على الفيسبوك وبعض المواقع الأليكترونية الأخري التي تقوم بنشر مقالات العبدلله قمت بالأمس بوضع صورة لطبق من (الهوت دوق) ثم علامة (الجمع) ثمً طبق من (البيتزا) مع وضع علامة يساوي وكان الهدف من هذه (المعادلة) الشهية هو معرفة ردود أفعال مرتادي هذه المواقع وجلهم من فئة الشباب على بعض التصريحات (المستغرشة) التي صرح بها بعض المسؤولين مؤخراً والتي تصف (الشعب الفضل) بالنغنغة ودعة العيش و(كمان جابت ليها بيتزا وهوت دوغ) في بلد أصبح الفقراء فيه يلجأ لوجبات مثل (كمونية السمك) وكوارع (الجداد) لتعويض نقص البروتين الحيواني بعد أن أصبحت اللحوم في حكم (المعدوم) !
فإلى تعليقات (الشباب) علها تكون مؤشراً يستند إليه (أولى الأمر) عند إتخاذ أي قرارات (مستقبلية)
ولو إنو (مش باين)
التعليقات :
• غايتو على حسب نوع الهوت دوغ من وين ( القوصى ولا ابورجيلة ولا لولى ولا كيرى ساى )
• نعمل شنو؟ إبتلاء من ربنا (البيتزا طبعاً)
• المعادلة دي تساوي مواطن سوداني مرتااااح مدغلب وسميييييييين
• هو الإنسان ده بطن بس ؟ وين الصحة وين التعليم وين الأمن ؟
• إنعدام الكفاءة الوطنية وفوضى الفساد لا محالة تساوي الفشل
• يا أستاذ ديل لحدت هسه بيتستروا على لصوص هيثرو عندهم عين يرفعوا الدعم؟
• الحجات دى والله رخيصة لحدت نحنا بطنا طمت شنو يعني سندوتش هوت دوق بي 15 ألف ؟
• المعادلة دي تساوي إنجازات 24 عام !
• مافي خيارات تاني يا أستاذ غير (الهوت دوق) و(البيتزا) …. لانشون مثلاً
• خلاص كان مافي طريقة نجاوب نسوي شنو ؟ قبل م أجاوب مصاصة العصير وينها؟ هو البيتزا والهوت دوق ديل بيشربوهم سااااي كده؟
• داير اسألكم إنتو صحي البيوت زمان كانت شينة ؟ ولا الناس دي مخلوعه من العمارات
ذي ما بقول المثل .. الما شنو كده ما عارف (يخلعك)
• في سؤال محيرني ما لاقي ليهو إجابة؟ رفع الدعم ح يستفيدو منو الفقراء كيف يعني؟
لو اصلآ في دعم من اساسو؟ لو في مواطن شغال طماطم في سوق الله أكبر ذي ده ح يستفيد شنو ؟
ده خلوهو نقول بتاع كارو ح يستفيد شنو ؟
• الشعب لابد لأن يكون فقيراً .. الفقراء يدخلون الجنة
• بعد ده نجاوب ليك السؤال … دقيقة بس (الإنقاذ دليفري ) يوجد بالمحل بيتزا و(هوت دوق ) باسعار مغرية ومريحة مع خدمة التوصيل للمنازل حتي لو بقت (شينة) .. أسعارنا غير مرفوعة الدعم … الإنقاذ دليفري اربعة وعشرون عاما من الغلاء اقصد العطاء
• بيتزا زائد (هوت دوغ) تساوي تلبك معوي وهذا مايعاني منه الشعب السوداني حاليا من فرط رغد العيش والرفاهية المطلقة. . تعيش الحكومه. .
• والله يا أستاذ بقينا ما فاهمين حاجة يظهر طشتنا شبكت .. أقصد شبكتنا طشت
• راجع نفسك وما تكون جائر.. وخلى حياتنا تعود لهناها .. (مهداة للريس)
• بعد ده .. الأكل بالنظر !!
• هههاهههههههه هههههه الله يجازيك يا وزير الهناء مليت بطونا بالبيتزا… نسينا شكل الكسره والعصيده ذاتو
• أحييييييييييييييي يا قلبي هوت دوق وبيتزا .. بس خلونا في القراصة كان بي بصل بناكلها وبيوتنا بتاعت الجالوص الشينه د عاجبااانا
• تخيل انو مجرد وجبة ذي دي بقت عندنا ترف كان الله في عون المواطن السوداني المش عارف يلاقيها من فين وللا من فين؟
• شعب مرفه يصعب فطامه (ههههه) !
• الزارعنا غير الله الاجی اقلعنا افطططططططمونا وريحونا ذاتو
• أموت وأعرف (الصنف) ده بجيبوهو من وين؟
• ويخرج المواطنون بعدما إلتهموا كل مخزون إيطالي بيتزا وديبونيرز بيتزا متوجهين إلى القصر الجمهوري مرددين شعارات (يا حكومة هسي هسي لازم تجيبو لينا جالاكسي) والبعض الاخر يردد (عايزين 10 تي شيرت وأجهزة أندرويد لكل بيت) كما يهتف متضرري السيول مرددين (يا حكومة مافي غلاء بس عايزين سوني ضد الماء) .. حكم والله نعيش كتير نشوف كتير
• الشعب إتدلع شديد والفطامه بقت صعبه يا أستاذ
• يا جماعة صدقوني (الحكومة كيسا فاااضي)
• اتحدى اي زول شاف الهوت دوق قبل الإنقاذ …!!!
• بكرة يجيك وزير ويقول لينا انتو ما كنتو بتعرفو الاندومي ذااااتو
• انا لغاية أسي ما بعرف الهوت دوق دا يا جماعة ..ممكن توصفوهو ليا؟
• علي فكرة الموضوع ما يزعلكم .. بالجد عرفنا جنس الاكل ده في عهد (الإنكاس) زمان كنا بنقعد في صينية فيها لحمة وخضار طازة وبعد كدة في فواكه .. لكن هسي الجوع قطع قلبنا بأكل البتزا والهوت دوغ
• في سبيل البيتزا قمنا نبتغي نَيْلَ العَشَاء .. لا لهوت دوغ قد عملنا نحن للفول فداء
كسره :
تحذر جمعية (مستغرشون) من زيادة تصريحات المسؤولين (المستغرشة) وتهيب بهم إلى أن (يروقوا اللعب) شوية حتى تنقشع قصة (رفع الدعم دي) عشان القصة ما ناقصة وكده !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟
الفاتح جبرا 
برنجية تصدقوا ؟؟!!
الرفيق العزيز يااااااااااااااخ انا ما حلفتكم نسيت طعم البرنجي زاتو
سلامات و تحيات يا فردة ,, ما شفتا حليفك لينا الا بعد ما البرنجية اتجازفت ,, و بمناسبة (الكتمة العملت بم اخيرا) ليك على البرنجية الجاية تب ليك انتا براك ,, بس ان شاء الله المستغرش رقم واحد يخليها ليك هو كمان !!
برنجيه غير مدعومه
التوقيع مستغرش رقم واحد
خوتكم آآآآآآآآآآآآآلعبيد خوة السجم انا ما محلفكم على البرنجية دي تخميسه ساكت ما خليتوها لينا عموما تحياتي لكم من ارض طاخ طاخ طاخ
الأخ الغلبان والله نحن ذاتنا كتمت وما عارفين الحاصل شنو
رفعو الدعم
لينا الله
هو كان في دعم يا naba اطرشنا
هاهاها . اخر واحد علق ده بخش الرج
بالجد آخر تعليق ده كان أحلى تعليق ..
الحكومة غير مسئولة تجيب ليكم من وين
نحن ندعم شنو وﻻ شنو
الحكومة كان الله في عونها مشكورة عملت ليكم ابراج في ماليزيا باسم فﻻنة الفﻻنية وخلدنا اسم المرأة السودانية في التاريخ بوضع اسمها على شارع في ماليزيا اننا نعمل لتاكلو البيتزا والهوت دوغ ونتعب كثيرا في سبيل رغد عيشكم ياجماهير الشعب الفضل
ههههههههههههههههه والله فترنا من رغد العيش يالحيكومة المظلومة
وغلبانين
بدون مناسبة يا أستاذ ، قبل شوية قريت خبر فى صحيفة آخر لحظة مفاده الآتى ( عاد الى البلاد اللواء ركن … رئيس اللجنة الزراعية (لاحظ لواء ورئيس اللجنة الزراعية ) بمجلس تشريعى ولاية الخرطوم بعد مشاركته فى مهرجان البطاطس ( آه والله العظيم البطاطس) المقام فى هولندا حيث زار هولندا وألملنيا !! ) تقولى شنو وتقولى منو !! ده وقت سفر ونثريات سفر ؟ وكمان بطاطس ؟!!
وعقيد اخر يتعالج على نفقته الخاصة بعد ان باع الوراه والقدامه ونفط بيته وبيت ابوه وامه واخوانه نتيجة اصابة عمليات قديمة لم تعالج بالمستوى المطلوب وعقيد وشه لامع في التلفزيون ويتكلم ورجع ورجع ورجع غايتو جنس غايتو
هو ما مشى عشان يشوف ويتأكد إنو الفرنش فرايس ده فعلاً بعملو من البطاطس ولّا لا…
يا سيد جبرا ،، هريتونا كلام في كلام انتو والمسؤلين ..
يا نزار الشارع
• في سبيل البيتزا قمنا نبتغي نَيْلَ العَشَاء .. لا لهوت دوغ قد عملنا نحن للفول فداء
ياخ والله الكتب التعليق دا يستاااااااااااااااااهل مليون لايك
شهدت الفترة السابقة تصريحات غير مسئوله من اشخاص غير مسئولين متفوهين بترهات القول وأضمرو سوء النية للشعب السوداني الفضل وكانت هذه التصريحات سوادا للسواد الأعظم من الشعب الفضل، حيث شكلت وجدان الشعب في الفترة الأخيرة وشغلت بها الحيكومة الناس تماما فكانت آذان الشعب ملاذا لسوءات أقوالهم، وعبرت عن معاني التصغير والإستذلال الملئ بالإثارة والبلبلة والتهكم علي بساطة المواطن المغلوب عليه ظلماً والمطلي بلون عذاب الدنيا فكم من غير مسئول اطلق عبارات ذادت حياة الناس كدرا وطينا فكل من سولت له نفسه ان يصرح يكن الإستغراب، فهذا أمر طبيعي لفقدان السيطرة والتحطم، فتسيطر الحيكومة وتستخف وتاكل حلاوة كمان بعقول الشعب بتصريحات هوجاء شتراء لطالما حركت فينا الإستغراش والإستفشاش وفقع وطرشقة المرارة، فمتي تتوقف وإلي اين مصيرنا ياتري.
مافي فايدة تصرحو ماتصرحو مافي فايدة العايزنو بتعملو فينا فأحسن تعملو من سكات طالما كل يوم الواحد يصحي وياخد المعلوم من التصريحات، اقترح علي شركات الإتصال أن يقومو بإدخال تصاريح المامسئولين ضمن أغاني ومدايح خدمة لحنا علي طريقة (أضغط نجمة وشيل التصريح).
ليك وحشة يا صابر بس التحريض على الشارع الشارع وينوووووووووووووووووووووووووووووو بس المرة دي عاوزين جديد في جديد يعني الكل دون الاربعين كفانا مومياوات
يبقي خيارنا الشارع بس .. احسن نطلع ومانندس
يبقي خيار لي كل مواطن .. ارفع راسك قوم البس
غير حالك شان تاريخك .. وارفع راسك وماتتهز
اكلك معقول بيتزا وبيرقر؟.. وينو الفول الفيهو الخس
عمرك كلو قضيتو مهانة .. ووهم ومخاوف من الحبس
ابقي مؤثر في سودانك.. وفكر في اطفالك وبس
من وين ليك حق السكر.. من وين حتجيب حق البص
عندك مبلغ تدفع موية .. ولا الكهربة هي الاخبث..
الرئيس قال البيوت فيها خمسة عربات و عشرة و هو بيشوفهاا بي عيونو و الخمسة عربات بتمشي لي مناسبة واحدة او جهة واحدة الكلام دة جميل جدا و حقيقي ما فيهو غلاط لكن نسال العجل القال الكلام ده شافو وين (في كافوري حوش باناقا – المنشية – الرياض – بيوت منتسبي المؤتمر الوطني في الاحياء الاخرى) طيب في ام بدة و انقولا و الثورة الحارة خورتمية في الحاجات اذا العجل اختزل السودان في محيط عيشو و هو زاتو لو قلتة ليهو كيلو اللحمة بي كم و العيش بي كم اشك انو يكونن عارفو , خطاب هزيل جدا جدا و تمثيلية رديئة السيناريو و الاخراج و كمبارس يطممو البطن و اسالها من شاكلة ياريس واي ياريس وووب ياريس احي و قال نحن ما بنطبع و في التسعينات سلمو افراد حماس لي امريكا و بن لادن ادوهو 24 ساعة علشان يغادر و من اموالو غنى ع.ح و اخوهو
الحل:
الشارع الشارع الشارع الشارع الشارع الشارع الشارع ياحياة بي عزة و كرم يا موت و الموت واااااااااااااااااااحد
ينصر دينك يا شرقاوي ولو رجعت لاول تعليق من بداية القمردينة قبل ما يتغير لونها (يعني اخوك قديم في القمردينة) قال كتمت كتمت كتمت وما فيش غير الشارع وبرضه ارجع لاخر تعليق زول زيادة من اربعين سنة مش عاوزينه ومن بيوت المصارين البيض ما عاوزينه عاوزين زول مدعوك ولو غير قميصه بعد ما يكون فوق يتغير على طول والناس تكون مراقبة والشارع الشارع الشارع وكتمت كتمت كتمت
الليلة الاصلييين يمتنعون …….. اخبار العطلة معاكم
والله اليوم في واحد اصلي عاجباهو طلعت ناس مدني وما ترك واحد الا وعلق عليه وسلم عليه لك تحياتي وسلامي وتقبل مروري
الزول ده في مؤتمره امس حملنا مسئولية الفساد
قال ليكم ما ما بقدم المستندات العندو هو مسئول امام ربو
الملفات الراقدة في الادراج والقضايا التي منع النشر فيها
مسئولية منو
ياخ ما تختشي
هو احنا عندنا قنابير
خط جبرة عفوا خط هيثرو-الاقطان -التقاوي – دولارات بنك السودان المشت لشركات خاصة -الاوقاف – المستشار بتاع النيابة العامة داك
مسئولية منو – الحكم التركي ولا الاستعمار الانجليزي ولا المهدية
صحيح الاختشوا ماتوا
ما ذكرته معروف ومعرف اكثر من ذلك وما خفي اعظم
عليكم الله ما سمعتو الزول بيتبجح بس عشان قدم بس لي فيزا لامريكا
قال الجماعة ديل ختيناهم في ركن لا بالله انت ليك 24 سنة خاتينك في …… اليلة جاي تتبجح يا انشاء يدوك التاشيرة انشوف
انشوف بتمشي – اليست جرية ابوجا في ليل دامس بقريبة
يا ابو الشوش نحن اولى بلحم ثورنا بس الناس تطلع الشارع وتولع لستك واحد في تقاطع وليك على يتعلق في ميدان ابو جنزير يا ناس الخوف في شنو الموت واحد وظز واحد مارق من الموت اربعة مرات في ستة اشهر هع كع كرع انا من المطار وهتافي سيدوي لو جيت في الايام القابلة
الغلبه لله ناس جيعانه بدل تاكل الهوت دوق قعدت عليهو باللحس
السلام عليكم انا جديدة معاكم هنا …
حبيت اعلق على الموضوع لانو استفزني هوت دوق شنو وبيتزة شنو !!! غايتو بستخفوا بينا على اساسا انو الشعب لاقي الويكة
عليكم الله البتعمل فيهو الحكومة ده موش استخفاف بعقولنا نحنا السودانيين الكنا بنقول تقولى شنو وتقولى منو والله صحى بنستاهل البحصل لينا اشنقونا بس ورونا الحبل علينا ولا عليكم تفوووووووووووووووو
كألعادة كتمت كتمت كتمت بس جابت ليها نفس في ود مدني مدد يا السني
اوتذكروا إذ طعامكم الويكاب وملاح اللايوق
فعلمناكم من بعد جوعكم البيتزا والهوت دوق
صحي شعب اكااااااال ونكار … ان شاء الله يدوهو التأشيرة كيتا فيكم يا معارضين يا شيوعيين ..
كان ادوهو سجمو وكان ما ادوهو برضه سجمو زي قولت عمك الجعلي كان نزلتني ……..وكان خليتني برضه …… وتقبل المرور
يا جنوبي سؤال باعتبارك خبرة و خيت
انت الميرغني وين , الصادق وين , باقي الاحزاب وين
دي فرصة علشان كل سوداني يكفر بي اتحادي او امة او اي حزب
و مهيرة والدة رجال في السودان
وداعا لكل المتنفعين و الوصوليين
الذين همهم الاكبر هو ما يكنزون
و مرحبا برجال يحملون هما كالجبال
يحملون هم السودان
تقبل مروري ولا فض الله فوك كفانا انا من عمر سبعة اعمامك ديل سامع بيهم وهسع خمسين
المجد للالاف تهدر في الشوارع كالسيول
يدق ساعدها قلاع البغي والظلم الطويل
الثورة انطلقت .. الثورة انطلقت ..
وان شاءالله يا جنوبي ما يعملوا ليها متاريس وتقيف الناس مقهورة وغلبانه
شباب سلام
عليكم الله لنفترض أننا اتعلمنا اكل البتزا و الهوت دوغ من الإنقاذ، يعني شنو؟هو دا إنجاز ليكم؟ أولاً الإتنين يعتبران من أرخص الأكلات في بلدانهم الأصلية.وسيدالإسم ( الهوت دوغ) دا بالذات بتابع في نيويورك بعربات تروللي في الشوارع يعني زي الترمس وأنا احد. الأدوهو تأشيرة و شاف نيويورك يرفع أيدو، و الجائزة إشتراك مجاني لمدة عام بجمعية ( يطرشون) ودي جمعية جديدية لنج أنشئت بعد التصريحات الأخيرة للمسؤولين ، (ولا مؤاخذة يعني ، أصلنا إرفنا يا قول إخوانا بشمال الوادي. )
يا ستي ان شاء الله بعد قومة الشعب المسعولين ديل ما نسمع ليهم تصريح تاني
اقترح على الحكومة السودانية تواصل (الرفع) ! رفع الدعم عن المحروقات والمهدورات والمسنودات والمفتولات والمجنونات وكل ما تستطيع رفعه ,,, لانو الشعب (مستمرئ) (الرفع) دى ,, يعنى بلعو ونزل عن طريق (المرئ) وماشى على الامعاء , حيث لا اخراج ! ايوة ,, فالمخرجات والمتنزهات والمقتطفات والمبسترات والمعلبات والبيتزات غير مسموح لها بالخروج ! ارخى يا بوص ! ارخى ,,
فشنو , احسن يرفعوا ويرفعوا حتى يكتب الشعب من المرفوعين بالمرفعين ,,
كما ان الشعب السودانى يستأهل الرفع ليكون متقدما ومرتفعا على كاااافة الدول والاصعدة والمجالات والمناحى يا صباحى ! وسلملى على الكلب الحار !
ألكلب اليكجمك مكان ماك مكجوم من يومك يا مهجوم يا مرجوم ,,,
واقترح على الشعب المستمرئ دا انو يغنى للحكومة (ارفعنى وزيد عذابى) ,,
كما من جانبى اهدى المقطع دا للمشير البشير اللى قال كلام مدغمس ومجغمس وملحمس امس (راجع نفسك وما تكون جائر ,, وخلى حياتنا تعود لهناها) ,, دا من باب اسداء النصح لمن تولى زمام الامر ,,
والسلام على من عرف الحق وصدع به ….
والله يا شمباتي ياخوي اخشي اننا في زمن من يعرف الحق يصدّع به !!
انت تعال نسألك : رفع قيمة الدولار الجمركي ده دحين ما بزيد سعر الدواء والقمح والسكر والزيت والادوات الكهربية واسبيرات العربية وحتي الطاقية البنغالية ؟ يا ربي سعر النبق الفارسي برضو حيزيد !
والله انا صدعت واتقيات !!
اووووووووع,,
وبزيد حتى مستهلكات الاستيراد وبياثر على الخطوط الجوية غير السودانية البتعمل فى السودان ,,
لكن هاااانت يا حبيب ,,
هانت
هناك صوت خافت بدأ يدوي وسوف يتصاعد الكتمة لازم تجيب نتيجة
ياجماعة اوع تصدقوا الريس الكذاب ده فاق مسيلمة فى الكذب والله يشهد عليهم رب العالمين كل اهل الؤتمر عايشين عيشة ملوك وجو من اسر فقيرة لكن نسو الماضى وقعو سف وخم وظلم وفساد وكمان فى الاخر جابت ليها استفزاز للشعب السودانى بانهم ورونا البيتزا والهوت دوق وكمان جابت رفع دعم وهى فى حاجة خليتوها مرفوعة الاكل يوم ترفعوا فى عماراتكم فى الداخل والخارج الله ىرفعكم فلقة ونشوف فيكم يوم يااهل الفساد والظلم والجشع والطمع عاش نضال الشعب السودانى الابى المعلم البطل
هل تعلم ان البيتزا اكلة شعبية فى ايطاليا ؟ هل تعلم ان الهوت دوق اكلة شعبية فى هولندا ؟وهل تعلم ان الكسرة وصحن ملاح يكلف اكثر من عمل بيتزا؟لكن تجار الدين ماجايبين خبر وماعارفين !!!! اللهم الطف بالشعب السودانى من ظلم وجبروت الحكام اللهم امييييييييين.
اخبار الثورة :
امتلأت الحراسات بالاحرار واصبح النظام يستخدم المساجد لحبس الثوار !
مطار الخرطوم يشهد هروب أسر المسئولين ومعظم المسافرين المؤكدين سفرهم الي دبي تم الغاء حجوزاتهم لتوفير مقاعد للهاربين !
انعدام الرؤيا في قلب الخرطوم من دخان البمبان ..
يا خرطوم ثوري ثوري ضد الحكم الدكتاتوري
ويا خرطوم ثورى ثورى لن يحكمنا لص كافورى ,,
فعلا من امس الغيت حجوزات معظم المسافرين الى الامارات العربية المتحدة , حيث الكنوز والاستثمارات !!
والله اكبر والعزة له ولرسوله وللمؤمنين وللثوار ولكن الكيزان لا يعلمون …
فشيت غبينتي ليتني كنت فيها جدعا (جزعا) قال شنو ما عارف بس ليتني اعرض امام القصر انشاء الله بعدها يشيلو جنازتي في قفة
ضاعت الثورة !!!!
نجح المندسين من عصابة الحزب الحاكم كانوا او من المخربين في تحويل
مسار الاحتجاجات من غضب شعبي الي خراب !!
اثبتت احزاب المعارضة ( شيبها وشبابها ) انها بعيدة كل البعد عن الشعب ولم تستثمر خروجه
بالتنظيم والتوجيه !!
ليس تخازلا ولكني عاصرت من المظاهرات ما يكفيني لتقييم هذه الاحتجاجات !
لك الله يا وطني الجريح !!!!
لم تضع ,,
صبرا يا حبيب ,,
حقيقة قد ضاعت الثورة و فرصة لن تعود
والله خوفي يا شرقاوي ديل اخوان الشياطين
الحبيب شمباتي .. خرجت كل احياء الخرطوم وحتي الاحياء التي كنا نظن انها لهم خرجت ..
ولكن لم يجد الشارع من يقوده الي حيث يجب ان يذهب لتلتقي الجموع فيبثوا الرعب في قلب الطغاة فيفر خفيف القلب وينشق المؤلفة قلوبهم انقاذياً ويتحمس من فيه بقية رمق من حب الوطن .. ولكن ترك الامر( لرباطة ) البشير فقادوا الثائر دون وعي منه الي حيث الاساءة له !!!!!
هي شحنة غضب يا صديقي ومتي ما فُرّغت خلاص ( همبوكة ونفّست ) يلا انفخ تااااااني من جديد …
كتمت كتمت كتمت
الما بتشوفوا في بيت أبوك يخلعك
حكومه جعاااااانه
احنا مرقنا مرقنا مرقنا , ضد الناس السرقوا عرقنا ,,,,
المظاهرات تنتظم ارجاء البلاد وخصوصا مدنى والعاصمة الخرطوم ,,
يا الله نصرك وفرجك العاجل ….
تنبيه الى الاخوة الثوار الاحرار :-
لايفوتكم الليل ,, فاذا اظلمت الدنيا تعبتم وانهكتم ,, فلتتناوبوا على الخروج والاحتجاج ,, وسهر الجداد ولا نومو ,, انتشروا فى مداخل الاحياء وكونوا لجان حماية منعا للاعتقالات وتثبيط الهمم بتكبيل القيادات ,,
كونوا عينا ساهرة على بيوتكم وامنكم واخوتكم ,,
هى نصيحة امدنا بها حكيم وخبير امنى نحبه ونثق به ,,
ما ينوم , ما ينوم , ما ينووووووووووم
يا عم جبرا
قلمك وين الايام دي البلد في اشد الجوجة ليهو
الايام دى فى دوااااااس بس ,,
نصر الله الشعب على الاوغاد اولاد الكلب ..
قالو ربيع عبد العاطي اخد ليهو ( هوت كف ) ..
تسلم إيدو و إيد الولدتو وتسلم جبره
واديك الاكبر منها ,, قالوا زماااااان نافع الما نافع ماخدلو كف من احمد هارون !
اى والله ,,
المصدر موثوق به ثقتى بيك كدة !!
واديك الوصية , جمع اكبر كمية من بصاقك عشان نمشى ونبصق لمن يجينا جفاف !
اتفووووووو على حكومة جزمة ,,,,
قمة الجُبن ان تستخدم السلاح في وجه العُزل وتهرب ممن يحمل سلاحا
وكت عندنا دبابات قدر دي , ما شفناها في اب كرشولا ليه ؟
حرية سلام وعدالة .. الثورة خيار الشعب
طير طير يا البشير وسوق معاك باقي الطير
انتو المدوناتيه ديل وينم ؟ الكيبورد ده فيهو بمبان كمان ؟ الرجال بواجهوا الرصاص انتو ما دايرين تواجهو الكيبورد !!
ها ,, الله يرحم !!
لكن اجمل شئ فى الاحداث دى انها بتمايز الصفوف وبتمرق الكفوف !
طاااااااخ
سلام شباب
إحنا قااااعدييين ، بس بنعاين. يا ربي حقيقة ولا خيال”!و لا أخفي عليكم من خوفي من مصير كمصير مصر! ربنا يسلم البلد و أولادنا !
النظام في سبيل البقاء لن يهمه حتي لو اشعلها حرب اهلية !!!
المرحلة القادمة من سيناريوهات الحكومة ستكون فتق النسيج الاجتماعي وشق المتظاهرين الي عرب وزنوج ..
حاول بعض المسئولين الصاق تهمة التخريب وسرقة المنازل الي عرق سوداني معين منسوبين للحركات الثورية هم من يعتدوا علي املاك وحتي بنات الشماليين ..
الحرص الحرص من الانسياق وراء الاشاعات في الايام القادمات ..
تافهين تافهين تجار الدين
غاده السمان
لكل من هاجمني على تضامني على ما يحدث في السودان ، عليك تفهم الوضع السوداني بصورة كاملة.
تريد فهم الشخصية السودانية سياسياً ؟ حسنا
هل تتخيل ان السوداني من مواليد عام 1950 البالغ من العمر اليوم 63 عاماً ، اي انه في عمر والدك تقريباً ، ولد والسودان تحت الحكم البريطاني المصري .. ثم شهد استقلال السودان عام 1956 وعمره 6 سنوات .. ثم شهد في طفولته وعمره 8 سنوات اول انقلاب عسكري في السودان عام 1958 .. فلما بلغ الرابعة عشر من عمره خرج الى الشارع في معية اخوانه الاكبر سناً للمشاركة في ثورة اكتوبر 1964 .. وهو على وشك دخول الجامعة أو في سنتها الاولى شهد انقلاب نميري على الديمقراطية عام 1969 .. ثم شارك في الثورة الشعبية على نميري عام 1985 وعمره 35 عاماً وهو يحلم بمستقبل أفضل لأبنه الذي لم يبلغ عامه الثاني بعد .. لكنه شهد انقلاب البشير على الديمقراطية عام 1989 .. واليوم هو يجلس في بيته بسبب السن ويحفز ابنه على المشاركة في التظاهر ضد نظام البشير !!!!!!
(منقول)
يا اخوانا سايلكم بالخير عمكم جبرا اعتقلو ولا شنو
الله يكضب الشينة
و الله يرحم الثورة بعد دا النركز للكيزان ساي لانو حايجو يورونا المكشم بلا بصل و نستاااااااااااااااااااااااااااااااااااااااااااااااهل
لابد لليل ان ينجلي كتمت كتمت كتمت
يعني ما مرقنا الا بي واحد هوت كف
لا لا البروف بخييير وصحة ,,
دعواتكم عز صلواتكم ,,,,
بيتزا بيتزا بيتزا…
أوووبيتزا…
نحن ما مطاليق…
أووووبيتزا….
ما بناكل العواليق…
أوووبيتزا…
حكومة التصاديق….
أووو بيتزا….
كتّالة المخاليق..
أوووبيتزا….
لاهاي مسببة الضيق..
أوووبيتزا…
بخرة ومحاية في الريق…
أوووبيتزا…
قراصة المساجين…
وين بيتزا..
تاكلوها لوبعد حين…
أوووبيتزا..
نسوانكم الدباديب..
أوووبيتزا…
سرقات بلا تراتيب..
أوووبيتزا…
وصبت المزاريب…
أوووبتزا…
أرواحنا ما تجاريب…
أوووبيتزا…
وزي ما في بيتزا بالدجاج وبيتزا بالجمبري وبيتزا بالجبنة بس وبيتزا بالهناي داك , كمان في بيتزا بالهوت دوق ودي اسمها 2 في 1
هههههههههههههههه,,,
قلت اخير كدى !؟
” عمار عوض محتجز بمطار دبي ومعه عشرة مليون دولار
09-30-2013 02:48 PM
أكدت مصادر الراكوبة في اتصالات بدولة الامارات والخرطوم أن نجل القيادي الكبير الذي قبض عليه أمس في مطار دبي قادماً من الخرطوم ومعه مبلغ 10 مليون دولار هو عمار عوض الجاز وحتى اللحظة لم تتجاوب السلطات الأمنية مع قيادات حزب البشير .
ودرج عوض الجاز منذ صعود تنظيم الأخوان المسلمين الى سدة الحكم في السودان على تهريب أموال السودان الى الخارج. “
بلاي يا جنوبي تخيل دا ولد واحد لعوض الجاز وفي دبي ,, يلا احسب المعفنين ديل كم واولادهم كم وفي كم زي دبي واحسب في متوسط 5 مليون بس ونشوف قروش البترول دي مشت وين ؟؟؟؟؟؟
😎
بس احسب وكمان اي واحد معرس اكتر من عماره اقصد من واحده وكل واحده عندها بيت وكل واحد رافع الدعم عن كل بيت دي حسبه كبيره خلاص
رافع دعمو في كل بيت