بس عجور

العبد لله قلما يشاهد قنواتنا السودانية وذلك لأسباب لا تخفى على الجميع فمعظم ما تبثه هذه القنوات إعلام فقير وفطير ولكن على الرغم من ذلك فالعبدلله قد رماه حظه العاثر قبل يومين في برنامج على إحدي هذه القنوات ، البرنامج من تقديم شاب يافع في مقتبل العمر ، منذ أن أعلن ولدنا مقدم البرنامج عن موضوع البرنامج حتى تأكدت أنه وضيوفه الكرام لا ينتمون إلى كوكب (المواطن) المطحون فالموضوع يا سادتي كان عن (عزوف الشباب عن الزواج) يعني بالعربي كده (ليه شبابنا ما عاوزين يعرسوا ؟) مما يعني ضمنياً (أن الموضوع في أيدهم وما عاوزنو) ! ، بالطبع أي مواطن بالغ عاقل رشيد يعيش بيننا على كوكب (المواطنين) يمكنه الإجابة على هذا السؤال موضوع البرنامج دونما تردد :
– يعرسوا بي شنو؟ وكان عرسوا يسكنوها وين ويعيشوها كيف ؟
قبل مواصلة البرنامج تأكدت من تناولي لحبوب القلب والضغط والسكري كإجراء إحترازي .. ضيفا البرنامج كانا (عالم دين) وعالم طبيب متخصص في وظائف الأعضاء وكمان (الإجتماع) .. العبدلله ظن وليس كل الظن إثم أن وجود عالمين متخصصين في الدين والطب والإجتماع كفيل بالتحدث عن الأسباب التي أدت إلى إستحالة التزاوج الشرعي بين الشباب وهي أسباب متشابكة ومترابطة تتحمل الدولة معظمها ولا أمل في القضاء عليها في ظل ما يحدث من إنهيار إقتصادي رغم الآثار السلبية على الفرد والأسرة والمجتمع ككل الذي ولدته وتولده هذه الظاهرة .
طفق الضيفان يتحدثان عن أيام السلف الصالح وكان الأجدر بهما الحديث عن (الخلف الطالح) فقد اختلفت المعايير وكيفية الحياة بين الزمنين بل إختلف (الحكم الرشيد) الذي جل همه توفير الحياة الكريمة للرعية وجاء (الحكم العنيد) ذو (الهبر الشديد) الذي لم يعر الشباب أدنى إهتمام حتى أصبح في عهده تأمين السكن وتكاليف الزواج أمراً عسيراً بل مستحيلاً فإنتشرت البطالة ومحسوبية التوظيف وتفاقمت ندرة فرص العمل وضرب الغلاء بأطنابه ليصبح مهدداً كبيراً يستحيل معه إنشاء أسرة متماسكة محصنة ضد الأزمات .
لقد بذل الضيفان جهداً مقدراً في توصيل رسالة للشباب مفادها أن يتزوجوا (بالموجود) كما كان يفعل الصحابة وهما لا يعلمان أن الغالبية العظمى الشباب (ما عندو أبوالنوم) وإنو (حق المواصلات عندو فيهو مشكلة) ناهيك عن (سندوتش الطعمية) يستوي في ذلك العاطل والشغال (ح يكون يعني شغال في شركة بترول)؟
من المؤسف أن كثير من علمائنا الإجلاء بعيدين كل البعد عن هموم ومشكلات الشباب إذ خلت حلقة البرنامج من التعرض إلى أهم عنصر من عناصر المشكلة وهو العنصر (المادي) ومصدره من وظيفة أوعمل يدر على هؤلاء الشباب مالاً يستطيعون به إنشاء اسرة متماسكة، وعشان العبدلله (يخت) علماؤنا الأجلاء ديل في الصورة فلنفترض أن شاباً تزوج كما تزوج (سيدنا جابر) الذي ضرب به أحد (الضيفين) المثل .. دون شيلة أو حفل أو (أي حاجة) وأنه وكما (أيام سيدنا جابر) لم تعرف مدن الإسلام (أزمة السكن) فتزوج هذا الشاب و(ساق مرتو) إلى داره التي لا توجد بها (كهرباء) ولا أدوات كهربائية (ما زمن الصحابه ما فيهو جمرة وكده) .. كما لا يطرق باب داره (بتاع النفايات) ولا بتاع (المويه) ولا بتاع (العتب) ، فعاشر (صاحبنا) زوجته وقضي حاجته ثم بدأ يفكرفي مسألة الدكاترة بعدين ومسألة (حق الكشف) ومتابعة (الحمل) والأدوية ثم (الولادة) ورسومها التي لحسن حظه لم تكن (قيصرية) ثم رسوم (شهادة الميلاد) ثم (خروف السماية) ولوازمه ثم متابعة (صحة الطفل) وشراء (الألبان) واللازم منه ثم دخول الطفل إلى روضة (نور الإيمان) المليونية !
وبينما كان صاحبنا مستغرقاً في التفكير سمع صوت (عروسته) يقول له :
– يا عصام ما (جوعنا) قوم شوف لينا حاجه ناكلا
خرج عصام وهو يسال روحو (هسه الزول يشتري شنو؟ السندوتش الواحد بي خمسطاشر جنيه وطلب الفول بي سبعة جنيه ) .. أيوااا خلاس مافيش غير السلطة .. توجه عصام لبتاع الخدار الذي يضع بضاعته النضيرة في أشكال هندسية بديعة ويرش عليها بالناء .. قرر عصام أن يشتري ربطة جرجير .. نص كيلو طماطم .. ربطة بصل .. ليمونتين .. وعجورة .. وقد أمسك بها ورفعها إلى أعلى
– العجورة دي بي كم ياخينا
– بي خمسة ألف ونص ه
في طريق عودته إلى (داره) كان عصام يتحدث إلى نفسه بصوت عال .. هي عجورة فطور بي خمسة ونص وأنا عجورة فطور بي خمسة ونص.. دي حداشرة ألف هي عجورة غداء بي خمسة ونص وأنا عجورة غداء بي خمسة ونص بقت إتنين وعشرين ألف هي عجورة عشاء بي خمسة ونص وأنا عجورة عشاء بي خمسة ونص بقت تلاته وتلاتين ألف .. ثم رآه المارة وهو يقذف بالكيس في الهواء ويقول في تشنج :
– عجور بس في الشهر مليون جنيه وتقولوا لينا عرسو !!

كسرة :
المجد والخلود للشهداء الأبرار

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟

43 تعليق

  1. مستغرش رقم واحد

    1. رغم واحد في ليبيا بس الله غالب عليه

    1. المرة دي شدو ليك وعقبال لجماعتك ناس شدو وهم في الاقفاص بس بي حق وحقيقه

  2. الله يفكنا منهم

  3. غلطان يا عصام .. تعاشرها ليه ؟؟!! انت موش تحمد الله انك عرستها ..

    1. كفاية عليه المنامات ياخ والمنامات دي زاتيها بالعجور ما بتجي صدقي يا باسطه هههههه لك التحية امريكي

      1. هاك دي ياغلبان ، قصة حقيقية والله ياغلبان زي قصة التيس .. تتذكرها ؟؟ حاج محمد هجر زوجتو ومشي قعد مع عشة اختو ، حاجة عشة الكلام ده مااااا واقع ليها ،، قالت ليه انت اامحمد يا أخوي مالك سبت مرتك ؟؟ محمد قال ليها ااعشة يا أختي المرة خلاص كبرت ومافضل فيها عقاب .. عشة قالت ليهو اامحمد يا أخوي امشي اتلم علي مرتك .. إنشاء الله ( قردنه ) ساي !! .. حاج محمد ده ياغلبان كان بقي كوز ماكان اخير ليهو ؟؟!! كان طبق الشريعة وعملن أربعة .. لا قردنه ولا يحزنون …

  4. وطيب اللي عندهم اكتر من واحده ديل ما يتنازلوا زي ما حدث في عهد الصحابه ،
    ياخ كان يجوبوا حلقه للمسؤولين اللي عندهم اكتر من زوجه ويدو الشباب فكره في التدبير وانو ممكن يتزوجوا مادام هم مدبرين أمورهم وبالقليل زي ما بقولوا،
    حقو يالفاتح تتحفنا بقائمه المسؤولين ديل وكيف عملوها وعشان كمان الناس تستفيد من خبرتهم وكدا وخاصه الاقتصادية وهل فعلا عايشين علي العجور ولا حاجه تانيه،
    استغرشت شديد والله في الموضوع ده

    1. هلا هلا عبيد .. انت ماسمعت بالوزيرة في ولاية الخرطوم عندها راجلين ( أنا قرات العنوان فقط العندو تفاصيل يورينا .. تعالوا نشوف التصويت ..
      علي : بس كان مفروض ثلاث ورباع هيك يبقي أحلي ..نعم..
      نجوي : يخرب بيتك حبيتك .. تنين نعم ..
      ناصر : ايش ها الحلاوة !! أكيد مؤتمر وطني .. نعم نعم ..
      احمد : يا خرابي !! رابعة العدوية ؟؟!! أربعة نعم ..

      1. ياسارة ماوريتينا قطعو من وين ؟؟ بس لو كان قطعو من لقاليقو كان ارتاح !!! ربنا ينتقم من الكيزان ولقاليقم !!!!!

      2. اين انتم ياسمار ؟؟؟ بورتوا للبروف عجورو .. كده البروف يزعل منكم !!!

      3. ههههههههههه امريكي يجازي محنك هم كمان بقن يدبلن

  5. البروف الحبيب
    والأحباء البروفات
    هسع يا البروف عليييييك الله الفاتح نفس الشباب للعرس شنو ؟؟؟؟
    مش كان فرشو عشبة بن علي في الشوارع !ّ أصل الناس بقت ما بتعرفش
    و عندي سؤال ممكن ؟؟
    إحترس فإن السيارة تتحرك للخلف ،،،، !ّ!ّ
    العنوان ده جبتو من وين ومعناهو شنو؟؟
    لأنو بصراحة كده ما فاهمو ،،،

    1. غلطان ياعصام ليه تعاشرها ؟؟!! موش تحمد الله انك عرستها !!!!!!

    2. سلام أستاذ الفاتح ، اسمح لي بعرض هذا الخبر ربما يعكس حالة الإحباط التي وصلها الشباب في زمن هذا النظام الظالم
      وهذا رابط الموضوعhttp://www.alweeam.com.sa/232290
      —————————————————————–

      سوداني يقطع عضوه التناسلي خوفاً من الفتنة والمعاصي
      الرياض – الوئام:
      قام شاب سوداني أمس الأول بقطع عضوه التناسلي من شافته ليتقى بذلك الفتنة والمعاصي – على حد زعمه – وكانت أسرة الشاب التى تقطن مدينة أم درمان العريقة قد هرعت به لأقرب مستوصف لإيقاف النزيف وخياطة الجرح. وقد تم حجز الشاب بالمستشفى .
      ونقلت صحيفة ” المجهر ” السودانية اليومية عن الشاب – الذي عاد قبل مدة قصيرة من الخارج بعد أن قطع دراسته – إنه أقدم على ذلك خوفاً من الفتنة والوقوع في المعاصي التي حرمها الله، وأنها الوسيلة الوحيدة ليطمئن قلبه – على حد تعبيره.
      رابط الخبر بصحيفة الوئام: سوداني يقطع عضوه التناسلي خوفاً من الفتنة والمعاصي

      1. سارة !ّ!ّ
        أضانا طرشا ,,,, ألا في الفتنة يا دوبك ,,, وقع !!!

    3. لا تخاف ايها المندهش وسوف تزداد اندهاشا شوية جماعة فقه السترة ديل بجوزو الاشتراك يعني كل عشرة في واحدة لعنهم الله دنيا واخرى

  6. كتمت كتمت كتمت كدي اصحابنا بالقمردين بالذات المعتقين نسالهم السؤال التالي لو رجعوك قبل العرس بي يوم تعمل شنو انا الغلبان شخصيا كان تركت كل شئ لهم ورجعت الماذون وزغت بالدو لكن بعد ده الله غالب الصقر كان وقع كثرت البتابت عيب

  7. كتمت كتمت كتمت الماشي معاي كاودا منو

  8. كما ورد
    أعلن القيادي في الحزب الحاكم بالسودان د غازي صلاح الدين عن إنشاء حزب سياسي بديل للمؤتمر الوطني في ثاني انشقاق يتم داخل لب النظام الحاكم والذي سبقه خروج مهندس النظام د حسن الترابي وتكوين حزب المؤتمر الشعبي في العام 1998م .

    وقال دغازي في تصريح إن الاجراءات التعسفية والغير قانونية التي اتخذها المؤتمر الوطني حيال مجموعة الاصلاحين بداخله أطلق رصاصة الاعدام على جسد الاصلاح واضاف “وهذا الاجراء فتح الباب أمامنا لتشكيل حزب سياسي جديد لتقديم حزب بديل محترم ومقنع في الساحة السياسية واشار للمشاورات الجارية لتكون ذلك الحزب بشكل كامل ونفى تماما أن يدور في فلك الاحزاب القائمة على رأسها الاسلامية وذكر بانهم سيقدمون اطروحة جديدة .

      1. لبست الطرحة وغيييرت بالتوب ,,

  9. سلام شباب، والله فائتوا الليله الموضوع فيه كمية من الإستغرشات. نستغرش من موضوع النقاش وإلا من عشة و أخوها و الا من الشاب السوداني وإلا من غازي صلاح الدين . !!!! كلمتك أهو يا بروف ، كلام ما مشي وجا، لو كان بنلم قروش على كل إستغراشة كان غنينا! اولا المذيع إنشاء الله يكون معرس بس ما فصاحة ساي و إلا يروينا ليه؟ بعدين صراحة كدة أنا غازي دة اصصصصصلي ما إرتحت ليهو ،بنطط كدة ليه أنا ما عارفة ، مرة مت غدي بالترابي و حسي نطط للجماعة ديل لكن عملوا ليه نظام (أكلت يوم أكل الثور الأسود) و لا الأبيض ما عارفه! ههههه المهم بعدييييييييييييين ( بعد عمرٍ طوييييييل) ما يجئ يعمل لينا فيها السيسي، احنا طيبين لكن. ما نساييين

    1. سلا نونا .. ليك وحشة .. نعم أوافقك الرأي علي ان الأعضاء يطرحون مواضيع هادفة تحكي عما يختلج في دواخل الشعب السوداني الصابر ، المغلوب علي أمره ، أما موضوع الغازي هذا فلوحده كوم اخر ، عزيزتي نانو هؤلاء القوم شياطين الإنس والجن قاموا باعداد وإخراج هذه المسرحية ليلتفوا بها علي طيبة وسذاجة ( كما يعتقدون ) الشعب السوداني .. فالنفترض ان هذا الغازي محق فيما يفعل .. اين كان طيلة ربع قرن من الزمان ؟؟ اهل نزل عليه الوحي الآن ؟؟!! بعد خراب مالطا ؟؟ إذا فضل فيها مالطا !! أختي نانو عليكم بالصبر والدعاء .. وكل زول فيكم يشيل ليه سكين ويقعد يخلل في عجور البروف .. تحياتي لكل الأعضاء …

  10. غايتو العجورة دى ماااا ظنيتا للاكل ! آييييي

    1. شمباتي ،،،
      عاد ما للاكل نان لشنو ؟؟؟

      1. شمباتي والمندهش لاتندهشا !! أخونا بابكر سلك عندو مقال اسمو ( فندكنا ) وانتوا عارفين الفندك عندو يد !! اسكتوا ساي !!!

      2. المندهش..
        ههههههههههههههههههههههههههههاااى, اسال جنوبى او ركس ! انا بررررا ..
        امريكى…
        ادونا فندكم , ندق ونديكم ,,

      3. المندهش ….. كيف حالك …. انتا اتصلتا وانا ما رديت كنت في الحج (حجيت والحمد لله) ربنا يتقبل
        لكن رجعت ليك …. وكيف نرفض رجوع القمرا لوطن القماري ……
        طولت ما رديت

    2. شمباتي …….. اتصلت عليك لكن قالو لي كنت متحنن …..
      مخير الله ….. الحنه الفي القدوم دي شنو
      ناس قراب منك …. عرفو ….. ترم ترم ترم

      1. هههههههههههههههههههههههههههههههههههههههه,,
        والله دى اشاعات مغرضة ومقروضة ذاتها !
        ورجعت ليك لكن ما رديت ! وبعدين معاك لو جيت ! لو ,, ولو,,
        وشنو الحج الكتامى دى !؟ احنا ما قاعدين فى نصو !
        انا جاييك بالدرب عديييل اقفر الشئ دا

  11. الحبيب كتلوك ولسه حي و الحبيب شمباتي
    حجا مبرورا وذنبا مغفورا ،،،،
    شمباتي !! في الإنتظار أنا أنا نار ،، والعجور جاااااهز ،، فطور وغداء وعشاء
    ركسونا ،،، انت وينك ويييييييين ؟؟

    1. إيه الحكاية يا مندهش ؟؟ ليه ما بتعزموني معاكم ؟؟ يعني عشان أنا أجنبي ولا شنو ؟؟ لكن برضو انا جاي وجايب معاي عجور كمان !!! تحياتي ..

      1. حباب الأمريكي
        بعينيّ اقول ليك تعال وتعال ،،،، بس عجورك خليهو في بكانو والعندنا مكفينا
        وعلى النجيلة جلسنا واكلنا وإدردقنا كمان

    2. جلوس آآآهـ ,, درديق لا !
      وعجور لااااااااااااااااااااااااااااااااااااااا

  12. إنتو عارفين طبعا يا جماعة إنو البلد دي كان فيها تلاتة طبقات
    عجور و فقوس وخيار

    وتلاشت الطبقة الوسطى وهي الفقوس وبقى فيها طبقة العجور وطبقة الخيار
    و إنقسم الخيار لطبقتين
    طبقة الخيار وطبقة الحُميّض
    وتلاشت طبقة الخيار وبقت فيها طبقتين
    طبقة العجور وتسكن كافوري
    والطبقة التانية طبقة الحُميّض ودا الشعب الفضل يعيش الشتات في أصقاع الداخل وأرجاء المعمورة
    بالمناسبة المصريين عندهم تسمية جديدة لناس العجورة وهو المحظورة

    اللهم لا تعولقنا ولا تخولقنا

    1. والله يا المندهش عجورك يدهش !!

  13. غازي صلاح الدين يقول : لا أستبعد اعتقالي و لا توجد حريات في السودان!!!
    والحكومة تقول : أجسامنا ليه جسمين ،،، روحنا واحدة وكيف اتقسمت قسمين ؟؟؟
    وانا اقول : يا جماعة إستهدو بالله قبل ما تجو ما كنا شايلين …… همّ وهسع الواحد بقى شايل همين
    يخسي عليكم ،،، اها بس !!!

    1. هههههههههههههههه,,
      الليلة عبارك كبييير يا مدير !!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: