تفتيش موبايلات

اليوم عزيزي القارئ ننتقل من التحدث عن حالات (الإستغراش القولي) وهو ما يصدر من تصريحات وأقوال تصيب المواطن باللإستغراش إلى نوع آخر من حالات الإستغراش وهو (الإستغراش الفعلي) وهو ما يحدث من أفعال تثير فينا تلك الحالة إياها من الإستغراش .
لقد تابعت وتابع معي الكثير من القراء قصة ذلك الطالب الجامعي الذي كان يقوم بحضور محاكمة الفتاة التي تم إتهامها بدخول مكاتب حكومية بملابس (قدرت الشرطة) أنها لا تليق وبناءاً على ذلك فتح بلاغ جنائي في مواجهتها وتحويلها للمحكمة التي أعتقد أنها لم تصدر حكمها حتى الآن .
نعود إلى قصة ولدنا (الطالب) الذي كان حضوراً لإحدي جلسات تلك المحاكمة وضبطته شرطة المحكمة وهو يقوم بتصوير الجلسة من خلال هاتفه الجوال وحيث أن المحاكم مكاناً يشترط فيه الانضباط والاحترام، ويتعين على مرتاديها الالتزام بقواعد السلوك والآداب داخل نطاقها ولما كان العرف السائد بالمحاكم يمنع التصوير أو أجهزة التسجيل داخل قاعة المحكمة (ما لم يأذن بذلك من الجهات المختصة) فقد تمت إدانته على فعله هذا ! (ولحدت كده كويسين) !
لم تكتف الشرطة بذلك بل قامت بتفتيش هاتفه على الرغم من أن كافة القوانين (الأرضية) تنص على عدم جواز التفتيش إلا للبحث عن الأشياء الخاصة بالجريمة الجاري جمع المعلومات عنها في حال التحقق منها !! (يعني مفروض ناس الشرطة يتأكدوا بس من وجود المقاطع التي صورها الطالب داخل المحكمة) لكن (الحصل) إنو (فلفلو الهاتف) وقالوا أنهم وجدوا صور (خليعة) به وتم بناء على ذلك إدانته وتنفيذ عقوبة (الجلد) عليه على الرغم من أن تفتيش هاتف المتهم الشخصي في غير الحالات (المصرح بها) يعتبر انتهاكاً صريحاً لخصوصية الشخص واطلاعاً على أسراره (و ده شرعاً لا يجوز خليك من القانون) !
العبدلله ليس قانونياً ومعرفته بالقانون أقل كثيرا عن معرفته باللغة الطاجكستانية ولكنه يعتقد أن كل ما يخالف المنطق والعقل يخالف القانون بالضرورة ، وقد كانت الضرورة التي دعت لكتابة هذا المقال هي (حكاية) إنتشار حالات تفتيش (هواتف) المواطنين عن طريق الشرطة عندما تقوم الشرطة بتوقيفهم على ذمة بعض القضايا .. وطواااالي (جيب موبايلك يا زول) .. ويشيلو الموبايل وهاك (يا فرجة وفلفة ويا بحث) مع إنو من الممكن إنو تكون عندك صور أو مقاطع عائلية خاصة جداً ولا تود لأحد الإطلاع عليها والغريب في الأمر أنه في حالة أي مواد يشتبه بأنها غير لائقة تتم إضافتها إلى ملف القضية (الأساسية) ويكون عندك بلاغين بدل بلاغ واحد !!
للكاتب المصري عمر عفيفي (وهو عقيد سابق بالشرطة المصرية) كتاب بعنوان (عشان ما تنضربش على قفاك ) وقد قام بكتابته من أجل توعية المواطنين بحدود تعاملات رجال الشرطة مع المواطنين إذ أن الكثير من (رجال الشرطة) في عالمنا (الثالث) هذا يبدو أنهم (شغالين جربندية) ساكت دون إتباع قانون أو (يحزنون) وقد ساعدهم في ذلك (الأمية القانونية) لدي المواطن وإعتقاده (الما في محلو) بأن كل ما يفعله رجل الشرطة هو سليم ميه في المية !
نحن (المواطنون) في حاجة ماسة لمعرفة كيفية التعامل مع الشرطة حينما تستوقفك .. ومعرفة الحقوق الخاصة بنا لأن ذلك فضلاً عن أنه يحمي المواطن من أي نوع من أنواع الإنتهاكات (والسلبطة) فإنه كذلك يقي المواطنين من عصابات الإبتزاز والنهب التي إنتشرت مؤخراً والتي تحمل (بطاقات) بعض القوات النظامية) وفي بعض الأحيان (زيها الرسمي) !
يا ريت أخواننا (القانونيين) وأخواننا في الشرطة يتبرعوا لينا (بعمود) يشرحوا لينا فيهو متى يجوز تفتيش (هاتف) مواطن موقوف على ذمة جرم معين والإطلاع على محتوياته ومتى (لا يجوز) عشان القصة ما تكون هايصة ساااكت وأي شرطي (يقبض ليهو على مواطن) في تهمة (ما) طوااالي (يشيل موبايلو يفتشو) !
كسرة :
– دائماً ما ينشط القانون لدينا في مسائل الزي الفاضح والصور الخليعة و(الحاجات الميتة) .. الكسرات دي ما شايفنها !!

– كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

40 تعليق

    1. الليلة shadow شايل اسمو وبقي زي ضُلك انتو الاتنين 9.54 .. خلاص العبوا ضربات جزاء !

  1. ده ما الفيل زاتو فى زول بقدر عليهو ؟؟؟؟؟؟

  2. على ما أعتقد أنه عندما بفقد القانون الإحنرام يكون الحل هو الإحنكام للا قانون
    بمعنى آخر أنه عندما بتحول الشرطى إلى رياطى سيربط له المواطن جوار منزله ليلاً

  3. موضوع الليلة ده بقي لي زي القام لي دقن !!
    الولد غلطان وبرررضو الشرطي غلطان !!
    يعني نحنا المغتربين ديل نمسح صور حريمنا من جوالاتنا ؟ وتبقي علينا غُربه وكُربه .. لا لا نمسحن ونحا ماشين في المطار في المطار ! طيب في الرجعه نرجع بدون صور يعني ؟ دي مصيبة شنو دي ؟ ايواااا نحنا نحفظا في الذاكرة وتخط الذاكرة في جيبنا ونظرة عند اللزوم .
    ولاااااااااا تجسسوا

    1. جوالك أب صور دا تخليهو هنا قبلو , وتشوف ليك 3310 تمشي بيهو السودان ويا دار ما دخلك شر !!!!!!

      1. و أخلي صوري بي قفاي !!؟

      2. يا ركس وثلاثتين عشرة دا يا ولدي يجبيوه من المتحف قول ليهو عديل اشتريهو زي بتاع عمك الغلبان يا دوب يكلمك

  4. إنشاء الله تبقي علي الموبايلات بس ( ما تمشي لي حته تانيه ) !!

    1. اكثر من طليع الزيت يا امريكي

  5. كدي النفلفل الموبايل وما القي لي حاجه كدا ولا كدا وبعدين يلصقوا لينا قضيه مخله بالشرف والأمانة

      1. وريتنا الموبايلات من شارع الكترا والا الجوازات

      2. هااااازول جوازات شنو ؟ أنا بقولك الجرائد ذاتها صادروها .. تأني باقيلك بنعرف اخبار التفتيش ؟؟

    1. مالك انت كما آآآآآآآآآآآآلعبيد بتفلفل موبايلك رز والا شنو

      1. والله ياحبة أنا خارج الشبكة .. أنا موبايلي iPhone 5 رئيسك زاتو مابعرف يشغلو ..

  6. هههههههههه
    قالوا الرئيس امر بجلد جميع افراد الشعب ثلاث جلدات….تاني يوم كل مراكز الشرطة امتلئت بالمواطنين والذحمة حصلت….الرئيس جا مارى وسال: الناس مذدحمة في شنو؟ الجماعة قالوا ليه الناس بتنفذ في اوامرك بتاعة الجلد امس. يا سعادتك. اندهش الرئيس وقال: الناس دى جنت ولا شنو؟ الايام ما راقدة ما يجو بكرة او بعد بكرة؟ الجماعة قالوا ليه : الناس خايفة تحصل زيادة.

    1. يحز في نفسي اننا بعيدين عن الوطن والناس بتنجلد جلد بالصح بدلنا

    2. والله برضو فهم من الجماعة – لانو قبل كدى سيادتو سأل المواطنين فى لقاء جماهيرى كدة: اها يا اخوانا عاملين شنو مع رفع الدعم و الزيادات دى؟ الشعب رد: و الله يا ريس سافين التراب عدييييل كدة.. و على الفور امر سيادتو بزيادة سعر التراب !!!

      1. قوية آآآآآفلادمير وبالمناسبة دي قوية تم اعتقالها والا ايه

    3. قبلها آآآآآآآآآآآآلعبيد كنا مجلودين ساكت من غير امر رئيس هسع جانا امر الرئيس الجلد كثر علينا ياااااااااااااخ

  7. الهندوي عتال الميناء القبضو وهو خارج لانو شائل حقة صاعود صبيحة اليوم الذي سرق فيه قندران من الميناء وقال للحرس بعفوية اهل الشرق قندران ما تشوفي حقة تشوفي
    دحن يا ناس الانقاذ الواوات دي والاقطان ودولارات بنك السودان ووووووما تشوفي صورة في موبايل تشوفي

  8. الاخوة الاحباب . سلام .
    والله أنا فى رائي كل شاب أو شابة يلقوه ما ماشى عديل فى الشارع دة يشيلو موبايلو يفتشوة ودى زكرتنى قانون المرور لو عملت ليك حادث وكنت أنت غلطان يفتشو عربيتك لو لقوها ناقصة طفاية ولا إشارة يدفعوك مخالفة .
    ياجنوبى إنت ماتخاف طالما ماشى عديل يمكن تملا موبايلك بأى صور أو مقاطع فيديو .

    1. انا مااااااشي عديل يا حنين لاكين يمكن عديل ما يمشي انا !! اها اسوي شنو ؟

      1. دا كلام شنو اجنوبي سوي باكستاني انت مافي معلوم

    2. يوم داك فى مول الواحة و فى ركن المطاعم (شوف اضانى و سمع عينى) مجموعة من البنيات و تلفوناتن كلها ياها البيسموها (الهواتف الذكية) و قاعدات يتبادلن فى مقاطع الفيديو و المقاطع الصوتية و الله لا يوريكم و لا يسمعكم (او حتى يوريكم و يسمعكم) الشفتو و سمعتو من ابتذال و سخف وقلة ادب ,, حتى نحنا الشباب (مرات) بنخجل نتشاركا مع بعض ,,, و جنس ديل هن زاااتن البيخلن ناس النظام العام و غيرهم يستأسدوا علينا !!!

      1. آآآآجنوبي الخرطوم فيهو مولات ؟اطرشنا ازول

  9. حنين سلام:انتي جادة ولا بتستهزئ؟ قصدك شنو بي ما ما شين عديل يفتحوا موبايلاتم؟ و دخل المشي في الموائل شنو$ كدة نفتح باب للغاشي و الخاشي يساأل أي زول أي حاجة’ و المشي ألما عدل ذاااااتو خشم بيوت و فيهو قولان و ممكن يكون في تصفية حسابات. و على إيه دا كلو
    ؟ إنشاء الله يشموا مكلوجين علينا بعدم خدش الحياء العام و دا ذااااتو ما خالنو في حاول.

    1. صحي دخل المشي بالموبايل شنو ؟ ان موبايلي ده عمره كوولو يقول لي
      جاري الاتصال يوم واااحد ما قال لي ماشي الاتصال !!
      هو عليكي الله قعادم في الحكم ده ذاااتو ما خدش للحياء العام ! نا كان
      منهم كل ما اجي ماشي اضاريني كده من الناس .

      1. انتو صحى هناى داك زاااتو ما مشيو مكجول ,, فى زول بيسالو من موبايلو و الصور الفيو ؟؟؟

  10. هو يا أستاذ لو لقوك في شارع النيل بتشرب في قهوه بقولوا ليك جيب موبايلك

    1. سلام وتقبلي المرور ومجرد سؤال هو شارع النيل فيه؟

      1. الله ياالغلبان قبل فترة كان في غايتو . مرورك مقبول وبي سعادة كمان

    2. بالجد شكلها كتمت كتمت

      1. هااااااااازول دي ماكتمت دي صفرجت عدييييييل كده… أبشروا …

    3. انا خايف على النيل زاتو الجماعة ديل يشبوهو

  11. انا راجع العصر الحجري حتى موبايل مش عاووز والناس ديل دايل حجارة حجارة حجارة بس بتمرقهم ولو لقت ليها لستك من امه في اكبر تقاطع ياها التمت كتمت كتمت كتمت

  12. كتمت آآآآآآآآآآآآآآآآآناس

  13. مافيش حد رغم وجود النظارة (فهمهم اجنوبي) على الموقع برضه كتمت الحاضر يكلم الغايب كتمت كتمت كتمت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: