قال الرووووب

(تسريبات عن إتجاه الحكومة لزيادة أسعار الكهرباء) .. هذا الخبر جاء بالأمس بصحيفة الخرطوم (دي ذاااتا) وفي متن الخبر نقرأ بأن هنالك تسريبات تفيد عن إتجاه الحكومة (لرفع الدعم) عن الكهرباء إبتداء من موازنة العام المقبل 2014م وقد نسبت الصحيفة إلى الدكتور عباس على السيد قوله في مؤتمر صحفي نهاية الأسبوع الماضي إتجاه الحكومة لزيادة أسعار الكهرباء !
يعني الواحد لسه ما فاق من الحاصل ده والزيادات التي شملت كل السلع يقوموا كمان يزيدو ليهو الكهرباء ، العبدلله لا زال يتذكر (والقراء كمان) تلك التظاهرة الكبري و(الحناجر والحلاقيم الفخيمة) التي كانت تهتف عند إفتتاح سد مروي .. (السد السد .. الرد الرد) بإعتبار أن سد مروي يعتبر إنجازاً يعتبر رداً (بيان بالعمل) على كافة القوى الصهيونية والإمبريالية العالمية وكمان (الطابور الخامس) !
وعندها تباري المسؤولون على أرفع المستويات معددين فوائد هذا الإنجاز وإنعكاساته على حياة المواطن البسيط الذي سوف تتاح له الكهرباء وتحل له كافة مشكلات الإمداد الوفير الذي سوف يكفيه ويزيد بل أن بعضهم ذهب إلى أن ما يزيد عن (حاجة المواطن) سوف يتم تصديره لدول الجوار !
ولم يجن المواطن من (السد السد الرد الرد) شيئاً ولم تتأثر اسعار الكهرباء التي أصبحت فاتورتها تمثل عبئاً ثقيلاً للمواطن ، وهنا أخبره (المسؤولون) بأن الحل يكمن في تعلية خزان الرصيرص إذ أن ذلك من شأنه أن يساهم بصورة كبيره في زيادة إنتاج الكهرباء بالبلاد مما يجعل (أسعارها) معقوله !
وتم الإنتهاء من تعلية خزان الرصيرص وهتفت الحناجر والحلاقيم الفخيمة .. ونثر المسؤولون الوعود بعد أن رفعوا العصي عاليا وهم يهتزون مع (أنا ليهم بقول كلام .. دخلوها وصقيرا حام) .. ثم إنفض الجمع تاركاً المواطن يحلم بكهرباء يتناسب سعرها مع دخله (المهدود) !
وها هو المواطن اليوم يفيق من ذلك الحلم الوردي الجميل ليواجه الواقع (القبيح) الذي يفيد بأن كل ما قاله المسؤولون من وعود هو كلام والسلام وإن المثل البيقول (الراجل بيمسكوهو من لسانو) قد تغير في هذا العهد الوضيئ والمسؤول أصبح ما معروف يمسكوهو من وين !!
رفع أسعار الكهرباء يا سادة يا أفاضل يا كرام سوف يفاقم من الوضع الإقتصادي (الأصلن مافي) لكل الشرائح محدودة الدخل والتي أصبحت حياتها بعد القرارات الأخيرة جحيم (عديل كده) .. كما أن رفع أسعار الكهرباء سوف يكون بمثابة الضربة القاضية للصناعة المحلية التي تترنح منذ سنوات بسبب ما تعانيه من (عوائق) والتي سوف تلجأ لتحميل هذه الزيادة للمستهلك (المواطن) الما عارف يلاقيها من وين وللا من وين؟
العبدلله قد فاض به الإستغراش من (فعايل) هذه الحكومة (الغريبة والعجيبه) .. تقوم الحكومة بتشييد سد وتعلية آخر فيرتفع سعر الكهرباء .. تقوم الحكومة بإفتتاح مصانع السكر التي تقول بأنها الأكبر في أفريقيا والشرق الأوسط فيرتفع سعر السكر .. تقوم الحكومة بإكتشاف عدد من آبار البترول فترتفع أسعار مشتقاته .. تقوم الحكومة بتصدير مئات الأطنان من الذهب فيرتفع سعر الدولار (بالله مش حاجه تخلي الزول يستغرش فعلاً) ؟ …. يا جماعة الخير الرحمة حلوه .. المواطن والله قال الرووووب !!
كسرة :
المجد والخلود للشهداء الأبرار

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟

Advertisements

30 تعليق

  1. مستغرش مع سبق الاصرار و الترصد. ارفع يا حسين و نحن وراك كاك كاك كاك

  2. أنا (إستغراشي) في الكسرة الأخيرة دي.. بتمر كل يوم كيف (ماسورتكم) جلدة بايظة ولا كيفن؟؟

  3. كان كدا الحكومة ما تعمل اي شئ تاني ( اذا كان فعل الشئ يمثل زيادة في سعر شئ اخر) تقعد بس تتفرج وامرنا لله يا فرج كربنا اللهم ازل هم المواطن السوداني ولو بزوال هذا النظام

  4. ياعبيد انت مستغرش غريش خلاص !! الظاهر عليك مابتنوم عشان ماعندك كهرباء ، ارجي الراجيك !!

  5. دي ما ارجي الراجيك يا امريكي – دي ارجي البشير …..؟

    1. مرحباً يا وطني السودان .. بس ماوريتنا السودان الفوق ولا التحت ؟؟!!

    2. البشير العضير ؟
      هييييي يكااااااااااااااااااااااا

  6. قالو يعملوا زيجات جماعية… تبعتها زيادات في المايقوما

  7. اركز .. اركز لا تجيب رخوة
    يا متلبك في الادران .. الحجر الأسود ما هو البروة
    وما ها مكاوي الكعبة تجيها .. حين ينكرفس توب التقوى
    وما في خرط للجنة تودي .. لا في خطط لدراسة جدوى
    يا من قال يا رب من قلبو …رد الخالق دائماً ايوة
    أركز … اركز .. لا تجيب رخوة
    اركض .. اركض .. تالا اشجار العملة
    واقصف .. اقصف من اوراقها
    يمكن تستر عورة شينك وما سواهو زمانك جملة
    اركز … اقوى .. ولف بشكيرك فوق الراس النشف غيرك
    لا تستهون .. قضي منافعك وتم العمرة
    وفور موية زمزم قهوة
    أركز … أركز .. لا تجيب رخوة
    ماك غلطان
    غلطان الشعب الجز جراد الغفلة كفاحو
    الجنى ارباحو .. ضياع ارواحو
    وجيد للحاصل وبخت الحاسد
    ماك غلطان
    غلطان الشهداء الراحو … الواحد .. واحد
    ماك غلطان
    غلطان الحزب الجم سلاحو وخيلو تناهد
    ماك غلطان
    غلطان زمنك واصلا وطنك ياها جراحو وعندك شاهد
    رفضك … سجنك .. شان الكادح والمتكادح يلقى صراحو ويبرا الساعد
    تهتف لامن تقصف دم .. وشارع هازيء … يهز اصفاحو … وبرضو تجاهد
    لامن صقر سن منقارك … لامن طيرك قصو جناحو … وخر يكابد
    الله يرحمك يا محمد الحسن حميد،، نظرتك كانت بعييييييييدة
    Sent from my iPad

    >

    1. رلحم الله الحبيب / حميد وجعل الجنة له متكئا ومقيلا ,,
      مرة العسكرى كسار الجبور ويوم باسم النبى تحكمك القبور ,,,,,

  8. البروف والسمار ,
    سلامات .
    رفعو الدعم عن المحروقات بحجة إنها بتتهرب الى دول الجوار ومابنقدر نغطى حدودنا كلها .
    أها الكهرباء دى رافعين منها العم بياتو حجة .
    الله فى …

  9. ولسه الرفع قدام
    شفتو حاجة
    قلنا ليكم الشارع قعدتو تغالطو
    خمو وصرو
    بكرة ماشين النجيلة والمتحف
    اها شنو ليكم

  10. ذَلّ مَنْ يَغْبِطُ الذّليل بعَيشٍ ** رُبّ عَيشٍ أخَفُّ منْهُ الحِمامُ
    كُلُّ حِــلْمٍ أتَى بغَــيرِ اقْتِـدارٍ ** حُجّةٌ لاجىءٌ إلَيها الـلّئَامُ
    مَنْ يَهُنْ يَسْهُلِ الهَوَانُ عَلَيهِ ** ما لجُـرْحٍ بمـَيّتٍ إيــلامُ

    والضرب على الميت حراااام ولا مش كدي !!!

    الشعب السوداني يستاااااهل الساكتين ليها شنو ؟؟

    شغااالين بالفارغة ما عندهم شغلة غير السكسكة وترم ترم على قول أهل أخونا جنوبي يا أخوانا ما لقيتوا لينا خبر من الزول ده
    ” بعد الكشة” ?? كلما تفتح قناة تلقاهم يغنوا ويجبجبوا تقول مبسوطيييين على الآخر ما عنهم عوجة تبببب !!!
    روحوا جاتكم نييييلة علي خيبتكم .. حليل أيام المتاريس وأصبح الصبح …

  11. والله يا بروف الناس ديل طلعنا ظالمنهم ساااااكت، وانا أقول هم (ضاغطين)علينا كدة لييييه؟ تاري عشان لو ( رفعوا) أيدهم مننا روحنا حتترفع السما طواااالي. يا ااحليلكم يالنايمين علي حيلكم!

  12. بالله بلد فيها أطول انهار العالم + الأنهار الموسمية + المياه الجوفية + أعلى معدلات الأمطار + كم سد و سد ،،، يستوردوا ليها موية من الامارات اللى مافيها غير المياه الجوفية و بتشرب من تحليه مياه الخليج و للزراعة بيعيدوا معالجة مياه الصرف الصحى (أكرمكم الله)
    و بلد فيها أكبر تنوع للمواشى التى يتسابق الخليجين للاستحواذ عليها و شراءها ،، تقوم باستيراد حليب و زبادى المراعى من السعودية
    و بلد الخلا بتاعا كلو شجر سدر، يقوموا باستيراد النبق الفارسى من ايران !!!
    بالله مش حاجة تخلى الواحد يستغرش و تنفقع مرارتو و ويقول الروووووب و الزبادى و كل مشتقات الألبان …. بالمناسبة ما رفعوا الدعم عنها ؟؟؟؟

  13. المسئول يمسكوهو من بكان ما بمسكوا الخروف !!

    1. طيب تاني ( يتغوز ) أربعة كيف ؟؟؟؟؟؟؟

      1. هههههههههه,,
        وهو عمل ايه بالقواز !!؟
        اهييييييييييي

  14. السؤال يا جماعة الخير الزيادات كلها بتمشي وين؟

  15. ماقلنا الشارع قلتو الموت
    قلنا امرقو واطلعو سيرة
    جددووافتحو تاني السيرة
    مافي حلاوة بتجي بالساهل
    وانو الظالم غافل وجاهل
    لو حقك ضاع عند ناس الثورة
    امرق وجدد واعمل ثورة
    لوغلبك تسكن وغلبك تشرب
    وغلبك تاكل من ماتصنع
    وضاع مجهودك في ماتزرع
    اجهز وقابل وش المدفع
    احسن من ماترقد وتقنع
    مد ايديك علي قدر لحافك
    عمرو الظالم لا هاب لا خافك
    مستحلي الظلم البادي وظاهر
    ولو سوداني ودمك طاهر
    امرق اطلع عبر وظاهر
    ولو حريتك ملك الثورة
    احسن تفني تموت وتغادر

    1. لا حول ولاقوة الا بالله يا حبيب ,,,,
      ما خليتلنا صفحة نرقد عليها ,,,
      سلمت يمينك ,,

      1. اول نكات العام 2014 .. اضحكوا !!! ورد في Sky News عربية .. السبت 2/11/2013 ورد مايلي : السودان يؤكد قدرته علي توفير الأمن الغذائي العربي !!!!!!!!! فينك انت ياجبرا ؟؟؟ الحق مرارتنا .. عليك الله ياجبرا الحق مرارتنا ..

      2. اول نكات العام 2014 .. اضحكوا .. ورد في قناة Sky News العربية السبت 2/11/2013 مايلي : السودان يؤكد قدرته علي توفير الأمن الغذائي العربي !!!!!!!!!!! فينك انت ياجبرا ؟؟؟؟؟ الحق مرارتنا.. عليك الله ياجبرا الحق مرارتنا .. بسرعة ..

  16. الغريبه وحتي ايام ما كان عندنا بترول اكتر واحد قال لي إيرادات الكهربا الداخلة للحكومه أكبر بكتير من إيرادات البترول وطبعا الإيرادات بتاعه الكهربا بعد ال…. وقريب دا كان في حاجه زي كدا ولكن الموضوع اتلما وتمت تنقلات،كدي يا بروف هبش لينا كدا واعرف ملابسات الزيادات وبرضو اذا في ريحه هيثرويه ولا اقطانيه ولا حجويه في اداره الكهربا دي وقطع شك بتكون في وبالكوم

  17. استغراشه المسا وكما ورد

    (سونا) شرع جهاز تنظيم شئون السودانيين بالخارج ، وهيئة الجمارك فى وضع ترتيبات مشروع الرقابة الالكترونية للإجراءات الجمركية للمغتربين فيما يتعلق بإجراءات السيارات .
    وقال الدكتور كرار التهامى الامين العام لجهاز المغتربين لدى لقائه بمكتبه مؤخراً وفد هيئة الجمارك السودانية بقيادة اللواء شرطة عبد الحفيظ صالح على نائب المدير العام للهيئة ان الغرض من المشروع هو وضع العلاج الناجع والقانونى لحالات التزوير فى اوراق السيارات التى يستوردها المغتربون من الخارج فى حال عودتهم النهائية ، كما يسد الثغرات امام ( السماسرة ) ، ويتيح فرصة انسياب الاجراءات المتعلقة بهذا الغرض فى سهولة ويسر دون اى عوائق فى حال اكتمال الاوراق الثبوتية وصحتها .
    ودعا التهامى الى دراسة المشروع وفق رؤية مشتركة لمعالجة الامر لمصلحة الوطن اولاً ثم مصلحة السودانيين بالخارج .
    الى ذلك ابان سعادة اللواء عبد الحفيظ اهمية المشروع والجوانب الفنية المتعلقة به وبرمجة الاوراق المطلوبة الكترونياً داخل الشبكة والمتمثلة فى الرقم الوطنى للمستفيد ، شهادة البراءة والتى تفيد بان العربة مستخدمة لصالح المستفيد شخصياً والتى يتم استخراجها من سلطات الدولة التى يقيم بها المغترب ، شهادة الى من يهمهم الامر ( الجمارك – جهاز المغتربين ) وشهادة التسفير معتمدة وموثقة من وزارة الخارجية او السفارة السودانية لدى دولة الاغتراب ، مبيناً ان هذه الخطوات تثبِّت الحق الكامل للمغترب وبصورة قانونية صحيحة .
    هذا وقد اكد الجانبان حرصهما الكامل على انفاذ المشروع بالصورة الكاملة والعاجلة التى تثبت حقوق المستفيدين من السودانيين بالخارج وسلامة اجراءاتهم .

    1. كل مايدر عائد مالي علي الحكومة يتم تنفيذه بسرعة البرق وكل ماهو في مصلحة المواطن والمغترب يتم تنفيذه جرعه جرعه.هذا ان تم اصلا.

      1. والله انتوا يا المغتربين معصورين عصر شدييييييد خلاص مافضل ليكم إلا تقولوا الرووووب .. كمان كان دعا الأمر اشربوهو .. نحنا في بلاد العم سام نبرا منكم ..

  18. اصالة عن نفسي وإنابة عن شعب وحكومة السودان : الرووووووب يا الله

    1. هههههههههههههههه,,,
      الروووووب من الزول المشى وما جا !!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: