أهو قلنا ليكم

لم يكن ما حدث من إحتجاجات مفاجئاً بل كان أكثر من متوقع فعلى مر 24 عاماً تحمل المواطن ما تحمل من أعباء حيث صار المواطن (مع ثبات دخله) هو من يقوم بكل شئ إنابه عن الحكومة .. العلاج .. التعليم إلخ في ظل إرتفاع محموم في كافة السلع الضرورية جعل المواطن تضيق عليه الأرض بما رحبت .
لقد ظللنا ننبه كثيراً إلى هذه الحالة المتفاقمة وأن المسألة وصلت إلى (حتة صعبة) ويجب على الحكومة (القعاد في الواطا) لوضع حل لهذه المعاناة التي يعانيها سواد الشعب الأعظم ولكن الحكومة بدلاً عن (القعاد في الواطة) قامت بفك المواطن (عكس الهواء) وهي تجيز الزيادات الأخيرة في المحروقات مما يعني زيادة فئات الترحيل وزيادة كل السلع الضرورية (وغير الضرورية) ليجد المواطن نفسه في وضع يحسد عليه جعله يخرج محتجاً !
ولأن الخروج جاء عفوياً لم يضع (المواطن) حساباً لاي نوع من إندساس (البعض) فكان أن عاث هؤلاء فساداً وقاموا بعمليات الحرق والإتلاف والتعدي على الممتلكات العامة والخاصة ليصبح المظهر العام تخريبا لا تخطئه العين ظلت القنوات الحكومية تتناقله وكأنما قد تم بواسطة المواطنين البسطاء الذين هم منه براء !
ولعل ما يؤكد عفوية التظاهرات في يومها الأول وعدم تأمينها ضد المندسين عدم رصد أي عمليات تخريب في الأيام التالية بعد أن تنبهت قوى المعارضة والحركات الشبابية لضرورة عدم إعطاء الفرصة (للمندسين) وأصحاب الغرض ومراقبة هذه التظاهرات داخلياً لتفويت الفرصة على كل من يود ان يشوه هذه الإحتجاجات السلمية .
وعلى الرغم من ذلك ورغم سلمية الإحتجاجات في تالي الأيام وعدم وجود أي مظاهر للتخريب والإتلاف سقط العديد من المواطنين بالرصاص الحي الذي نفت جميع (الأجهزة النظامية) إستخدامها له مشيرة إلى أن ذلك قد تم بواسطة مجهولين وإن سلمنا وآمنا بهذه الفرضية (العجيبة) فهذا يعني أن هذه الأجهزة الأمنية لم توفر الحماية الكاملة للمحتجين ولم تقم بعملها على الوجه الأكمل في تأمين المواطنين المحتجين مما يخضعها للمساءلة .
إن مشكلة (الحكومة) أنها لا تسمع (كلام الببكيها) ولا تنظر أبعد من (قدميها) فبعد عقدين ويزيد من إدارة الدولة ورغم هذا الفشل وهذه الإخفاقات التي لازمتها في شتى المناحي أنها لا تريد أحداً أن يشاركها في صنع مستقبل هذه البلاد ولا زالت تستند علي سياسة الإقصاء والتفرد بالسلطة وإشراك أحزاب (تمومة الجرتق) و(الترضيات) الذين لا يهشون ولا ينشون في محاولات باهتة لإدعاء تلونها بجمع مختلف أطياف المجتمع السياسي حتي آلت الأحوال إلى ما هو عليه من تراجع للإقتصاد وتعثر لعجلة الإنتاج وإزدياد في معدلات الفقر فاقت نسبتها الستين في المائة وما صاحب ذلك من إنتشار لمختلف الأمراض المجتمعية كإنتشار البطالة والعنوسة وإرتفاع معدلات الجريمة .

لقد بح صوتنا و(كمل حبرنا) و(إنسهك كيبوردنا) ونحن ننصح (الحكومة) أن تقوم بتصحيح (نفسها) وذلك بمراجعة السياسات الخاطئة التي تفاقم من معاناة المواطنين ولعل أبسطها محاربة الفساد الذي أصبح لا يأبه من قاموا به حتي بتوجيهات (أعلى السلطات) فهل يتقبل المواطن تحميل الحكومة له ما هو فوق طاقته جراء هذه القرارات القاسية وهو يري من ينهبون مدخراته يسرحون ويمرحون دون محاسبة أو عقاب؟ لقد ظللنا نكتب ونكتب عن كثير من الحال المائل في هذا العهد (الرشيد) ولكن يبدو أن المسؤولين لا يستبينون النصح إلا (ضحى الغد) !
إن من يحتجون على القرارات الأخيرة ويواجهون هذا القمع والإستخدام المفرط للقوة هم مواطنون شرفاء (صبروا كثيراً) على سوء الحال حتي إذا ما أضحت الحياة الكريمة مستحيلة لم يجدوا غير الخروج للتعبير (سلمياً) عن الغبن الذي يحيق بهم جراء هذه السياسات (يعني يسكتوا لمتين؟) ويجب على الحكومة أن تتعامل من هذا الفهم فلم يعد للشعب ما يفقده .
أننا لا زلنا نسدي النصح (للحكومة) بأن الأمور قد وصلت إلى مرحلة يستحيل معها المضي بذات السياسات السابقة (وقوة الراس) لأن ذلك بالقطع سوف يزيد من حدة هذه الإحتجاجات ويجب إعمال صوت العقل بدلاً عن (الكنكشة) وذلك بتبني تحولاً ديمقراطياً سلمياً سريعاً يجنب هذه الأمة الكثير من النوائب والشرور والفتن والمحن وذلك قبل أن تقع الفأس في الرأس وأهو قلنا ليكم !

كسرة :
المجد والخلود للشهداء الشرفاء الذين ضحوا بأرواحهم من أجل إنسان هذا الوطن العظيم

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟

Advertisements

49 تعليق

  1. بس نقول شنو نظل نستغرش الي حين الاستغراشه
    الاكيده ،
    التوقيع المستغرش رقم واحد ومستغرشتن الي الغلبان علي حسب طلبو

    1. نشكر لك رأفتك بالغلبانين ويووووووووووووووووووووووووه برنجية

      1. كيف انا معاك يا الغلبان،،، اهو حسب طلبك و حليفك ، خليتا ليك !!!

  2. مقهورين وساكتين | رد

    عودا حميدا أستاذ

  3. والله كنا خائفين عليك من الكلاب .. بعد ماكتمت .. قربت تفرج إنشاء الله ..

    1. تعرف يا صاحبي البيتزا والهوت دوق قربت توصلهم لي عكارة نميري هههههه

  4. السلام عليكم ، اشكاليتنا فى الافراد وليست فى الانظمه ، الصادق ، الميرغنى ، الترابى و الكليه الحربيه التى تعلم عدم الولاء للوطن ……… عجبى

    1. قالوا المره الكعبه لما تكبر بتبقي م؟؟؟ه والانت قلتهم ديل كعبين وم؟؟؟ين !!
      شكرا للسيول والامطار التي افرخت لنا شبابا يعيد الامل وشكرا لرفع الدعم الذي اعاد ثقتنا في الشباب بعد ان هرمنا وكدنا نبكي الوطن ,,

      1. هرمنا وهم (تدنصرو) وبرضه شابكين فينا يحلنا الحله بله من ناس ديل وآآآآآآآآآآآآآآآآآاسفاي

    2. والله اكوكو اخوي الخوف ترا من جنس الديناصورات دي

  5. الاطرش ما بقولوا ليهو الاطرش بوروهوا !!
    المجد والخلود للشهداء والخزي والعار للحكومة ,,,
    طير طير يا بشير نحن قرفنا من التدمير ,,,,,,,

    1. يطير وين يا جنوبي !! ده حبيبنا الطيرك انت .. عايز تنكر ؟؟ وبعدين كان طار .. منو تاني الباكلكم Hot dog .. ده لسع غير الوجبات الأمريكية الكتييييرة الانتوا لسع ما سمعتوا بيها .. اها كان طار منو البوريكم ليها ؟؟؟ يا جنوبي هي انقرع …

      1. الضارب امه في عضم الشيطان بي الشئ اب راسين البكسروا بيهو السكر عشان حتة ( قنقر ) ومال حيعمل فينا شنو عشان الهوت دوق والبيتزا , هو غير التراب اكلنا شنو !؟ ان شاء الله تاكلو لامن يموت ويحكها قدام الرجال ,,

    2. طرش نان وعما آآآآآآآآآآآآآآآآآجنوبي تحياتي لك ونشكر العبيد لعدم مجازفته للبرنجية

  6. أبلم مو شقي ,, شقي البتكلم معاهو …
    البشير أبلم وعلي عثمان أبلم ونافع أبلم ,, أما الكاذب الرسمي ده أبلم و وسخ وتافه عديييييييييييييييييل ..
    النكته انو الحاج ادم يطالب بتقديم المتظاهرين للمحاكمات صحي اذا اتتك مذمتي من ناقص ,,,

    1. الحاج ادم الحاج يوسف ابو ادم ابو اهلهم

  7. البروف والسمار الكرام
    عودا حميدا للبروف وحمد لله الما اعتقلوك
    لانو اليوين ديل الكلاب شغالين اعتقالات شديدة
    والرجفة جاتم وخايفين خوف شديد رغم تظاهرهم بالثبات
    بالزمة الضب الكبير من سنة 89 شوفتو ليهو جنس الغطسة دي ياخ ده من يوم المؤتمر الصحفي ما ظهر

    1. ياشوش You missed your Hot dog meal

      1. هههه
        بالحيل فقدناها مش الاكلونا ليه ادسو يبقي ناكله كيف تاني
        الا اي مغترب وهو جاي السودان لاهله بدل مقاطع الجلاليب والتياب اليجيب كم كيلو كدة بتاعه هوت دوق عشان بابا عمر وعمو علي دايرين يغورو ويشيلو معاهم بيتزتن وهوت دوقون

  8. لا ولن تقبل الحكومة باي حال من الأحوال تسليم السلطة او الإعتراف بالجرائم والفساد..فالمال والسلطة مرضان لحكومة واحدة والبطش والغلظة وقتل النفس التي حرم الله إلابالحق هي من الاساس لجسد مريض وسلطة متهالكة شارفت علي السقوط وماهي إلا فترة حياة بالأجهزة أو موت سريري..فالتشبث بالسلطة اصبح مفخرة وإستخدام الرصاص في وجه الأبرياء وطلبة المدارس أصبح مشروعا بأمر عبدة الشيطان.عن اي امر تتحدثون وتجتمعمون وتقيمون المؤتمرات الصحفية.. علي قول المثل قتلني وبكي وسبقني اشتكي..الموت ياجماعة الخير الموووت شباب طلبة- بنات- كلهم ماتو يعني فارقو الحياه اهلهم- ذويهم- امهاتهم- اخوانهم ماحالهم الان عندما يرو القذر أو العذير أو سفيه الداخلية يتحدثون امامهم احياء يقهقهون ويخدعون الاعلام الخارجي ويتحدون، اي تحدي وانتم تقتلون نفوس طاهرة بريئة من مما تفعلون اما خفتم علي اولادكم اما خفتم علي اهلكم ام حكمتم الشيطان والمال والسلطة..تقتلون بالرصاص الحي الابرياء وتخرجون علينا بمهزلة، هو سكوت عن الحق بل خيابة رجال وكل من يحضرون هذه المؤتمرات الصحفية يشتركون في هذا الجرم نعم قاطعوها فهم يستهزئون ويضحكون علي العالم ويتحدون المواطنين الشرفاء الذين ماتو بنيراهم ..الله لهم هو مولاهم ونعم النصير.. وهم يهتفون في داخلهم هي للشيطان هي للشيطان لا للشعب ولا للشرفاء..نعم هم عبدة الشيطان.

    1. عمك يا صابر بتنكأ الجراح مش عبدة الشيطان خانك التعبير المره دي التعبير مقلووووووووووووووووب آآآآآآآآآآآآآآآخوي هؤلاء يعبدهم الشيطان شفت كيف لعبتا في قلبتا وبرضه قلبتا حلوه ان شاء الله كاكي تاني بس وطنين يختونا ديل

      1. فعلا انقلبت الشيطنة علي الشيطان ياخ والله الشيطان عمرو مافكر يعمل جنس العمايل دي..وبالخد فقدنا التصاريح الاستغراشية..وطبعا الوالي بعد دا المفروض يصرح انو خلاص الوضع اصبح كارثي لانو نص السكان ماتو في السيل والنص التاني مات في المظاهرات..

      2. يا ود صابر انت ما بتنوم ؟؟ مالك قاطع نومنا يا أخي !!!!!، بعدين انتوا كلام والينا مافهمتوهو ، الزول ده قال ليكم نحنا عايزين نقعد في البلد دي براااااانا ، اسع الله يسألك يا ودصابر انت حركة إسلامية ولا إسلامي ؟؟ طيب وكت لا .. قاعد معاهم ليه ما تطفش تخليها ليهم يا أخي …

  9. نص جديد للشاعر الكبير أزهري محمد علي

    زخة رصاص في الراس
    من سلطة معطوبة
    ما بتثني عزم الناس
    لو عزا مطلوبا
    في دولة الرصاص
    كم خيمة منصوبة
    حرس الرئيس الخاص
    متغطي بي توبا
    ولدا رضي و وناس
    شايلنو لي حوبة
    في ليلك اب كباس
    شاهد خراب سوبا
    شاهد وطن بنداس
    عينيهو معصوبة
    في يوم شديد الباس
    والدنيا مقلوبة
    مجبور رمي الكراس
    دنقر رفع طوبة
    شاف لحية القناص
    بي دمو مخضوبة
    تمتم قري الاخلاص
    كتب الخلاص بالدم
    طلع القمر بوبا

    أزهري محمد علي

    1. انت يا جنوبي ظاهر عليك ( مؤتمر حرامي ) جنك سرقة يااخي جيب لينا قصيدة من عندك ..

      1. ههههههههه انا بسرق واجيب لناسي وهم بيسرقوا ويشيلوا ,, مااااااااالك ما نضمت معاهم ؟
        ياها عادتكم يا الامريكان ..

      2. افووو يا جنوبي !!!!!! نحنا راجين اليوم الأسود بس انتوا ولعوها زياده ..

      3. بس سرقة عمك جنوبي سمحة ما زي سرقت ديييييييييييييييييييك ودييييييييييييييييييل

    2. ونص من ابو سارة نقلا عن الراكوبة
      هبّوا وانهضوا يا جمهور
      ضد الظلم القهر الجور
      ودكّوا حصون حكام الجبهة
      الظلموا شعوبُن وعاشوا فجور
      باسم الدين واللِحى غشّونا
      ومن خيراتنا بنوها قصور
      وكل وزير سوّاهن أربعة
      مو قارّات لبنات الحور
      وسواقين وخدم وأيامى
      ساكنين فوق في سابع دور
      طغوا واتجبروا نسوا خلق الله
      الجايعة وصابرة وساكنة جحور
      والجزيرة الكانت خضراء
      نشّفوا ريقة وارضها بور
      وبعد الخضرة الكاسية سهولة
      اصابا القحط وجفاف وفتور
      وحتى عجايب الدنيا السبعة
      زادوا عليها بكل غرور
      و(المانافع) سمّوه (نافع)
      والعمال قادُن (غندور)
      وتمّوا التاسعة بكل بجاحة
      وسوّا الناطق (ود مندور)
      ليكم يوم يا ولاد الهِرْمة
      حليل (حُمّيد) المات مقهور
      حروفك حيّة معشعشة فينا
      وانت رحلت بعيد مقبور
      وكل غناك الكان غنّيتو
      بين الناس موجود مذكور
      و(موسى مِتَيْ) و(السِيمَتْ) كانوا
      لمّان يخطبوا تنهض بور
      وكُلْ عمّال السكة حديد
      بصوتٍ واحد عالي جهور
      يهزّوا اركان القِبَل الأربعة
      لا صوت ديزل لا بابور
      بلّوا رؤوسكم جاتكم نيلة
      قريب تنقلب الضَلْمَة لنور
      تضوقوا الضاقو عقيد الغفلة
      البهدل ليبيا سنين ودهور
      وعاش في نعيم الدنيا الزايل
      حصّن نفسه السور ورا سور
      وبعد العز الزايل وزايف
      ولمعة ونعمة هناء وحبور
      بعينكم شفتوه وين متخبّي
      وسط انبوب بالسرى مطمور
      دحينكم جهزّوا حالكم تب
      عليكم جاي خلاس الدور

      (أبو سارة)

  10. يتقشف المواطن بدل الحكومة دي حكومة وين دي

    1. المواطن جلده تخن والحكومة جلها رق بس يا با شا

  11. الميتة ما بتمسع النائحة !!!
    احنا مرقنا ومافى رجوع , موت بى دم ولا موت بالجوع

    1. بسمع منك ربي آآآآآآآآآآآشمباتي وليتني كنت فيها جدعا واحده تفوووووووووووو عليك حكومة وبعدها ان شاء الله يلقطوني في قفة

  12. و الله العظيم سوف توقفون أمام الملك الجبار و تسألون عن دماء هؤلاء الشرفاء و سوف نعرف الحق حينها .. فهل جهزتم للمؤتمر ذاك .. يلا أحمد بلال و عبد الرحمن الخضر قدموا أقوالكم فكل البشر من أبو البشر آدم و جميع الأنبياء و الرسل حضور ليسمعوا !!!

    1. ياابواحمد موش لمن يعرفوا الله في الأول !!

  13. حمد الله على سلامتك وعوداً حميداً يا بروف، والله قلقنا عليك شدييييد من كلاب الليل لمن غبت عننا كتييير !! وعلى قول القائل:
    ( من أمن العقاب أساء الأدب ) .. ديل ما خايفين من الله !! بيخافوا ليهم من زووول ولا شعب !! أنت يا أستاذ تاعب نفسك ساااي وبتنفخ في قربة مقدودة تقول لي فساااد ؟؟ هم ما شايفين وسامعييين وفايت أضنينهم بل ومشاركين بأنفسهم وأهليهم رجالاً ونساءاً وبهربوا حصيلة سرقاتهم خارج الحدود وما (العشرة مليون دولار القبضوها أمبارح مهربة عبر مطار دبي إلا غيض من فيض !! وعلى رأي الشاعر: ( لقد أسمعت من كان حياً ولكن لا حياة لمن تنادي) وهي لله هي لله .. اللهم ولي من يصلح ولا تسلط علينا بذنوبنا من لا يخافك فينا ولا يرحمنا وعم بلادنا وسائر بلاد المسلمين بالأمن والسلام والأستقرار ورخص الأسعار يا كريم … آااااامين …

    كسرة مؤقتة:

    أخبار بتنا نسرين السرقوها نص نهار رمضان في شارع النيل بالخرتوم شنو يا وزير الدتخلية ؟؟

    1. تتحياتي نانو ابو احمد ونسرين زي شليل

  14. قالت بم قالت بم قالت بم قالت بم ان شاء الله تدوم

  15. اليوم فيه نسمه بدل الكتمه

  16. تخيلوا كدة معاى يا مدوناتية انو و على طريقة الثورة المصرية ،،، قوووول كدة الثورة نجحت و الجيش تدخل لحل الموقف،،. و قام السيد وزير الدفاع اللمبى ابو ريالة (زى السيسى كدة) استلم الحكم و بقى هو سيد الموقف و شكل حكومة ،،،، ماااااا الضحك شرطنا ….. الله يكضب الشينة بس. !!!!

    1. ههههههه وحات الله يا فلاديمير مرقت الثورة من نفسنا ,,,

      1. هااازول ريالتك كابه .. نوم نومك خلينا ننوم .. قبال ماتنوم .. دحين مسعول من الخير سمعت بالجني القالوا ابوهو عبد شايقية دحين هرب بي كم ؟؟ طيب الشايقي داك اسمو منو ؟؟ يااخي الزول اسمو قريب من مقشاشة يقوش ساكت .. يقوشو البلاء اليخومو .. الزول ده قالوا ليك شغال سمسار بترول .. ضرب بالملايين .. دحين في الأحداث دي سمعتو صوتو ؟؟ لا .. شوفتو ؟؟ لا .. صرح ؟؟ لا .. سمسر في البترول ؟؟ لا .. هاهاهاهاهاهاها ،،

    2. هههههههههه لذيذه وملعوبه صح يا فرده
      والله دا الفضل كمان بقينا ملطشه
      يا تري دي ح تكون حكومه نكته اقصد نكت قراط
      علي وزن تيكنوقراط ومش هو مساعد فني طيارات
      غايتو طفشونا ذاتو من البلد

  17. تصدق يا فلادمير إنو حكاية (أبو ريالة ) دي صحي صحي ما تريقة سااااكت !! أنا مره عزموني في مناسبة وكان (هو) معاي في نفس التربيزة قال بتونس ملاني ليك (بزااااق) كلي لمن قميصي زاااتو إتبلا !! (أوعك تقول أنا من السدنة يا جنوبي) .. وزي ما قال واحد من الرؤساء الأفارفقة عندما قام عليهو شعبوا عائزيين يغيروه وطلعوا مظاهرات (الشعب يريد إسقاط النظام) قال ليهم : ” هووووي يا عورة أخير ليكم أنا أقعد !! لأني أنا وناسي خلاااااس شبعنا ما دايريين نسرق تاني .. وبعد كده دايرين نشتغل للبلد أحسن من يجيكم واحد جديد جييييعاااان مع جماعتوا وكمان يبدو يسرقوا فيكم !! ” وفي مثل يقول ليك أرضى بي قردك ما يجيك الأقرد منو !! إتو كدي يا أخونا مسعولين من الخير ويييين {بتي نونا} من زمااان ما سمعنا منها حاااجة لا حس ولا خبر إن شاء الله خييير .. ما تكون إتلحست في المظاهرات دي ؟؟؟

    1. هههههههههه تبرأ انت ,,, سمح الوداك شنو !!

      1. انت يا الاخو كلامك ده كله غلط في غلط .. ده ما بزاااق ده مسك !! بتعرف المسك ؟؟ تلقاك عمرك ما سمعت بيهو .. خلو الناس الطاهرين ديل في حالهم ..

  18. المرحلة مرحلة تغيير .. يجب أن نركز على أدوات التغيير وحدها … ولا صوت يعلو فوق صوت المعركة … لا يجب أن يجف دم الشهداء قبل أن نغير هؤلاء القتلة الظالمين …

    1. والله يااب احمد كلامك ( صح ) ( بضم الصاد عدييييل كدي ) الجماعة ديل كان قعدوا اكتر من كدي الرماد كال الشعب السوداني !!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: