مش برضو وزارة؟

في أحد الفديوهات المتواجده على موقع اليوتيوب مقطع لفديو يصور أحد الشيوخ صغار السن وقد عاد من رحلة خارجية وهو يخرج من مطار الخرطوم في رهط من السيارات الفخيمه (الجاية دي حاول أبلعا) … وأمامه (شرطي مرور) مشغل (السارينا) يفتح له الطريق ويمنع المواطنين (حتى من كانت له حاجة مستعجلة) من الدخول إلى الشارع !
إستفزني الموقف فما كنت أتوقعه أن تكون مسألة أفضلية المرور وقفل الشوارع دي فقط (للإسعاف) و(الدفاع المدني) ثم كبار الزوار والمسؤولين (مش الشيوخ) .. ونتاجا لذلك الإستفزاز قمت بالذهاب حينها إلى قسم المرور وقابلت الضابط المسؤول سائلاً أياه إن كان ذلك (يجوز) فأجابني أن من حق أي مواطن أن يستاجر (شرطي بي موترو) ويقوم بنفس الفعل فعدت أدراجي مستغرشاً .
عندما جئت ساكناً جديدا للحي الذي اقطنه لفت نظري أن أحد المنازل يحرسها (شرطي) بصورة يومية فظننت وليس كل الظن إثم أن المنزل يتبع إلي أحد كبار المسؤولين ولكن عند السؤال إتضح لي أنه مواطن عادي وحتي أزيل الإستغراش الذي أصابني توجهت إلى أحد أقسام الشرطة وكانت الإجابه .. (عادي أي مواطن ممكن نأجر ليهو شرطي يحرس ليهو بيتو) !
مع أن الحكاية التانية تبدو (مبلوعة) أكتر ويبدو أن الحكاية الأولى فيها (إن) إلا أن الشاهد هو أن وزارة الداخليه ممثله في إدارة الشرطة يمكن أن تقوم بتأجير أفرادها لحراسة المنازل أو المنشآت وهذا بالطبع واحد من واجباتها العديده .. وقد كان العبدلله يعتقد أن توفير الشرطة للأمن والحماية يشمل الوزارات والمصالح الحكومية (من باب أولى) حتى فوجئ بإعلان بصحيفة الخرطوم عدد يوم الأحد الموافق 3 نوفمبر الحالي يلغي ذلك الإعتقاد ويوضح بشكل جازم أننا في عهد المفارقات واللا معقول .. يقول الإعلان :
ولاية الخرطوم – وزارة التخطيط والبنى التحتية – إدارة الإمداد – الموضوع : حراسة رئاسة الوزارة وفروعها – عطاء رقم 18/2013م – يرغب السيد مدير عام وزارة التخطيط والبنى التحتية من شركات أمنية متخصصة لحراسة الوزارة وفروعها وعلى الراغبين تقديم عروضهم بمقر الوزارة وذلك حسب الشروط المرفقة !!
نعم يا سادتي .. (الحكومة) تطلب الحماية من شركات أمن (أهلية) .. وتدفع من أموال المواطنين (الشئ) الفلاني ثمنا لهذه الحماية بينما يدفع المواطن (دم قلبو) لدعم الشرطة والأجهزه الأمنية (شفتو الكلام ده كيف) يعني وكأنما يقوم المواطن بدفع دم قلبو (لو فضل ليهو دم) لهذه الشركات الأمنية الخاصة ودي حاجه ما عاوزه ليها فهامه لا حجم عائلي ولا مقاس أطفالي !!
لقد توصل العبدلله منذ زمن إلى أن القصة (خربانه) مما جميعو وما هذا الإعلان (العجيب وغريب) إلا دليلاً على هذا (الخراب) الذي أصاب مفاصل البلد ونخر في عظامها ، لماذا لا تستعين هذه الوزارة بالشرطة لحماية منشأآتها وهنالك فرع للشرطة خاص بأمن المنشآت .. تصور معي أيها القارئ المستغرش لو أن كل الوزارات والجهات الحكومية حذت حذو هذه الوزارة (وما بعيد تكون) كم من الأموال تدفع من خزينة هذه الدولة التي ما فتئت ترفع الدعم عن المواطن حتي ملأ حياته البؤس والشقاء والإملاق .. إنه ورب الكعبة عبث ما بعده عبث فإن كانت الدولة بهذا الثراء بحيث تطلب الوزارات والمصالح والهيئات الحكومية من شركات الأمن الخاصة حمايتها فلماذا (تضيقها) على المواطن المسكين وتصر على أن خزينتها خالية من الموارد وأنها سوف تمارس فضيلة التقشف ؟
نحن نعلم علم اليقين بل لا يتطرق الشك إلينا إطلاقاً بإن ما نكتبه لا يعيره المسؤولون أي إهتمام .. وأننا ننفخ في قربه (مقدوده) ولكن حسبنا أننا نشير إلى مواطن الخلل (والفساد) غير المسبوق الذي لم يعرفه الأولون ولا الآخرون .. ويا (بخت) صاحب العطاء الفائز لأن شركته الخاصة سيكون لها شرف حراسة الحكومة (مش عشان حاجة تانية يا وحشين) !
لقد فقدنا الدهشة تماما مما يحدث ولن نندهش ولن نستغرش إذا ما وجدنا إعلاناً من (وزارة الداخلية) يرغب فيه مديرها العام من شركات أمنية متخصصة التقدم بعطاءآتها لحراسة أقسام الشرطة .. الداخلية دي مش برضو (وزارة )؟ .. والله حيرتونا … هات الحبوب يا ولد !

كسرة :
المجد والخلود للشهداء الأبرار …
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

Advertisements

25 تعليق

  1. برنحيه

  2. الغلبان وفلاديمير ونونا وجنوبي وود الخلا وحتي أمريكي والمندهش وعمك تنقو وووو الجميع واعذروني ان نسيت اي واحد وبت السودان وقويه والكل ما معقوله يعني

  3. إيه ( حتي امريكي ) دي ياعبيد ؟؟!! عنصريتكم دي عايزه ليها حراسة .. لك تحياتي .. هناك في بلاد العم سام سواق التاكسي وموزع البيتزا بختو ليه المسدس ( السودانين مسمنو اب عفنه ) موش أبو العفين ، بخوتوهو ليهم في رقبتهم مابحرسهم إلا رب العالمين .. هنا عندكم ( ياحتي عبيد ) ناس قريعتي راحت وناس من اين لك هذا ؟؟ عندهم حراسة .. وانتوا كان ماعاجبكم تخوشو الحراسة !!

  4. المستغرش ليه انا يا بروف .. انك لاقي الحبوب .. طوالي بتنادي جيب الحبوب يا ولد …
    بعد كده حنفعل ليك قانون من اين لك هذه الحبوب ؟؟
    عشان تاني ما تتكلم في الحكومه …..تسكت نسكت ..(دي على وزن سلم تسلم ) .
    كسره: د. عبيد بقيت تطلع الطيش .. الجماعه شالوا منك البرنجيه  

    1. يا عمك تنقو الظاهر عليك ما متابع وانا أعلنت حمله عدم الكنكيش وحتي يجد بقيه المشاركين ألفرصه كان في دول العالم الثالث اوحتي أمريكي

      1. يا عبيد لك التحية ..بس ( حتي بتاعتك دي فقعت مرارتي ) انت ياعبيد ناسي انو نحنا من دول العالم الأول ، حتي رئيسنا أوباما عندما يكون ماشي بيتو بس ماعليهو إلا يركب ال High Way وعينك ما تشوف إلا النور ، لا موتر ولا كارو ولا يحزنون ، 5 دقايق بس يصل بيتو .. انتوا في دول العالم الطيش عندكم الحراسة لسع بالعساكر ؟ نحنا عندنا الحراسة بالكاميرات والتكنولوجيا ، برضو تقول لي ( حتي ) ياعبيد ؟؟ تقول أخ تتلخ !!

      2. يا اخونا أمريكي ياخ ما تزعل مني،أزعل من الحكومه وبس وبالله يا ناس أمريكا برضو عندكم مراره بتتفقع وبتعرفوا الموذر فييت اسكوير(ام فتفتفت) والله كان كدي (معكوسه) تقيل تقديري واحترامي يا ظريف وحتي وحتي نلتقي في ساعه خير

  5. الفاتح .. الشيخ صغير السن دا بيحرسوه لأنه محايته بيبسى وحيرانه جيكسى مش زى حيرانك الغبش ديل أمثال شنباتى ود. طارق عبيد والجنوبى ..
    الشى التانى الشركات الأمنية دى زاااااتها حقت الجماعة القاعدين جوة .. يعنى من دقنو وأفتلو..وزيتهم فى بيتهم وعلى المتضرر اللجؤ للقضاء ..
    ويا ولد جيب الحبوب لأبوك قبال المرارة ما تنفقع ..

    1. يا الما مكلبظ انت الظاهر بتعرف الناس كلها،انت منو،اظهر وعليك الأمان

      1. يا دكتووووووووووور .. كان آخر لقاء بيننا فى مزرعة ابرسى فى الخرطوم مع مجموعة ساخر سبيل فى معية أخونا ابوناجى ( الفاتح جبرا ) يوم 23 أغسطس 2013..

      2. انت الظاهر عليك Too fat ..ادينا معاك أنبوبة غاز !!

  6. البروف الحبيب
    والأحباء البروفات
    إن ننسى لا ننسى ،،، ان وزارة الدفاع هي من ابتكرت هذه التجربة ،، جنود قطاع خاص وكده ((( الجنجويد ))) ودي نفس الفكرة
    بس يا بروف ما قلت لينا إجار العسكري بالعربية بكم ؟ والعسكري لوحده بكم وعربية النجدة بكم ؟؟
    و انا شاحد الله القى قروش كتاااااار ،، عشان أأجر الجوز البقيفو قدام القصر الجمهوري ،، أصل وقفتهم دي عاجباااني

    1. المندهش أخوي .. تعجبك عافيتك .. كان كدي انت زول خرتومي تب .. هااجنا انت بتشوف القصر الجمهوري ؟؟؟!!!

  7. ده “شيخ” خليجي، وحتى المواطنين الخليجين ناسنا بينبرشو ليهم (معليش ع السوقية) بس على قدر اهل العزم (ناس قريحتي راحت)، والغريبة انو حتى سفاراتنا عندهم لما تكون في مشكلة برضو بطلبو من السودانيين (انبطحو)، ياخي ديل ما بتفرعنو الا على اهلهم، ولو مسكنا الحكاية بالدين فالرسول صلى الله عليه وسلم بيقول: (خيركم خياركم لأهله)، “رأيكم لو استخدمنا الاستنتاج المنطقي”؟.
    بعدين مسـألة الشرطة دي بقت واضحة “مالنا دولة بينهم” يقلبونه كيف يشاؤون، اغلب الميزانية للقوات النظامية التي يزداد تعدادها يوميا ومن ابنائهم ومواليهم (مواليهم دي بضم الميم وفتحها “الاثنين معا”)، ولازم ازيدو ليهم المخصصات وكده، والشركات الامنية الخاصة دي ليها “هدف” لازم انشف دم قلبنا، استاذي والله انا فاكر انو الكلام اريحني لكنو بدا احيرني ويملأ صدري غلا على غل.
    السؤال الهام:
    هل من الممكن تأجير الشرطة لتأمين المظاهرات السلمية؟

  8. بتعرفو للنمضي …………. انضمو ساي … عوجة ما بتجيكم
    اخخخخخخخخخخخخخخخخ
    انا قربت اطفش
    يا مندهش اخبار ناس (شيميسي) ناس نعل ما قبضوهم هناك …. مع الكشه القايمة دي
    الله اكبر

    1. هههههههه,,,
      تطفش اى تزهج ان تطفش اى تهج !!؟
      وج وج وج

      1. شمباتى .. تالله إنك لفى ضلالك القديم ..

      2. هههههههههههههههههههههههههههههههههههااااى,,
        والنسى قديمو شنوووووو !!؟
        طييييب !!
        مرحبنبك فى دهنك اوبسورى ثوبك الجديد ,,,

  9. والله يا بروف أنا مستغرشة منك انت ده!!! داااابك تعرف الحكاية دي!ليه ما بتمشي بالشوارع؟ يأتوا وزارة ما حارساها شركة خاصة؟! يا قولك كووووولللهم محروسين قطاع خاص، و ألما واقف بره واقف في الريسيبشن، عاااادي بالزبادي! و امشي وزارة المالية ، يكرشوك زي الترتيب. بعدين حضروا كوووووولللكم حبوبكم عشان تس،معوا الجاية دي، رءئاسة الجمهورية بتأجر عرباتها( ام صقر الجديان) عاااادي !!!شفتهم بي عيني. دي راكبها ولد رئيس وهو رجل اعمال( definitely this president is arabic) و لما سألت بي يأتوا صفة يركب العربات الرئاسية دي خاصة وهو جاي في ( his personal business) قالوا لي العربات مؤجرة، والله اعلم ( full stop( شن قولكم)

    1. والله عاد بالغتي يا نانو .. برنجية وخواجية عدييييل كدي .. تحياتي ..

      1. لقيتني كيف يا أمريكي، بالمناسبة قصة نونا و نانو دي ذااااتا الكان خائف منها أخونا ناو ابو احمد٫!بالمناسبه أين هو؟زمن مختفي، له تحياتنا!

  10. المال السايب بعلم السرقه والمال العام بتعلمو فيهو السرقه ومامحتاجه لي حد يحرسها لانها مقشطنها اسيادها وسبب عطاءات الحراسة هي ان تعم الفايدة لانو زي ماتكرمو الاخوان الفوق ديل انو اصلا شركات الحماية دي تابعة لجهاز المغتربين الوطني !! والمثل بقول (الممطورة مابتترش) يحرسولا شنو وهي اصلا مافيها شئ.وبس لاثقال كاهل المواطن برسوم زيادة لانو المتحمل او الحامل الاول والاخير هو نحنا.

    1. قال ( هو نحنا ) انتوا لسع عايشين يا ود صابر ؟؟ خليك صابر كده !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: