والمغفرة كمان

ونعمة بالله .. ونعمة بالله .. ونعمة بالله … ظل العبدلله يردد فيها وهو يطالع ذلك التصريح الذي ورد على لسان الرجل الثالث في الدولة الدكتور الحاج آدم نائب رئيس الجمهورية، والذي ذكر فيه أن الحالة الاقتصادية في السودان تجاوزت لغة الأرقام، وباتت تعتمد على رحمة المولى عزّ وجل.
كلنا يعلم أن من يَتَوَكَّلُ على الله فهو حسبه ولكن (تتوكلو لينا) بعد شنو؟ فشأنكم شأن إبن ورث أموالاً طائلة من أبيه فطفق يبدد ذات اليمين وذات اليسار ثم إذ وجد نفسه (أباطو والنجم) توضا ثم صلي صلاة )الحاجة( رافعاً يديه إلى السماء مع إنو لو مشى عديل ما كان )محتاجا( !!
سعادة الأخ نائب رئيس الجمهورية يحيلنا إلى (القوى الإلهية) لتنقذنا مما نحن فيه بينما لا نجد رجلاً في الدولة بإستطاعته إحالة (ملف هيثرو) إلى (القوى العدلية) حتي يستطيع هذا الشعب المكلوم أن يستعيد (أموال بيعه) التي قبضها اللصوص في رابعة النهار والتي مر على توجيه السيد رئيس الجمهورية بمحاكمتهم قرابة العام … أقول قولي هذا وهنالك بعض (كبار المسؤولين) ما فتئوا (لحدي الليلة) يرددون (دون خجل) تلك الأسطوانة المشروخة : العارف ليهو فساد موثق اليورينا ليهو .. وكأنما هذه الواوات الممتده التي تكتب منذ أعوام في ذيل هذه الزاوية تكتب (بالحبر السري) !!
لماذا لا ينهار الإقتصاد سيدى (الحاج) والهبر وإستباحة المال العام أصبحت بالمفتشر (عيني عينك) ودونكم (هيثرو) و(الأقطان) وما يتناوله البعض عن بيع (بيت السودان) وما خفي يعلم به الله ذو الجلال والسلطان .. نحن يا سيدي النائب لا نقنط من رحمة الله ولكننا نتساءل عن الكيفية التي أديرت بها هذه البلاد ذات الخيرات العديده والوفيرة خلال سنوات حكمكم الرشيد حتي باتت تستجدي الرحمة والفرج من الله ..
لم يكن لهذا التصريح أن يثير فينا المخاوف فترتجف قلوبنا قلقاً على مستقبل هذه البلاد لولا أنه صدر من السيد نائب الرئيس والذي يترأس ما يعرف باللجنة العليا المكلفة بمتابعه الإصلاحات الإقتصادية فهذا التصريح من الرجل يشير بما لا يدع مجالاً للشك بان البرنامج الإقتصادي الإسعافي (الثلاثي) الذي شرعت الحكومة في تطبيقه لم يعد هو المرتجي للخروج من المأزق الإقتصادي الجاثم كما أن حديث سيادته يؤكد إنعدام كافة الحلول ما عدا حل واحد هو (رحمة الله) .
ولعل أخطر ما ورد في تصريحات السيد نائب الرئيس هو حديثه عن أن الميزانية العامة للدولة لا تعبر بصدق عن الأداء الكلي للاقتصاد والنشاط المالي كما لا تعكس تفاصيل المشهد الاقتصادي السوداني وهو حديث رغم خطورته إلا أنه واضح ومعلوم فكيف بالله عليكم يمكن أن يتم وضع ميزانية ليست بداخلها إيرادات بعض الوحدات الحكومية التي تقوم بتجنيب إيراداتها (وتصرف منها على كيفاوبمعرفتها) !
في ظل هذه (الهيصة) المالية و(الجوطة) الإقتصادية لا يملك المرء وهو يستمع إلى المسؤولين (والخبراء) المستشارين وهم يتحدثون عن معدل النمو .. ونسبة التضخم ..ومش عارف ايه إلا أن يضحك حتي ينكفي على ظهره (ده بعد ما ياخد ليهو بكية) .. الجماعة ديل قاعدين يحددوا المعدلات والنسب دي كيف؟ وكل هذا الكم من الأموال (المجنبه) والجهات التي ترفض (المراجعة) لا ترد حساباتها في الميزانية ولا وجود لها في اضابيرها .. مش حكاية عجيبة تحتاج إلى الرحمة والمغفرة كمان ؟ ..
كسرة :
فعلاً .. هو إنهيار بات إصلاحه يعتمد على رحمة المولى عز وجل .. أو كما قال (الحاج آدم) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

Advertisements

73 تعليق

    1. مبروووًووووكه عليك الماده ونص
      هههههه

    2. نص ونص قزازة زمان في الديم

  1. الله يجازي محنك يابروف .. طممت بطنا من الصباح .. هسع الباسطة الاكلتها مع الشاي دي اطرشها ساااي كده ؟؟ النقوم امص لي ليمونة !!

    1. ما شاء الله عليك يا (اونكل سام) انتا لسة بتاكل باسطة مع الشاى؟ ربنا يزيدك و يبارك ليك,, الظاهر تأثيرات رفع الدعم لسة ما وصلت حلتكم !!

      1. يديك العافية فلاديمير أخوي .. حصل سمعت ب ( جو بايدن) كان بشيل ليهو ساطور في الجامعة ؟؟ كلم أخوي شمباتي وقول ليهو خليكم مع سواطيركم دي .. وخلونا نحنا لأكل الباسطة !!

      2. اكل الباسطة دا باعتبار ما كان مفيش حد بالقمردينة متذكر شكل الباسطة

  2. البروف وسمار القمردينة .
    صبحكم الله بالخير .
    والله يابروف فعلا الحاصل دة بيخلى الزول يكفر دون أن يدرى وهذا لعمرى ما يرمى الانسان فى النار سبعين خريفا .
    (رب كلمة لا يلفى الرجل لها بالا تهوى به فى النار سبعين خريفا).أو كما قال .(ص)
    ثقتنا فى ربنا كبيرة ونعم بالله .لكن الفيهم إتعرفت …
    الله فى ….

    1. زي صاحبك بتاع العرس الهدى لابو العروس المصحف هههههههه الدين نحنا ما بنابا لكن الفيك انغرفت

  3. الله يجازي محنك يابروف .. طممت بطنا من الصباح .. هسع الباسطة الاكلتها مع الشاي أقوم اطرشها ساااي كده ؟؟؟ قال اطرشها قال .. النقوم امص لي ليمونة !!!

    1. ههههههههههه,,
      وبالعدم !!؟

      1. يجازي محنك ياشمباتي !! انت بقيت ( معتمر واطئ ) ولاشنو ؟؟

      2. ههههههههههههههههههههههه,,,
        ادام الله وطينتك اوبسورى وطنيتك يا حبيب !
        لووووووووووووووووول

    2. هو انت يا امريكي اكلت باسطة من الصباح وبطنك ما طمّت ؟!

      1. ها يا جنوبي حمد لله علي السلامة ليك وحشة والله غيابك من الساحة زي غياب سيدا من المريخ ، بعدين يا جنوبي الله أكبر عليك نحنا كان مااكلنا باسطة في حكومة الإنقاذ دي نأكلها متين ؟؟ بعدين النقول ليك حاجة تانية أنا كان ما فتحت ( تفلزيون ) السودان من الصباح وشفت صورة أبو العفين ولا بتسوك !! اها رأيك شنو ؟؟

  4. بقينا ما عارفين نصدق منو ولا نكضب منو ..الجماعة ديل حيرونا عدييييييييييل كدا ..
    الفاتح شوف لينا حاجة كوثر الوداعية تورينا الحاصل شنو …ونحنا ماشين وين وجايين من وين ..
    زماااااااااااااااااااان كنا بنقول خلونا النشوف آخرتا شنو لاكين بعد كلام مولانا الحاج آدم ( قدس الله سره ) يمكن نكون حددنا وجهة تانية غير التوجه الحضارى المزعوم ..
    غايتو أخير كلو زول يحضر كفنه وينتظر ..

    1. ظني ماخاب فيك .. انت زول Too fat .. روحك روح كلب !! انت لسع ماحضرت كفنك ؟؟ ال Low fat زماااان راحوا المقابر !!

      1. كضبن كاضب يا اللمريكى .. انا ما Too fat زى ما ظنيت ولا شيتين.. لاكين بس جنس كلام الحاج أبو ساطور البيطمم البطون دا مش يخلى الزول يحضر كفنه وينتظر ؟؟؟

  5. السلام عليكم ، امس جايبين واحد ، واحد شنو ده نص تعيين ، مراسله ، فى قناة العربيه ، قال ايه عميل فى الامن السودانى وقال ايه هرب الى دوله افريقيه لانو ضد ، و الله ووالله كان العملاء السودانيين زى الوهم ده ، عشان كده بقت الحاله على الله و الحكام يرعوا ما لاقين البقول ليهم تك تك تك ، …………….. عجبى

    1. لا و المذيع شابكو ليك يا استاذ و يا استاذ ,, و اخينا كيسو فاضى ما عندو سجم خشمو و المذيع هو اللى بيلقنو الكلام,, كان احسن للقناة اللى اكيد دافعة ليو ان تقدم البرنامج كلو براها و تقول : نقلا عن المنشق فلان الفلانى !!

      1. يجازي محنك ياالمندهش كمان جابت ليها لفتهانزا ؟؟ طيب تاني نرجع بشنو ؟؟ والله دي عايزه ليها شوال ليمون عديييل كده !! رأيك شنو ياشمباتي ؟؟ ما عندكم مزرعة في شمبات ؟؟!!

      2. الحبيب كوكو….
        سلام وشوق ومحبة وبركة بالطلة يا الطف خلق الله ,,
        تانى ما تعمل كدة ياخ ….

        امريكى…
        مزرعة !!؟ ياهناى انا مواطن سااااااى ! مزرعة شنو كمان ؟؟

  6. لا حول ولاقوة الا بالله العلى العظيم !!
    هو الحاج ادم بعرف ربنا !؟
    اتفوووو عليو

  7. ولا ياربى تكون دى آخرتها الكان عايز يشوفها الحبيب حاج السلاوى !!!؟

    1. شنباتى .. نشوفها أكتر من كدا .. ؟؟ ما خلاس بقت ووووووووووووووواضحة ( واوات زى واوات الفاتح ) … هى دايره ليها كتابة ؟؟؟

      1. ههههههههههههههههههههههههههههههههههههههههاااااى,,
        اظهر وبان عليك الامان !!
        شنو يعنى مجافينا كدة ؟؟
        اهئ اهئ اهئ ,,
        احنا ما ناسك ياااااخ

      2. يا دوووب عرفتك يا الما مكلبظ ،كيفك وكيف أيامك وكيف الحساسيه ولا النزله اذا انا عرفتك وكلمه السر لوراتيدين اذا بتتذكر الروشته ولا انا بره الشبكه

  8. الكلام القالو نايب الرئيس موجود في الماده ٨٥ وبالذات في الفقره حتي من قانون الاستغراش

  9. خلاص أعلنو موت البلد بعد أن كان الموت إكلينكياً ؟؟!!

    انا شاحد الله يا الحاج ود آدم إنت والمعاك كلهم ،،،،
    تلقوهو في سمعّاتكم ودماعّاتكم ( أو كما يقول شمباتي ) ويقفل مداخلكم ويحلج مخارجكم ومحل تقبلو يغلبكم
    قاااااااادر يا كريم

    1. إنا لله وإنا إليه راجعون سيوارى الجثمان بدار المؤتمر الوطني وينتهي العزاء بإنتهاء مراسم الدفن

      ماااا عااارف ليه إتذكرت ود الخلا !!
      أين أنت يا رجل ؟؟؟

      1. كُر يا يابا !!
        لكن ماااا سببت ليهم الجفاف وشلت منهم العفاف !
        اهم شئ السدة الما منها ردة ,,
        اخييي عليهم …

      2. المندهش .. الجثمان صدقة للصقور والذئاب والكلاب الضالة والعزاء عافنكم لله و الرسول , بلا خسار فاتحه وتعب حفر !
        ود الخلا ظنيته مع د. غازي
        شمباتي امس جيت من الميناء للعمرة ومسكت الخط طوالي , خفت اتصل عليك تخصمني وكان لازم اصل الرياض امس المساء , دعيت ليك كان بينفع !
        كتلوني ولسه حي .. انت بالذات سألوني عنك وورييييييييتم . طاخ

      3. لاااااااااااااااااااااااااااااااااااااااااااااا,,
        اهئ اهئ اهئ,,
        حمدالله على السلامة وربنا يتقبل ,,,,
        لكن حقى بخلصو بالتلفون !!!

  10. أعلن هارتموت فولتس المدير العام لفرع لوفتهانزا في السودان.أن الشركة (قررت تعليق رحلاته من فرانكفورت إلى الخرطوم).
    وقال مصدر يعمل في صناعة الطيران في السودان لوكالة (فرانس برس) إن الخطوة جاءت بعد 51 عاماً من خدمة لوفتهانزا في السودان.
    وأوقفت الخطوط الجوية الهولندية (كي ال ام) رحلاتها بين امستردام والخرطوم بسبب ارتفاع التكاليف ، مطلع هذا العام.
    وأعلنت شركة مارسلاند للطيران السودانية الاحد تعليق رحلاتها. و سيرت الاحد آخر رحلاتها.
    وتقوم مارسلاند برحلات الى جنوب السودان ومدينتي جدة والقاهرة فضلا عن مدينتين في إقليم دارفور

    وتم ايقاف هذه الشركات الاجنبية لاعمالها في البلاد الى تدهور قيمة الجنيه السودانى – الذى تشترى به التذاكر محلياً – وصعوبة تحويل ايرادات الشركات بالعملة الصعبة الى الخارج

    اهيء اهيء اهيء
    الفااااااتحة

  11. مؤشرات جيدة لحقبة جديدة.
    بس المؤشر الاقوى والذي يًستشف من كلام النائب الحاج انه في طريق تنقلاته من الهلال للمريخ.
    وان المريخ بعد ان انتقل له هيثم مصطفى نال كاس الممتاز.
    ولكن فشل الفريقان الحصول على كاس الاندية الابطال – معليش اقصد سيكافا.
    اخيرا الجنيه مصيرو ينتعش بس نحن باقي لينا كم ونركب النعش.
    عن أبي أمامة رضي الله عنه عن النبي صلى الله عليه وسلم أنه قال ما من رجل يلي أمر عشرة فما فوق ذلك إلا أتى الله مغلولا يوم القيامة يده إلى عنقه فكه بره أو أوثقه إثمه أولها ملامة وأوسطها ندامة وآخرها خزي يوم القيامة .رواه أحمد
    احلهم الحلّ بله
    ما احسن لينا نقد فراجة؟

    1. أنا زمااان سألتك قلت ليك السودان ياتو الفوقاني ولا التحتاني؟؟ الليلة عرفناك من التحتاني ياوصيف … اصلكم انتوا دائماً ( تسخاني ) !!!!

      1. والله انا كان ما لقيت المدونة دي في اللحظات الاخيرة شان اتنفس علي كان الفوق ذاتو خليتو

  12. يا اخوانا خليكم متفائلين , اسي السودان دا لو ما حلو جنوبي دا لليلي لابد هناك ؟؟؟؟؟ اكيد في حاجة انتو ما شايفنها !! فكدي اعيدوا البصر كرتين وتلات كرات واربعة كراتيت وعشرة كروتة , يمكن القى الزيي فيكم , يمكن تلقوا لينا مخارجة !!! باقي القصة بي جاي بقت ما مضمونة !!!!!!!!!

    1. وينك يا ابو الشباب …. طولت ما طليت …. الشره بلعناها احنا الاتنين
      بدايات موسم الهجره ….. الله يكون في العون

      1. وانا ما بلعت معاكم !!؟ هييييق …
        وامكن القى حاجة , حاجة تفرح ,,,,

    2. والله يا ركس السودان بقي زي بيت الهناي ! كل زول راجي دورو ,
      تصدق التنك بتاع العربية هنا بعبيهو بي 30 ريال وبنزين 95 , هناك نفس التنك كنت بعبيهو بي 240 ألف جنيه وبنزين زي البوخ كان ما قفلت التنك سريع بيخلص قبل تشغل عربيتك !
      زمان السودان حلو بي ناسو هسع يمين ناسو ذاااااااتم بقوا ما حلوين .
      كان لي وكان لابد من الدعاء بقول يا ربي ما تفرجا علينا عشان يقطعوا العشم من خيرا فينا , دايرننا نتعب نتوضأ ونصلي ونقعد ندعوا وهم يجوا يشيلوها بالسااااهل ,
      هسع وزير المالية ده داير يفرض ضرايب علي المغتربين في شنو ؟ هو مش رفع الدعم عن أي شئ ؟ شاحد الله ضربه فييييي …… ويكون ما لابس والضربو يقول ليهو نعيماً .

  13. يااااااى الرماد كال خشمنا الله ىجازى الكان السبب

  14. يا أخوانا في حاجتين محيراتني و ليهو جائزة، اولا الرئيس محمد مرسي كان منتخب ديمقراطيا و قبض هو عشان كان هرب من السجن ايام الثورة، علل:ما حكم نائب الرئيس الذي كانت قد أصدرت في حقه مذكرة قبض. ثانيا: لجنة الخبز إجتمعت ورفعت و نزلت و طلعت بي توصية ،اما ٤ ارغفه بجنيه او رغيفين بوزن اربعه أرغفة (. بجنيه برضو) الفاهم يفهمني، أختكم مااااسحة

    1. نونا .. سلام .. بالعكس انتي افهم واحدة في السمار ديل انتي بتقولي ليك كلام إبليس ذاتو مابفكر فيهو .. بس اعملي حسابك من الساطور !!

      1. الله يستر أمريكي اخوي، هيييي أنا بررررررة، ده إنت القلت(انت محصن يا اخوي)

    2. حاحاول اجاوب .. الله اعلم نصيب بس الناخد اجر المحاولة :

      ج1 – الحكم حكم ربنا يا نونا ! سؤالك دة على وزن اطول الزرافة ولا اسمن الفيل …
      نبكي بس !

      ج2- فَسّر الماءَ بعد الجُهدِ .. بالماءِ ! هسة جنس اللخبتة دي يشرحوها كيفن ؟؟!
      قطع شك اللجنة زااااتا ما عارفة الكلام دة يعني شنو .. ما تستغرشي ساكت

    3. الثانية اسمها حساب ابو الكجك وما تسأليني اسألي بقية القمردينة عن ابو الكجك دا

  15. سلامات …………
    يا جماعة والله العظيم تلاته مافي حل غير الشارع …… اهو كلو كفن في كفن …… واخير كفن الشارع بودي الجنة …. ومعاها شفاعه 70 كمان ……
    نافع (لعنة الله عليه) قالا ليكم المارق الشارع يشيل معاهو كفنو….. والله احسن حل اخير من كفن الجوع واحتمال ما تلقي ناس يدفنوك
    تموت كما يموت الجبناء …… ما يحسو بموتك الا يشمو ريحة عفنك دا لو فيك حاجة بتعفن من اصلو ……
    الشارع وبس وما داير زول اقول لي البديل منو …. والبرقص العروس منو ….. هسع شمباتي دا مالو عيبوهو لي ….

    1. قصدك شنو يازول ؟؟ نعمل شمباتي رئيس ؟؟!! والله مالو فكرة ..

    2. انت شابكنا بتعفن بتعفن .. أجب علي السؤال الآتي : المانافع في المنافع= المانفعين أم أبو العفين ؟؟

      1. اتو قلتو المنفعين ولا المر
        فعين

    3. هههههههههههههههه,,شمباتى للرقيص ولا شنو يا المكتول ولسه حى ؟؟
      المهيرة عقد الجلاد الناااااار يا عروسنا ,,
      رئييييييسك غلبو الثبات !
      وجع

  16. اليومين ديل الشغل قاعدين نمشيهو بالجلابية السودانية ……………

    1. ههههههههههههههههههههههه,,
      ياخوى ما تخاف ,, ما بتشبه الاثيوبيين !
      لوووووووول

      1. ياشمباتي العوجة والخوف ما من الجلابية .. الخوف يتلموا علينا المبعدين من السعودية ( السودانين والاثيوبين ) وعدل علي الجربفات .. تاني ياشمباتي تمشي لبتاع الفرن تديهو جنيه يقول ليك مطلوب رغيفه !!!

  17. المشكله مافي حاجه يعتمدو عليها حتي الآن والدليل زي الامبارح جابتو قناه العربيه ووالله قعدت ووقفت وتاني قعدت وووو تقول الواحد في العنايه المكثفة ،الله كريم.

  18. وااااااااا

    حريق هائل بوحدة تحريات غسيل الاموال التابعة لبنك السودان.
    سبحان الله الحريق جاء في وقته.
    الحريق لم يؤدي الى خسائر في الارواح بيد انه اتلف بعض الملفات.. حكمة الله بعض الملفات.!
    اتصل العاملين فور حدوث الحادث بوحدة الدفاع المدني.. يعني كان في ناس قاعدة والحريق اتلف بعض الملفات يا ساتر يا ساتر .!
    الحريق نشب نتيجة التماس كهربائي.. تاني مشينا وجينا للالتماسات الكهربائية .؟
    الحريق نشب في الطابق الثاني الخاص بوحدة تحريات غسيل الاموال والفساد.. ياربي يكون الطابق الوحيد السلوكه عريانة.؟
    .
    سبحاااااان الله
    الحبيب كتلوني جيب الدلوكة وتعال

    1. انتوا عندكم عرس ولاشنو يا المندهش ؟ اسمع دي واقعييية .. يحكي ان الأولاد والبنات الكل مشغول في بيته مع عياله ويتركون أمهم تعيش لوحدها دون أنيس أو حبيب .. ذات يوم دخل عليها ابنها وقال لها يا أمي أنا عندي ليك عريس ، في واحد خطبك مني .. رأيك شنو ؟؟ قالت ليهو البتشوفو يا ولدي ! تم الزواج وساق العريس عروسته ( الأم ) .وفي الصباح قام الابن بزيارة امه العروس ، وسألها : أصبحتي كيف ياامي ؟ فكانت إجابة الأم .. تصبح نبي ياولدي .. انتهت .. استغفر الله .. طبعا الأم قاصده تصبح في النبي .. بس الفرحة والنشوة كانت كبيرة .. اها ياالمندهش تصبح في النبي اعزمني في الدلوكة دي .. الشمباتي بره ..

    2. المندهش .. لا تندهش !! اسمع الحريق دا : ورد في الأنباء ان الدول الغربية وجدت ضالتها في السودان لتدمير الأسلحة الكيميائية علي أراضيه . انتهي الخبر .. التعليق : أليس الموت حق ؟؟ أهكذا تودون ان تموتوا ؟؟

  19. الملاحظ انو التصريح المرة دي حقيقي فعلا وهذا هو الوضع في السودان وبقية التصاريح تأتي فقط كطيور زينة علي شاكلة إصلاحيين – ابييي – مش عارف إيه. الموضوع بقي بالبلدي كدي زي آخر البوش الجماعه بتخاتفو في آخرو ويقومو يخلو الصحن فاضي بعد ما احسنو الصحن وجلوهو كمان بي بيفة سلك والمشكله انو هم شكلهم لسه منتظرين الوصلة ومامقتنعين إنو خلاص مافي وصلة لانو الحلل مقشطة ونضيفة ومجلية وتسو كدي.. وما عارفين إنو المال العام زي صحن السلطة مافيهو زيادة خلص يعني تقوم تمشي تغسل يدك.
    الله يسترنا وينتقم حقنا في الدنيا قبل الآخرة (اللهم لاتؤخر حسابهم)..

    1. ياود صابر نحنا الحساب دا راجينو بفارغ الصبر .. كدي عليك الله ياود صابر اسأل لي واحد يفتي لينا .. بعدييين يوم الحساب عندما الدور يجي علي أبو العفين .. يعني بالواضح كدي لمن أبو العفين دا يقيف قدام رب العالمين .. نحنا المظلومين ديل بنكون حاضرين ولا لا ؟؟ طبعا أبو العفين دا مثال أنا داير اقيف قدامهم كلهم وأحضرهم .. عليك الله ياود صابر اسأل وكلمني أنا مغبون شديييييد .. داير اتفشي ..

      1. الكويس انو يوم الحساب لافي رفع دعم لا في تصاريح إستفزازية لافي قلة أدب بتاعت كل من (هب ودب وأنس في نفسه الربه) ان يطلع لينا بي 100وش الحمدلله يارب انو اليوم داك كل نفس بما كسبت رهينة والمشكله انو هم عارفين الكلام
        ده لكن هم نفسهم مستغرشين وماعارفين ليه قلة الادب وعدم الانسانية والضمير الاسود والقلب الاغلف ده!!
        واكيد في النهاية الله احسن منهم.

      2. أخالفك الرأي ياود صابر هؤلاء الأوغاد نسوا الله فأنساهم انفسهم ، من يستمع اليهم ويري أعمالهم يلحظ أنهم يقولون أنا ربكم الاعلي !!

      3. الرسول بقينا للزي ده ! يعني نرجي يوم الحساب ؟
        بلد تتباع فيها ( كوارع الجداد ) ويقول ليك الرئيس فلان والوزير فلان !!!!!!
        أحييييييييييييييييييييي من الشفتو ويا اخوانا كان رقتو بوصف الشفتو , شفت البلد ماش لهاويتو التحتو
        سير سير يا بشير , بس ان شاء الله تكون عارف انت ماشي لوين ؟

      4. الي الجحيم هو وزمرته إنشاء الله !!!

  20. يا بروف انت ماااشي بعيد ليييييه؟ .. خليك من الرجل التالت .. الرجل الاول زااااااااااتو قال الارزاق بيد الله ….!!
    ويقال والعهدة على الراوي أن المايكات الكانت قدامو في المؤتمر الصحفي اصيبت بالشلل بعد سماعها الكلام دة !!
    ونقلا عن شقيق مايك قناة الجزيرة ان اخوه دخل في حالة صدمة عصبية منذ المؤتمر وهو الان بمستشفى حمد الماحي بالدوحة !

    غايتو ونعم بالله طبعا ونسأل الله ان يلطف بنا معشر المستغرشين في الارض .

    تخريمة :
    عملاً بمبدأ حُسن الظن حنفترض إنو مافي زول قال ليهم إنو الحساب برضو بيد الله !

    1. انتوا ياالشوايقة عنصريين خلاص مالك خليت الراجل الثاني ؟؟ فيشانشنو ؟؟؟؟؟

      1. يعني كان انا فطيتو يالامريكي ربنا حيفطو ؟
        الريس ما خلا لينا حاجة نفتش فيها البعدو ..
        وعلي رأي المثل بعد التعديل :
        إذا كان رب البيت للدف ضارباً .. فأكيد أخوهو شغال بتاع ساوند !

      2. هييييييييييييييي يا امريكى ,,
        البريد (الشيخ) انا يا ناس بريدو !
        ههههههههههههههههههههههههههههههههههه

  21. الله كريم علينا كلنا فقد طالت مده الاغتراب والله حرام

  22. هي واحده (مش هي لله هي لله) كتمت كتمت كتمت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: