التطنيش عشان تعيش (أرشيف)

الحياة بقت صعبة خلاص ولا تحتمل.. اليوم كلو الزول جاري بلا فائدة .. حاجات كتيرة كل يوم تعكنن عليك وتكرهك العيشة.. لازم تعمل ليك (إستراتيجية) عشان شوية الحياة تكون مقبولة وأسهل حبتين.. دى غايتو عشرة نصائح تطنيش.. لو عاوز حياتك تتحسن شوية أسمع كلامى وأعمل بيهم!!
الطناش الاول
طنش إنك كل سنة تسمع حكاية (الخريف فاجأنا) دى .. وحكاية قمنا بتكوين لجنة لدرء (الكوارث) والكلام المقدد القاعد تسمع فيهو ليك (عشرين خريف) ده لأنو لو عاوز تتكلم فى الموضوع ده وتقول للمسئولين إنو الحكاية دى كترتوها ومسختوها وإنو المسألة بقت ما مبلوعة ما ح يسمعو ليك وح يسووا فى القاعدين يسووا فيهو ده وما ح يشتغلو بيك شغلة وح تقوم (تفقع مرارتك) ساكت فأحسن ما تتعب نفسك لأنو السنة الجاية ح يحصل نفس الشىء والخريف ح يفاجىء المسئولين والمطرة ح توقع البيوت والسيل ح يكتل الناس .. صدقنى دى حكاية ما عندها نهاية عشان كده طنش الموضوع ده وما تشغل بيهو دماغك واضرب منو طناش عشان بالك يرتاح!!
الطناش التاني
طنش وما تدفع أى جباية يعنى ح يعملو ليك شنو؟ إعدام مثلاً؟ ح يجرجروك كم (جرجيرة) كده ويحبسوك شويتين وبعدين ح يفكوك يعنى ح يودوك السجن عشان يشربوك ويأكلوك؟ طبعا لا!! هم المسئولين ديل قاعدين يأكلوا ليهم زول!! ما قاعدين ياكلو براهم وكده ..طنش يا زول وأسمع كلامى وما تدفع أى جباية!!
الطناش التالت
طنش أى زول عاوز منك قروش.. مش إنت ذاتك ما عندك ولسة قاعد تتدين؟ طيب ح تجيب ليهم قروش من وين يعنى؟ هل ح تهبط عليك ثروة من السماء عشان تسدد ليهم؟ طبعا لا.. عشان كده طنش الناس الإنت مستلف منهم ديل كلهم وشيلهم من راسك كلو كلو.. وبعدين لو إفترضنا فى واحد فيهم زهج منك وعاوز يمشى المحكمة عشان يشتكيك الحكومة ح تدفعوا رسوم ودمغات وشنو ما بعرف داك أكتر من القروش العاوزا منك ذاتا.. يعنى مش ح يمشى.. عشان كده (طنش) واسمع كلامى!!
الطناش الرابع
طنش إنك تستمع لتصريحات المسؤولين عشان ما يجيك شلل رباعي أو إنسداد في الشريان التاجي المسؤولين ديل أصلو عايشين في كوكب تاني .. غايتو لو ما عملتا بنصيحتي دي أنا ما مسؤول !
الطناش الخامس
طنش الجرايد و الأخبار لأنها كلها كلام يوجع الدماغ!! الإتحاد الأوروبي يرتب لحوار بين الحكومة والمعارضة … قرب إعلان التشكيل الوزاري المرتقب .. (تشكيل مين يا عم) .. الإتحادي لم ينسحب من الحكومة (ينسحب ؟ في زول يرفض النعمة؟) .. الخطوط الألمانية توقف رحلاتها (المطار الجديد لزومو شنو؟) والعجب الجرائد الإجتماعية.. الفنانه ديك (طلقوها) والمطربة ديك (ضبطوها) .. وقصص وحكاوى إنت فى غنى عنها.. عشان كده (طنش) حكاية الجرائد عشان بالك يهدأ وتروق وكده!!
الطناش السادس
طنش كلام أي مسؤول يقول ليك .. العارف ليهو فساد يجيب مستنداتو .. طنش يا عم ما هم قاعدين يطنشوا في كسراتنا دي سنين وكمان يقولوا ليك (جيب مستندات) !!
الطناش السابع
طنش اي حاجة ح تنكد عليك عيشتك يعني زي مشاهدة التلفزيون والمذيع الكل كلمة والتانية يقعد يقهى ليك فى (سقف الأستديو) ويكتل ليك فى عينو و(يغرودهم) ليك وإلا مقدم البرنامج القاعد يسأل الضيف ويجاوب قبالو.. ولازم تطنش كمان مشاهدة الإعلانات او الإستماع إليها.. طنش عشان ما يجيك ضغط أو ينفجر فيك عرق .. طنش السخافات دى عشان تعيش!
الطناش التامن
لو كنت ما متزوج طنش أسطوانة أهلك بتاعت (ما تعرس إنت منتظر شنو) ؟ أو (فكر فى موضوع العرس وخليهو فى بالك) !! لأنو هم ما عارفين الفى بالك!! ولو كانو عرفو الفى بالك ما كانو جابو ليك السيرة دى من أساسو .. طنش يا عم هو ناس مثنى وثلاث ورباع ديل خلو ليكم حاجة تعرسوها؟ ما عزلوا (النوار)
كلو !! .. وكمان ما خلو ليكم حاجة تعرسو بيها ما شالو (الضحاكات) كووووولها !!
الطناش التاسع
لو كنت متزوج طنش النقة بتاعت (المرا) وما تشتغل بيها شغلة عشان ثبت علميا إنو (النقة) بتعمل إلتهاب فى صمام (العصب القولونى المترالى) وأنها تورث الفقر وإنت ما ناقص (فقر) وكفاية الفقر العليك كمان تقوم تجيب ليك معاهو (نقة) !! أسمع الكلام وطنش (نقة المرا) وأضرب (طناش) عشان ما تمشى (الإنعاش) !
الطناش العاشر
طنش الطناشات الفوق دى كلها وما تشتغل بيها شغلة لأنى إتلفت كده وكده وحكيت رأسى عشان ألاقى ليا موضوع أكتب فيهو قمت ما لقيت والوكت زنقنى وناس الجريدة كل دقيقة يتصلو فينى ويسألونى: يا أستاذ ما رسلت المادة مالك؟ فقمت (نجرت) موضوع (الطناش) ده .. فطنش الطناشات الفوق دى كلها وما تشتغل بيها.. احسن ليك!!

كسرة :
هو الواحد بالله يطنش شنو؟ وللا شنوو؟ وللا شنوووووووووووو !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

Advertisements

22 تعليق

    1. الطناش في بلد المقهورين خوف ..

      1. والمقهورين في بلد الطناش قنابل موقوتة

    2. يا حبيب مبروك البرنجيه واخوك مطنش من البرنجيه ههههههه

    3. انا طنشت وفي الاخر طفشت

  1. ياربي دي ياها البرنجيه البقولوها ؟؟

    1. مطنشاتى رقم two !!!

    2. البرنجية ما ديك يا عمك تنقو

  2. الليلة نحن حانطنش وماحانعلق …

  3. أنتو طنشوا وانا بستغرش

  4. يعنى طنشتنا عديييييييييييييل كدا .. الطناش ..ولا العمى ..وأهو كلو طشاش فى طناش .. طنش تعش ..ويمكن تنتعش فى زمن الطناش الحائر …
    اكتر وأهم طناش عجبنى هو طناش تصريحات اللا مسئولين العندنا .. لأنو من تصريحاتهم الكتيرة ومسيخة ولا تغنى ولا تسمن من جوع المرارةإنفقعت تلاتة مرات وضغط الدم وصل اعلى من منسوب نيل 88 والكوليسترول فاق كل التوقعات .. اما السكر فحدث ولا حرج ..
    غايتو لاكين جنس غايتو ..

    1. طنش برضو وعليك بالمورينقا ههههه

    2. الله يرحم عثمان حسين وبارزرعة والطناش الحائر اقصد الفراش الحائر

  5. عجبني البند السابع ده لأني مسألة “البند السابع” بحبها في الله –
    بالامس كنت اشاهد قناة الخرطوم او انغام حاجة زي دي – وكانت سهرة من الامس بيقدمها تقريبا علي شبيكة ويقودها موسيقيا ثنائي العاصمة لما كانت – الشاهد في الموضوع شكل الناس اللي حاضرين اللقاء في الاستوديو (تقريبا مابين نهاية الثمانينات الى بداية التسعينات، الوقت داك ما كانت في بيتزا الا الفتريته باقي 88 وخيرات السماء)، لكن المهم والله اشكال الناس السمرة الجميلة المبتسمة من انشراح دواخلها، والاشكال السودانية الضائعة اليومين ديل، والطمأنينة، والتفاؤل، والتذوق، والحطب كتيييييييييييييير، نار ودخان، واللبن والسمن والسمان “طبعا طير السمان ده اختفى والعياذ بالله”، كل شيء ضاع، وبقى مافي كبير، الفي كلو (ابو كبير)، بالمناسبة كيلو الضان بكم.

  6. يا اخوانا مسؤولين من الخير ان شاء الله ،،،انتوا الغلبان وين اليومين دى؟ أوع تكون كتمت معاو فى الزنتان !!!!

    1. والله فيك الخير يا فلاديمير
      فعلا الغلبان ليهو مده ،انشالله خير وفعلا ليهو وحشه،تحياتي

    2. الغلبان ما في الزنتان كره الكيزان وطفش طفشان مشكور سؤالك عن العبد لله انت والعبيد الرواد المعتقين للقمردينة والله ليكم وحشة

  7. يا ربي أشارك و لا أطنش؟. سلام شباب الغائبين :نانو و الغلبان، و بت وراق( طوووووولت) و جميع الغائبين بأهدي ليهم موضوع الليله ده مع أطيب المنى.

  8. كتمت كتوما ربي يخليها تقول بم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: