واسعة شوية

لو كنت مكان (الحكومة) لقمت بإستغلال كل أدوات (الإعلام) من أجل عكس صورة زاهية لما هو عليه الحال بعد (الإحتجاجات) الملتهبة الأخيرة ولحاولت بشتي الطرق أن أوضح للمواطنين و(الناس عموما) بأن الأمن بعد تلك الموجة قد إستتب وإنو السلع موجوووده والمواصلات فضيييياه ..
ولكن بعد أن شاهدت أحدى القنوات الفضائية الحكومية وهي تقوم بإجراء إستطلاع (قال عفوي) مع المواطنين في أحد الأسواق تأكد لي تماما ًبان هذا الإستغلال لم يكن (أميناً) وأن (الإعلام الحكومى) ممثلاً في تلك القناة لا يحترم (عقل) المشاهد البته ويبث ما يود أن تكون عليه الأشياء وليس كما هي عليه الآن وتعالوا لنعرض بعض مما جاء في ذلك البرنامج مع بعض الخيال (وبراكم أحكموا)
المشهد (نهاري) .. أحد الأسواق .. مسؤول من المحلية ومعه بعض الموظفين يجوبون السوق .. الكاميرا تتابع المذيع وهو يتوقف أمام بائع موز وهو يمسك بالمايك :
– معانا المواطن منو؟
– معاكم المواطن عبدالفضيل
– طيب يا عبدالفضيل .. الوضع هسه كيف في أي تخريب أو حاجه زي دي
– لا والله الأمن مستتب وقاعدين نرجع بيوتنا الساعة تسعة بالليل ومافيش حد بيتعرض لينا
– وقاعدين تلاقوا مواصلات ؟
– أيوه المواصلات قاعده والحمدلله وما فيها أي صعوبة (ياخي المواصلات بالليل معدومة)
– طيب البيع كيف؟
– والله قاعدين نبيع الحمدلله والزبائن كتااار (ليس هنالك زبائن على الشاشة)
– وبعد رفع الدعم ده الأسعار إتأثرت؟
– لا لا .. لا إتأثرت لا حاجة .. الأسعار نزلت (شوفوا جنس الكضب ده) !
– ممكن تورينا الأسعا كانت كم وهسه كم ؟
– كيلو الموز كان بى خمسة جنيه .. هسه بنبيعو بي تلاته جنيه وبالليل ممكن نبيع الكيلو بإتنين جنيه
(من الخيال) : بعد أن تنتقل الكاميرا لمكان آخر يتجه أحد المواطنين الذين كانو يستمعون للحوار
– بالله أديني 2 كيلو موز
– (عبدالفضيل يتفرس في القروش) : ديل ستة جنيه !
– مالهم مش قلتا الموز الكيلو بي 3 جنيه
– تلاته جنيه شنو يا زول إنتا جنيت ؟ إنتا ما سمعتا بالزيادات دي ؟ والله ولا راسمالو !!
(المذيع يمسك بالمايك ويلتقى بإحدي المواطنات)
– ممكن تعرفينا بى نفسك؟
– المواطنة ست النفر أحمد
– يا ست النفر هل لاحظتي أى زيادات في السوق؟
– والله الحاجات أسعارا ياها ذاااتا وفي حاجات كده كمان سعرها نزل (واااااسعة مش كده؟)
– يعني ما إتأثرتو بالقرارات دي؟
– لا ما إتأثرنا الحمدلله .. قاعدين نجي نشتري مستلزماتنا في أمان الله والقروش موفره وفايضة (شفتو كيف؟) !
– عندك أي رسالة يا حاجة ممكن توجهيها للمواطنين
– بالحيل .. عاوزه أقول ليهم ما تسمعو كلام الناس الطابور خامس ديل .. رفع الدعم ده ما أثر في أي حاجة والأسعار ياها الأسعار !
– (خيالي) : طيب يا ست النفر لو قلنا ليكي معانا سعادة المسؤول عن المحلية أهو قدامك تطلبي منو شنو؟
– (على الشاشة صورة المسؤول هو ينتظر طلب ست النفر)
– (متفاجئة وهي تخرج من النص) : والله بطلب منو يديني تصديق حته أبيع فيها الشاي في البرندات ديك عشان الحياه يا ولدي بعد الزيادات دي بقت صعبة وما محتملة والسوق بقى نااااار
كسرة :
ما قلنا ليكم ما تطمنوا المواطنين .. بس ما تخلوها واسعة شوية !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟

23 تعليق

    1. هههههه يعني بدون فلتر ؟

  1. انت يابروف لسع بتشاهد العفن ده !!!

    1. ههههههه صديقي امريكي انا التلفزيون دا بركبوه بي كم ما عارف هههههههه ياااااااااااااااااااه حليل التلفزيون وسنما النيلين

  2. يا ناس عليكم الله صحي ما قالت بم يعني رجعت كتمت كتمت كتمت تاني

  3. طيب يا أخوانا لو دا الحال هسع بعدين خروف الضحية حا ببقى بي كم ؟؟؟ وبالمناسبة يا ناس السودان إنتو ما عليكم ضحية تب لأنو الخرفان غاااالية وما عندنا ليها قدرة والضحية زي الحج ( لمن إستطاع إليها سبيلاً ) .. والحبيب صلى الله عليه وسلم ضحى بكبشين أملحين أقرنين واحد عنه وعن أهله، والتاني عن من لم يضحي من أمته .. وقصر الكلام ما في داعي تكلفوا نفسكم فوق طاقتها يعني الواحد يتدين عشان يضحي !!! لالالالا وألف لا ما تقول لي أولاد ولا مرة ولا غيرو يا أخي ما ضروووري !! ولا رايكم شنو ؟؟

    كسرة متحركة:
    أخبار بتنا نسرين السرقوها بالخرتوم في شارع النيل ونص نهار رمضااان شنو يا وزير الداااخلية يا بتاع المؤتمرات الصحافية ؟؟

    1. والله الشعب السوداني ذاااتو بقي في موقف زي موقف سيدنا اسماعيل !! لاكين المشكلة انو الشايل سكينو وواقف فوقنا ده ان جابو ليهو كبش يفدينا حيضبح الكبش ولاااااااا بيرفع سكينو مننا !!

    2. وود البشير ضحى بي شعب

  4. لم اؤمن في يوم من الايام بالعمل او السحر ولكن بعد السيول والامطار الاخيرة وتصريحات المامسئولين العرجاء واخيرا الكارثة رفع المواطن المسكين وتعليقه من رقبتو المسلولة اصلا (ليهو رب يحميهو)، آمنت إنو العين والسحر موجودة اي يااولاد ويابنات امي الحكومة دي عامله لينا عمل عند شيخ درجة اولي عشان مانفكر اصلا نعبر ولا نظاهر ولا نحتج علي ابسط حقوقنا والدليل قدامنا البيان بالعمل وغصبا ومابكيف اي زول بس بكيف الحكومة، العيش 10 بي الف خلال ستة سنوات اصبح 2 او 3 بالف والبنزين من 4000 الجالون خلال خمسة او سنوات لي كم وعشرين اها والناس عادي بتشتري وتكب بنزين وبتدفع بالغالي كمان والمشكله انو العمل بقي حتي لو كتلو لينا مواطنيين يعني موت عديل برضو الحال في حالو وده العمل هنا وحقو نبدا نفتش الشيخ الكارب ده وين لانو مامعقول الشغلانه جابت ليها كتل عديل عرفنا اكل قروشنا وجبايتها مننا رجاله و حقارة كده كمان جانا الموت والله يستر علينا من الفضايح الممكن تكون في ما بعد لانو نحن هنا وقد سهل الهوان علينا من ملة شيطانية..نسأل الله يحلنا منها سريع لانو الله بس البقدر بصراحة بعد استسلام المواطنين للحقارة والذل والمهانة.

    1. صحي ثورة اكتوبر دي كتلوا فيها القرشي ومعاه اتنين بس والشارع ده فار زي السيل هسي ديل كاتلين فوق ال 150 نفر ولاااا حصل شئ !! يا ربي القرشي بالقديم يساوي كم بالجديد !!

      1. قوية القرشي كان بساوي تقله دهب

  5. الحلقة دي انا شفتها واظنو في قناة الخرطوم والسوق الجابوهو ده طرابيز الخضار كلها فااااضية ومتكية الا كم طربيزة كده واحده فيها شوية طماطم وخضار وواحدة خاتين فيها موز ودستة برتكان موزعه !! وحتي الكاميرا مضيقين مجالا شان ما تفضح الموقف ..
    حتي في اتنين من البائعين ( الامنجيه ) كلامهم اتناقض مع بعض , واحد قال الامن مستتب والبيع كويس والتاني قال مافي بيع لانو الناس لسه خايفه من المخربين !! والناس الفي السوق كووولهم المذيع والكومبارس ما يتعدوا العشرة تنفار ,,
    هو كان رفع الدعم بينزل الاسعار عليكم النبي ارفعوهو تاااااني !!
    احد المسئولين قال رفعنا الدعم عشان ما تبقي في ندرة في السلع وترجع الصفوف تاااني ! شفتو المسعور ده قلبو علينا كيف ؟ والله برضو كتر خيروا يعني ما داير الشعب يتحرم من الفرجه !!

    1. المطر عنده عينات آآآآآآآآآجنوبي وطالما غيمة راح تمطر ان شاء الله بس ما دايره صلاة استثقاء عاوزه الشارع ورجعت كتمت

  6. وكتمت كتمت كتمت ما تجو يا ناس زعيط ومعيط وتقولوا حقتكم الشارع مرق ما عرفتو توجههو مناظركم كريهة صادق في ايه ومرغني من ايه وترابي بتاع ايه واحمر علشان ايه تفو عليكم احزاب يعني الشارع يجبها ليكم في صوالين بيوتكم الكل يغور والشارع بس الناس البتموت بس

  7. يا جماعة الخير حصولونا الليلة شوف عيني وما حكاوي جوناس في بكس لي بتاع البقالة الجمبي وشالوالميزان ومرقو
    انا:يا اخونا مالك الحاصل شنو
    بتاع البقالة: ديل بتاعين ختمالميزان
    انا: و يختمو الميزان كيف (طبعا الفهامة العندي صيني و ما طوالي شغالة)
    بتاع البقالة: انا عارف اهو جايبين ايصال بي 71 الف جنيه و كمان ختم لي الميزان الالكتروني
    شوية والصبي بتاع البقالة جا خاشي معاهو الميزان المختوم
    انا: كدي وريني الختم النشوفو لي الدنيا بنعرف الختم في اللحمة
    بتاع البقالة بقى يقلب يمين و شمال في الميزان
    بتاع البقالة:يا ولد ما قلتة ختمو وينو الختم
    الصبي: والله ختم صغير ما عارف ختاهو وين
    بتاع البقالة: يختم ك……… و الله يطلع ……….. و ………. نستاهل نحن ما هم ارجل مننا و نحن راقدين قش
    انا: الله يعينك و نشوف عمنا جبرا يشوف لينا موضوع ختم الميوان الجديد دهشنو
    يا اخوانا في واحد كتب انو الطريق الى السعادة هو الطريق المؤدي الى صالة المغادرة و تكسر انت وراك زيرين
    يا المغتربين حزاري من الرجوع الى هذه المزبلة

    1. ياشرقاوي يا اب مخا تقيل إنشاء الله في ميزان حسناتك !!

      1. انتوا المعلقين ديل ناموا ولا شنو ؟؟ اصحوا هييي قالوا اكتشفنا ( ماس) أي والله مااااس وكمان حنصدروا !!!!

    2. و الميزان خاتمنو فوق شنو؟ يعنى زى ختم ناس الضرايب فى الايصالات عند المحلات؟ طيب بعد دة المفروض يختمو لينا مفتاح قزايز البيبسى, و كمشة الفول, و حتى صحانة الالمنيوم المطفقة البناكل فيها البوش, و ياريت صناديق البيبسى الفاضية البنقعد فيها !!!! ان شاء الله زى ما قال سيد البقالة (يختم ك……… و الله يطلع ……….. و ……….) و !!!!!
      بلاش – بس خلاس على قولة (شعبولا) …

      1. ما نحنا ديل !!! والله بكره يختموا لينا ك …… وبرضو ما ننضم , غير نحرق لينا كم لستك وكم لباس وبس خلاص …
        ختم الميزان لدعم الكيزان …

      2. هييييييييييييييي,,
        خلوا اللباسات فى حالها !!

  8. لا ياس مع الحياة سنقلعون عما قريب

    1. اليوم الخميس ٢٠١٣/١٠/٢ قدمت قناة الجزيرة ( علي غير العادة ) قدمت خدمة كبيرة للشعب السوداني ، بعرضها لفيلم وثائقي عن ثورة ٢١ أكتوبر .. حيث كان الهتاف ( بعد ان اتفق الثوار الي التوجة نحو القصر ) الرصاص لن يثنينا .. الرصاص لن يثنينا .. ما رأيكم دام فضلكم ؟؟!!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: