غلتان يا المخزنجي

منذ أن تم التستر على (حرامية) خط هيثرو وتم تغطيس حجر (ملف القضية) على الرغم من مناشداتنا شبه اليومية التي عززتها توجيهات السيد رئيس الجمهورية التي قاربت على العام قد فقد العبدلله الأمل تماماً في إصلاح هذا النظام الذي أصبح الفساد فيه وإستباحة المال العام (حاجة عادية) رغم (الحلاقيم) التي (تتبرج) قائلة : (العارف ليهو فساد يجيب المستندات) !
لقد أصبحت مصداقية المسؤولين منعدمة تماماً .. وأصبحت المحاسبة وعقاب المخطئ من المستحيلات وقد كان قمين بأولي الأمر في هذه الظروف العصيبة وهذا الإقتصاد المتهالك وهذه المسغبة التي يعيشها المواطنون أن ينتبهوا إلى أن الأمور لم تعد كما كانت وأن الأغلبية الصامتة لم تعد تحتمل مشاهدة عمليات الإستهبال والإستسهال وإستباحة ما تبقي من أموال هذا الشعب الصابر الفقير ..
10 مليون دولار تقاوى (ضاربة) والمسؤول هو (المخزنجي) !! قال أيه عشان (خزنا) في مخازن فيها (حديد خردة) .. والله يا المخزنجي غلتان ثم غلتان إنتا ما لقيت ليكا مخازن ما فيها حديد خردة تخزنا فيها عشان موسم شتوى كاااامل يضيع على هذا الشعب الصابر الفضل؟
يعني أيه .. التقاوى جات سليمة .. والتخزين هو السبب ؟ طيب في ظل الفساد الحاصل ده و(الضرب) البدون رحمة ده مش ممكن التقاوى دى تكون جات (أساسن) فاسدة ومنتهية ومشترنها بأبخس الأثمان؟ ما خلاس مافيش مصداقية وأي مسؤول عاوز (يلغف) أي كمية من قروش الشعب المسكين ده الما عارف يلاقيها من وين وللا من وين؟ وعارف (عارف دي حلوة) ؟ ما ح يحصل ليهو التكتح .
تعال معي أيها القارئ الكريم لنشهد فاصلا من مشاهد العبث وأقرأ معي بتمعن :
كشفت وزارة الزراعة والري النقاب عن تقرير لجنة تقصى الحقائق بشأن تقاوى القمح بمشروع الجزيرة وقالت اللجنة في تقريرها الذي تلاه وكيل وزارة الزراعة محمد الحسن جبارة أن هناك تدنياً في نسبة الانبات نتيجة لظروف التخزين غير الملائمة .. إنتهي حديث السيد وكيل وزارة الزراعة لكن بالله عليكم الزول يقول شنو؟؟ التخزين ما تابع للوكيل ؟ الواحد يشرط هدومو ؟ يطقع بالحجار ؟
يا أهل الله .. يا الأمم المتحدة .. يا زكي جمعة بتاع عادل إمام . يا أى زووووول .. وكيل وزارة الزراعة بيقول إنو التقاوى فسدت عشان التخزين .. طيب إنتا شغال شنو؟؟ دى مش مسؤوليتك إنك تتأكد من سلامة إجراءآت الإستيراد هذه التقاوى ونقلها وترحيلها وتخزينها حسب الإجراءآت السليمة المتبعة وللا دي مسؤولية (المخزنجي)؟
يا جماعة الخير كيف بالله عليكم تدار هذه البلاد التي تحتاج لكل (دولار) بهذه الطريقة التي تهدر على شعبها البائس الفقير عشرة ملايين من الدولارات .. ولا محاسبة ولا يحزنون … مش الغلط كوووولو طلع من (المخزنجي) .. والله يا المخزنجي تتجازى !!

كسرة :
حساب الدنيا ده خلاااس قنعنا منو .. لكن (الله ده) بعدين بتمشو منو وين؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟

41 تعليق

  1. برنجيييييييييييييييييييييييييييييييييييييييييييييييييييييييييييييييية

    1. البرنجية زااااتا مندهشة !!!

      1. ود بوتن
        هيييييييي الدهشة من المتعافي وبتقيف ولا انا ولا البرنجية ما لينا دخل في الموضوع

    2. القدم بالقدم والبرنجيات خدم يا المندهش ,,

      1. ههههههههههههههه,,,
        مبروكة يا المندهش وانقرع يا جنوبى !!

  2. الغلطان انت يا بروف موش المخزنجي .. كدي اسألهم قول ليهم انتوا حتقابلوا الله يوم القيامة ؟؟ كلهم حيقولوا ليك انت بتحلم يازول ؟؟؟!!!

    1. لاكين موش مفروض اوووول يوريهم الله يعني شنو !؟

  3. مفروض اتحاد الملاك واتحاد المزارعين يعملوا فيها انهم وطنيين وناس طير ساااكت ويوكلوا محامي يرفع قضية علي الشركة التركية الانتجت التقاوي دي , اها تقوم الشركة التركية تقدم مستندات البيع والاتفاق التم بينهم وبين المستورد ( الوطني ) طبعا بين قوسين عشان مجازا , ووقتها بيظهر انو فعلا التقاوي دي فسدت بعد جات ولآ قبل تجي , وهل اشتروها تقاوي ولآ علف ولآ نفايات !
    هي ذااتا التقاوي دي مشترنها قبل الموسم ومخزننها لي شنو ؟ ما يشتروها وقت الموسم ومن المطار للدفار للحفار !!
    قالوا الاتراك قالوا للجهة المستوردة : ابوس ايدكم ده ما وكت زراعتكم وما تشتروا التقاوي دي من هسي عشان لما تزرعوها السنة الجاية وما تنبت ما تجيبوا لينا سمعه كعبه للتقاوي حقتنا . قالوا ليهم : انتو مالكم ومالنا نحنا دايرنها هسي دي !!
    نافه تافه عبد المتعافي .. إييييييه ولا زمان يا كورة …

    1. أول مرة تقول كلام صح يا جنوبي !!
      وبعد يوكلو القضية لمحامي ،، يكونو لجنة تنبثق منها لجنة ومن اللجنة المنبثقة تنبثق لجان منبثقة وبعدين يقومو يخزنوها ويكون المخزن فيهو خردة حديد وتقوم اللجان المنبثقة دي تصدي وتلحق خط هيثرو ،،
      أمممممممم فكرة برضو

      1. هههه … بعدها يكونوا لجنة تبصق في وزير الزراعة و الوكيل ومدير البنك الزراعي ……

    2. عجبتنى جداً يا جنوبى حكاية من المطار للدفار للحفار دى !! و يا أستاذ الفاتح موضوع خط هيثرو ده استحاله ملفه يتقفل ، إنت عايز تقطع على اللجنة المكلفة السبوبة التى أنعم الله بها عليهم ؟ ديل سافروا كم مرة لندن فى إطار عمل اللجنة والسفريات دى – غير إنها فسحة وكده – فيها نثرية ، عشان كده أنسى …

  4. الوزراء العاوز الريس يعفيهم من الحكومة زعلانيييييييين و سألو الريس ليه عاوز تتخلى عننا وتشيلنا من الحكومة ؟
    قال ليهم : أن التغيير سنة الحياة. !! قالو ليهو طيب ليه إنت ما بتتغير، قال ليهم : أنا فرض ولست سنة ،،،
    ويا المخزنجي كلو منك بي سببك السودان كله مهدد بالمجاعة ،،، يخسي عليك

    1. و الله لاكين ماااا بالغتا لينا عديييييييل كدى يا المخزنجى !!!

  5. لكن يا البروف العزيز ،، الحق يقال عندنا في البلد دي عبقريات لابد من تكريمهم والإعتراف بإفكارهم الجهنمية التي لم يسبقهم عليها أحد في العالمين زي الخطة العجيبة دي التي تم إكتشافها وتسجيلها رسميا كأحدث إقتراع في القرن فقد صرحت أ.سامية عثمان مديرة الصحة بمدينة شندي في تصريح صحفي لاحدي الصحف بأن لها خطة للقضاء علي آفة “الجنادب” التي تجتاح المدينة هذه الايام وتتمحور الخطة حسب مديرة الصحة بأن تُستدرج الجنادب بكامل المدينة الي استاد شندي بعد اضاءة الاستاد بالكامل وإطفاء اضواء باقي المدينة تماماً وعند تجمع “الجنادب” باستاد شندي يتم القضاء عليها ،،
    لكن الميزانية المرصودة للإبادة لم يكشف عنها لأنها ستكون غموتي !!

    1. هههههههههههه اريتا ما مرتي سامية دي !!
      بالله حكومة يجهجها ابو الجندب !!!1

    2. استاذة سامية دي شكلها من عشاق الافلام الامريكية، وبعد تلم الجندب كله في الاستاد، حتجي فرقة كوماندوز عن طريق الجو تبيد ابو الجندب كله، برافو عليك استاذة سامية، المفروض تشتغلي مع اللمبي في وزارة الدفاع

    3. عالم جهلة !!!!!!!!! دي اسمها نظرية الدفاع بالإستدراج ,,,, والحمرشة !!!!!!!

    4. إها و ديل حتستدرجم كيف انشاء الله، بي شعلة و لا مخبر سري؟ ولو طلع ابو جندب شفت كدة و قفش الف له و كلم جماعتو، ساميه حتعمل شنووووو؟ يا قول النكتة حقول الخطة فشلت.ههههه

  6. الغلطان انت يا بروف موش المخزنجي .. كدي اسألهم قول ليهم انتوا حتقابلوا الله يوم القيامة ؟؟!! حيقولوا ليك انت بتحلم يازول ؟؟؟!!!

  7. الطاهر التوم إستمع إلى إفادات وكيل وزارة الزراعة ومندوب البنك الزراعى وممثل المزارعين ورئيس لجنة تقصى الحقائ ولسه ما وصل للحقيقة الضائعة بين أطراف المربع الذهبى أعلاه ..بس الظاهر نسى يستمع لإفادة المخزنجى ..
    انا اقترح تطويل المسلسل دا بعمل حلقة خاصة بالمخزنجى .. يمكن يقدر يقول الحقيقة الغائبة .. وزى ما قالوا فى المثل يضع سره فى اضعف خلقه ..الله يجازيك يا المخزنجى

    1. فى حاجة مهمة جدا يا اخوان نسينا نسال منها،، و هى : الحديد الخردة اللى فى المخزن دا بتاع منو و بتاع ياتو جهة؟؟ مش ممكن يكون مدسوس علينا من جهة أجنبية تعمل على إفساد التقاوى و بالتالى الموسم الزراعى كاملا !!!!!
      يعنى الموضوع طلع من ايدينا !!!!

      1. جهة اجنبية زي الحكومة مثلا يعني …
        اليوم قناة الخرطوم حتجيب المتعافي في برنامج ( بمنتهي الصراحة ) الساعة 10.30 مساء بتوقيت السودان البي قدرة قادر بقي زي توقيت مكه !! طبعا من هسي جهزوا شعوركم انكم تشوفوا منتهي الوقاحة عشان هو مؤمن نفسه قانونيا وكده !!

  8. طبعا المخزنجي غلتان وستين غلتان كمان ليه ما يتأكد من صلاحيه وجوده التقاوي قبل ما يخزنها في مخزنو،،،،،القانون لا يحمي المخزنجيه الغلتانين
    غايتو مسكين يالمخزنجي الغلتان
    التقاوي،الأقطان ،الحج والعمره،هيثرو،الغسيل،التليت والريبيع وحاجات ما سمعنا بيها قبل كدا دي هدت الاقتصاد السوداني
    يا جماعه انتو كيف الأخلاق وهل تغيرت برضو ام لم تتغير

  9. الله يجازى البوظ علينا الموسم الزراعى وإنشاءالله تبوظ طهورتو.
    ديوان الافتاء مطلع فتوى بأن قطع الاشارة الحمراء حراااااااااام .
    الرئيس عمر البشير يعطى حكومة الجنوب منحة عبارة عن 22 الف جوال زرة تم شحنها من ميناء كوستى النهرى .
    رطل اللبن بى أربعه الف جنية .
    سعر الدولار بى 8.400 جنية .
    دة كلو من المخزنجى الله يخزنج يومو…..

  10. يابروف انت بتكسر بمئويه ولا حاجه تانيه شوف ليك أوحد تاج تكسر بيه

  11. المخزنجي يامن ادوهو المعاش ما اظن اكون لقى 1% من شيلة العرس اقصد التقاوي

  12. حبوب الضغط يا ولد

    1. البعاتي هاك الحبوب دي
      سعر الدولار على مدى 30 عاما
      نهاية ديسمبر 1983= جنيهان ونصف
      ” ” 1984 = 3 جنيهات ونصف
      ” ” 1985 = 4 جنيهات و80 قرشا
      ” ” 1986 = 4 جنيهات وتسعين قرشا
      يونيو من عام 1989 = 12 جنيها
      اليوم 30/11/2013 = 7900
      اي أن سعر اليوم يزيد على سعر عام 1983 بنسبة 65800%
      أها هسع حاسي بشنو ؟؟ ما أخير شوية ؟

      1. ياخوي هم زاتم لخبتو لينا القروش الحسبة دي ما فاهما

  13. هدوها من الفركة جابت الدلكه .. هدوها من الفرة باتت برة (المتعافن).

    1. ههههههههههههههههههههه,,قووويييييييييييية

  14. الخرطوم في 1-12-2013(سونا)
    حصرت لجنة التقصي حول التقاوي الفاسدة للقمح التي شكلتها اللجنة الزراعية بالبرلمان برئاسة د.حبيب مختوم في مؤتمرها الصحفي الذي عقدته بالبرلمان اليوم لاطلاع الاعلام على تقرير اللجنة ، حصرت التقصير في التقاوي الفاسدة للقمح بين وزارة الزراعة التي جلبت التقاوي والبنك الزراعي الذي قام بتخزينها، مبينة في تقريرها أن مهمتها الآن ليست تحديد المسئولية بل العمل على انقاذ الموسم الزراعي للقمح.
    وقال د. حبيب مختوم رئيس لجنة التقصي “إن المساحة التي كان مخططا زراعتها 300 الف فدان ولكننا تأكدنا بعد التقصي انها لا تكفي لـ 160 الف فدان، أي ان هناك عجزا بحوالي 140 الف فدان”، موضحا أن التقاوي وصلت من تركيا بعد نهاية نوفمبر 2012 بسبب تأخر البنك المركزي في السداد للوفد الذي سافر لتركيا منذ يوليو 2012 وقد تم استلام التقاوي في نهاية نوفمبر 2012 ثم تم الافراج عنها في الميناء في سبتمبر 2012 ووصلت المخازن في يوم 5 -12 2012 وتم التوجيه بتخزينها وفي مارس 2013 اتضح ان التقاوي اصابتها حشرة وقد تم ابتعاث لجنة فنية من وزارة الزراعة الى مدني وامرت اللجنة بغربلة هذه الكميات واعادة تعبئتها وتخزينها في مخازن مناسبة، وفي اكتوبر 2013تم توزيع التقاوي وفي نوفمبر بدأت العملية الزراعية وتمت زراعة 45,888 فدان منها 21 الف فدان زرعت بتقاوي إمام (التركية) وتم ريها وظهر عدم الإنبات فيها في 16,500 فدان وتم تشكيل لجنة في منتصف نوفمبر بعد تلقي الشكاوي بعدم الإنبات في الحواشات التي تفاوتت نسب الانبات فيها بين %10 الى 50 % ما عدا الافدنة التي لم تزرع بتقاوي امام. ((الحمد لله يا إخوانا المخزني طلع براءة، والله شلت همو!!!!!(((

  15. قصة التقاوي الضاربة دي ما بعيد يكون جابوها ضاربة ولبعوا ال 10 مليون دولار و عملوها في التخزين .. نظام قضاء و قدر و كده .. القضاء و القدر ده طبعاً تزكرة برائة طوالي للمسؤولين .. أنا ما بستبعد أي حاجة من الكيزان ديل ..
    ديل ياخي الواحد فيهم بقى يلبع قروش البلد في عز الظهر و على عينك ياتاجر و بكل قوة عين .. و الحقيقة هم زاتو الواحد فيهم بقى ما بحس أنه القروش دي قروش حرام .. بقت المسئلة عنده عادي زي شرب الموية

  16. المتعافي ما بيعافي ..

  17. يمهل ولايهمل إن غداً لناظرة قريب وسيعلم الذين ظلموا أي منقلب ينقلبون

  18. كلام يجيب المغص .. الجماعه ديل مفتحين عديل قال 10 مليون قااال ها والله تلقاها مافايتا 2 ولا 3 مليون (ماضاربه) يعملوها عشره
    والكومشنات والطواقي تتطاقش ..و المخزنجي والمزارعين يطاقشوا

    حسره عليك يابلد !

    1. البلد مالها ما حلوة .. انت ما سمعت اخر تقرير بقول بلدنا أفشل ثالث دولة في العالم ؟؟!! والله التقرير دا اذا صاح أنا بكون سعيد جداً .. لأنو دا في رأي مركز متقدم وكمان متقدم جداً جداً !!!

  19. عدنا والعود أجمد … كبف حالكم كلكم بدون فرز وحمد الله على السلامة يا نونا ويا جنوبي ليكم وحشه ..
    المتعافي الله لا يعافيهو دا (أبكبلو زااااتو) مش تمساحو قبل كده أكل مننا مشروع سوبا شرق ضمن جمعية المهندسين الزراعيين لمن كان والي الخرتوم وباعو للأمارتيين بمبالغ خرافية وقال يعوضونا قال !! ولي يومك دا لا حس ولا خبر أكتر من 7 سنة – ديل الله ينتقم منهم دنيا قبل الآخرة ويورينا فيهم يوم أسود مثل عاد وثمود قولوا آاااااااميييين …

  20. اميييييييين

  21. استغفر الله العظيم ,,,
    معليش ما بقدر اعلق حفاظا على دينى !!!

  22. كتمت وحيات ديني كتمت

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: