تكون الواطه أصبحت

لزمان طويل كان العبدلله يعتقد بأن التصريحات (الغريبة) من شاكلة (الدفاع بالنظر) وما شابهها تصريحات قاصرة على المسؤولين (الرجال) فقط إلى أن طالع العبدلله تصريحاً جعله في حالة من الإستغراش الحاد للأستاذة سامية عثمان مديرة الصحة والسكان بمحلية شندي (أوردته صحيفة حكايات مؤخراً) تحت عنوان ( استدراج الجنادب لمباراة فاصلة باستاد شندي) حيث أشارت فيه (الأستاذة) انهم بصدد دعوة المواطنين الي إطفاء المصابيح الكهربائية وتشغيل إنارة استاد شندي بغرض استدراج الجنادب وإبادتها !
تعالوا معي أيها القراء الأفاضل لنشهد ذلك اليوم (معركة ذات الجنادب) :
يعقد المسؤولون بمحلية شندي إجتماعاً لوضع اللمسات النهائية (للمعركة) والتي تشمل تحديد ساعة الصفر لقطع الإمداد الكهربائي عن (العدو) داخل المنازل والمرافق والشوارع وكل أنحاء المحلية ما عدا الإستاد الذي سوف يتم التأكد من صلاحية كل (لمباتو) وإكتمال الإنارة فيهو ، كما تشمل الإستعدادات وضع القوات القتالية التي تحمل قنابل (المبيدات) على خط (التماس) مع تشكيلات قتالية مزودة بأسلحة الرش الفتاكة على (دائرة السنتر) ولم ينس المسؤولون في ذلك الإجتماع تحضير عدد من عربات (النفايات) خارج الإستاد تمهيداً لحمل جثث القتلى والمصابين من بني (جندب) لدفنهم خارج المدينة .
مع غروب الشمس وفي تمام الساعة السابعة تماما تم البدء في تنفيذ الخطة فقطعت الكهرباء عن كل الأحياء والاسواق وأصبحت مدينة شندي تعيش في ظلام دامس وخطر يحدق بالجميع …. تعالت الأصوات في الشوارع والتجمعات والأسواق :
– يا جماعة الختف موبايلي منو؟
– أنا سامعة ليا حركة في الصالون
– شايف الزول الطالع في حيطة الجيران داااك
يبدو ان (ناس المحلية) وهم يخططون لمعركة ذات الجنادب لم يخططو لمعركة ذات الحرامية في ظل ذلك الظلام الدامس الذي شمل كل أصقاع المحلية .
كما أن الاستاذة لم تضع في إعتبارها هذا المشهد في إحدي المستشفيات :
– يا جماعة مريضكم ده ما بنقدر نعمل ليهو العمليه هسه .. إنتو ما عارفين دي ليلة ذات الجنادب؟
– يعني شنووو الزول قاعد ينزف وعاوز يموت
– يعني عاوزننا نموت نحنا؟
– كيف؟
– إنتو ما عارفين لو ولعنا غرفة العمليات دي الجنادب الفي المستشفى دى كوووولها ح تمشى تدخلا وتهاجمنا بدل ما تمشي الإستاد ؟
أضيئت أنوار الإستاد .. وكانت الخطة القتالية التي وضعها المسؤولون تقضي بأن تتجه أرتال العدو من أوكارها متجهة إلى أرض المعركة (الإستاد) إستناداً إلى الظاهرة العلمية التي تقضي بان الحشرات تتجه إلى بؤر الضوء وهذا ما حدث إذ بدأت أفواج الجنادب تتجه نحو الإستاد من أواسط المدينة وأحيائها البعيدة
بعد أن تأخر وصول العدو إلى أرض المعركة بدأت قوات (المحلية) تعيش في قلق :
– يا جماعة (الجنادب) دي تكون كشفت الخطة ؟
– لا لا ح يجوا بس الظاهر تعبانين وما قادرين يمشو
– أيوه يكونوا جعانين وحالتهم صعبه وبيتحركو يا الله يا الله
– ما لازم يكونوا تعبانين هو الشعب ذاااتو تعبان وجعان وحيلو مهدود لمن هم
مضت ساعات لم يتجمع فيها إلا عددا قليلا من الجنادب التي كانت موجودة أساساً بشقوق جدران الإستاد وتحت كراسي المشجعين حيث إتجهت نحو ضوء الكشافات حيث تمت إبادتهم بواسطة قوات المحلية المدججة بأسلحة الرش الفتاكة .. وبقي الجميع في إنتظار حشود الجنادب التي تتجه من أقصي المدينة والأحياء المجاورة نحو الإستاد المضاء غير أن الإنتظار قد طال بعد أن إنتصف الليل ..
وبعد أن بدأت خيوط ضوء الصباح تنعكس على جدران إستاد المعركة التي لم تتم إتضح أن الشئ الوحيد الذي لم يضع له المسؤولون حسابا هو أن سرعة الجندب لا تتعدي في أحسن الأحوال المتر في الدقيقة أي ان أقرب منزل من الإستاد يبعد ألف متر تحتاج فيه الجنادب لقضاء 16 ساعة حتي تصل إلى أرض المعركة .. وتكون حينها الواطة أصبحت وكده !!

كسرة :
أموت وأعرف الناس دي بتجيب الصنف ده من وين ؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟

Advertisements

27 تعليق

  1. بررررررضو برنجية ،،، تصدقوا !!!!!

    1. تعرفوا،، انا لما سمعت بموضوع الجنادب العايزين يستدرجوها للاستاد دى، كنت قايلا نكتة او تبلى على المسكينة دى سااااى،،، و لكن طلع فعلا ان الست هانم لا فض فوها فعلا مقدمة الاقتراح دة و ما بعيد تكون قامت به فعلا،،، و بكرة يجوا ناس الحكومة المركزية يعملوا ليها حفلة تكريم لما قدمته من اقتراحات كان لها كبير الأثر فى القضاء على الجنادب !!!!

    2. ماشة معاك عسل … مبروك مع قليل من المغصة ..,

      1. الله لا جاب مغصة يا جنوبى يا اخوى،،، وعد منى البرنجية الجاية ليك،،،، بس انتا خليك مصحصح و ما يجازفوها منك ناس العبيد و نونا …..

      2. هييي يا يمة نونا المسيكينة يوم واااااحد ما برنجية!! و ييين معاكم و ناس عبيد، عبيد دا يا يمة قالولك يوم إستغرشتوا قبل الا ما البروف ينزل المقال ذاتو! الإنجليز ما بلعبه يا اخوي، و من هذا المنطلق بنادي بي برنجياية وحييييده و لا إستغراشايه لشقائق النعمان

  2. Bringiبرنجية

  3. الناس ديل نسوا أنو أصل الجندب دا سوووووداني أول حاجة يعملها بعدما يقوم من النوم يرتااااح شوووووية وبعديين يتحرك نحو الأستاد !!! لكن جابو ليهو خبر ود عمة خالة أمو طهرو بت جيرانم عشان كدي مشا يبارك ليهم ويفطر معاهم بعدين يمشي الأستاد ..

    التااااني مش كدة يا فلاديمير ؟؟

  4. مساء الخير ياستاذ/ الفاتح
    الطاهر انو الصنف ده مصنوع في امريكا خصيصاً لحكومات الدول الافربقية المتخلفة ولكن الحكومة السودانية اشترت كل المنتج وتم تخزينه بطريقة ؟؟؟؟؟؟؟؟ كما تعلم وهذه هي النتيجة الله يكون في عون الشعب السوداني .

  5. معليش سقط سهواً كلمة الظاهر

  6. يا عادل عثمان انت علاقتك شنو بشيخ علي عثمان ؟! انت بتقول كلام عسل .. نحنا في أمريكا ما عندنا صناعات تقليد كدي شوفو الصين وتايوان ..

    1. عمنا امريكي افصل الشيخ من علي عثمان هو شيخهم براهم الله لاجمعنا بيهم دنيا وآخرة

      1. يابت السودان .. اعملي حسابك الشيوخ ديل يدهم لاحقة !!!

  7. مقهورين وساكتين | رد

    وجع هههههههههههههههه

  8. عادل امام في مسرحية الزعيم بيقول جملة جميلة: (ما هو انا ما اقعدش زي انبوبة البوتجاز)؟
    واهو نحلل الراتب وكده
    اقصد السيارة وكده
    اقصد البدلات وكده
    اقصد الاجازات المدفوعه وكده
    وكده
    .
    …. الخ
    واخيرا االجنادب دي في ناس كان لقوها بيقلوها وياكلوها من الدخلت فيهم بس عليهم الله ما يسمموها بمبيداتهم النافدة دي تقوم تسمم اهلنا الغلابة، “ولازم الموضوع ده اتناقش في البرلمان لأنه اولى من الاولويات الفي البرطمان – اقصد البرلمان “؟

  9. أنا والله شفت الخبر دا في جرية واقعة في الواطة ولمن قريته اتخيلتها جريدة كاريكاتير و ضحكت و رميتها تاني.

  10. والله فكرة برضو , اخير من قعاد ساكت
    وبالمرة يستعينوا بمشجعين حي العرب وناس الحصاحيصا عشان عندهم دراية بمثل هذه المعارك ..
    هي الجنادب دي جات من وين ؟

  11. شوفوا الخبر ده مجندب جنديبه غريبه خلاس
    وكما ورد

    12-04-2013 08:30 PM
    علمت مصادر (الراكوبة) بأن والي كسلا هرب من الولاية بمبلغ 13 مليار جنيه؛ وأشارت المصادر بأنه تم القبض عليه بتكتم شديد في أرتريا وتم ترحيله إلى الخرطوم.. ولم تتأكد بعد تفاصيل هذه العملية أو الجهة التي قبضت على الوالي أو مكان احتجازه.

    وأضاف مصدر مقرّب من حكومة كسلا أن الوالي مأزوم بقضية (آداب) شهيرة تتداولها المجالس بالإضافة إلى أن أجل ولايته سيحين قريباً بالإطاحة به.

    0 | 0 | 265

    1. امبارح فى اذاعتى BBC و مونت كارلو،،، جابوا تقرير من منظمة الشفافية و مكافحة الفساد العالمية (أظن اسمها كدة) بان السودان و الصومال و العراق و سوريا من اول (عشرة) دول فى (العالم) فى تفشى الفساد فى النظام الحكومى و العام ،،،
      لا تتصورا مدى فرحتى بهذا الخبر،،، أخيرا السودان طلع من ضمن العشرة الأوائل على مستوى العالم فى حاجة كدة … يا سلاااام ،،، افرحوا و احتفلوا !!!!

  12. فكره هائله من احد سيدات النظام …..ليتني اعرف من اين ياتون بهذه الافكار النيره…..ولع النور

  13. لا حو ل ولا قوة الا بالله لا نملك الا ان نقول مبروك لها الشعب لوجود مثل هذه القيادات المدركة و والواعية واعتقد ان قدراتهم وامكانياتهم اكبر من السودان وأهله …. شكرا لحكومة الانقاذ على حسن اختيارها لهذه الكفاءات النيرة والفريدة في عصرها ..
    بعدين هم ابادوا البشر يعني فكركم حاتغلبهم الجنادب !!!!! تفو عليهم

  14. كتمت كتمت كتمت وتحياتي للجميع

    1. أووووو حبيبنا الغلبان
      حمدا لله بسلامتك يازول
      نسأل منك الليل ونجمو ،، معليش طافيين النور عشان الجنادب وكده
      لكن جيتك فرحتنا ومنوووور زي استاد شندي

    2. يا سلام ويييينك يا الغلبان والله العظيم فرقتا معانا شديد وليه يعني الغيبه الطويلة دي ياخ شفقتنا شديد وخا ساتان انت هناك بس اوع من تاورغا والبد بعيد وكتر من الزوميييطه وافتكر اسمها كدا يعني زي البرنجي بتاعنا وقالوا في حاجه اسمها بورويطه برضو ابعد منها بعيد وهي قالوا زي الركشه عندنا،يا زول انا سعيد جداً يالغلبان بالحضور وتقبل تقديري واحترامي

    3. حبيبنا الغالى المختفى ،،، و الله ليك وحشة ،،، و الظاهر عليها كتمتها كانت شديدة جدا معاك ،،، و ما ظهرت الا مع التشكيل الوزارى الجديد ،،، ان شاء الله تلاقى ليك فيها كرسى و الا حتى بمبر !!!

    4. طولت ماكتمت

  15. المسؤولة متأثرة بأفلام الكرتون، وخصوصاً “سبونج بوب”

  16. تلمها سامية وياطاها الاستاد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: