قبل خمسين عاماً

• قبل خمسين عاما كان المواطن السوداني يركب الطائرة لسببين: لقضاء شهر العسل مع عروسته أو للتجارة الآن أصبح يركبها لسبب واحد (الأردن)…!

• قبل خمسين عاما كان الفاشلون يلتحقون بالمدارس الخاصة والآن يلتحق بها الناجحون…

• قبل خمسين عاما كان عدد الوزراء لا يتجاوز أصابع اليدين والآن عدد الوزراء يتجاوز شعر الرأس بقليل (غير المستشارين) مع إنو البلد (كشت)…!

• قبل خمسين عاما كانت جرائم المال العام تساوي (صفر) الآن المال العام أصبح صفر… من كترت (اللبع)

• قبل خمسين عاما لم تكن البلاد تعرف (جريمة الإغتصاب) والآن (افتح أي جريدة) … عااادي
• قبل خمسين عاما إستطاع فريق المريخ أن ينشئ إستاده الحالي والآن (الدولة) لا تستطيع إنشاء مدينة رياضية…

• قبل خمسين عاما كانت هنالك بيوت دعارة علنية ولم تكن الأمراض الجنسية منتشرة والآن لا توجد بيوت دعارة علنية بينما تنتشر الأمراض الجنسية…

• قبل خمسين عاما كانت هنالك ست (مطربات) والآن القاعدات يمشو (نيجريا) أكتر من ستين…

• قبل خمسين عاما كانت شوارع الخرطوم تغسل يوميا بالصابون والآن لو المواطن لقاهو يستحم بيهو يكون كويس
• قبل خمسين عاما كان شرطي المرور ينظم (حركة) المرور والآن شرطي المرور ينظم (كشات) المرور…

• قبل خمسين عاما كانت صيوانات حفلات الزواج أكثر من صيوانات تلقي العزاء والآن (القصة معكوسة)…!

• قبل خمسين عاما كان مرتب الخريج الجامعي يكفيه ويوفر منو والآن مرتب الخريج الجامعي مواصلات ما يكفيهو (ده كان اشتغل طبعا)…

• قبل خمسين عاما كان لينا خط سكة حديد يربط بين الخرطوم وادي حلفا عطبرة بورتسوان كسلا سنار كريمة الأبيض الرهد بابنوسىة نيالا واو… والآن (البركة فينا)…!

• قبل خمسين عاما كانت المساحة المزروعة بمشروع الجزيرة مليون ونصف فدان والآن تقلصت المساحة إلى أقل من نصف ذلك…!

• قبل خمسين عاما كانت خطوطنا الجوية تهبط وتزدهي بها أشهر المطارات الدولية أثينا روما فرانكفورت باريس هيثرو بيروت الآن مافيش حد (عارف) بنهبط وين…؟!

• قبل خمسين عاما كان يمكن للمواطن أن يقوم باستخراج أوراقه الثبوتية دون أن تتأثر ميزانيته الآن (إلا الواحد يدخل ليهو صندوق)…!

• قبل خمسين عاما كان لدينا (7) كباري والدولار (بي 25 قرش) والآن لدينا 25 كبري والدولار والدولار بي (7) ألف…!

• قبل خمسين عاما يتم الإستعداد للخريف (بالفعل) والآن يتم الإستعداد للخريف (بالقول)…!!

• قبل خمسين عاما لم تكن علامة الصلاة على الجباه متفشية الآن (حكاية عجيبة والله)…!!

• قبل خمسين عاما كان هنالك باب بالصحف اليومية اسمه (أين تسهر هذا المساء…؟) كولوزيوم النيل الأزرق الصافية الجي إم إتش الآن (السهر مع الباعوض)…!!

• قبل خمسين عاما لم تكن حبوب منع الحمل معروفة ومع ذلك لم تكن ظاهرة الأطفال اللقطاء منتشرة الآن حبوب منع الحمل تباع في الصيدليات والمايقوما (مليانة) …

• قبل خمسين عاما كانت المدارس تطلب من التلميذ قص أظافره وحلاقة شعر رأسه والآن تطلب من التلميذ (جنيه) فطور الأساتذة وطباعة الإمتحان…

• قبل خمسين عاما تم القبض على موظف عشان سايق ليهو تاكسي (لجمعه بين الوظيفة والعمل الخاص) الآن وزراء (سايقين ليهم) شركات ومشاريع زراعية وبيصرحوا بيها في الصحف كمان…!

• قبل خمسين عاما كان (الجزار) يقوم بتغطية اللحم بقطعة قماش بيضاء ومع ذلك يزوره (مفتش الصحة) الآن يقوم الذباب بدور (التغطية) ومع ذلك لا يزوره مفتش صحة ولا يحزنون…

• قبل خمسين عاما كان المواطن يشيل القروش في جيبه ويجيب الخضار في قفه والآن يشيل المواطن القروش في قفه ويجيب الخضار في جيبه…

• قبل خمسين عاما كان حفلات الزواج تمتد لأكثر من شهر والآن (ساعتين بس) من تسعة لحداشر…!

كسرة:

• المجد والخلود للشهداء الأبرار !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

Advertisements

26 تعليق

  1. برنجية ،،، مع أجمل التهانى بالسنة الهجرية الجديدة راجين الله ان تحمل لنا تحقيق جميع آمالنا …

    1. وبالعدم تحقيق آمال من يحلمون بالهجرة يا فلاديمير ان شا الله للحبشه هربا من كفار المؤتمر الوثني

      1. سلامات يا جنوبي ولعل المانع خير،زواج وكدا

      2. هههههههههه,,
        من زمااان كايس ليك شئ يلمك مع الاحباش ديل !!

      3. وهي الحبشة دايرة ليها هجرة ؟؟؟؟؟؟؟
        الديم , الجريف غرب , الخرطوم ككل وشارع النيل خسوسن ( ما ياهو النيل حقهم داك ) !!!

      4. يا عبيد ياخوي زواج وخير يتلمن كيف ؟
        شمباتي @ ركس امبارح ودوني حوش السمك ! بس حوش الحبش عدييييل ! ركس تعال سريييع خايف السنة الجايه يبقي الدخول بي تأشيرة من سفارة اثيوبيا !

      5. آآآآهـ !!؟
        ارجانى هناك كان كدى

      6. يرجاك وين ياشمباتي ؟؟ انت ما سمعت بالمسعول الاشتري قصر في حته راقية بمليون دولار وكمان ساق معاهو زوجاتو التلاتة !! أنا اشك الزول دا يكون كوز ولا حركة إسلامية ولا حتي مؤتمر ، لأنو ما عملهم أربعة .. مو هيك ياشمباتي ؟؟

    2. و زمان كان زول وااااحد فى البيت يشتغل و يعيش ليهو عوائل مع عائلته ،،، و الان كل العوائل دى تشتغل و بالكاد تقدر تعيش ليها زول واحد !!!

  2. صباحكم خير عقبال مئة عام ..

  3. صباجكم خير .. عقبال مئة سنة ..

  4. صباح الخير البروف العزيز
    وصباحكم خير البروفات الأعزاء
    فيك الخير يا بروف
    قبل خمسين عاما دي انا ما عارفها ،، لكن كلامك ده كان قبل خمسة وعشرين عاما وشووووية كده
    جنوبي !ّ!ّ حبشة شنو كمان ؟؟ قصدك يعني نتعاقب ؟؟
    امريكي ! ماهو جمع المذكر السالم لإسم ( البروف ) غايتو قبل خمسين عاما كانت البروفات

  5. مقهورين وساكتين | رد

    قبل خمسين عاما كانت هنالك جامعة واحد تدرس الطب
    واﻻن كم تاشر جامعة و الحالة بطالة

  6. • قبل خمسين عاما لم تكن علامة الصلاة على الجباه متفشية الآن (حكاية عجيبة والله)…!!
    وقبل خمسين عاما ما سمعنا بي وزير متزوج اربعه نسوان،(،شوفوا الدناوه دي ).
    وقبل خمسين عاما كان عندنا مصنع بيره ابوجمل وما حصلت فيهو اختلاسات(شوفوا نهب المال العام حتي في اداره الحج وهلم جرا).
    وقبل خمسين عاما كانت في برنجيه(حسه استغراش ساكت)

    1. قبل خمسين عاما مدير مصنع البيره لم يتورط في مسااله ماليه(مدير ووزير الزكاه في المحاكم في بلاغ يخص المال العام عجائب )

  7. البروف والسمار الاعزاء .
    سلامات .
    قبل خمسين عام كان الواحد بيعرف جيرانو كلهم وكل ناس الحى . الان الواحد مابيعرف جارو بالحيطة.أقصد الفوق ليهو.
    قبل خمسين عام كان الواحد لو لقا ليهو شافع غلطان فى الشارع بيعاقبو ويوديهو لى أبوهو يعاقبو تانى . الان لوفتحت خشمك فى الشارع بينادوليك التلاتة تسعات .
    قبل خمس وعشرين عام كان الناس بياكلو كسرة الفتريتة . الان بقى الاكل الغالب بيتزا وهوت دوق…

  8. قبل تلاتين سنة كنا 11 نفر ابوي لوحده ما بحويجنا لشيء والان نحن الحداشر ما قادرين نعالج ابونا ………….
    جنوبي حمد الله بالسلامة وكل عام وانت بخير ….. كملت البقنية والشربوت بعد داك ظهرت …. ما تنسونا من صالح الشربوت انشاء الله في كيس

  9. قبل خمسين عام نفر واحد كان بشيل البيت اسي خمسين نفر ما بيش يلو البيت

  10. قبل خمسين عاما كان المعلم يعلم النشئ.. الآن المعلم معلم الله

  11. * .مان لو قلت : امسك حرامي … لحظات وعين الحرامي ما تشوف الا النور .
    * الآن لو قلت امسك حرامي … ثواني وعينك انت اللي ما تشوف الا النور .
    * زمان لوقلت للحرامي يا بو …. وقبل ما تكمل كلمة بوليس تلقى الحرامي اطلق ساقيه للريح .
    * الآن لو قلت للحرامي ياااابوليس .. يقول ليك قديمة .
    * زمان ابو البنت يرفض المتقدم لبنته لانه سبق وان تزوج وطلّق .
    * الآن المجتمع يمنع المتقدم للزواج اذا كان اتقدم لواحدة مطلّقة .
    * زمان تندهش لو قطعت الكهرباء او الموية .
    * الآن تندهش لو جاءت الكهرباء او الموية .
    * زمان تعرف كل زملاءك في الفصل .. وما تعرف قبيلة واحد منهم .
    * الآن تعرف قبائل كل اللي معاك في الفصل وما تعرف واحد منهم .
    * زمان الموظف يركب مع المدير في عربيته .
    * الآن المدير يركب مع الموظف في عربيته .
    – عشان ماتقولوا انا بنظر فقط للجزء الفارغ من الكأس :
    * زمان عندنا جامعات لا تتعدى اصابع اليد الواحدة .
    * الآن عندنا جامعات ( عِد واغلط ) .
    * زمان ما عندنا اقرار ذمة للمسؤولين .
    * الآن عندنا اقرار زمة للرئيس زاتو .
    – والله ايام يا زمان … !!!!!

  12. قبل 30 سنة كان ابوي مكفينا نحن ال11 من ولد لبت وما حوجنا يوم لشئ …. وهسي نحن ال11 ما قادرين نوفر ليهو جق العلاج
    كسرة :
    يا جنوبي البقنية خلصت ولا لسه …. جيبو معاك انشاء في فتيل…..

  13. غايتو قبل خمسين عام ددي ماااا بقدر أفتي فيها ، علا سمعنا سمع إنو السودان كان كبييييييير و الوزراء ستة سبعة ، حسي السودان سغيرووووووووني و الوزراء ،،،،،،،،،،،برضو سغيرونين هاهاهاه. عارفاكم يا بتوع المشاكل إنتو

    1. سبحان الله يا نونا يقطع من هنا ويوصل هنا !

    2. الغريبه المسؤولين االحالين كلهم حضروا السودان قبل سبعين سنه مش خمسين سنه،يعني بي صراحه كدا ديل ………ومافي داعي للمشاكل

  14. قبل خمسين عام كنا بضبح للضيف قبل يجي هسي كان جاك ضيف تتضارى منو
    قبل خمسين عام كان الشعب السوداني بيضبح كل خميس وجمعة وهسي الريس قال بياكل هوت ضوق

  15. الأستاذ الجليل الفاتح جبرا ،،
    جبر الله كسرك في معنوياتك وذكرياتك ..
    أود لفت نظرك الى موضوع ارجو ان يجد عنايتك للتنيه وهو إستعمال أكياس وجوالات المبيدات والسماد في نقل الخضروات ،، إذ لاحظت أن الأكياس المعروضة للبيع بسوق الخضار بسوق بحري هي فوارغ سماد وتقاوي ومبيدات .. كما ئانه يتم فرشها في أعلى الخضروات لزوم النقل بالبكاسي من المزارع للسوق ..
    نزار عبدالماجد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: