أفعال رباعية عامية

• جرجر : الجرجرة مصطلح حديث يستخدم بخاصة في المصالح الحكومية حيث يتم جرجرة المواطن .. صور لينا الورق ده .. خت لينا دمغة هنا .. تعال بكرة وهكذا دواليك .
• سلبط : السلبطة هي أن تدعي إمتلاك شيئاً لا يخصك أو إمتهان مهنة لا تجيدها كذلك الذي تخرج من كلية المساحة ويعمل صيدلياً !
• كركر : (بفتح الكاف وتسكين الراء) .. تستخدم للتعبير عن الضحك الشديد المصحوب باصوات مكركرة كما أن (كركر) موقف مواصلات صاحبت (العطاء بتاعو) كثير من الأقاويل والشائعات التي تتهم البعض بالبلع واللغف .
• سمسر : السمسرة المهنة الوحيدة التي لا تتطلب منك رأس مال .. جلابية بيضاء مكوية وكم (على بالطلاق)
• صرصر: بمعني (كرفس) وهي تستخدم (للوجه) دون سائر الأعضاء كقولك (فلان مما شافني صرصر ليا وشو) .. طبعن ما عاوز منك قروش وبتماطلو
• قرطع : القرطعة هي شرب الماء والسوائل عامة بنهم ودون توقف (بدون ما الزول ياخد ليهو نفس)
• برطع :البرطعة هى الجرى فى الفضاء بلا قيود أو موانع .. يقولون ان فلاناً بعد أن أمسك بزمام المسئولية فى المصلحة أصبح يبرطع فيها ساااى أى اخذ يفعل ما بدا له بصورة (حرة) دون قيود أو موانع (مفيش حد بيسألو)
• شكشك : الشكشكة كلمة بائدة في مقام كلمة الحنكشة اليوم (بس زيادة عنها حبتين)
• جهجه: جهجه الشئ اى (أفقده البوصلة) وخلاهو ما عارف الإتجاهات مما جعله يفقد السيطرة على الأشياء.. كقول أحدهم: يا جماعة ما تجهجهونا في وجوه جديدة في التشكيل الوزاري ده وللا ياهم نفس الوجوه الليها ربع قرن دي .
• فنجط: الفنجطة هى حالة تصيب (الحمير) وهو نوع الجرى بصورة غير منتظمة وغير متناسقة وغير مدروسة (إذا أردت أن تشاهده فتفرج على أحدى مباريات القمة)
• صنقع: صنقع الرجل أى رفع رأسه فوق (زى العاوزين يكبو ليهو قطرة فى عيونو)
• دنقر: عكس (صنقع) ودنقر الشخص رأسه أى خفضه (زى القاعدين يحلقو ليهو) ودنقير الرأس نحو الأرض دليل على الخجل والإنكسار.. كان (حرامي الحي) في زمان مضي (يدنقر) راسو لما يقابلك هسه الحرامية الواحد يعاين ليك جوووه عيونك !
• فرتق: فرتق الشئ أى جزأه وقسمه بعد إجتماع كقولك تفرتقت الأحزاب المعارضة إلى أجنحة .. (هى بدون أجنحة ما عاملا حاجه) أو كقولهم (فلان) فرتق الحفلة أى إفتعل شجاراً فقام الفنان شال عدتو ومشى!
• سردب: السردبة (بضم السين وتشديد الباء) يقال انها فى العامية هى أعلى الظهر وسردب الشخص اى وقف منحنياً دون حراك علامة عدم تفاعله وإكتراثه للأمر .. كقولهم (والله الحياة بقت صعبه لكن مسردبين ليها)
• هضرب: الهضربة هى الهذيان والكلام (الخارم بارم) الذى يتفوه به الشخص عندما تتملكه الحمى ويمكن للشخص أن يهضرب (بدون حمى) إذا ما واجه موقفاً صعباً كتلك الزوجه التى سمعت أن زوجها قد قام بتطليقها فقالت : عادى ما مشكلة بس خلوهو يطهر ليا البيت ويضرب ليا الأولاد جير!
• مزمز: المزمزة هى تناول الطعام فى لذة وتأنى خاصة (المشويات) والمحمرات والمتبلات والمقمرات وكده ! معقولة الزول يمزمز بى بوش؟
• زرقن: الزرقينة هى أداة تستخدم فى ورش الحدادة والنجارة لكبس القطع وضغطها ويقولون ان فلاناً قد زرقنوهو فى التحقيق زرقنة شديدة (أكيد ما عندو ضهر)
• طربق: الطربقة هى الكلام الكتير دون فائدة ، يقولون فلان طرباق أى (رادى وإتفتح) والطربقة من الممكن أن تصاحبها (هضربة) كتصريحات بغض المسؤولين التي تدعو إلى (الإستغراش)
• سلفق: السلفقة هى الحصول على المبتغى دون إستحقاق .. كقولهم والله الزول ده وصل نايب مدير سلفقة ساااكت (ما سلفقة كيف إذا هو كان عامل بوفيه)
• عصلج: يقولون (الصامولة) عصلجت بمعنى أنها أبت أن تنفك من (المسمار) ووقفت فى حتة واااحدة .. وفلان راسو (معصلج) أى لا يقبل التفاهم.. والموضوع معصلج أى واقف فى محلو (ذي ملف خط هيثرو ده)
• خرخر: الشخص (الخرخار) هو ذلك الشخص الذى لا يتقبل الهزيمة أثناء اللعب ويغالط فى مجريات اللعب والنتيجة ولا يمتثل لقانون اللعبة وربما قام ببعض المخالفات حتى يكون الفوز من نصيبو .. (حد جاب سيرة إنتخابات؟)
• حندك: يقولون ان فلاناً قد حندك فلاناً إذ أخذ الأول فى التلذذ بشئ أمام مرأى ومشهد الأخير دون أن يكون للأخير مقدرة التلذذ بذلك الشئ .. وشعب (محندك) إذ كان معظمه يرى القلة(تمزمز) وهو قاعد يعاين.
• بشتن : بشتن الشئ أى زاده قبحاً والشخص المبشتن هو ذلك الشخص الذى يرتدى ثياباً قبيحة بالية غير متسقة والشوارع المبشتنة (زى شوارعنا دى)
• حمبك: (أنظر خرخر)..
• عنقد: العنقدة هى أن يحول شخص أو شئ دون إكمال موضوع ما كقول أحدهم: والله كنت جاييك لكن بس ناس المرور عنقدو ليا … (عربيتو ما مرخصة)!
• طمبج: طمبج الشئ أى (زادو مويه) أكتر مما يجب ، وشوارع وساحات (مطمبجة) بالمياه يعنى (مليانة موية) .. ما الخريف (زى ما بنقول طوااالى : جا شنو؟ …. فجأتن!!

• كسرة:
• كنكش : كنكش فى الشئ اى قبض فيهو قبضه (الجن ما يفكها منو) ككنكشة بعض المسئولين فى مناصبهم رغم التعديلات الوزارية (يا جماعة مش بتبالغو؟)

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟

30 تعليق

    1. مبروك … ( انظر كنكش )

      1. شكرًا أخي جنوبي .. Made in USA …

  1. مهداه الي نونا والغلبان مستغرشا

    1. هدية مقبولة يالعبيد، علا بكرة بجي الخريف و اللواتي بتقيف. لما عمو بكري يبقى الرئيس و يظبط لينا النت بنردها ليكم.

      1. حيظبطكم بالشاشمندي يا نونا خليكم مستعدين …

      2. قالوا مشي يعزي يا امريكي , الحمد لله ديك ما بيكفنوا الميت زينا ! كان قال ليهم دي لفيتوها كيف ؟

  2. فرطق: وهي تعني من يأخذ مال احد من غير وجه حق،
    يعني كلنا اتفرطقنا وكده وللمعلوميه

  3. الظاهر عليها الليلة شاشمندي يابروف !!!

    1. لاكين واله كلمات كتيرة كنا نسيناها مع الغربة دي بس الليلة البروف رجعا لينا ..
      هسي جنس حليفة زولنا الامس دي وكل مرة يكرر والله العظيم علي عثمان قدم استقالته براااهو والله العظيم البقول نحنا اختلفنا كضاب وديل اعداء الدين ! انتو النبي والصحابة اصلكم ؟
      هسي دي تقع تحت ياتو فعل ؟ شكشك , خرخر , هنجك , طربق ولآ هضرب

      1. ممكن تقول دنقر يا جنوبي .. زي القذافي وكده !!!

      2. احم احم

  4. ود الحكووووووومة | رد

    يستنكح – إستنكح – إستنكاحاً : أي أكل الناس عينك عينك باللسان (حنّك) أو بالغش و(الفهلوة)

  5. الجررررجرة : مشيت (البينية) لي ناس الحركة عشان أجدد رخصة السواقة (جرجروني ليك جنس جرررررجرة) !! 1- قالوا لي الرخصة دي طالعة من الأقاليم لازم تجيب منهم خطاب يفيد بصحة الرخصة. سافرت وجبت الرد بعد 3 يوم وكلفني حوالي 600 جنيه من رسوم ودمغات وتذكرة الباص …ألخ 2- قالوا لازم تمتحن شارع وإشارات ( الزول البمتحنا ما موجود) قالوا بت خالة أم حبوبتو طهروا بنات جيرانم وهو مشى يبارك ليهم !! 3- بتاع الأشارات موجود في مكتبو لكن قال لازم الشارع في الأول !! 4- تاني يوم لقيت بتاع الشارع وأمتحني ومشا الحال.. 5- رحت لي بتاع الإشارات قالو طلع الفطوووور !! إستنيت للساعة 12 جا لكن قال تعال بعد الصلاة (وهو ولا بصلي ولا حاجة بس لزوم الجرجرة) !! 6- بعد الصلاة سألني كم سؤال وعندهم ورقة مطبوعة جاوبت عليها صااح .. 7- بعدها توقيع المدير والحق لله راجل ود ناس موجود في مكتبو ومضى الورق 8- بعدها التصوير لكن البصور مااافي !! تعال بكرة !!
    9- جيت الساعة 9 صباحاً برضو ما موجود إستنيت لحدي ما جا 10- بعدها إدخال البيانات – الموظف ما موجود !! خلااااس (حرنتا) (وحردتا) (وعصلجتا) و(تكرنتا) قلت إنعل أبو الرخصة لأبو العربيات لأبو السواقة زاااتا !!! وطلعت الورق من الظرف داير أشرطو وفجاءة واحد ختفو مني إتلفتا لقيتا (شرطية) بت ناس قالت لي ما لك داير تشرط ورقك ؟؟ قلت ليها بطلت ما داير رخصة ولا زفت أنا 5 يوم يجرجرو فيني عشان حتة رخصة ما دايرا – الحق لله بت حلال قالت لي إتفضل أدخل وتعال أقعد جنبي وأدتني موية شربت ومافي 10 دقائق إلا والرخصة في إيدي (كتر خيرها وجزاها الله خير ربي يسعدها دنيا وآخرة) لو ما هي كان شرطت الورق ورميتو ومشيت – شفتوا جنس الجرجرة دي قبل كدة ؟؟؟؟ وعلى هذا المنوال يتم التعامل مع الناس في كل الدوائر والمؤسسات الحكومية وعلى السودان السلاااام ..

    1. ما دي زاتها الماده 85

    2. قالت ليك تعال اقعد جنبي ولا في مكتبي ؟ عشان نفهم يعني !!
      انا يا نانو كل اجازة بمشي بكون سايق عربية لوحة اجنبية وكل بتاع مرور يوقفني يقول لي رخصتك دي ما سودانية !! وطبعا تبدأ الشمطة واقعد اتفصح فيهو اقول ليهو القانون بيسمح لي اسوق برخصة اجنبية لمدة 3 شهور ( وحات الله لا بعرف قانون ولا حاجة ) يقوم يقول لي وينو جوازك ؟ الغريبة يوم وااحد ما قالوا لي عربيتك دي ما سودانية ! يا ربي يكونوا ما شايفين اللوحات ؟
      اها نرجع لي موضوعنا , اوع تكون بعد قعدتك جمبها وادتك الموية وسلمتك الرخصة في 10 دقايق برضو قلت ليها كتر خيرك وربي يسعدك دنيا واخره ؟ اتلومت لاكين .. ( انظر حندك ) ..

      1. والله أنا يا جنوبي في إجازة من اجازاتي كنت سائق العربية قام بتاع الحركة وقفني ، ظنيتو كان داير حق الفطور ، قام سألني من الرخصة ، قمت طوالي اديتو الرخصة الأمريكية سألني قال لي دي شنو ؟ قلت ليه دي رخصة ، شالها أداها للضابط ، الضابط قال ليهو يا عسكري دل اداك رخصة أمريكية اكتر من كده تاني داير شنو ؟ رجعها ليه خليه يمشي طوالي مشيت يا جنوبي ..

      2. والله لقيتني برااااي القااااعده في البلد دي و أتفااااصح. تاااريكمممم و انا اقوووول دي ماااا فصاحة ناس هنا. من الليلة لساني ( كيبوردي) دا تممممممم على ، ما بفتحوا. ر

    3. فى جرجراية نسيتها يا أخوى ‘ مكتب الضريبة !! على ما تخلص الجرجرات الأولى تلقى مكتب الضريبة قفل ! تجى الصباح بدرى هم ما يجوا إلا الساعة التاسعة والنصف، ولو عجبك !! وإجراءات إدخال البيانات لا تتم بدون سداد الضريبة ، وهى أكتر من 200 جنيه.

      1. الدقش .. بتعرفوهو ؟؟ أبو العفين قال داير عفو من أي زول دقشو !! غايتو أنا ما بعفي ومحضر لي عودين واحد شاف والتاني طلح !! بس عايز فتوي من شيخ النسوان بتاع البرلمان ، هل يجوز للرجل استخدام الشاف والطلح ؟؟ أنا كلما أشوف أبو العفين دا بالرغم من ان وجهه قبيح لكنني أراه كالمخنث ..

      2. اخخخخخخخخخخ يا امريكي ياخ , الطلح ده مافيهو سرايح ياخ ,,
        كان لي بتاع البرلمان داك لو قلت ليهو قرد متدخن بالطلح يقول ليك جايز , عفن داك

  6. ود الحكووووووومة | رد

    الأخ نانو أبو أحمد
    مع إحترامي ليك إنت غلطان ، كان تعمل واحد من اثنين :
    1- تبدأ تطلع رُخصة جديدة [كان أسهل شوية]
    2- تسوق ساي بدون رُخصة [زيي رُخصتي منتهية من 2005 وكل ما أنزل السودان “أسردب” وأسوق
    شُفت التنظير دا (نظر – يُنظر – تنظيراً فهو المُنظراتي)

  7. نفير القدال. .مرباع اليوم
    ————؛
    شن المعنى جيب غندور وشيلة نافع
    وتغيير الملاية الفوق لحاف الشافع
    لعبة صفرجت يخفض براهو الرافع
    وقلب المرتبات بعد البلل مو نافع
    ————؛
    امبده – الساعة خمسة وعشرين

    1. الحكاية كلها (حلوة الحكاية) استراحة محارب عشان يجهزو ا للانتخابات الجاية انا كنت قايلة التعديل الوزاري بيقلص عدد الوزارات بالوزارء لكن طلع لعبة السيجة

  8. عندنا في السودان جرجرة مقننة وكمان اصبحت ثقافة في الخدمة المدنية ومن اهم مهارات الموظفين في السودان الجرجرة

  9. هسي وزير المالية الجديد ده اول امبارح مش قال نحنا فاشلين ومفروض مش بس تقيلونا مفروض تدونا اجازة مفتوحه ؟ سمح امبارح حالف القسم في شنو ؟ يلا زيك وزي القبلك يمين اسم محمود ده ما تلقاه الا في ابوك .

    1. يا جنوبي ديل بحلفوا عااادي بالزبادي زي الماحاصل حاجة ..

  10. مسطول سألوهو : رأيك شنو في التغيير الوزاري الجديد ودخ دماء شابة ؟
    قال : تغييير شنوووو !؟ مش ناسهم الزي ناس نجوم الغد ! ديل حيجوا يغنوا غناء الحقيبة ذااااتو , وعمر البشير قاعد ليهم زي السر قدور …

  11. فرتق : وهي سرقة المال العام والجري بها
    همبت : وهي فرض رسوم بدون دراية الدولة وتحوليها للصالح الخاص رغم انف المواطنين
    سفسف : وهي اكل كل الجبايات التي تقوم بها مصلحة او وزارة من قبل وزير كيزاني
    لهط : وهي جزءمن العام وتجتنيبه لمصالح خاصكل المال العام

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: