبة العشاء شوية يعني ممكن أبطل (أفخاذ الدجاج) المشوي وآخد بدلاً عنهم (ريشة ريشتين (كستليتة ضأن) وقطعة سمك مقلي وكمان (أبطل) ليهم (الفيليه المشوي) خالص عشان قالوا بيزيد نسبة الكلسترول .. لكن على بالطلاق تاني كل حاجه في مكانا .. الغداء كباب و كفتة وسكالوب بانيه وشيش طاووق، والتحليه كريم شانتيه مع شوية لوز وحبه مكسرات !! (مواصلاً) الجماعة ديل عاوزين (يفطمونا) أصلو وللا شنو؟
– طيب يا عوض والإجازات !
– لا .. لا .. لا كل شئ ولا الإجازات دي أنا ليا خمسة وعشرين سنة كل إجازه قاعد أسوق الأولاد منتجع (لوكابرون) في السويد يعني الوزير ده عاوزني أبقي زي باقي المواطنين الكحيانين وأصيف في (موناكو) !
– طين هسه باقي ليك يا عوض إنتو المواطنين ديل الحكومة ح تقدر تفطمكم وتقلل من الرفاهية و(النغنغة) العايشين فيها دي شوية؟
– والله بيني وبينك نحنا شعب (منغنغ) شوية .. ممكن يعملوا لينا شوية (فطمة) .. يعني الواحد تاني بدل ما يقري أولادو في مدرسة فرنسية فيها داخليات يقريهم مثلاً في مدرسة إنجليزية فيها (ترحيل) ويوفر (فرق السعر) وحق الداخلية و(الوجبات) وكده وبدل ما يقضي هو وأولادو الإجازاه في أوروبا الغالية دي يغيروا شوية ويمشوا يقضوها في أمريكا اللاتينية عشان رخيصة والإجازات فيها ما مكلفة !
(مواصلاً) وإنتا يا استاذ ح تخفض المنصرفات كيف؟
– والله يا عوض أنا عن نفسي ح أوقف (الكافيار) وأقلل الكاباتشينو وأبطل (المساج) !

كسرة :
يا جماعة الخير (أفطمونا) أقصد أرحمونا .. وخلونا في حالنا .. برضو الرحمة حلوه !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

50 تعليق

  1. مستغرش رقم واحد

    1. صحي ناس العالم الاول انتو !! بس تفلح لينا في البرنجيه أها انشاء الله خلّصت واطاتك ديك ؟

      1. هو كان بقى مستغرش لو كان خلص واطاتو؟؟؟

      2. واطاتي أصبحت في السودان
        توبه يا حبوبه

      3. واطاطه ما بتخلص كان ما شال البرنجي دا واداهو ناس الاراضي مع شوية مسحه للشنب وليك امان الله يمسحو ليهو في هناي النور داك الفي كافوري

  2. طيب مستفشش رقم واحد

    1. فلم كابوي من الغرب (الامريكي)

  3. مصطفي عثمان ( رخي الله جُضمه ) ده لو ما كان مكلّف يجيب لينا المستثمرين البعيشونا في رفاهية كان قال شنو ؟
    اوتذكر إذ سيارتك كريسيدا .. وشرابك من موية الزير
    فسبحان الذي اركبك اللاندكروزر وجعلك في كل البلاد تطير
    هو اشمعنا قال الفطام يعني !؟ آآآآآآآآآآ هو صحي ما الطفل الهناي …

    1. لو رخاهن اكثر من كده يبقى وووووووووووووووولف

  4. مقهورين وساكتين | رد

    ساكتون وفي القلب مرارات
    حانقون على كل القرارات
    مجرمون ينطقون الافك وانا
    بعد ذا نمﻷ الكون بهاتيك العبارات
    ثائرون في بيوت في قﻻع من زمرد
    لن نخيط الفجر عرسا بل بل سنبقى ترهات
    اخرجوا للشارع العام للميادين للوزارات
    وقولوا كلمة الحق وﻻ تخشو من الموت سكرات
    هائمون ﻻندري متى تسقط فينا دولة التبذير هذي
    ﻻ متى يحصل منهم في السياسات ابتكارات الجدارات
    اسكريني يا قرارات اﻷلم اسكتيني بين اشﻻء الندم
    كلنا شعب يسافر ثم ﻻيبقى اﻻ مﻻئييين القرارات
    _______________
    شعر خاص بفقع المرارة والتصريحات اﻻستغراشية اﻻ ستفشاشية
    شكرى شكرا ﻻ داعي للتصفيق
    بالمناسبة وللتذكير بافعال الحكومة
    تدميرالتعليم الصحة المواصﻻت الوظائف المرتبات الجنيه السوداني الشباب السوداني
    انتشار البطالة والعطالة والمخدرات
    قلة الوعي الديني
    كثرة الزواج والطﻻق
    اندﻻع المزيد من الحروبات
    انفصال جنوب السودان
    انتشار العصابات في وضح النهار
    انعدام اﻻمان ممن هم اهل له
    و و و
    الباقي قولوه انتو فترت من الكتابة

    1. الباقي قولوه انتو فترت من الكتابه
      رئيس كضاب يرمي الكضبه دُرابه
      وزير فاشل وديمه ارقامه كضابه
      جونا بلدنا بي خيرا وصبحت كنها خرابه
      اغاثة في لمحه مسروقه قبل نعرف منو الجابا
      بقت عيشتنا يا يابا عيشة التابا واليابا

      1. مقهورين وساكتين

        تسلم اﻻيادي جنوبي

    2. مقهورين وساكتين وغلبانين

      1. شديييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييد

  5. ذكرتني كدي بالرخاء ، انا غايتو متذكككرة زماااااااان قبل سنة ٨٩، قالوا جوا ينقذونا من الحالة الصعبة الكنائس فيها!!!!!تارينا كنا في رخاء يا جدعان و إحنا ما عارفين!محن!

    1. رحم الله ابو امنة حامد

  6. الكنا فيها،،. هوووووي ما تتشبكوا. فيني ما كنائس ، ده الكيبورد

    1. ههههههههه
      الكيبورد الباطن ؟

      1. جنوبي هييييي عرفتك حتنط انت . مسئول من الخير ، أنتو مش انفصلتو؟

      2. هههه ننفصل كيييف ؟
        لسه بيناتنا الحرابه والحدووووووود
        أبيي وهجليج والجدود
        ومجري بترولنا القيافه
        يعدي بالخرطوم يفوت
        وابكي بالحسرة واموت

      3. أخوي جنوبي. تموت ليه. يموتوا الناس. ود الدابي و الجرقاس. تفوت تمشي و تسيبا كدة. يبرطعوا فيها بالعكاز؟. وحاة الله الخلقت الناس. بلدنا عزيزة ما بتنداس. بنحيا و فيها ما بنفوت أكان شاتونا بالرصاص. بنرقد فوق ترابا خفاااااف نضم الايد و نبوس الرأس

      4. ابوس راسك يا جنوبى على روعة النظم ,,,

      5. تسلم شمباتي يا حبيب ..
        الليله دقيت علي عباس ركس وسيتم التسيق مع بقية الشباب
        وما تخاف حنخليلك حضور عبر الهاتف ..

      6. دستوركم انتو الاثنين

  7. برز مصطفي يصرح عن الرفاهية التي عاش فيها السودانيون عن اي سودانيون تتحدث، يامصطفي كده ساي من غير رسميات؟
    اللهم الا اذا كان هناك شعب اخر سوداني غيرنا في كوكب اخر ام ان الذي صرح ليس منا نعم هو ليس بسوداني ولايعيش في السودان ولا يمت لنا بصلة! رفاهية في عينك يامصطفي!ورينا شي واحد من الرفاهية.. موية الفول رفاهية، موية الجبنة رفاهية، الموقف البعيد رفاهية،نص ربع الكيلو لحمة رفاهية،البيبسي العائلي البي خمسمية في كباية رفاهية،الخدمة الوطنية رفاهية، القروش البندفعها ساي رجالة رفاهية، السوق،الشهدا،السوق الشعبي ،المينا البري ،المطار الحار،المستشفيات الدخولها بقروش رفاهية، الدافوري في التراب رفاهية، شهادة الجامعه مع سواقة الركشة رفاهية، الامجاد والهايس والقريس مع ايصالات الحركة رفاهية، الكمساري المسكين رفاهية،المدرسة الرسوم الامتحاناتا بندفعها نحن رفاهية ، الجامعه الرسوم تسجيلها بتزيد كل سنة رفاهية، قروش الموية اللو مادفعتها مابتقدر تشتري كهربا رفاهية، متوسط اجور العاملين الماتامي 300 جنيه رفاهية ، متوسط اجور الموظفين الكبار
    والصغار الماتامي 700 جنيه رفاهية ،سخانة سعار الاكل والشراب وكيلو الطماطم بي 20جنيه رفاهية، (اللهم اغفر لنا ان نسينا او اخطأنا)
    خلاص اشنقونا اعدمونا اي شئ الا رفاهية ورخاء..

  8. يازول انت لسع بتتكلم عن الانفصال ؟؟ انت دقه قديمه خلاص !! الناس مرطبه في كافوري !! اصحي يا الاخو ..

    1. الغرب انفصل والا شنو انا خارج الشبكة بظهر

  9. والله يا شباب انا ممتنع عن التعليق لعدم تمكني من إيجاد كلمات مؤدبة يمكن بها وصف هذا التصريح وصاحبه !!!!!!

    1. والله الليلة فرمتونا فرم..

  10. هووووي يا جنوبي أحسن لييييك أرعا بي قيدك ما تدخل في خطوطنا الحمرا !! هسع مالك بي بتي NUNA دي ؟؟ خليك في حدودك وأعمل بي مقولة ( يا غريب خليك أديب ) ولا بعمل ليك خروووووج نهائي !! أما زير التيبار (أقصد وزير الإستثمار) هو فضل في للبلد حاجة يستثمروا فيها ؟؟ يا ناس يا وهم ما تخلونا في حالنا أرحموا من في الأرض يرحمكم من في السماء …

    1. تبيت في الخلا !
      انتو بي طاري الخلا ده , ود الخلا وينو ؟

      1. اوعي يكون جانا هنا كان جا هنا معناها لحق امات طه

  11. لو اتسهلت كسرة وزير المالية بي طماطم وموية (ما عكرانه) يعني مش من صهاريج الحكومة من بير السكر الزمان وشوية ملح والزيت ان شاء الله طاير تكون بايضه لينا في قفص

  12. آآآآآآآآآآناس كتمت

  13. ياربى دينا ودينهم واحد !!؟
    افتونى عشان ما اخلبت ساى !!

    1. يا أخي ان الدين عند الله الإسلام .. بس في حاجة عايز أقولها ليك : هؤلاء القوم ابعد ما يكونوا عن الإسلام ..

      1. امريكى…
        ياخ انا عارفو الاسلام ! لكن بسال عن دينهم هل هو الاسلام ؟؟
        جنوبى….
        اممممم , جزاك الله خيرا على الاجابة الشافية , يعنى اقوم عليهم بى نمرة اربعة ؟؟

      2. افطومونا .. فشت غبينتنا ( بالسعالات والجوابات ) .. تعالوا نتلاقي في الشارع !!

    2. مااااااااا واحد عشان ما تخلبت ساي ..

    3. لا بختتلف لهم دين ولنا دين شكلا بدايته واحدة بس لو غرقت لي جوه دينك بختلف عن دينهم دينهم ميكيافلية زي الكتاب الاخضر بتاع عمك الكابو من بره اخضر ومن جوه احمر ودينك يا خوي محمدي

  14. انت يا بروف قصدك متفشفش من فشفاش ولا قصدك من فيش اند جيبس وعاوزين الشعب الفضل يخلي اكل الفيش ويأكل بس جيبس،
    والله حاجه تحير فعلا وتخلينا نطفطم

  15. هههه غايتو انا من فتره مفطوم تماما عن تعاطي اكل اللحوم الحمراء والبيضاء والبنيه والطماطم والكوسا وقريبا السكر والكسره “العيش طبعا”
    *اللحوم البنيه دي من فصيله الورل وانت ماشي ااصغر لحدي الفار ويدخل في التصنيف الجراد
    واعلن ربط الفطام قصدي الحزام لترقيع الموازنه (الميزانيه مصلحتك اوولا)

    والله ياهؤلاء الشعب دي تاني الا يتفطم من الفول والعدس
    كسره.. قريبا حتفطم عن المواصلات كداري بس ياصحبي

      1. علي قولتك ياغلبان كتمت كتمت

  16. شهدت الفترة السابقة تصريحات غير مسئوله من اشخاص غير مسئولين متفوهين بترهات القول وأضمرو سوء النية للشعب السوداني الفضل وكانت هذه التصريحات سوادا للسواد الأعظم من الشعب الفضل، حيث شكلت وجدان الشعب في الفترة الأخيرة وشغلت بها الحيكومة الناس تماما فكانت آذان الشعب ملاذا لسوءات أقوالهم، وعبرت عن معاني التصغير والإستذلال الملئ بالإثارة والبلبلة والتهكم علي بساطة المواطن المغلوب عليه ظلماً والمطلي بلون عذاب الدنيا فكم من غير مسئول اطلق عبارات ذادت حياة الناس كدرا وطينا فكل من سولت له نفسه ان يصرح يكن الإستغراب، فهذا أمر طبيعي لفقدان السيطرة والتحطم، فتسيطر الحيكومة وتستخف وتاكل حلاوة كمان بعقول الشعب بتصريحات هوجاء شتراء لطالما حركت فينا الإستغراش والإستفشاش وفقع وطرشقة المرارة، فمتي تتوقف وإلي اين مصيرنا ياتري.
    مافي فايدة تصرحو ماتصرحو مافي فايدة العايزنو بتعملو فينا فأحسن تعملو من سكات طالما كل يوم الواحد يصحي وياخد المعلوم من التصريحات، اقترح علي شركات الإتصال أن يقومو بإدخال تصاريح المامسئولين ضمن أغاني ومدايح خدمة لحنا علي طريقة (أضغط نجمة وشيل التصريح).

  17. والله يا الفاتح الكلام البتكتب فوقو دا بتاع وضعت النظارة في منضدة… ( مابعرفا ) وارتشفت من كوب … ( غلبني اقراهو ) … والفطور والغدا والعشا الاسماء بتاعت الوجبات دي اول مرة اسمع بيها شكلك منغنغ شويا زيادة مننا لأنو الكلام صعب شوية الزول يحفظو كما طبقو عديل كدا

    1. الكلام ده اسبيرات عدييييييييييييييل ما هو اكل

  18. يفطمونا تاني من شنو كتمتكتمت كتمت

  19. انت الكتبتو دا بي ياتو لغة وما هو معني كبتشينو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: