عبدة الشيطان

هل تود عزيزي القارئ أن تصبح بين عشية وضحاها من بين أصحاب الفلل والعمارات وقضاء الإجازات بين مانيلا وكوالا لامبور ؟ عليك فقط أن تتجرد من إنسانيتك وتنسي كل ما قاله الله تعالى والرسول الكريم وتقوم بتوطيد علاقتك بالشيطان ثم تنشئ (منظمة خيرية) وتقوم بتسجيلها لدي السيد مسجل الجمعيات الخيرية والطوعية .
ثم تبدأ في ممارسة عملك الإنساني (أقصد الشيطاني) وذلك بأن تقوم بشراء ما تستطيع من الأدوية ذات الربحية العالية (من شركات إستيراد الأدوية) والتي يتم التداول فيها لاهميتها مثل (المحاليل الوريدية) ، كن مطمئنا فلن يسالك مسؤول عن علاقتك كمنظمة خيرية بدنيا الدواء بل إن أردت فسوف تحصل على شهادة من إدارة الصيدلة بولاية الخرطوم تتيح لك (مزاولة المهنة) تضعها على مكتبك في مدخل المنظمة !
بعد ان تقوم بشراء (ما إستطعت) من دواء بسعر الجملة المخفض من شركات الأدوية لا تهتم لمسألة تخزينه ووضعه في غرف ذات تبريد وتكييف مما يكلفك الكثير فقد راينا بأم أعيننا كيف أن كراتين الدواء (وفيها أدوية شراب) توضع في (السهلة) متعرضة لأشعة الشمس الحارقة !
لا تهتم لمسألة العرض والطلب فأنت الآن تحتكر الدواء (الفلاني) وما عليك إلا إرسال مناديبك للصيدليات والمؤسسات العلاجية العامة والخاصة .. لعلمك التام لا تخسر (قروشك ساااي) فليس يشترط وأنت تسوق (دواء) أن يكون مندوب مبيعاتك (صيدلاني) قم بتعيين أي (زول ) والسلام (مفيش حد ح يسألك) !
بما إنك تحتكر الصنف المعين من (الدواء) وبما أن (المرض) لا ينتظر فأفرض السعر الذي تراه ليس مهما حكاية (إشتريتو بكم) .. ضع 40% 50% 70% إنتا وكيفك ولا تنسي أن تضاعف السعر لو الدفع كان (آجل) وكده وذلك من أجل المزيد من الربحية وإن شاء الله المواطن ما يتعالج ذاااتو .
لا تقلق ولا تخف وأنت تجني أرباحك الطائلة من معاناة وفقر ومرض أفراد هذا الشعب السوداني الفضل
فأنت لست وحدك هنالك عشرات المنظمات التي ترتدي اللبوس الإنساني وتقوم بهذا العمل الذي يتردد (عبدة الشيطان) ألف مليون مرة في القيام به .
هذه المهزلة عزيزي القارئ مستمرة لأعوام مضت ولا زالت تحدث تحت بصر المسؤولين بالدولة ومعرفة كل الجهات المختصة كالمجلس القومي للأدوية والسموم ، الهيئة العامة للإمدادات الطبية، إدارة الصيدلة بوزارة الصحة الاتحادية ، إدارة المنظمات الطوعية بوزارة الصحة ولاية الخرطوم وربما (الأمن الإقتصادي) !
لا تسألني أيها القارئ الكريم ما علاقة هذه المنظمات (الخيرية) والمتاجرة بالدواء التي لها لوائح وقوانين والتي ليست بالطبع من ضمن نشاطات هذه المنظمات .. كما لا تسالني عن صهينة (الجهات المسؤولة) عن هذا العبث بأرواح وصحة المواطنين فالفساد كما تعلم يا عزيزي أصبح (بالمفتشر) – هيثرو وكده- وغالبية أصحاب هذه المنظمات التي تقوم بهذا العمل (القذر) – وهي مرصودة لدينا – مسنودة من قبل متنفذين في هذه الدولة التي لا يفتئ مسؤولوها يصرحون بإجتثاث الفساد من (شأفته) !
يقيني إن الدولة إن لم تتعامل مع هذه المنظمات (الشريرة) بالحزم الكافي وفضحها ومعاقبتها أمام الرأي العام ومصادرة العقارات ورؤوس الاموال الخاصة بها وإيقاف نشاطها الهدام هذا (بأسرع ما تيسر) فسوف يأتي ذلك اليوم الذي يقوم فيه الشعب نفسه بهذه المهمة ولن تنفع حينها (الجقلبة) .. قال أيه ؟ منظمات (خيرية) !!

كسرة :
(هي لله) … أنا بقصد كتابتي دي !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟

Advertisements

44 تعليق

  1. منظمات غسيل اموال

    1. تسلموا يا جداد النت .. مرحبتين وحبابكم ..

    1. حمدلله على السلامة يا مستغرش ،،،، جيت بسيارة و الا فى دابة؟؟؟

      1. ههههههههههه,’,
        قصدك جا بى قطبى !
        لوووووووووووووووووووول

      2. دابة عمك قطبي دي موسمة لاقتني واحدة بي جاي

    2. مستغرش رقم واحد

  2. فى زول قال غير كده … هي لله

  3. طمنا يا بروف اليوم ده متين ؟؟!! نحنا خلاص قرفنا من اكل ال Hot dog ..

    1. هههههههههههههههههه,,حامضة منك لكن !!

  4. وانا كواحد من الناس الاتعاملو مع المواضيع دي بحكم ادارتنا الطبية لبعض مراكز السودان الصحية او احدى مستشفياتها فكتييييييييييير اشترينا من منظمة الشهيد(———– )الله يرحمو والسعر اقل من سعر الامدادات الطبية التي من المفترض تكون هي الاقل سعرا وبحكم موقعك العملي فبتفتش السعر الاقل عشان الشغل يمشي لانو ما ممكن تشتري من صيدلية عادية وتبيع للمواطن تخسر انت وما ممكن تبيع بي سعر خرافي ( عشان تستفيد انت) وعيان واحد يسلم عليك ما في وعلي عينك يا تاجر اقصد يا مسعول

  5. كل مسئول هو مذنب ومجرم ويسألو الله الخلقو يوم يفر المرء من اهله بس كل المسئولين من رئيسها لي غفيرها مشتركين في هذ الاجرام.. وقوة الوش + قوة الراس + عبادة الشيطان فرائض وسنن هي الموصلانا لي كدة.

  6. انتو جبرا بجيب الكلام ده من وين يا اخوانا ده ما بلد دي مزبلة بؤرة فساد غرزة اي حاجة غبر انها تكون بلد فيها حكومة وشعب

    1. تم تفريغ الدولة بمنطق التمكين واستلم الوظايف من لا يدري عنها شئ كل الوظايف القيادية وحتى الوظايف الكشا مشا احتكروها وكلهم اتو بمبدأ واحد هو النهب زي ما قال التيس الريئس النهب المصلح وما زال النهب المصلح قائم منذ ان قال كلمته وهذه كانت قبل سنتين الا شوية وما زالت كسرات اخونا البروف قائمة شفت العجب

      1. يحكي ان الحاجة رقية كان لها تيسا أمريكيا حيث قمن كل نساء الحي باستلافة ( أي التيس ) ليقوم بالواجب تجاه غنمهن ، وقد كان .. إلا واحدة منهن ، جاءت تشتكي للحاجة رقية ، فما كان من الحاجة رقية إلا ان طلبت منها ان تأخذ غنمها وان تقوم بتدليكهم ( بالدلكة ) .. والله دي قصة واقعية ، ليست مستوحاة من روايات المرحوم الطيب صالح .. اها ياغلبان .. التيس منو فائدة وبعرف كمان ..شوف ليك حاجة تانية ..

  7. لا لا ما تظلموا الشيطان يا جماعة !! ده حتي الشيطان لما يلاقي زول افرط بيوعظه وبقول ليهو إنما نحن فتنة فلا تكفر ,,
    الادوية في كل الدول بيجي سعرها مطبوع في الكرتونة ومن خروجا من المصنع محدد ربح الوكيل كم وربح الصيدلية كم وحتتباع للمواطن بي كم !!!
    هي المنظمات الخيرية دي في كوارث السيول كانت وين ؟
    تتذكروا لما وزير المالية السابق عبد الوهاب وقف المنظمات الخيرية وبقي يعاملها زيها زي التجارية ؟ تلاتة سنوات سعر الدولار ثبت وما زاد تعريفه واحدة لحدي ما تآمروا عليه اساتذة الشيطان وطيروهوا من منصبه وعاثوا في الارض فسادا ..
    يا ربي رجعوا ليهو قروش الفنادق المحجوزة ؟ والله صحي هي قمة ولآ شهر عسل !!

    1. وزير المالية دا برضو قال في البرلمان ( في عون ياباني قيمته 200 مليون دولار خش البلد وما وصلني في وزارة المالية ) !!! يكون طش يا ربي ؟؟؟؟؟

      1. و الا يكون لسة فى السكة, جايهو على ظهر احدى دواب السيد القطبى !!!

      2. هههههه خلي البروف يوديهو لي عواطف الوداعية حقت أبروف يمكن توريهو !!
        غايتو في 10 مليون محجوزة في مطار دبي لاكين ال 190 دي الا عواطف ..

      3. قت ليك يا ركس : اها ولما قال كده رئيس البرلمان قال ليهو شنو ؟
        تعرف برلمانا ده زي حريم الجزُر !

      4. يازول الطشاش اليمسكك انت ما بتشوف العمارات الواقفة دي ؟؟!! قال طاش ما طاش !!

      5. فعلا يا جنوبى,, مش هناية ديك قالت ليهم: يخسسسى عليكم ؟؟!!

      6. انتو يا اخوانا أمريكي دا امريكي صحي صحي ولّا شنو ؟؟؟؟

      7. نعم يا ركس والله امريكي صحي صحي .. بس الموجعني ياركس هنا ما عندكم عدالة زينا … هناك يا ركس يا أخوي عندنا واحد زايد واحد يساوي اثنين .. عندكم يساوي كم ياركس ؟؟ هناك ما عندنا فساد ورشوة ومحسوبية يا ركس يااخوي ( الفساد المالي ) .. أنا كنت مع ولدي عند الدكتور .. وجيت طوالي قرات تعليقك .. عارف العلاج شال مننا كم ؟؟ اسكت ساكت .. ياركس هناك أولادي كان عندهم تأمين صحي ، بس ما زي حقكم ياركس .. هناك الإنسان بني ادم يا ركس .. تسألني تقول لي جبتهم من هناك ليه ؟؟ جبتهم للوطن ..

  8. كلامك في محلو وكلو حاصل ومش بس الادويه وهناك حاجات تانيه شي مواد اغاثه وحاجات تانيه مانعاني ودي بتعرفها عواطف الوداعيه

  9. احييييييييي ، بس. قلبي وجعني ياخواني !

    1. تبري انتي من وجع القلب يااختي ، وجع القلب لي عدوك ..

      1. يا خوي كل الشعب الفضل قلبه واجعه دحين عزينا نحنا كلنا كتمت ياخ

      2. افووو ياغلبان !! الراجل بعزوهو كمان .. الراجل بشيل تارو بي ايدو ..

      3. حرقتني تيس الحاجة رقية بتاعك ده المدلك انا غايتو سمعت بتيس ست نفيسة واسال الاخوان القدام في القمردينة ناس فلادمير وجنوبي والعبيد تيسك دا براهو يا خوي

  10. يعني رزق لما قال الأرزاق علي الله كان كلام جمعيات خيرية ولاهي لله

  11. الجمعيات الخيرية دى زى الدنيا ,محش واخد منها حاجة !!
    وهاك هاك البجقلى دا

  12. الخيل تجقلب زي الشرارة في القندول وكتمت كتمت كتمت

    1. يا غلبان انت شابكنا كتمت كتمت .. ما سمعت وزارة الصحة قالت شنو ؟ قالت ليكم ما تفرطوا في اكل لحم الأضاحي .. يعني ممكن تاكلوا hot dog .. هو في اضاحي يا بروف ؟ منتظرين الإجابة ..

      1. الغلبان حكايته طويلة والله يا امريكي عن جد وحكاية محزنة وثار شخصي بيني وبين (الذين صار الشيطان يعبدهم) من ارقى مكان لاتعس مكان و90% من السبب هم والعشرة في المية سوء تقدير من العبد لله بس املنا في ربنا كبير وانا في مكان الكتمة الاصلية الان ليبيا من شارع الكترا وشارع الجوازات وشارع الكورنيش والمولات الى طاخ طاخ طاخ يعني لو كنت ايام نفست شوية في السودان لي هسع كنت في الشارع بظاهر او كنت لحقت امات طه لا فرق تقبل تحياتي امريكي

  13. كتمت في ليبيا يالغلبان واصلها كاتمه في السودان متعوده دايماااان

  14. حاولنا تحرقص على البرنجية ما صار منه عموما عيدكم مبارك وان شاء الله عندكم خرفان التقصيد وزادو ليكم الرواتب ههههه حكومة مجنونة كان كل الناس شغالة بالحكومة السواد الاعظم على بابا الله زادو الرواتب ما زادوها خرفان بالالتقصيد خرفان بالايجار كله ما نافع بالله عليك دي طريقة دي وبرضه كتمت كتمت كتمت

    1. يا غلبان والله غلبتنا عديييل كدة الشغلانة بالتقسيط وليس بالتقصيد .. وانت إذا عايز ( تقصد ) ، أحسن ليك تضحي بي تيس .. اخير ليك من ( التقصيد ) ، تيس يكون جدع أو ( وتني ) .. كل سنة وانتوا …..

      1. اخي امريكي التقسيط هي لغة العرب المقعدة بس انا بحب هنا اكون على سجية محمد احمد وهاك التقسيط بتاع الخروف تاني وانا ضحيتي جزم بي تيسك المدلك الفوق داك

      2. اكان كدي أمانة ما ضحيت ااخوي يا غلبان .. هنيالك …

      3. المدلك دا تانى وين تلقى !
        هيييي يكاااااااااااااااااا

  15. اها يا امريكي كتمت تيس خروف كتمت ان شاء الله كتمت الضحية دي تجيب ليها كتاحة وهبوب

  16. مرحب بي بتي نونا بعد طول غيااااب وإنتظاااار، وحباب كل الغائبين زي أخونا جنوبي المختفي من فترة أنا كنت قايل (كشووووهو) في المظاهرات ودقوا ليهو خروووووج نهائي لي بلدو نمولي !!! أما حكاية الخروووف دي حاجة تاااانية ما عندنا قدرة للأولوفات (الملايين) حقت زمااان دي .. غايتو ممكن الواحد يضحي بي جدادتين مش الحكاية أب أربع ؟؟ خلااااس دي أربعة كرعين والله يجازي الكان السبب وحليل أيام كنت بلعب شدت مع علي دينار (زي ما قال جنوبي) أيام الخروووف بي جنيه ولو أشتريت 10 يدوك 2 زيااادة !!! مش كده وبس علي الطلاق بالتلاتة كنت مربي الخرفان في البيت (الزريبة براها أربعمية “400” متر) وحرم بهايمي كانن بياكلن (منقة) أها شن قولك يا جنوبي لو سامعني ؟؟؟ كل سنة وأنتو طيبين وتااامين ولاااامين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: