حمدان بعد التعديل

تم نشر هذا المقال في : 2 أغسطس 2009م
المطلوب : تعديل الأسعار التي جاءت في الإمتحان (حينها) بما يتناسب والأسعار (الآن) ثم تعديلها مرة أخرى لتتناسب والأسعار (بعد رفع الدعم) ثم الإجابه على الأسئلة علماً بأن مرتب حمدان لم تطرأ عليه أي زيادات منذ ذلك التاريخ

المادة : إمتحان حساب

أجب مستعيناً بالله تعالى على جميع الأسئلة التالية مع تبيين خطوات الحل بوضوح
السؤال الأول :
حمدان يعمل موظفاً يإحدى المصالح الحكومية مرتبه يبلغ 500 ألف جنيه (بالقديم) وهو يعول أسرة مكونة من أربعة ابناء بالإضافة إلى أمهم ويسكن فى بيت إيجار فى منزل صغير بحى شعبى بأطراف المدينة بأجرة شهرية تبلغ 250 ألف جنيه (بالقديم) أحسب كم يتبقى من مرتب حمدان الشهرى بعد خصم قيمة الإيجار
السؤال الثاني:
إذا كان حمدان يركب يوميا مواصلتين كيما يذهب لمكان عملة وكانت هاتان المواصلتان قيمة تذكرة الأولى 350 جنيه (بالقديم) والثانية 500 جنيه (بالقديم) قم بحساب مجموع المبلغ الذى يدفعه حمدان للمواصلات شهريا ذهاباً وعودة ؟! مع مراعاة تقريب الناتج لأقرب عدد صحيح جبراً للخواطر.
السؤال الثالث :
كم يتبقى من راتب حمدان بعد خصم إيجار المنزل وتكلفة المواصلات الشهرية؟!
السؤال الرابع :
إذا علمت أن منزل حمدان لا يحتوى على (أى جهاز كهربائى) وعلى الرغم من ذلك فإن قيمة ما يدفعه شهريا للجمرة الخبيثه (الكهرباء) هو 95 ألف جنيه (بالقديم) كما أن قيمة فاتورة المياة الشهريه هى 13 ألف جنيه (بالقديم) وأن قيمة رسوم (النفايات) الشهريه هى 7 ألف جنيه (بالقديم) فكم يتبقى من راتب (حمدان) بعد خصم قيمة الكهرباء والمياة والنفايات؟!
السؤال الخامس :
يذهب أبناء حمدان الأربعه إلى مدارسهم (كدارى) غير ان كل فرد منهم يأخذ مصروفاً مقدارة 500 جنيه (بالقديم) يكفى لشراء عدد واحد (سندوتش) فول (غير مصلح) : أحسب قيمة ما يدفعه حمدان شهرياً مصروفاً لأبنائه مع الإنتباه لعدم حساب الجمع والعطلات الرسمية ثم أخصم المبلغ مما تبقى له من مرتبه .
ملحوظة :
تم إعفاء أبناء (حمدان) من (الرسوم الدراسية الإجبارية) بعد ما قام بإستخراج (شهادة فقر ومسغبة) من اللجنة الشعبية
السؤال السادس :
لحسن حظ حمدان فجميع أفراد أسرته (نباتيون) لا ياكلون اللحوم بانواعها ولا (الأجبان) ولا يشربون (الألبان) ويحبون الفول (بالزيت) فقط (حباً جما) لدرجه أنهم يتناولونه فى الثلاث وجبات فى شكل سندوتش (عيشه واحده) فى كل وجبه فإذا كانت تكلفة السندوتش الواحد 450 جنية (بالقديم) أحسب قيمة سندوتشات (الوجبات) الشهرية ثم أخصم المبلغ مما تبقى له من مرتبه (إن كان هنالك بقيه)
تنبيه :
حتى لا تخطئ فتفقد درجات السؤال قم بخصم وجبات فطور (الأولاد) – ما عدا الجمع والعطلات الرسمية – مع إضافة مبلغ (ألف جنيه يوميا) بالقديم هى قيمة فطور حمدان بالمصلحة !
السؤال السابع :
لا يقوم أفراد أسرة حمدان (بكى ملابسهم) بل يكتفون بغسلها فقط ويستخدمون (صابون الغسيل) لغسيل الملابس و(الإستحمام معاً) بواقع (لوح صابون) لكل فرد أسبوعياً فإذا كان كل 5 ألواح صابون 2250 جنيه بالقديم أحسب إجمالى قيمة (الصابون) المستهلك شهرياً ثم أخصم المبلغ مما تبقى من مرتب حمدان (إن كانت هنالك بقية)
السؤال الثامن :
لا يتناول افراد اسرة حمدان (الشاى) بل يكتف كل فرد منهم بعدد 2 ملعقة سكر صغيرة فقط فى اليوم (مذابه فى الماء) فإذا كانت معلقة السكر الصغيرة الواحدة تحتوى على 5 جرامات من السكر أحسب كم جراماً من السكر تستهلكة أسرة حمدان شهرياً ثم أخصم القيمة الإجمالية مما تبقى من مرتب حمدان (إن كانت هنالك بقية) علماً بان سعر رطل السكر هو 1000 جنيه بالقديم وأن الرطل يساوى 454.5 جرام
السؤال التاسع:
إذا كان منزل حمدان يتكون من غرفتين ومطبخ ودورة مياه فكم شخصاً ينام في كل غرفة علماً بأنه لا يمكن لأحد أن ينام في فى الحوش نسبه لجحافل جيوش البعوض وعدم وجود ميزانية للعلاج ؟!
السؤال العاشر:
هل تستطيع أن تحسب المتبقي من راتب حمدان للشهر بعد القادم بعد سداد الديون المستحقة لهذا الشهر والشهر الذى يليه إذا أمد الله فى عمره ولم يمت بفقر الدم أو بتصريحات المسؤولين علماً بأن هذا الإختبار قد خلا من أشياء أساسية كثيرة كالعلاج والدواء و(الكساء) و(المواجبات) و(الحياة نفسها)

سؤال اختياري (خمس درجات إضافية) :

أ‌- هل لديك أى إقتراح يقلل من منصرفات حمدان بحذف بعض البنود (البذخية)
ب‌- هل من نصيحة توجهها لحمدان ؟؟!!
كسرة :
كان على الحكومة قبل (رفع الدعم) أن تدلل على محاربتها للفساد وتدي (الكسرات التحت دي) نظرة حتى يطمئن (المواطن) على حرص الحكومة على إسترداد المال العام !! .. لكن يبدو أن (المكتوله ما بتسمع الصائحة) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

58 تعليق

  1. مستغرش رقم واحد

      1. لفة الرأس راحت !! علي الأخ حمدان ان ( يقلل ) يعني مجرد تقليل .. من اكل ال Hot Dog وآل Pizz ..

      2. اين غبت ايها المستغرش سلامااااااااااااااااااااااااات ولسه ما ولعت

  2. علي الأخ حمدان ان ( يقلل ) يعني مجرد تقليل .. من اكل ال Hot Dog وال Pizza .

    1. جزم باليمين تقول لي حمدان hotdog او pizza الا يقول دي اسبيرات ياخ بتبالغ

  3. نسال اللة العون ويولي من يصلح هذا الحال عاجلا غير اجلا…..(دعوت مظلومين وما ادراك بدعوت المظلوم)

    1. يولي من يصلح يا احمد ود المصطفى يعني عارفين الفيل ؟!

  4. وهو حمدان دا ما عامل ميزانيه لأمراض الفشفاش والمراره والأمراض المصاحبه لتلوث البيئة من اسهالات وخلافو
    هو اصلو حمدان دا سوبرمان

    1. حمدان عامل نايم ما ياعهو دا الشارع قدامه واغنية عازة حاضرة

  5. أشهد أن لاإله إلا الله وأشهد أن محمد رسول الله………

    1. جئت بالحق بت مدني عاوزه شارع

  6. ملعقيتن سكر !!
    بذح جد !! عالم ما تختشى ….

    1. في مويه مافي مويه تدفعوا بس ، عنكم ماشربتوا ..

    2. ههههههههههه والله صحي سفييييييه الزول ده ياخي !!! هسي يجيهو سكري يتجهجه ..

      1. هو حمدان دا لسه ما مات آآآآآآآآآآآآجنوبي والله انا قايله لحق امات طه

      2. لا ومذابة فى ماء عذاب زلال !
        الله لا غزا فيهم بركة

      3. يابركة انت .. الله لا قزه فيهم بركة .. تمشي معاي واشنطون نحضر الجمعية .. والله العظيم أنا جااااهز
        تأشيرة ذاتو ماندور .. تذكرة وتيارة عدل ..

      4. يابركة انت ..الله لا قزه فيهم بركة ..تمشو معاي واشنطون نحضرو جمعية بتاع أمم متحدة .. والله أنا جاهز تأشيرة ذاتو ماندور .. نركبو تيارة بس ..

      5. امريكى ….
        هههههههههههههههه,,,
        جنس حركات عليكم !!!
        خلاس نويتوا تغتسوا حجر البتاع دا !! ؟

    3. ملعقتين ونص مربة توت اسود

    4. المشكله ياشمباتى انو ما حجر بيقتس دا هنبوكه هسع يجينا مسطح

      1. هههههه …. طرورة وانتي الصادقه !

      2. تعالوا نكون جمعية ياخوانا ( الطفاشة ) يمتنعون ..

  7. يا بروف بعد ده كله وتستغربوا من ارتفاع معدلات خرج ولم يعد او الانتحار

    1. هاك دي يا عباس خرج وعاد وخرج ولن يعد الغلبان

  8. ج1/ الباقي + 250 جنيه
    ج2/ حمدان مطلوب 37150 جنيه بعد خصم الجمع والسبتات
    ج3/ ماينص 37150 بالقديم
    ج4/ ماينص 152150 لاكين المحيرني حمدان وين لقي نفايات !؟
    ج5/ ماينص 196150 وتم خصم الجمع والسبتات والعيدين وكم يوم كده احتياطي كوارث والسنة الدراسية 8 شهر صافي .
    ج6/ الاولاد 8 وجبات الجمع والسبتات الخصمناهن قبيل بي 3600 والغداء والعشاء حق الاولاد بي 108000 وحمدان ومرته 450×2×3×30= 81000 وفرق فطور حمدان 550×22= 12100 يبقي الاجمالي لحدي هنا حمدان مطلوب 400850 جنيه بالقديم
    ج7/ بما ان افراد العائلة 6 اذن 2250÷5×6×4 أسابيع = 10800 يبقي الاجمالي ماينص 411650 جنيه بالقديم
    ج8/ 2 ملعقه ×6 تنفار× 30 يوم ÷5جرام = 72 جراماذن 1000÷454.5 ×72 = 158 جنيه يبقي الاجمالي ماينص 411808 جنيه بالقديم
    ج9/ كل غرفه تلاتة تنفار وده في صالح حمدان عشان لو لا قدر الله وحصل بي قليبك تقول لي تعال وتعال الشافع النايم معاهم يقول ليهم لا ماااافي مجال .
    ج10/ بعد رفع الدعم ده حسبة ماااافي نتحسبن بس
    ج الاختياري
    أ/ اقترح علي الاخ حمدان انو يشيل الالف والنون من اسمو البزار لزومه شنو حمد ما كفااااااية !
    ب/ النصيحة انو يخلي شغله وكده حيوفر 411808 جنيه بالقديم

    1. تحيتي اخي جنوبي وحساب ابو الكجك دا خليهو

    2. خلينا من الحساب ده من دييييييييييييييييييييك حمدان مطلوب بقي كم

    3. ج9/ كل غرفه تلاتة تنفار وده في صالح حمدان عشان لو لا قدر الله وحصل بي قليبك تقول لي تعال وتعال الشافع النايم معاهم يقول ليهم لا ماااافي مجال .
      هو حمدان ياجنوبي من 2009 ياهوم الاربعه ابناء وهذا دليل قاطع بان حمدان بقى (مابعرفش )على راي عادل امام من سوء التغزيه يعنى ما محتاج لى شافع يقول ليهو لا

      1. يا بت وراق تلاقي صغارو كلهم ماتو من الجوع انا خفت من كده قلت اخير امشي ليبيا كان فيها موته اموت انا شفتي الغلب دا

  9. الحل الوحيد حمدان واسرتو ينتحروا انتحار جماعي
    ويتبعهم الشعب الفضل
    ونجيب مواطنين من مصر الشقيقة علشان يقوموا لينا بالثورة !!!

    1. والا نشوف لينا سيسي او ام سيسي

  10. حاول مراسلتك عل بريدك ولكن ارتد وانت الخسران

  11. والله أنا إستغربت لمن ما شفت إسم جنوبي لحدي الساعة 2 الظهر !! قلت أمكن واحد تاني غيري دق ليهو خروووج نهائي ..

    بعدين ما باااااالغت عدييييل في الجواب التحت دا !! هو عندو نفس كماااان ؟ وجاب ليهو قدرة وهمة من ويييين هو لاقي ياكل ؟؟
    ج9/ كل غرفه تلاتة تنفار وده في صالح حمدان عشان لو لا قدر الله وحصل بي قليبك تقول لي تعال وتعال الشافع النايم معاهم يقول ليهم لا ماااافي مجال .
    الليلة وين بتي نانا ما ظهرت ؟؟ شكلها ما دايرة معاكم لأنها قرفانة من الحاصل ده !! سلااااام …

    1. جنوبي مكنكش وكان دقوا ليهو خروج نهائي برضه برجع

    2. ههههههههههههه,,نان خدو السادة النارو وقادة يعمل ليهو شنوووووو !!؟

      1. بعمل ليهو صُفره وخضره زرقه وحُمره حلوة ونضرة وزفة ألوان

    3. سلام شباب
      شكرًا على سؤالك أخي نانو،(بالمناسبة اسمي نونا ما نانا)، القرفة حاااااااصلة لكن بس غيابي بسبب امتحانات العيال ومذاكرتهم و أبو الشباب طبعاً عامل رايح تقع فوق راس النسوان.
      المهم ، قعدت احسب و احسب و احسب (زي جنوبي الشاطر ده) إلا إتذكرت شئ يا خوانا ،حمدان ده كان ما أخاف الكضب شغال معانا في المكتب حقو أسألوا ليكم !!!

  12. كيتا للعشرة الكرام القاعدين بالموقع وما بكتبوا او يشاركوا كتمت كتمت كتمت كتمت

  13. خسمتكم البرنجية الجاية ياتخميسه يا خلوها لي

    1. ههههههههههههههههه,,
      لقيتك شحااااد لكن !!

    2. نحنا هينين انت خصّم العبيد المكنكش ده ! ما فضل ليهو الا يعيرنا بالهوت دوق كمان .

      1. انحنا هنا نضارى بالحيط عشان كدي البرنجية ما بنقدر عليها والنت زاتو ما في الا الواحد يشتاق للقمردينة يقوم يدخل من انترنيت كافيه حليل زمن الامارات والسودان نختفها مع النجمة

  14. يا اخواني ما توروا الاهبل ده انو الهوت دوق ياهو كبير اخوانه محشي شخط واب دمام ومصران وطايوق والحاجات الكنا بنرميها لي كلاب الجزُر , غايتو بس الحمد لله !!
    هسي يداعوك بي شنو .. يداعوك بي شنو !! ان شاء الله امريكا تديك التأشيرة , شاحد الله تديك التأشيرة والسفرة التخلينا نطراك لي جنا الجنا ويندهوك فيييييييييي ألو مرحبا ..

    1. هازول .. قطعت مصاريني بالضحك !! الله يملأ مصارينك بالهوت دوق .. قول أمين ..

    2. ههههههههههههههههههههههههههههههههههههههههههه
      دايره لى صينيه اقيف فوقه

      1. آآآآآآآآآآآآآآآبت وراق كان ما وقفوك جماعتنا اياهم القمردينة ما بتوقفك دي صينة حفظ البرج يا ستي ولو ما هي(اي القمردينة) جزم باليمين ولا صينية ولا يحزنون كان ركبت الظلط عدييييييييييييل كدي

    3. ههههههههههههههههههههههههههههههههههههههههاااى,,,
      عاد ياها كشفة الراس والدعا يا جنوبى آخوى ,,
      آميييييييييييييين

  15. حمدان دا ما بعرف درب المؤتمر الوطني بي وين ؟ ما يمشي .. فيها يكسب أجر المجاهد (هي لله) وفيها يصلح أوضاع عايلتو .. ولا خلاص التذاكر خلصت ؟

    1. التذاكر ما خلصت بس البلد قطط (ليس قططا اسأل جنوبي عن الفرق) ما عرفت اكتبها لكن اكيد فهمتوها

      1. قطت تقط قطا فهي عدمانه التكتح ..يبست يباس ..
        صاح يا الغلبان ؟

  16. يا زول يا جنوبي أكييييد أنت جنوبي (تايوان) لأنو ما في جنوبي أصلي بعرف تصاريف الأفعال !! وكمان بعرف إمو ( قطت بالتاء) ما زي ما كتبا الغلبان .. المهم أرسى ليك على بر عشان نعرفف الحقيقة قبلما أدق ليك خروووووج نهائي !!

    1. الغلبان آآآآآآآآآآآآآآآخوي نانو مظاهراتكم دي عنده بخور تيمان ههههه طاخ هاك ليبيا دي

  17. حمدان واولاده ياكلو سمك فيليه وسندوتشات شاورما وفروج مشوي ويحلو باسطة وحلويات جلاكسي وكده

    1. زي مديح زمان نشرب بالكوز يا نبي اله في الجنة ام موز يا نبي اله ياخ معقولة حمدان ما بشوفها في الحلم لانه الحلم نفسه بيكون من اشياء انت مشاهدها ههههه تقبل المرور يا ود الجد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: