خليتوا لينا حاجة؟

مؤخراً أعلنا إنشاءنا لجمعية (مستغرشون) وهي جمعية تعني بتسليط الضوء على تصريحات بعض المسؤولين التي تصيب المتلقي بالإستغراش (الإستغراب والدهشة) وقد إنتشرت مؤخراً هذه النوعية من الإفادات والتصريحات الغريبة الشئ الذي حدى بأحدهم أن يعلق قائلاً : الجماعة ديل بيجيبوا (الصنف) ده من وين؟
تعالوا معا لنقرأ ما ّأفاد به السيد (قطبي المهدي) وقد تم سؤاله عن تأثير القرارات الأخيرة على المواطن وذلك على القناة الإخبارية (سكاي نيوز) ، قال لا فض فوه :
– ﺍﻟﺸﻌﺐ ﺍﻟﺴﻮﺩﺍﻧﻲ ﻟﻦ ﻳﺘﺎﺛﺮ ﺑﻬﺬﻩ ﺍﻟﺰﻳﺎﺩﺍﺕ ﻷﻥ ﻣﻌﻈﻤﻪ ﻳﺴﺘﺨﺪﻡ (ﺍﻟﺪﻭﺍﺏ) ومعظمهم يآكلون (الفيتريتا )!
كان من الممكن أن يكون الإستغراش قليلا لا يؤثر على (وظائف الكبد) أو (سلامة المرارة) لو أن هذا (المهدي) قدس الله سره لم يستخدم كلمة (معظم) والتي تفيد الكثرة والغلبه (يعني لو قال بعض ممكن كان تكون مبلوعة شوية) لكنه (أصر) وألح إلحاحاً بأن معظم أفراد الشعب السوداني الفضل يستخدمون الدواب من بغال وحمير وحصين في تنقلاتهم وحلهم وترحالهم لذا فإن زيادة أسعار (البنزين) لا تشغلهم كثيراً ما دام ليس هنالك زيادة في أسعار (البرسيم) !
بالطبع كلام غريب وعجيب لا يمكن لأحد أن (يفكر) فيه وإن فكر فيه أن (يتفوه) به وإن تفوه به أن يتفوه به على قناة فضائية يشاهدا كل العالم ليشهد ويتأكد بما لا يدع مجالاً للشك بان بعض مسؤولينا من أصحاب (الإعاقات الذهنية) .
منذ زمن بعيد والعبدلله ينادي بإزالة التظليل الذي على زجاج (دواب) المسؤولين وأهو دي النتيجة فليس هنالك أي تفسير لما أدلي به سعادة هذا المسؤول سوي أن هنالك خلل في تظليل زجاج (دابته) جعله يري أرجل المواطنين وقد تقطعت (سفنجاتهم) وبليت (مراكيبهم) وعلاها الغبار كأظلاف الدواب !
في ظل هذا النوع من الإفادات التي صرح بها هذا (القطبي) لم أكن (لأستغرش) لو أن الحوار إستمر على الوجه التالي :
– وكيف يا سيد قطبي تقومون بتوفير العلف والبرسيم لهذا العدد المهول من الدواب !
– (مبتسماً) : لا تنسي يا سيدتي أننا بلد زراعي لديه (نفرة زراعية) وكده !
– وكم يبلغ سعر (لتر) البرسيم الآن
– والله هو رخيص لكن ما عارفو بي كم؟ عشان أنا (دابتى) بتستخدم (برسيم سوبر)
– هل تؤثر (فضلات) هذا الكم الهائل من (الدواب) على نظافة مدنكم؟
– لا… لا أبداً فالمواطنين من الثراء بحيث كل زول عامل ليهو (بامبرز) لى (دابتو) !
– إذن كيف توفرون هذا الكم من البامبرز وهل هو في متناول الجميع؟
– البامبرز في متناول الجميع .. والحكومة تقوم بدعم البامبرز !
– وإنتا سعادتك عامل بامبرز لي دابتك؟
– لا .. لا لأنو كلما (تجي تعملا) بنوديها (ماليزيا) تعملا هناك وتجي !

وكلو كوم وحكاية (الفتريتا) دي كوم تاني .. يا جماعة أبقوا ليكم على حاجة يا نحنا شعب فقير و(عين أبو أهل الخلفوهو) طالع وبياكل (فيتريتا) … يا شعب مرفه ومرطب ومرتاح وبياكل بيتزا وهوت دوق !!

كسرة :

بفي أن نعلم ان هذا (القطبي) الذي يقول بأن معظم أهل السودان فقراء يمتطون الدواب ويأكلون الفتريتا قد سبق وتمت سرقة المبالغ التالية من منزله :
(91) ألف جنيه سوداني و(13.140) يورو و(11.360) فرنك سويسري و(645) ألف ليرة لبنانية و(420) ألف ليرة سورية و(20) ألف جنيه مصري و(9) آلاف ريال سعودي و(5) آلاف جنيه استرليني و(26) ألف دولار !!!
فعلا والله نحنا فقراء هو غنتو خليتو لينا حاجة !!

– كسرة ثابتة (قديمة) :
– أخبار ملف خط هيثرو العند النائب العام شنو(وووو وووو وووو وووو وووو)+و+و+و؟

– كسرة ثابتة (جديدة) :
– أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟

24 تعليق

  1. نقول برنجية؟ بعد إذن السادة المدوناتية !!!!

    1. لك تحيتي ولك كل البرنجي

    2. نقول مبروكة ..

  2. الأخوة المستغرشون فقدوا المنطق تماماً حتى مافى حد قال بغم !!! تحياتى

    1. و الله فعلا يا ام ايمن,, نقول بغم شنو !! اصلاا الواحد ما عارف يضحك و الا يبكى و الا يندهش و الا يستغرب و الا (يستغرش) ,, ,, ,, قبل مدة ليست بالبعيدة شاهدت مقطع باليوتيوب عن احد المسئولين (و أحسبه النائب الثانى للرئيس) عندما سألوهو فى قناة فضائية عن ارتفاع الاسعار و خاصة صحن الفول اللى بقى ب(5 جنيهات وقتها – مامعروف هسة بقى كم) قال: و يا أختى هل ارتفاع الاسعار هذا محمدة ام مفسدة؟ فاندهشت المذيعة من سؤاله !!! فتابع (تقدس سره): ارتفاع الاسعار هذا يعود بالنفع على المزارع السودانى, حيث ان الفول يزرع فى السودان و بيعه للمستهلك بسعر عالى يجلب الفائدة على المزارع, و ايضا ارتفاع اسعار مكملات صحن الفول التى تزرع بالسودان ايضا كالبصل و السلطة و الجبنة تعود لمنتجيها بالفائدة ,,, زى دة يقولوا ليو شنو عليكم الله ؟؟؟

  3. فاتت عليك يا بروف ان هذه الأموال التي سرقت من هذا النكرة كانت عبارة عن قيمة البامبرز لدابتة لمدة شهر واحد فقط !!

  4. برنجيه

    دا بيت ولا صرافة كل هذه العملات

  5. يا جبرة الناس ديل اكيد بيتكلموا عن شعب تانى غايتو ديل م نحن …مفروض تانى ناس القنوات الفضائية يسالوهم عن اى شعب يتكلمون

  6. لعنة الله علي بني كوز

  7. مقهورين وساكتين | رد

    سمح القال انو اذا اﻻسرة دخلها في اليوم 2دوﻻر تعتبر أسرة غنية
    ده يفقع شرايين المخ عن بكرة ابيها
    حقو تيجيبوا لينا الفهامة علشان نحسب بيها الغنا ده

    1. وغلبانين تقبل مروري

  8. فعلا نحن خلاص بقينا ملطشة وزريبة فاتحة ساي وجنينة وغفيرة ميت واي زول عندو اي فضلات او روث كلام يجي يكبو لينا ويفوت معقول ديل انحن، وداوب كمان والله لقد بلغ السيل الذبي وبلغت القلوب الحناجر وفاض الكيل وسال علينا، طيب لو بنركب الدواب باصات الوالي لشنو وجمارك سيارات لشنو ومنع استيراد العربات المستعملة لشنو بل واساسا بنزين لشنو مدام انحنا مابنستعملو ياقطبي ياود الح..انت لو راجل قول كلامك ده في السودان في اي شارع وتكون براك مامعاك كلاب لهب بتاعنكم ديل لانو انتو من غيرهم مارجال، دواب ياراجل ياناقص عقل ودين الله بسألك ده كلامك ولا ملوك ليهو عشان تقولو وضميرك اصلا ميت من زمان وعقلك ماف اغراك مال الناس وداست عليك شياطين الشهوة والسلطة، قال رسول الله صلي الله عليه وسلم (اتق الله واتبع السيئة الحسنه تمحها وخالق الناس بخلق حسن) توب واستغفر واتطهر عسي ربنا يقبل تفاهات القول بتاعتك دي واكيد انت مسير مامخير لكن ضميرك وعدم انسانيتك املت عليك الكلام الفارغ ده وتأكد انو الناس بضحكو عليك وعلي امثالك فيما تتخبطون عبث الكلام والمنطق وارجع لي دينك.

  9. كلامك ده طمني شوية يا استاذ .. انا بديت اعتقد جازما انو انا من الفئه القليله (المندسه) البركبوا مواصلات و ما بياكلو هوت دوق لكن اهو طلعنا كتار و لا قليله ولا حاجه … ده اذا ما اتضح انو باقي الشعب الفضل فئة مندسه برضو و احتمال يكون جهه غير معلومة

  10. بلد غفيره نايم كتمت كتمت كتتمت شدوا حيلكم

  11. اخى جبرة والاخوة اكلى الفيتريتا وراكبى الدواب ديل مافيهم رجاء ضميرهم مات من زمان كل مرة بياكلوا الشعب الفضل حاجة كسرة بيتزا هوت دوق فيتريتا والله الكلام ده فقع اى حاجة ورفع الضغط والسكر قاصدين انه باقى الشعب يموت مغص ساكت حسبنا الله ونعم الوكيل نشوف فيهم يوم ليس على الله ببعيد

  12. * قطبي المهدي ترك الجامعة في السنة الثانية , ويحمل الان لقب الدكتوراة !! يعني مشكوك في المؤهل الاكاديمي .
    * مره أدي ليهو فكي قروش عشان يضاعفا ليهو بواسطة السحر والشعوذة , والفكي غنج بالقروش والمصيبة هو ماااا سكت وفضح نفسه !! يعني مشكوك في ايمانه وبرضو في قواه العقلية .
    * يحمل الجنسية الكندية والقرين كارد الامريكي ! يعني مشكوك في انتماءه لهذا الشعب عشان كده ما مؤآخذ لو ما عرفنا ..
    * لاكين صراحتن قالوا في الانجليزي لهلوبه .. عشان نكون حقانيين ..
    هو شغال شنو ؟

    1. لهلوبة هسه والا زمان أأأأأأأأأأأأأجنوبي

  13. دابة هو والعينو @@
    اتفوووووووووووووووووووه

  14. الاخ جبرا و السمار
    لدي اقتراحعملي و جادي جدا و الرجاء من الجميع المشاركة و التعليق عليه و هو كالاتي:
    يقول المثل اذا لم تقدر اصطياد الدب لقوته فاستخدم قوت الدب ليقتل نفسه و هو ان الدستور الذي و ضعه هؤلاء يعطي الحق بانشاء الاحزاب السياسية و تسجيلها رسميا بحيث تكون شرعية و لا يمكن اعتقال افراد هذا الحزب جزافا و نحن في مدونت ساخر سبيل عدد مهول و كفاءات و خبرات متنوعة في شتى المجالات و اجتماع على حب هذا السودان و هو الاهم فلماذا لا ننشئ حزب يضم كل المشاركين في المدونة و غيرهم من الحادبين على حب هذا الوطن و دخول معترك الانتخابات القادم .
    (الكلام ده ما جنون و لا هرطقة) ارجو من السيد جبرا و الاخوة دراست الفكرة و اعطاء مقترحات حيث اثبتت الاحداث الاخيرة ان هذا النظام لن يتورع عن ابادة الشعب برمته اذا خرج الشارع لانهم يعلمون العواقب من محاسبة على جميع الجرائم و لكن لايمكنهم ذلك عبر صناديق الاقتراع.
    و دمتم

    1. لكن هي الانتخابات وينة مش ياها المزورة دي ولا غيرا
      نسأل الله أن يجعل كيدهم في نحرهم وتدبيرهم في تدميرهم وأن يرينا فيهم يوم كيوم عاد وثمود
      وعلى قولة عمنا الغلبان هي كتمت وغير بمب مابنفع

    2. اقتراح وجيه ان شاء الله يكون حزب التوجيه والتحريض بس

  15. اولا انا لن اعقب علي تصريج هذا القطبي لانني قررت ان لا ارد علي اي تصريج من مسؤول (غير مسؤول) سوداني و ذلك تمشيا مع قول الشاعر (يخاطبني السفيه بكل قبح ** فاكره ان اكون له مجيبا).
    ثانيا : اثني علي اقتراح الاخ شرقاي بتكوين حزب جديد و مفيد لاننا هرمنا و نحن ننتظر ان تفعل احزاب الكرتون دي حاجة للشعب الفضل و لكن هيهات لمن تنادي. خاصة ان احزابنا صارت من اهل الخطوة فهي تتواجد في مكانين في أن واحد فهي متواجده (مجازا) في المعارضة و كذلك متواجدة (فعليا) في الحكومة.

  16. إنتو عارفين يا مستغرسين ديل زي ما قال عليهم الأخ (جنوبي) وأنا قمت عليهو ولومتو في إستخدام اللفظ (الغير لائق) بس بيني وبينكم يستاهلوا القالو عليهم جنوبي !! ديل عندهم ( لــــ …..,,, فكري ) أنا ما بقدر أكتبها لكن يستاهلوووها بجدارررررة ..
    وينك يا بتي نونا قاطعة موية ونور مالك ؟؟ وشكراً ليك عفيتيني من رسوم الأشتراك … تحياتي للجميع سلاااااام …

  17. ليس لنا غير الدعوات والتضرع لله تعالي بزوال هذا النظام الفاشي الفاسد الحاقد الدنئ المسيئ لنا ولكرامتنا، ياجماعه الناس ديل مزقو السودان مانفع قطعوهو كعكعه ووزعوها برضو ماقنعو اكلو قروش البترول ماقنعو اكلو قروش الزكاة والضرائب اكلو قروش الناس ماقنعو شردو ظلمو بغو افسدو كذبو صرحو مانفع قتلو واعتقلو وبرضو ماحينفع لا نحن حانعمل شئ ولا هم حايقنعو.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: