في الكركدي

إنتظمت مطار (أمازونيا) عاصمة دولة الأمازون حركة غير عادية .. عدد من رجال الشرطة بملابسهم الرسمية وهم يمسكون بكلاب شرطية ضخمة .. أعداد من رجال الأمن وهم يرتدون البدل السفاري ويضعون على أعينهم نظارات الشمس السوداء .. الجميع يبحث عن شئ !

في واحدة من زياراته لدولة (ناكوسيا) المتقدمة لم يصدق المسؤول الأمازوني عينيه عندما كان يسير مع نظيره (الناكوسي) وهما يطوفان بأحد المعرض الأمنية ويتوقفان أمام أحدي الفترينات التي تحتوي على عبوات من البخاخ الذي كتب عليها (غاز الصدق)
– والغاز ده عندكم من زمان ؟
– لا لقد إكتشفه علماؤنا حديثاً وهو يساعدنا كثيرا في إستجواب المتهمين إذ تكفي بخة واحده على وجه المتهم أو إذابة قليل منه في كوب قهوة أو شاي أن يعترف الشخص (بصدق) عن كل ما قام به أو يفكر فيه !
– ياخي والله نحنا محتاجين ليهو بشكل ! (وهو يحدث نفسه) – طيب ما ممكن تدونا منو كم عبوة كده ؟
– للأسف فإن الكمية الموجوده منه الآن قليله نسبة لأن المكونات والعناصر التى تدخل في تركيبته نادرة بعض الشئ لكنني أعدك بإرسال عدد من العبوات حالما نقوم بإنتاجه .
إنتهت زيارة المسؤول الأمازوني وعاد إلى بلاده وبعد أشهر قلائل وصلته برقية تفيد بإرسال (طرد) يحتوي عدد من بخاخ غاز الصدق عن طريق (الجو) أرسله له نظيره الناكوسي ، كاد المسؤول الأمازوني يطير من الفرح فأرسل مدير مكتبه إلى المطار لإحضار الطرد إلا أن الموظف المسؤول عن الطرود بحث عن الطرد (سما واطة) فلم يجده فإنتابته الحيرة وأخذ يردد :
– والله يا جماعة الطرد ده بالذات أن ختيتو في الحتة دي بأيديني ديل !
عاد مدير المكتب وأخبر المسؤول عن ضياع الطرد والذي هاج وماج متصلاً بكل الوحدات الأمنية طالباً منهم العثور على الطرد فالمسؤول يعلم تمام العلم بان وقوع هذا الطرد في أيدي أحدى الحركات أو الأحزاب المعارضة لحكومة (الأمازون) سوف تنتج عنه كارثة لا سيما لو تم إستخدامه لأحد المسؤولين الأمازونيين وهو يتحدث ويخطب في المواطنين في لقاء على الهواء .
لم يثمر البحث عن شئ .. يبدو أن جهة ما قامت بسرقة الطرد وتهريبه إلى خارج المطار .. قام المسؤول بعقد إجتماع ضم كل الوزراء وكبار المسؤولين بالدولة :
– شوفو يا جماعة لازم كل واحد فيكم يعمل حسابو ويزم الحيطة والحذر .. الغاز ده بخة واااحدة منو الزول طواااالي يفك آخرو ويقول الفي ضميرو .. مافي زول فيكم يشرب ليهو كباية شاي وللا فنجان قهوة بدون ما يكون متأكد من الزول العملو ! وأهو كلمتكم ..
في حشد جماهيري بمناسبة إفتتاح أحدي المنشآت التي تخص وزارته وبعد واجب الضيافة الذي قام به أهل المنطقة وقف سعادة الوزير مخاطباً الجماهير :
– شوفوا يا جماعة هسه الإنجازات الأنا عملتها دي .. في وزير تاني عملا؟ على بالطلاق ألاقي إسمي في التشكيلة الجديده الجايه دي مافي إلا أمشي أسجل إسمي مع ناس حركة الإصلاح والتغيير .. (الأمازونية طبعن) !!

كسرة :
يكون (بخوا) ليهو الغاز في (الكركدي) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

Advertisements

34 تعليق

    1. بالبركة يا جنوبى،،،، طيب ويييين انتا منها من زمان ؟؟!!

      1. هههههههه نبارك ليكم السمح ,
        هي يا عبيد اتاري زي السكرة توفيق من الله سااااااااااكت

    2. مبروكة البرنجيه يا جنوبي والظاهر عليك انت الأيام دي كوري جنوبي وانشالله دائماً

      1. مبروكة ياللخدر !!

      2. ههههه يا اللخدر لونو زرعي …
        انت ناس مثلث برمودا وين ؟ المندهش / ركس / كتلوني ولسه حي ,
        الغلبان ده يتفقدوهو عن منو يا ربي ؟

  1. واووووووووووواتك محتاجة لغاز الصدق المركز بالوريد مش بخ

    1. و يدوبو منو جرادل و براميل زى حقت المناسبات ديك,, و يسقو منو الجماعة كلهم ,, اكان تكفيهم بس ,, ما هم بقوا كتااار خلاس!!!

  2. هههه ديل بقوا ما محتاجين للبخاخ ذاتو , تأنيب الضمير ما حااااار , ما شايف كل يوم يظهر واحد ويتباكي , واحد في قناة فضائية وواحد في جريدة صحفية وواحد في مؤتمرات حزبية و .. و .. !!
    هو وكت إنشق ومرق من الفاسدين المغيرين تاني اصلاح منو وتغيير منو ؟ اجي يا اخواني هو نحنا الكنا معوجين !؟

    1. مكعوجين يا جنوبي يا خوي زي مفرمه الملوخيه ،بالمناسبه انت بتحب الملوخيه؟!

      1. ما بحبها لأنها بتهيج لي المصران ولأنو البشير بيمشي زي المفرمه حقتا !!

      2. جنوبي : انت مثلث برمودا دا موش البتعلمو فيهو الحريق ؟؟؟؟؟؟؟؟
        بمناسبة مكعوجين قالوا ( دبيب وقع في جردل مريسة , طلع منو ومشى عديييييييييل كدا !!!!!!)
        عالم دبايب !!!!!

      3. ياهو ذاااتو يا ركس !!
        قت ليك وجردل المريسة ده كان كشحناهو في قطر بيتلولو !؟ هههه
        انت دحين البروف ده امس مش جلانا في بليلة الاربحاء ؟ اربحاء وعقاب شهر يا ناس عليا جنس كدر ,,

  3. ثلاثة ورابعهم كلبهم
    بمناسبة الكلاب البوليسية دى قد تكون شاهدت ليلة امس عرض كلاب بوليسية فى مهرجان السياحة والتسوق ببورتسودان المهم انو فى كلب عض الاخر قوم طوالى ملازم اول شرطة ومعاهو اتنين جابو الكلب حوادث مستشفى بورسودان فى الاول غلطو جابو الجانى اقصد الكلب بعداك جاب المجنى عليه طبعا الكلب قال للدكتورة المناوبة تخيطو لينا جرح الكلب طبعا الدكتورة رفضت بحجة انو المستشفى بشرى قاليها وبهذا الاسلوب وامام الجميع( الكلب بتاعنا دة اهم من عيانينكماعاشتو فى الشهر 9 مليون ) احتد فى الكلام مع الدكتورات و مصر بضم الميم فقامت ضربت لمدير عام الوزارة فطلب الاخير اعطائه الهاتف ليحادثه فرفض استلام الهاتف قال هو لا بيعرف دكتور لا بيعرف مدير عام قالت ليهو طيب ودوه مستشفى الشرطة رفض ودخل العيان اقصد الكلب العملية الصغيرة ورقدوا فى كاوتش كادن ان يشتبكن معاهو بالايدى حتى اخرج الكلب ووضعه على كرسى انتظار وقام احد طلاب الطب باخذ صور فهمو بمصادرة موبايله ساوافيك بهذه الصور انشاء الله حالما اجد هذا الطالب فقالت احد الطبيبات بسخرية طلعوا اورنيك 8 كمان فى النهاية تدخل احد الكوادر المساعدة ويتبع لقوة نظامية باعطاء الكلب حقنة ديازبام حتى لا يتالم الكلب وقام بخياطته بعدد 3غرزة خيط ظنا منه انه حل المشكلة

  4. شمباتي وعبيد وناس نونا وباقي دكاترة القمردينة .. صعبان عليا أوي تعبكو الراح بلاش ..
    عقيد اركان حرب طبيب مزوّر .. يمارس الطب ويجري عمليات جراحية ويلبس لبس ضباط الجيش ومعين رسمي ومسجل في المجلس الطبي !!!
    اتزكرت نكتة الدكتور المشي للخطاط المسطول قال ليهو اعمل لي يافطة اكتب دكتور فلان اخصائي باطنة وقلب ومسالك بولية وجلدية و .. و … / جا تاني يوم يشيل اليافطه من الخطاط لقاهو كاتب دكتور فلان .. علي كل شئ قدير ..

    1. اخوي جنوبي عليك الله اسمع قصتي دي
      السنه الفاتت مشيت الرقم الوطني بمدينه كرري والضابط قال لي عندك ما يثبت انك طبيب
      قلت ليهو في جواز السفر انا طبيب
      قال لي ما بعترف بالمكتوب في جواز السفر
      وريتو بطاقتي في البلد الشغال قال لي لا لازم تجيب لي ما يثبت من المجلس الطبي،قلت ليهو يااخ ما بتعترف بي جواز السفر السوداني الصادر من الجوازات قال لي لا قلت ليهو وطيب كيف بتطلب من الدول الأخري تعترف بالجواز ده
      المهم في النهايه اداني الرقم الوطني والمهنه اعمال حره،السنه البعدها جبت ما يثبت وادوني شهاده الرقم الوطني طبيب اختصاصي ولكني لمن مشيت استلم البطاقه وجدت المهنه اعمال حره،اها دي يحلوها كيف واخوك طبيب من سنه 86 اها دي يحلوها كيف

      1. غايتو ياخوي بي قفاكم الطب في السودان بقي اعمال حره ! انت ما سمعت بالكمين دكتور البخلوا شغلهم في المستشفيات الحكومية ويمشوا للمستشفيات الخاصة وعياداتهم اثناء دوام الحكومة !
        انا ذااتي قبل سنتين مشيت المجمع الفي ابوكدوك اعمل الرقم الوطني دخلت من الباب واحد عبأ الاستمارة وشال مني قروش وواحد صور الجواز وجنسية الشاهد وشال قروش وختو لي ورقي في ملف وشالوا مني قروش في النهاية بعد خلصت كل شئ ادوني صور ورقي والرقم الوطني , هسي يا ربي كان اجهزتم دي حصل ليها حاجه تااااااني نعمل رقم وطني جديد ولاااااااااااا عندهم ارشيف !!

      2. ههههههههههههههههه,,والله احسن ليك الاعمال الحرة دى يا حبيب !!

      3. مرة فى المغتربين ايام البطاقة الضريبية ديك,, طلعوها لى بان مكان الميلاد الخرطوم و مكان الاقامة لبنان ,, جابوها من وين لحدى هسة ما عارف؟؟؟ و لمن جيت اصلحها و هى غلطتهم قالو لى لازم تدفع 25 دولار تانى ,, خليتها كدة لبنان لبنان ,, مع انى ما استخدمتها غير مرة واحدة !!!

    2. والله يا جنوبي اخوي ماني دكتورة، على قول أمي”يا ريييييت !)بس شكرًا على ظنك ،بتفكر انه الفكرة جاءتك من احدي ردودي على مأمون السجم حميدة ،كان مدير الجامعة فتره و إتلوم معانا. المهم، ماااا علينا . لكن بالمناسبة دي ممكن عاااادي أبقى دكتوراه، ما عندي مشكلة، في زول عنده إعتراض؟ وإلا حتبقى علي أنا بس!!!!

  5. أيا سلااااام عليك يا بروف
    أهو البخاخ جاب نتيجة ودي البداية ،،،،،
    قر نائب رئيس بنك السودان المركزي بدرالدين محمود بمسؤليته ومسؤولية الحكومة فيما وصل إليه الاقتصاد السوداني، وصعوبة معالجة أوضاعه الراهنة بدون مساعدات دولية، وقال إن صعوبة أوضاع الاقتصاد تستوجب ليس إقالتهم فقط بل إعطائهم إجازة مدى الحياة،
    غايتو انا لحدي هسع ما مصدق !! شمباتي اقرصني في ركبتي عشان أصدق !!!!!
    وبالجنبة التانية ،، جنوبي مبروكة البرنجية يا ود أمي أمااااانه أنا ما خرمان ليها !!!!
    ود بوتين بتغيب وتجي كده انت بتمش وين ؟؟؟
    مافي خبر من الغلبان ،، يا اخوانا حد يمش يشوفو !!

    1. كلامك صح
      كدي شوفوا بينا الغلبان دا وييييين،
      حسه زي الغلبان دا يسألوا عنو كيف وبس اوع يكون في تاروغا افتكر اسمها كدي وشفت في الجزيره الوثائقية حاجات وحاجات وحاجات في مدينه تاروغا افتكر اسمها كدي

    2. هييييي,,
      ركب شنو كمان انت !!؟

    3. اخونا المندهش سلامى و تحياتى ,, و الف شكر على السؤال ,, تسأل عنك العافية و الخير كله يارب قول امين – اخوك موجود و لكنها مشاغل الحياة و الجرى وراء المعايش ,, بس كل شوية لمن الواحد يلاقى ليو فرصة بيزوغ و يجى يتاوق برقراق الشباك و يبقى صادى تانى…
      و فعلا اخونا الغلبان مختفى شديد اليومين دى ,, و لعلها (شبكتهم) فى الزنتان ,, اوع تكون كتمت معاو هناك !!

  6. وكما ورد اليوم الرقم أدناه
    هل هو رقم مالي ام رقم موبايل ولا يمكن رقم العداد
    غايتو غلبني اقراهو ومتروك لأخوانا النوابغ بقراااته،

    في أموال بلغت (13.212.425) جنيهاً
    11-26-2013 02:33 PM

    الخرطوم: الأهرام اليوم
    يواجه مسئول كبير ونائبه بالخطوط الجوية السودانية اتهامات بخيانة الأمانة والتصرف في أموال بلغت (13212425) جنيهاً سودانياً من حسابات الشركة؛ وكشفت التحريات التي تقوم بها دائرة مكافحة الفساد بالمباحث والتحقيقات الجنائية أن الشركة قامت بمراجعة لماليتها وتوصلت لوجود تجاوزات مالية في حسابات الشركة وفقدان المبلغ المذكور بين المسئول ونائبه؛ وكشفت الشركة أن الأول مسئول عن فقدان(12619675) جنيهاً والباقي من نصيب نائبه؛ وقدمت الشركة المستندات التي تعتمد عليها في توجيه الاتهام للمتهمين تحت طائلة خيانة الأمانة.

    1. ههههههه قول ليهم البروف قال ليكم تجاوزات فيهو واو وااااحد تشوف , واوات كسرة ده كوووولو ما تشوف !!؟
      ده الحالة الرقم ده بالجديد لو كتبوهوا بالقديم الرقم ذاااتو كان قال لا حولااااااااااااااااااااااااااااا ..

  7. وووووووب علينا ,,, شوفوا المقطع ده في اليوتيوب عليكم الله ..

    1. يا جنوبي انت مالك في شاشه التلفزيون لابس عقال

      1. هههههه انا ما اللابس عقال , انا الدايرين يقطعوا ليهو اضانو مع انو انا ما مخالف كفيلي هو المخالف !!

  8. يعنى ما كفاية قطعوا ارزاقهم هناك,, عايزين كمان يقطعوا اذانهم و اياديهم … الافتراء كعب و الله و نهايتو سيئة جدا !!

    1. لاحظ انو ده كلام زول كان عضو مجلس شوري يعني ما مواطن عادي !!
      ابوي قبل كده لمته قلت ليهو ليه ما اخدت التابعية ؟ قال : يا ولدي الزمن داك السعودية بترجي الباخرة السودانية الجايبه ليهم العيش عشان ياكلوا !!؟
      هسي نحنا ما رجينا باخرتم زي ما كانوا بيرجوا باخرتنا وجينا نشتغل بعرق الجبين , لكن الشبع كعب !!

      1. هيومان رايتس
        وبرضو نقول مسلمين

  9. طرد شنو نحن راجينريالعالمين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: