لو ما كان مزور

العبدلله لديه يقين راسخ بأن البلاد لم تمر عبر تاريخها الطويل بمرحلة أسوأ مما هي عليه الآن في كافة مناحي الحياة حسبكم أن الدولار قد وصل سعره نهار الأمس ثمانية جنيهات وعشرون قرشاً (يعني تمنية ألف وشوية) !
تعالوا معاً نقف على أوضاع (الصحة) في بلادنا كمثال لهذا التردي الذي نعيشه ، ففي مؤتمر صحفي ضم وزير الصحة (مأمون حميدة) ومديري إدارات وزارته تم التصريح بهذه المخالفات :
• ضبط أشخاص ينتحلون صفة طبيب !
• يعني تاني الزول قبل ما الطبيب يكشف غليهو يطلب منو يوريهو مستنداتو (البرضو ح تكون مزورة)
• تسرب الإشعاع من أقسام الأشعة في 16 مستشفى !
• يعني المستشفيات بدل ما تعالج السرطان تجيب ليك سرطان
• الأطباء خلف تعطيل الأجهزة الطبية في المستشفيات العامة
• أهو دي عاوزه ليها فهامة (هم قاصدين يعني وللا عدم معرفة بالتشغيل وللا الفهم شنو بالضبط)؟
• وجود أدوية ومستهلكات طبية منتهية الصلاحية بالمستوصفات
• بالله ده إسمو كلام .. عشان كده الزول يدخل ماشي بي كرعينو ويطلع في (عنقريب) !!
• إستعانة المستوصفات بكوادر أجنبية
• بالطبع الوزارة بتقصد كوادر أجنبية (غير مسجلة) يعني ناس دخلت (الزريبة) دي سااااكت وكمان إشتغلت في الحقل الطبي (شفتو الكلام ده كيف؟) … بلد سايبه !
• أغلاق مستشفيات خاصة ومستوصفات بسبب إخفاقها في حفظ الدم
• سبحان الله المستوصفات الخاصة التي تطالب أهل المريض بدفع الأمنيات المليونية تخفق في (حفظ الدم) .. ناس ما عندها دم فعلاً
• وجود مؤسسات خاصة غير مرخصة تقوم بإجراء عمليات تحصين !
• (ونحنا نقول ليه بقينا زى الحصين) اليوم كوووولو جارين !!
• وجدود عيادات تجري عمليات جراحية دون تصريح رسمي
• العجب كمان لو العمليات دي بيقوم بيها الأطباء المزورين الفوق ديل تكون المسألة فل الفل
• ضبط مجموعة تضم 34 إختصاصياً يهربون أثناء ساعات العمل الرسمية إلى عياداتهم
• طبعن .. أكيد يمشوا يحصلو (النقاطة) وإن شاء الله المواطن يحصل (أمات طه) !
• وجود 17 معمل فحص تعمل دون ترخيص !
• يعني (كيري) سااااكت .. تجيب ليك كم جهاز (ضارب) .. وبتاع معمل (مزور) ومحاليل فحص (منتهية الصلاحية) وتعمل ليك لافتة مضيئة وأهو لقيت ليك شغل بدل ما تقعد (عاطل) ساكت شايل شهادة (التدريب المهني) وحايم !
• عدم السيطرة على الدخول للمستشفيات العامة مما أضر ببنية الصرف الصحي بالمستشفيات !
• يعني بالعربي كده الناس بتدخل المستشفيات عشان تقضي حاجتها ! طيب الزول (مزنوق) وقدامو مستشفي (يعملا وين) .. طبعن أكيد يقطع تذكرة ويفك زنقتو .. هو لو (الحكومة) وفرت دورات مياه عامة كان ده بيحصل ؟

هذا عزيزي القارئ الكريم بعض مما جاء من مخالفات تم رصدها من قبل وزارة الصحة الولائية للمؤسسات العلاجية الخاصة بولاية الخرطوم .. يعني (العاصمة) .. فتأمل كيف يكون حال الولايات الأخرى يا رعاك الله !

المعادلة عزيزي القارئ تقول أنه بعد رفع الدعم وإرتفاع أسعار اللحوم والفواكه والخضر سوف يتجه (الشعب) إلى البقول وما شابه وسوف تختفي من (جسده) النحيل العناصر الهامة كالبروتين الحيواني والفايتمينات مما يجعله عرضة لكثير من الأمراض تجعله يتجه نحو المستشفيات ليجد أن (الدم) منتهي الصلاحية وأن المعمل يعمل دون ترخيص وأن الأجهزة قد قام بتعطيلها الأطباء وسوف تخترق عظامه الأشعاعات الصادرة من غرف الأشعة وسوف يصرف له دواء (فاسد) وسوف تجرى له عملية جراحية في مكان غير معقم وللا مرخص يجريها له طبيب (مزور) وعندما تسؤ حالته ويسأل ذويه عن مكان تواجد الإختصاصي تأتي الإجابة :
– الإختصاصي ده قبيل طلع من المستشفى ومشي عيادتو !! (ده لو ما كان الإختصاصي ذات نفسو مزور) !!

كسرة :
قال أيه .. من أراد أن تثكله أمه .. شنو كده ما عارف … يا راجل نحنا كنا فين وبقينا (معاكم) وين ؟ يا عمي رووووح منكم لله !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

24 تعليق

  1. وجود* عيادات

  2. برنجية مع اعادة اللف

  3. جيد لينا بى الجديد

  4. هسع جنوبي دا مالو ماسمييين حصل يوم واحد سمعتوا بيهو عندو فقر دم ؟؟!!

    1. هههه يقطع من هنا ويوصل هنا , شال مننا فقر الدم وادانا فقر الجيب ..
      بحر ابو قردة ده ما يعمل ليهو حركات بحار زي تسونامي او يعمل ليهو حركة قرود كده ويخلصنا من الوضع المشين ده !!
      مامون حميده ده بس يخلوهوا لي أهلن ي سعاااااد , بتحسي ب شنو ؟ هو فاضي من تقديم البرامج في التلفزيون !!
      هي مستشفياتنا دي زاتا صحي بتشبه محلات فك الزنقة ..

      1. لمعلوميتك يا جنوبي ، اهلان يا سعاددي ذااااتا ما عشان خاطر سواد عيونا، لاحظ ليهو ٩٩٪من ضيوفو دكاترة في مستشفياتو، يعني دعاية مجانيييية، هو الفقر دا بعمل حاجة لله! فقر، الله لا وفقو ، ًيووريني فيك يوم اللا نام لا أكل الطعام يا حميدة الز……اكتر زول في الجماعة ديل ينطبق علييهو( إذا سرق فيهم الضعيف،….( وهو لو عاوز ينفعنا ما يجاوب هو على المرضي، شغال مذيع ربط ليه؟ ناس هنايا خاطر وهناي سعدالدين ديل مشوا وين؟ خللي ديل، انا الغلبانااانه دي ما بوصل و اربط؟( بالمناسبه الغلبان وين؟)

  5. ومن هنا نعرف فائدة الطب بالاعشاب
    أي عشبة بتعالج 54 مرض شفتو كيف ؟ وعلينا جااااي ،،،، اها دي أرحم من المستشفيات الخاصة والعامة ،،،،،
    الغلبان بسلم عليكم وبقول ليكم
    كتمت كتمت كتمت كتمت كتماااااااااااااااات

    1. يا المندهش .. الزول الغلبان دا وين ؟؟ قول ليهو كتمت بتاعتك دي غلبتنا وجننتنا .. بعدين الساعة 8:30 م شاهدوا حرامي المالية مع الصحاف اب جلاضيم البكسر التلج لكل الأنظمة !!!

  6. (الأطباء خلف تعطيل الأجهزة الطبية في المستشفيات العامة) !!
    اسه الوزير دا ما اطرش !!؟ الاطباء مالهم ومال الاجهزة !!؟
    فلا هم يقوموا بعمل التحاليل ولا يخططون القلب او يجرون موجات صوتية !!
    بسسسسم الله ,,
    اليمشى يشوف محل واجعو وين ,,
    اتفوووووووووو عليو

    1. “الاطباء مالهم ومال الاجهزة !!؟” القصة و ما فيها, اذا المستشفيات العامة ما شغالة حتمشي وين؟ الخاصة طبعا.
      وانا كدكتور عندي عيادتي الخاصة لو قلتا لي مريض امشي المستوصف الفلاني اللي هو انا شغال فيو اكيد بتمش صح؟
      الشغلة من الفهم دا بزنس بس ما اكتر

  7. اللهم لا نسألك رد القضاء ولكن نسألك اللطف والقضاء على كل فاسد “حظ الما فاسدين، دخل الفرد حيبقى عاااااااااااااااااااااااالي لو ربنا استجاب “مفهووووم؟””.
    وا عمراه؟

  8. الششششششششششششششششششششششششششششششششششششششششششششششششششششارع
    فقط لا غير

  9. سجاره بالله ياأستاذ جبره وأكون شاكر لو ولعتها مره واحده …… لا حول ولا قوة الا بالله

  10. اتف……. من هنا لي يوم إلقيامة علييهو المسخوط دا، والله والله ما طالبني حليفة ، القوم دا كللللو كوم عندي و حميدة السجم دا عندي كوم،. لكن ما عافية ليك سنتي الأكلاتها لي في الجامعة زور و بهتان و أثبات وجود و بعد داك زي الماحصل شي، تتلاقي يوم القيامة لكن تكون عارف تجئ مكرررررررب عشان ما عافية ليك معافية ليك و لو لقيتك في الشارع حأديك كف زي بتاع الدكتور داك لكن المرة دي ما حتفلت. ما سألتوأنفسكم ليه هو اكتر زول بلاقي إعتراضات بصوت عالي؟ لأنو فاسد مستفز كمان

  11. أكد رئيس الجمهورية عمر حسن أحمد البشير أن اقتصاد البلاد يصدر من مشكاة متقدة بنور الإسلام ومبادئ الدين الإسلامي الحنيف، ويتجاوز نزاعات الأنانية والذاتية ويميز بين حق الله وحق المجتمع وحق الفرد،
    جنوبي ,, الكلام ده يعني شنو ؟؟؟ باقي انت متفلهم ومتفلفس وبتفهم الحاجات دي !!
    شمباتي ،،، جيب الدلوكة وتعال !!

    1. يعني انتو لسه شفتو حاجه !؟
      هم مش قالوا كل شئ لله ؟ المجتمع والفرد ديل وين لقولم حق ..
      الخلاصة انهم حيطلعوا دينا باسم الدين …
      شمباتي جيب الدلوكة وجيب لي معاك العراقي الخيطو عباس الترزي … واي

      1. الليلة يوهى يا بلالى يووووهيييي,,
        انحنا جينا وكية للمابينا ,,
        الليلة يوهى يا بلالى يووووهييييييييييييييي ,,
        ههههههههههههههههههههههههههه,,نويت تعكس الخط ولا شنو يا جنوبى ؟
        وى وى وى

  12. السلام عليكم
    بارك الله فيكم
    تدوينة رائعة
    http://kollshi17.com/

  13. بعااتي و ما فاضي | رد

    يا اخوانا اخر زول مارق يقفل معاه الباب كويس و ما ينسى يخلي الغاز فاتح، خليها تحرق اكتر من ما هي حرقانة… الحمدلله بس

    1. بعااتي و ما فاضي | رد

      لو فضل فيها غاز اساساً

  14. وزارة الصحة دي كان يتبعوها للمرور كان كل مستشفي وقفوا قداما عسكري واي طبيب داخل يقول ليهو رخصتك !!
    انتو السودان ده ما فيهو هيئة تخصصات طبية بتدي الكوادر الطبية تراخيص عمل ؟

  15. البروف والسمار .
    سلامات .
    ياجماعه ترا مامون حميدة إعترف بأخفاقات وزارتة ومستشفياتة البخلى المتعافى يعترف بفساد بزور الفمح وضياع الموسم الزراعى شنو .والبخلى عبدالرحيم محمد حسين يعترف بى إخفاقة فى وضع إستراتيجية للدفاع تجنب البلاد الحروب وإستنزاف الموارد .والبخلى على محمود يعترف بعجزة هو دون عجز ميزانيتة وتقديم إستقالتة شنو ……. ياخ الله ينعل أبوهن…

    1. أذا كان رب البيت للدف ضاربا فشيمة أهل البيت الطرب والرقص مأمون حميدة دا وين لمن حصل الكلام دا كلو ولا فجأتن الحاجات دي حصلت هو فاضي لينا من البزنس بتاعو
      يارب تورينا فيهم يوم كيوم عاد وثمود……… آميييييييييييييييييييييييييييييييييييييييين

  16. والله قصه !!! لقد هرمناااااااا من كترة ماسمعناااااا عن وضع بلادي المتردي … عندنا واحد معرفه خريج ترجمه الاسلاميه شغال صيدلي؟؟؟!!! سألناهو كيف القصة دي قال عمل كورس صيدله؟؟؟!!! وين الكلام ده ههههههههه
    بعدين قصة الدلوكه الحايمه دي شنو اكان نشيل معاكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: